| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೧೯. ಸಮಥಾಧಿಕರಣವಾರೋ
19. Samathādhikaraṇavāro
೩೦೯. ಸಮಥಾ ಸಮಥೇಹಿ ಸಮ್ಮನ್ತಿ? ಸಮಥಾ ಅಧಿಕರಣೇಹಿ ಸಮ್ಮನ್ತಿ? ಅಧಿಕರಣಾ ಸಮಥೇಹಿ ಸಮ್ಮನ್ತಿ? ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ?
309. Samathā samathehi sammanti? Samathā adhikaraṇehi sammanti? Adhikaraṇā samathehi sammanti? Adhikaraṇā adhikaraṇehi sammanti?
ಸಿಯಾ ಸಮಥಾ ಸಮಥೇಹಿ ಸಮ್ಮನ್ತಿ, ಸಿಯಾ ಸಮಥಾ ಸಮಥೇಹಿ ನ ಸಮ್ಮನ್ತಿ। ಸಿಯಾ ಸಮಥಾ ಅಧಿಕರಣೇಹಿ ಸಮ್ಮನ್ತಿ, ಸಿಯಾ ಸಮಥಾ ಅಧಿಕರಣೇಹಿ ನ ಸಮ್ಮನ್ತಿ। ಸಿಯಾ ಅಧಿಕರಣಾ ಸಮಥೇಹಿ ಸಮ್ಮನ್ತಿ, ಸಿಯಾ ಅಧಿಕರಣಾ ಸಮಥೇಹಿ ನ ಸಮ್ಮನ್ತಿ। ಸಿಯಾ ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ, ಸಿಯಾ ಅಧಿಕರಣಾ ಅಧಿಕರಣೇಹಿ ನ ಸಮ್ಮನ್ತಿ।
Siyā samathā samathehi sammanti, siyā samathā samathehi na sammanti. Siyā samathā adhikaraṇehi sammanti, siyā samathā adhikaraṇehi na sammanti. Siyā adhikaraṇā samathehi sammanti, siyā adhikaraṇā samathehi na sammanti. Siyā adhikaraṇā adhikaraṇehi sammanti, siyā adhikaraṇā adhikaraṇehi na sammanti.
೩೧೦. ಕಥಂ ಸಿಯಾ ಸಮಥಾ ಸಮಥೇಹಿ ಸಮ್ಮನ್ತಿ, ಕಥಂ ಸಿಯಾ ಸಮಥಾ ಸಮಥೇಹಿ ನ ಸಮ್ಮನ್ತಿ? ಯೇಭುಯ್ಯಸಿಕಾ ಸಮ್ಮುಖಾವಿನಯೇನ ಸಮ್ಮತಿ; ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ।
310. Kathaṃ siyā samathā samathehi sammanti, kathaṃ siyā samathā samathehi na sammanti? Yebhuyyasikā sammukhāvinayena sammati; sativinayena na sammati, amūḷhavinayena na sammati, paṭiññātakaraṇena na sammati, tassapāpiyasikāya na sammati, tiṇavatthārakena na sammati.
ಸತಿವಿನಯೋ ಸಮ್ಮುಖಾವಿನಯೇನ ಸಮ್ಮತಿ; ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮಾತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ।
Sativinayo sammukhāvinayena sammati; amūḷhavinayena na sammati, paṭiññātakaraṇena na sammāti, tassapāpiyasikāya na sammati, tiṇavatthārakena na sammati, yebhuyyasikāya na sammati.
ಅಮೂಳ್ಹವಿನಯೋ ಸಮ್ಮುಖಾವಿನಯೇನ ಸಮ್ಮತಿ; ಪಟಿಞ್ಞಾತಕರಣೇನ ನ ಸಮ್ಮತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ।
Amūḷhavinayo sammukhāvinayena sammati; paṭiññātakaraṇena na sammati, tassapāpiyasikāya na sammati, tiṇavatthārakena na sammati, yebhuyyasikāya na sammati, sativinayena na sammati.
