| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
সমথক্খন্ধককথাৰণ্ণনা
Samathakkhandhakakathāvaṇṇanā
২৭৬০. ইদানি সমথৰিনিচ্ছযং দস্সেতুং যেসু অধিকরণেসু সন্তেসু সমথেহি ভৰিতব্বং, তানি তাৰ দস্সেন্তো আহ ‘‘ৰিৰাদাধারতা’’তিআদি। ৰিৰাদাধারতাতি ৰিৰাদাধিকরণং। আপত্তাধারতাতি এত্থাপি এসেৰ নযো। আধারতাতি অধিকরণপরিযাযো। আধারীযতি অভিভুয্যতি ৰূপসম্মতি সমথেহীতি আধারো, ৰিৰাদো চ সো আধারো চাতি ৰিৰাদাধারো, সো এৰ ৰিৰাদাধারতা। এৰমাধারাধিকরণ-সদ্দানং ৰিৰাদাদিসদ্দেহি সহ কম্মধারযসমাসো দট্ঠব্বো। অধিকরীযতি অভিভুয্যতি ৰূপসম্মতি সমথেহীতি অধিকরণন্তি ৰিৰাদাদিচতুব্বিধমেৰ পাল়িযং দস্সিতং। অযমত্থো ‘‘এতেসং তু চতুন্নম্পি, সমত্তা সমথা মতা’’তি ৰক্খমানেন ৰিঞ্ঞাযতি।
2760. Idāni samathavinicchayaṃ dassetuṃ yesu adhikaraṇesu santesu samathehi bhavitabbaṃ, tāni tāva dassento āha ‘‘vivādādhāratā’’tiādi. Vivādādhāratāti vivādādhikaraṇaṃ. Āpattādhāratāti etthāpi eseva nayo. Ādhāratāti adhikaraṇapariyāyo. Ādhārīyati abhibhuyyati vūpasammati samathehīti ādhāro, vivādo ca so ādhāro cāti vivādādhāro, so eva vivādādhāratā. Evamādhārādhikaraṇa-saddānaṃ vivādādisaddehi saha kammadhārayasamāso daṭṭhabbo. Adhikarīyati abhibhuyyati vūpasammati samathehīti adhikaraṇanti vivādādicatubbidhameva pāḷiyaṃ dassitaṃ. Ayamattho ‘‘etesaṃ tu catunnampi, samattā samathā matā’’ti vakkhamānena viññāyati.
২৭৬১. এতানি চত্তারি অধিকরণানি চ ‘‘ইধ পন, ভিক্খৰে, ভিক্খূ ৰিৰদন্তি ‘ধম্মো’তি ৰা ‘অধম্মো’তি ৰা’’তি (চূল়ৰ॰ ২১৫) অট্ঠারস ভেদকারকৰত্থূনি চ মহেসিনা ৰুত্তানি। তত্থ তেসু চতূসু অধিকরণেসু ৰিৰাদো অধিকরণসঙ্খাতো এতানি অট্ঠারস ভেদকরৰত্থূনি নিস্সিতো নিস্সায পৰত্তোতি যোজনা।
2761.Etāni cattāri adhikaraṇāni ca ‘‘idha pana, bhikkhave, bhikkhū vivadanti ‘dhammo’ti vā ‘adhammo’ti vā’’ti (cūḷava. 215) aṭṭhārasa bhedakārakavatthūni ca mahesinā vuttāni. Tattha tesu catūsu adhikaraṇesu vivādo adhikaraṇasaṅkhāto etāni aṭṭhārasa bhedakaravatthūni nissito nissāya pavattoti yojanā.
