| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
19. සමථාධිකරණවාරො
19. Samathādhikaraṇavāro
309. සමථා සමථෙහි සම්‌මන්‌ති? සමථා අධිකරණෙහි සම්‌මන්‌ති? අධිකරණා සමථෙහි සම්‌මන්‌ති? අධිකරණා අධිකරණෙහි සම්‌මන්‌ති?
309. Samathā samathehi sammanti? Samathā adhikaraṇehi sammanti? Adhikaraṇā samathehi sammanti? Adhikaraṇā adhikaraṇehi sammanti?
සියා සමථා සමථෙහි සම්‌මන්‌ති, සියා සමථා සමථෙහි න සම්‌මන්‌ති. සියා සමථා අධිකරණෙහි සම්‌මන්‌ති, සියා සමථා අධිකරණෙහි න සම්‌මන්‌ති. සියා අධිකරණා සමථෙහි සම්‌මන්‌ති, සියා අධිකරණා සමථෙහි න සම්‌මන්‌ති. සියා අධිකරණා අධිකරණෙහි සම්‌මන්‌ති, සියා අධිකරණා අධිකරණෙහි න සම්‌මන්‌ති.
Siyā samathā samathehi sammanti, siyā samathā samathehi na sammanti. Siyā samathā adhikaraṇehi sammanti, siyā samathā adhikaraṇehi na sammanti. Siyā adhikaraṇā samathehi sammanti, siyā adhikaraṇā samathehi na sammanti. Siyā adhikaraṇā adhikaraṇehi sammanti, siyā adhikaraṇā adhikaraṇehi na sammanti.
310. කථං සියා සමථා සමථෙහි සම්‌මන්‌ති, කථං සියා සමථා සමථෙහි න සම්‌මන්‌ති? යෙභුය්‍යසිකා සම්‌මුඛාවිනයෙන සම්‌මති; සතිවිනයෙන න සම්‌මති, අමූළ්‌හවිනයෙන න සම්‌මති, පටිඤ්‌ඤාතකරණෙන න සම්‌මති, තස්‌සපාපියසිකාය න සම්‌මති, තිණවත්‌ථාරකෙන න සම්‌මති.
310. Kathaṃ siyā samathā samathehi sammanti, kathaṃ siyā samathā samathehi na sammanti? Yebhuyyasikā sammukhāvinayena sammati; sativinayena na sammati, amūḷhavinayena na sammati, paṭiññātakaraṇena na sammati, tassapāpiyasikāya na sammati, tiṇavatthārakena na sammati.
සතිවිනයො සම්‌මුඛාවිනයෙන සම්‌මති; අමූළ්‌හවිනයෙන න සම්‌මති, පටිඤ්‌ඤාතකරණෙන න සම්‌මාති, තස්‌සපාපියසිකාය න සම්‌මති, තිණවත්‌ථාරකෙන න සම්‌මති, යෙභුය්‍යසිකාය න සම්‌මති.
Sativinayo sammukhāvinayena sammati; amūḷhavinayena na sammati, paṭiññātakaraṇena na sammāti, tassapāpiyasikāya na sammati, tiṇavatthārakena na sammati, yebhuyyasikāya na sammati.
අමූළ්‌හවිනයො සම්‌මුඛාවිනයෙන සම්‌මති; පටිඤ්‌ඤාතකරණෙන න සම්‌මති, තස්‌සපාපියසිකාය න සම්‌මති, තිණවත්‌ථාරකෙන න සම්‌මති, යෙභුය්‍යසිකාය න සම්‌මති, සතිවිනයෙන න සම්‌මති.
Amūḷhavinayo sammukhāvinayena sammati; paṭiññātakaraṇena na sammati, tassapāpiyasikāya na sammati, tiṇavatthārakena na sammati, yebhuyyasikāya na sammati, sativinayena na sammati.
පටිඤ්‌ඤාතකරණං සම්‌මුඛාවිනයෙන සම්‌මති; තස්‌සපාපියසිකාය න සම්‌මති, තිණවත්‌ථාරකෙන න සම්‌මති, යෙභුය්‍යසිකාය න සම්‌මති, සතිවිනයෙන න සම්‌මති, අමූළ්‌හවිනයෙන න සම්‌මති.