ಪಟಿಞ್ಞಾತಕರಣಂ ಸಮ್ಮುಖಾವಿನಯೇನ ಸಮ್ಮತಿ; ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ।
Paṭiññātakaraṇaṃ sammukhāvinayena sammati; tassapāpiyasikāya na sammati, tiṇavatthārakena na sammati, yebhuyyasikāya na sammati, sativinayena na sammati, amūḷhavinayena na sammati.
ತಸ್ಸಪಾಪಿಯಸಿಕಾ ಸಮ್ಮುಖಾವಿನಯೇನ ಸಮ್ಮತಿ; ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮತಿ।
Tassapāpiyasikā sammukhāvinayena sammati; tiṇavatthārakena na sammati, yebhuyyasikāya na sammati, sativinayena na sammati, amūḷhavinayena na sammati, paṭiññātakaraṇena na sammati.
ತಿಣವತ್ಥಾರಕೋ ಸಮ್ಮುಖಾವಿನಯೇನ ಸಮ್ಮತಿ; ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ। ಏವಂ ಸಿಯಾ ಸಮಥಾ ಸಮಥೇಹಿ ಸಮ್ಮನ್ತಿ। ಏವಂ ಸಿಯಾ ಸಮಥಾ ಸಮಥೇಹಿ ನ ಸಮ್ಮನ್ತಿ।
Tiṇavatthārako sammukhāvinayena sammati; yebhuyyasikāya na sammati, sativinayena na sammati, amūḷhavinayena na sammati, paṭiññātakaraṇena na sammati, tassapāpiyasikāya na sammati. Evaṃ siyā samathā samathehi sammanti. Evaṃ siyā samathā samathehi na sammanti.
೩೧೧. ಕಥಂ ಸಿಯಾ ಸಮಥಾ ಅಧಿಕರಣೇಹಿ ಸಮ್ಮನ್ತಿ, ಕಥಂ ಸಿಯಾ ಸಮಥಾ ಅಧಿಕರಣೇಹಿ ನ ಸಮ್ಮನ್ತಿ? ಸಮ್ಮುಖಾವಿನಯೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
311. Kathaṃ siyā samathā adhikaraṇehi sammanti, kathaṃ siyā samathā adhikaraṇehi na sammanti? Sammukhāvinayo vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಯೇಭುಯ್ಯಸಿಕಾ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Yebhuyyasikā vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಸತಿವಿನಯೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Sativinayo vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಅಮೂಳ್ಹವಿನಯೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Amūḷhavinayo vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಪಟಿಞ್ಞಾತಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Paṭiññātakaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ತಸ್ಸಪಾಪಿಯಸಿಕಾ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Tassapāpiyasikā vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ತಿಣವತ್ಥಾರಕೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ। ಏವಂ ಸಿಯಾ ಸಮಥಾ ಅಧಿಕರಣೇಹಿ ಸಮ್ಮನ್ತಿ। ಏವಂ ಸಿಯಾ ಸಮಥಾ ಅಧಿಕರಣೇಹಿ ನ ಸಮ್ಮನ್ತಿ।
Tiṇavatthārako vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati. Evaṃ siyā samathā adhikaraṇehi sammanti. Evaṃ siyā samathā adhikaraṇehi na sammanti.
೩೧೨. ಕಥಂ ಸಿಯಾ ಅಧಿಕರಣಾ ಸಮಥೇಹಿ ಸಮ್ಮನ್ತಿ, ಕಥಂ ಸಿಯಾ ಅಧಿಕರಣಾ ಸಮಥೇಹಿ ನ ಸಮ್ಮನ್ತಿ? ವಿವಾದಾಧಿಕರಣಂ ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಸಮ್ಮತಿ; ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ಚ ತಿಣವತ್ಥಾರಕೇನ ಚ ನ ಸಮ್ಮತಿ।
312. Kathaṃ siyā adhikaraṇā samathehi sammanti, kathaṃ siyā adhikaraṇā samathehi na sammanti? Vivādādhikaraṇaṃ sammukhāvinayena ca yebhuyyasikāya ca sammati; sativinayena ca amūḷhavinayena ca paṭiññātakaraṇena ca tassapāpiyasikāya ca tiṇavatthārakena ca na sammati.
