| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃၆. သမသီသဋ္ဌဉာဏနိဒ္ဒေသော
36. Samasīsaṭṭhañāṇaniddeso
၈၇. ကထံ သဗ္ဗဓမ္မာနံ သမ္မာ သမုစ္ဆေဒေ နိရောဓေ စ အနုပဋ္ဌာနတာ ပညာ သမသီသဋ္ဌေ ဉာဏံ? သဗ္ဗဓမ္မာနန္တိ – ပဉ္စက္ခန္ဓာ, ဒ္ဝာဒသာယတနာနိ, အဋ္ဌာရသ ဓာတုယော , ကုသလာ ဓမ္မာ, အကုသလာ ဓမ္မာ, အဗ္ယာကတာ ဓမ္မာ, ကာမာဝစရာ ဓမ္မာ, ရူပာဝစရာ ဓမ္မာ, အရူပာဝစရာ ဓမ္မာ, အပရိယာပန္နာ ဓမ္မာ။ သမ္မာ သမုစ္ဆေဒေတိ နေက္ခမ္မေန ကာမစ္ဆန္ဒံ သမ္မာ သမုစ္ဆိန္ဒတိ။ အဗ္ယာပာဒေန ဗ္ယာပာဒံ သမ္မာ သမုစ္ဆိန္ဒတိ။ အာလောကသညာယ ထိနမိဒ္ဓံ သမ္မာ သမုစ္ဆိန္ဒတိ။ အဝိက္ခေပေန ဥဒ္ဓစ္စံ သမ္မာ သမုစ္ဆိန္ဒတိ။ ဓမ္မဝဝတ္ထာနေန ဝိစိကိစ္ဆံ သမ္မာ သမုစ္ဆိန္ဒတိ။ ဉာဏေန အဝိဇ္ဇံ သမ္မာ သမုစ္ဆိန္ဒတိ။ ပာမောဇ္ဇေန အရတိံ သမ္မာ သမုစ္ဆိန္ဒတိ။ ပဌမေန ဈာနေန နီဝရဏေ သမ္မာ သမုစ္ဆိန္ဒတိ။ပေ.။ အရဟတ္တမဂ္ဂေန သဗ္ဗကိလေသေ သမ္မာ သမုစ္ဆိန္ဒတိ။
87. Kathaṃ sabbadhammānaṃ sammā samucchede nirodhe ca anupaṭṭhānatā paññā samasīsaṭṭhe ñāṇaṃ? Sabbadhammānanti – pañcakkhandhā, dvādasāyatanāni, aṭṭhārasa dhātuyo , kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā. Sammā samucchedeti nekkhammena kāmacchandaṃ sammā samucchindati. Abyāpādena byāpādaṃ sammā samucchindati. Ālokasaññāya thinamiddhaṃ sammā samucchindati. Avikkhepena uddhaccaṃ sammā samucchindati. Dhammavavatthānena vicikicchaṃ sammā samucchindati. Ñāṇena avijjaṃ sammā samucchindati. Pāmojjena aratiṃ sammā samucchindati. Paṭhamena jhānena nīvaraṇe sammā samucchindati…pe… arahattamaggena sabbakilese sammā samucchindati.
နိရောဓေတိ နေက္ခမ္မေန ကာမစ္ဆန္ဒံ နိရောဓေတိ။ အဗ္ယာပာဒေန ဗ္ယာပာဒံ နိရောဓေတိ။ အာလောကသညာယ ထိနမိဒ္ဓံ နိရောဓေတိ။ အဝိက္ခေပေန ဥဒ္ဓစ္စံ နိရောဓေတိ။ ဓမ္မဝဝတ္ထာနေန ဝိစိကိစ္ဆံ နိရောဓေတိ။ ဉာဏေန အဝိဇ္ဇံ နိရောဓေတိ။ ပာမောဇ္ဇေန အရတိံ နိရောဓေတိ။ ပဌမေန ဈာနေန နီဝရဏေ နိရောဓေတိ။ပေ.။ အရဟတ္တမဂ္ဂေန သဗ္ဗကိလေသေ နိရောဓေတိ။
Nirodheti nekkhammena kāmacchandaṃ nirodheti. Abyāpādena byāpādaṃ nirodheti. Ālokasaññāya thinamiddhaṃ nirodheti. Avikkhepena uddhaccaṃ nirodheti. Dhammavavatthānena vicikicchaṃ nirodheti. Ñāṇena avijjaṃ nirodheti. Pāmojjena aratiṃ nirodheti. Paṭhamena jhānena nīvaraṇe nirodheti…pe… arahattamaggena sabbakilese nirodheti.