Paṭiññātakaraṇaṃ sammukhāvinayena sammati; tassapāpiyasikāya na sammati, tiṇavatthārakena na sammati, yebhuyyasikāya na sammati, sativinayena na sammati, amūḷhavinayena na sammati.
තස්‌සපාපියසිකා සම්‌මුඛාවිනයෙන සම්‌මති; තිණවත්‌ථාරකෙන න සම්‌මති, යෙභුය්‍යසිකාය න සම්‌මති, සතිවිනයෙන න සම්‌මති, අමූළ්‌හවිනයෙන න සම්‌මති, පටිඤ්‌ඤාතකරණෙන න සම්‌මති.
Tassapāpiyasikā sammukhāvinayena sammati; tiṇavatthārakena na sammati, yebhuyyasikāya na sammati, sativinayena na sammati, amūḷhavinayena na sammati, paṭiññātakaraṇena na sammati.
තිණවත්‌ථාරකො සම්‌මුඛාවිනයෙන සම්‌මති; යෙභුය්‍යසිකාය න සම්‌මති, සතිවිනයෙන න සම්‌මති, අමූළ්‌හවිනයෙන න සම්‌මති, පටිඤ්‌ඤාතකරණෙන න සම්‌මති, තස්‌සපාපියසිකාය න සම්‌මති. එවං සියා සමථා සමථෙහි සම්‌මන්‌ති. එවං සියා සමථා සමථෙහි න සම්‌මන්‌ති.
Tiṇavatthārako sammukhāvinayena sammati; yebhuyyasikāya na sammati, sativinayena na sammati, amūḷhavinayena na sammati, paṭiññātakaraṇena na sammati, tassapāpiyasikāya na sammati. Evaṃ siyā samathā samathehi sammanti. Evaṃ siyā samathā samathehi na sammanti.
311. කථං සියා සමථා අධිකරණෙහි සම්‌මන්‌ති, කථං සියා සමථා අධිකරණෙහි න සම්‌මන්‌ති? සම්‌මුඛාවිනයො විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
311. Kathaṃ siyā samathā adhikaraṇehi sammanti, kathaṃ siyā samathā adhikaraṇehi na sammanti? Sammukhāvinayo vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
යෙභුය්‍යසිකා විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Yebhuyyasikā vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
සතිවිනයො විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Sativinayo vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
අමූළ්‌හවිනයො විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Amūḷhavinayo vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
පටිඤ්‌ඤාතකරණං විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Paṭiññātakaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
තස්‌සපාපියසිකා විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Tassapāpiyasikā vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
තිණවත්‌ථාරකො විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති. එවං සියා සමථා අධිකරණෙහි සම්‌මන්‌ති. එවං සියා සමථා අධිකරණෙහි න සම්‌මන්‌ති.
Tiṇavatthārako vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati. Evaṃ siyā samathā adhikaraṇehi sammanti. Evaṃ siyā samathā adhikaraṇehi na sammanti.
312. කථං සියා අධිකරණා සමථෙහි සම්‌මන්‌ති, කථං සියා අධිකරණා සමථෙහි න සම්‌මන්‌ති? විවාදාධිකරණං සම්‌මුඛාවිනයෙන ච යෙභුය්‍යසිකාය ච සම්‌මති; සතිවිනයෙන ච අමූළ්‌හවිනයෙන ච පටිඤ්‌ඤාතකරණෙන ච තස්‌සපාපියසිකාය ච තිණවත්‌ථාරකෙන ච න සම්‌මති.
312. Kathaṃ siyā adhikaraṇā samathehi sammanti, kathaṃ siyā adhikaraṇā samathehi na sammanti? Vivādādhikaraṇaṃ sammukhāvinayena ca yebhuyyasikāya ca sammati; sativinayena ca amūḷhavinayena ca paṭiññātakaraṇena ca tassapāpiyasikāya ca tiṇavatthārakena ca na sammati.
අනුවාදාධිකරණං සම්‌මුඛාවිනයෙන ච සතිවිනයෙන ච අමූළ්‌හවිනයෙන ච තස්‌සපාපියසිකාය ච සම්‌මති; යෙභුය්‍යසිකාය ච පටිඤ්‌ඤාතකරණෙන ච තිණවත්‌ථාරකෙන ච න සම්‌මති.