ಅನುವಾದಾಧಿಕರಣಂ ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ ಸಮ್ಮತಿ; ಯೇಭುಯ್ಯಸಿಕಾಯ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ ನ ಸಮ್ಮತಿ।
Anuvādādhikaraṇaṃ sammukhāvinayena ca sativinayena ca amūḷhavinayena ca tassapāpiyasikāya ca sammati; yebhuyyasikāya ca paṭiññātakaraṇena ca tiṇavatthārakena ca na sammati.
ಆಪತ್ತಾಧಿಕರಣಂ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ ಸಮ್ಮತಿ; ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ ನ ಸಮ್ಮತಿ।
Āpattādhikaraṇaṃ sammukhāvinayena ca paṭiññātakaraṇena ca tiṇavatthārakena ca sammati; yebhuyyasikāya ca sativinayena ca amūḷhavinayena ca tassapāpiyasikāya ca na sammati.
ಕಿಚ್ಚಾಧಿಕರಣಂ ಸಮ್ಮುಖಾವಿನಯೇನ ಸಮ್ಮತಿ ; ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ತಿಣವತ್ಥಾರಕೇನ ಚ ನ ಸಮ್ಮತಿ। ಏವಂ ಸಿಯಾ ಅಧಿಕರಣಾ ಸಮಥೇಹಿ ಸಮ್ಮನ್ತಿ। ಏವಂ ಸಿಯಾ ಅಧಿಕರಣಾ ಸಮಥೇಹಿ ನ ಸಮ್ಮನ್ತಿ।
Kiccādhikaraṇaṃ sammukhāvinayena sammati ; yebhuyyasikāya ca sativinayena ca amūḷhavinayena ca paṭiññātakaraṇena ca tassapāpiyasikāya tiṇavatthārakena ca na sammati. Evaṃ siyā adhikaraṇā samathehi sammanti. Evaṃ siyā adhikaraṇā samathehi na sammanti.
೩೧೩. ಕಥಂ ಸಿಯಾ ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ? ಕಥಂ ಸಿಯಾ ಅಧಿಕರಣಾ ಅಧಿಕರಣೇಹಿ ನ ಸಮ್ಮನ್ತಿ? ವಿವಾದಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
313. Kathaṃ siyā adhikaraṇā adhikaraṇehi sammanti? Kathaṃ siyā adhikaraṇā adhikaraṇehi na sammanti? Vivādādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಅನುವಾದಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Anuvādādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಆಪತ್ತಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ।
Āpattādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ಕಿಚ್ಚಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ। ಏವಂ ಸಿಯಾ ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ। ಏವಂ ಸಿಯಾ ಅಧಿಕರಣಾ ಅಧಿಕರಣೇಹಿ ನ ಸಮ್ಮನ್ತಿ।
Kiccādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati. Evaṃ siyā adhikaraṇā adhikaraṇehi sammanti. Evaṃ siyā adhikaraṇā adhikaraṇehi na sammanti.
ಛಾಪಿ ಸಮಥಾ ಚತ್ತಾರೋಪಿ ಅಧಿಕರಣಾ ಸಮ್ಮುಖಾವಿನಯೇನ ಸಮ್ಮನ್ತಿ; ಸಮ್ಮುಖಾವಿನಯೋ ನ ಕೇನಚಿ ಸಮ್ಮತಿ।
Chāpi samathā cattāropi adhikaraṇā sammukhāvinayena sammanti; sammukhāvinayo na kenaci sammati.
ಸಮಥಾಧಿಕರಣವಾರೋ ನಿಟ್ಠಿತೋ ಏಕೂನವೀಸತಿಮೋ।
Samathādhikaraṇavāro niṭṭhito ekūnavīsatimo.
Related texts:
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸಮಥಾಧಿಕರಣವಾರಕಥಾವಣ್ಣನಾ • Samathādhikaraṇavārakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಸಂಸಟ್ಠವಾರಾದಿವಣ್ಣನಾ • Saṃsaṭṭhavārādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಸಂಸಟ್ಠವಾರಾದಿವಣ್ಣನಾ • Saṃsaṭṭhavārādivaṇṇanā