အနုပဋ္ဌာနတာတိ နေက္ခမ္မံ ပဋိလဒ္ဓသ္သ ကာမစ္ဆန္ဒော န ဥပဋ္ဌာတိ။ အဗ္ယာပာဒံ ပဋိလဒ္ဓသ္သ ဗ္ယာပာဒော န ဥပဋ္ဌာတိ။ အာလောကသညံ ပဋိလဒ္ဓသ္သ ထိနမိဒ္ဓံ န ဥပဋ္ဌာတိ။ အဝိက္ခေပံ ပဋိလဒ္ဓသ္သ ဥဒ္ဓစ္စံ န ဥပဋ္ဌာတိ။ ဓမ္မဝဝတ္ထာနံ ပဋိလဒ္ဓသ္သ ဝိစိကိစ္ဆာ န ဥပဋ္ဌာတိ။ ဉာဏံ ပဋိလဒ္ဓသ္သ အဝိဇ္ဇာ န ဥပဋ္ဌာတိ။ ပာမောဇ္ဇံ ပဋိလဒ္ဓသ္သ အရတိ န ဥပဋ္ဌာတိ။ ပဌမံ ဈာနံ ပဋိလဒ္ဓသ္သ နီဝရဏာ န ဥပဋ္ဌဟန္တိ။ပေ.။ အရဟတ္တမဂ္ဂံ ပဋိလဒ္ဓသ္သ သဗ္ဗကိလေသာ န ဥပဋ္ဌဟန္တိ။
Anupaṭṭhānatāti nekkhammaṃ paṭiladdhassa kāmacchando na upaṭṭhāti. Abyāpādaṃ paṭiladdhassa byāpādo na upaṭṭhāti. Ālokasaññaṃ paṭiladdhassa thinamiddhaṃ na upaṭṭhāti. Avikkhepaṃ paṭiladdhassa uddhaccaṃ na upaṭṭhāti. Dhammavavatthānaṃ paṭiladdhassa vicikicchā na upaṭṭhāti. Ñāṇaṃ paṭiladdhassa avijjā na upaṭṭhāti. Pāmojjaṃ paṭiladdhassa arati na upaṭṭhāti. Paṭhamaṃ jhānaṃ paṭiladdhassa nīvaraṇā na upaṭṭhahanti…pe… arahattamaggaṃ paṭiladdhassa sabbakilesā na upaṭṭhahanti.
သမန္တိ ကာမစ္ဆန္ဒသ္သ ပဟီနတ္တာ နေက္ခမ္မံ သမံ။ ဗ္ယာပာဒသ္သ ပဟီနတ္တာ အဗ္ယာပာဒော သမံ။ ထိနမိဒ္ဓသ္သ ပဟီနတ္တာ အာလောကသညာ သမံ။ ဥဒ္ဓစ္စသ္သ ပဟီနတ္တာ အဝိက္ခေပော သမံ။ ဝိစိကိစ္ဆာယ ပဟီနတ္တာ ဓမ္မဝဝတ္ထာနံ သမံ။ အဝိဇ္ဇာယ ပဟီနတ္တာ ဉာဏံ သမံ။ အရတိယာ ပဟီနတ္တာ ပာမောဇ္ဇံ သမံ။ နီဝရဏာနံ ပဟီနတ္တာ ပဌမံ ဈာနံ သမံ။ပေ.။ သဗ္ဗကိလေသာနံ ပဟီနတ္တာ အရဟတ္တမဂ္ဂော သမံ။
Samanti kāmacchandassa pahīnattā nekkhammaṃ samaṃ. Byāpādassa pahīnattā abyāpādo samaṃ. Thinamiddhassa pahīnattā ālokasaññā samaṃ. Uddhaccassa pahīnattā avikkhepo samaṃ. Vicikicchāya pahīnattā dhammavavatthānaṃ samaṃ. Avijjāya pahīnattā ñāṇaṃ samaṃ. Aratiyā pahīnattā pāmojjaṃ samaṃ. Nīvaraṇānaṃ pahīnattā paṭhamaṃ jhānaṃ samaṃ…pe… sabbakilesānaṃ pahīnattā arahattamaggo samaṃ.
သီသန္တိ တေရသ သီသာနိ – ပလိဗောဓသီသဉ္စ တဏ္ဟာ, ဝိနိဗန္ဓနသီသဉ္စ မာနော, ပရာမာသသီသဉ္စ ဒိဋ္ဌိ, ဝိက္ခေပသီသဉ္စ ဥဒ္ဓစ္စံ, သံကိလေသသီသဉ္စ အဝိဇ္ဇာ, အဓိမောက္ခသီသဉ္စ သဒ္ဓာ, ပဂ္ဂဟသီသဉ္စ ဝီရိယံ, ဥပဋ္ဌာနသီသဉ္စ သတိ, အဝိက္ခေပသီသဉ္စ သမာဓိ, ဒသ္သနသီသဉ္စ ပညာ, ပဝတ္တသီသဉ္စ ဇီဝိတိန္ဒ္ရိယံ, ဂောစရသီသဉ္စ ဝိမောက္ခော, သင္ခာရသီသဉ္စ နိရောဓော။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘သဗ္ဗဓမ္မာနံ သမ္မာ သမုစ္ဆေဒေ နိရောဓေ စ အနုပဋ္ဌာနတာ ပညာ သမသီသဋ္ဌေ ဉာဏံ’’။
Sīsanti terasa sīsāni – palibodhasīsañca taṇhā, vinibandhanasīsañca māno, parāmāsasīsañca diṭṭhi, vikkhepasīsañca uddhaccaṃ, saṃkilesasīsañca avijjā, adhimokkhasīsañca saddhā, paggahasīsañca vīriyaṃ, upaṭṭhānasīsañca sati, avikkhepasīsañca samādhi, dassanasīsañca paññā, pavattasīsañca jīvitindriyaṃ, gocarasīsañca vimokkho, saṅkhārasīsañca nirodho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ sammā samucchede nirodhe ca anupaṭṭhānatā paññā samasīsaṭṭhe ñāṇaṃ’’.
သမသီသဋ္ဌဉာဏနိဒ္ဒေသော ဆတ္တိံသတိမော။
Samasīsaṭṭhañāṇaniddeso chattiṃsatimo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၃၆. သမသီသဋ္ဌဉာဏနိဒ္ဒေသဝဏ္ဏနာ • 36. Samasīsaṭṭhañāṇaniddesavaṇṇanā