Anuvādādhikaraṇaṃ sammukhāvinayena ca sativinayena ca amūḷhavinayena ca tassapāpiyasikāya ca sammati; yebhuyyasikāya ca paṭiññātakaraṇena ca tiṇavatthārakena ca na sammati.
ආපත්‌තාධිකරණං සම්‌මුඛාවිනයෙන ච පටිඤ්‌ඤාතකරණෙන ච තිණවත්‌ථාරකෙන ච සම්‌මති; යෙභුය්‍යසිකාය ච සතිවිනයෙන ච අමූළ්‌හවිනයෙන ච තස්‌සපාපියසිකාය ච න සම්‌මති.
Āpattādhikaraṇaṃ sammukhāvinayena ca paṭiññātakaraṇena ca tiṇavatthārakena ca sammati; yebhuyyasikāya ca sativinayena ca amūḷhavinayena ca tassapāpiyasikāya ca na sammati.
කිච්‌චාධිකරණං සම්‌මුඛාවිනයෙන සම්‌මති ; යෙභුය්‍යසිකාය ච සතිවිනයෙන ච අමූළ්‌හවිනයෙන ච පටිඤ්‌ඤාතකරණෙන ච තස්‌සපාපියසිකාය තිණවත්‌ථාරකෙන ච න සම්‌මති. එවං සියා අධිකරණා සමථෙහි සම්‌මන්‌ති. එවං සියා අධිකරණා සමථෙහි න සම්‌මන්‌ති.
Kiccādhikaraṇaṃ sammukhāvinayena sammati ; yebhuyyasikāya ca sativinayena ca amūḷhavinayena ca paṭiññātakaraṇena ca tassapāpiyasikāya tiṇavatthārakena ca na sammati. Evaṃ siyā adhikaraṇā samathehi sammanti. Evaṃ siyā adhikaraṇā samathehi na sammanti.
313. කථං සියා අධිකරණා අධිකරණෙහි සම්‌මන්‌ති? කථං සියා අධිකරණා අධිකරණෙහි න සම්‌මන්‌ති? විවාදාධිකරණං විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
313. Kathaṃ siyā adhikaraṇā adhikaraṇehi sammanti? Kathaṃ siyā adhikaraṇā adhikaraṇehi na sammanti? Vivādādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
අනුවාදාධිකරණං විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Anuvādādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
ආපත්‌තාධිකරණං විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති.
Āpattādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati.
කිච්‌චාධිකරණං විවාදාධිකරණෙන න සම්‌මති, අනුවාදාධිකරණෙන න සම්‌මති, ආපත්‌තාධිකරණෙන න සම්‌මති; කිච්‌චාධිකරණෙන සම්‌මති. එවං සියා අධිකරණා අධිකරණෙහි සම්‌මන්‌ති. එවං සියා අධිකරණා අධිකරණෙහි න සම්‌මන්‌ති.
Kiccādhikaraṇaṃ vivādādhikaraṇena na sammati, anuvādādhikaraṇena na sammati, āpattādhikaraṇena na sammati; kiccādhikaraṇena sammati. Evaṃ siyā adhikaraṇā adhikaraṇehi sammanti. Evaṃ siyā adhikaraṇā adhikaraṇehi na sammanti.
ඡාපි සමථා චත්‌තාරොපි අධිකරණා සම්‌මුඛාවිනයෙන සම්‌මන්‌ති; සම්‌මුඛාවිනයො න කෙනචි සම්‌මති.
Chāpi samathā cattāropi adhikaraṇā sammukhāvinayena sammanti; sammukhāvinayo na kenaci sammati.
සමථාධිකරණවාරො නිට්‌ඨිතො එකූනවීසතිමො.
Samathādhikaraṇavāro niṭṭhito ekūnavīsatimo.
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සමථාධිකරණවාරකථාවණ්‌ණනා • Samathādhikaraṇavārakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සංසට්‌ඨවාරාදිවණ්‌ණනා • Saṃsaṭṭhavārādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සංසට්‌ඨවාරාදිවණ්‌ණනා • Saṃsaṭṭhavārādivaṇṇanā