২৭৬২. ৰিপত্তিযো চতস্সোৰাতি ‘‘ইধ পন, ভিক্খৰে, ভিক্খূ ভিক্খুং অনুৰদন্তি সীলৰিপত্তিযা ৰা আচারৰিপত্তিযা ৰা দিট্ঠিৰিপত্তিযা ৰা আজীৰৰিপত্তিযা ৰা’’তি (চূল়ৰ॰ ২১৫) ৰুত্তা চতস্সো ৰিপত্তিযো। দিট্ঠাদীনং অনুগন্ত্ৰা সীলৰিপত্তিআদীহি ৰদনং চোদনা অনুৰাদো। উপাগতোতি নিস্সিতো, অনুৰাদো চতস্সো ৰিপত্তিযো নিস্সায পৰত্তোতি অত্থো। ‘‘তত্থা’’তি পঠমমেৰ নিদ্ধারণস্স ৰুত্তত্তা ইধ পুনৰচনে পযোজনং ন দিস্সতি, ‘‘সম্ভৰা’’তি ৰচনস্সাপি ন কোচি অত্থৰিসেসো দিস্সতি। তস্মা ‘‘আপত্তাধারতা তত্থ, সত্তআপত্তিসম্ভৰা’’তি পাঠো ন যুজ্জতি, ‘‘আপত্তাধারতা নাম, সত্ত আপত্তিযো মতা’’তি পাঠো যুত্ততরো, আপত্তাধারতা নাম আপত্তাধিকরণং নাম সত্ত আপত্তিযো মতা সত্ত আপত্তিযোৰ অধিপ্পেতাতি অত্থো।
2762.Vipattiyo catassovāti ‘‘idha pana, bhikkhave, bhikkhū bhikkhuṃ anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā’’ti (cūḷava. 215) vuttā catasso vipattiyo. Diṭṭhādīnaṃ anugantvā sīlavipattiādīhi vadanaṃ codanā anuvādo. Upāgatoti nissito, anuvādo catasso vipattiyo nissāya pavattoti attho. ‘‘Tatthā’’ti paṭhamameva niddhāraṇassa vuttattā idha punavacane payojanaṃ na dissati, ‘‘sambhavā’’ti vacanassāpi na koci atthaviseso dissati. Tasmā ‘‘āpattādhāratā tattha, sattaāpattisambhavā’’ti pāṭho na yujjati, ‘‘āpattādhāratā nāma, satta āpattiyo matā’’ti pāṭho yuttataro, āpattādhāratā nāma āpattādhikaraṇaṃ nāma satta āpattiyo matā satta āpattiyova adhippetāti attho.
২৭৬৩. সঙ্ঘকিচ্চানি নিস্সাযাতি অপলোকনকম্মাদীনি চত্তারি সঙ্ঘকম্মানি উপাদায কিচ্চাধিকরণাভিধানং সিযা, কিচ্চাধিকরণং নাম চত্তারি সঙ্ঘকম্মানীতি অত্থো। এতেসং তু চতুন্নম্পীতি এতেসং পন চতুন্নম্পি অধিকরণানং। সমত্তাতি ৰূপসমহেতুত্তা। সমথা মতাতি সম্মুখাৰিনযাদযো সত্ত অধিকরণসমথাতি অধিপ্পেতা। অধিকরণানি সমেন্তি, সম্মন্তি ৰা এতেহীতি ‘‘সমথা’’তি ৰুচ্চন্তীতি ‘‘সমত্তা সমথা মতা’’তি ইমিনা সমথ-সদ্দস্স অন্ৰত্থং দীপেতি।
2763.Saṅghakiccāni nissāyāti apalokanakammādīni cattāri saṅghakammāni upādāya kiccādhikaraṇābhidhānaṃ siyā, kiccādhikaraṇaṃ nāma cattāri saṅghakammānīti attho. Etesaṃ tu catunnampīti etesaṃ pana catunnampi adhikaraṇānaṃ. Samattāti vūpasamahetuttā. Samathā matāti sammukhāvinayādayo satta adhikaraṇasamathāti adhippetā. Adhikaraṇāni samenti, sammanti vā etehīti ‘‘samathā’’ti vuccantīti ‘‘samattā samathā matā’’ti iminā samatha-saddassa anvatthaṃ dīpeti.
২৭৬৪-৫. তে সরূপতো দস্সেতুমাহ ‘‘সম্মুখা’’তিআদি। ‘‘ৰিনযো’’তি ইদং সম্মুখাদিপদেহি পচ্চেকং যোজেতব্বং ‘‘সম্মুখাৰিনযো সতিৰিনযো অমূল়্হৰিনযো’’তি। ‘‘পটিঞ্ঞাৰিনযো’’তি চ পটিঞ্ঞাতকরণং ৰুত্তং। সত্তমো ৰিনযোতি সমথো অধিপ্পেতো। তিণৰত্থারকোতি ইমে সত্ত সমথা বুদ্ধেনাদিচ্চবন্ধুনা ৰুত্তাতি যোজনা।
2764-5. Te sarūpato dassetumāha ‘‘sammukhā’’tiādi. ‘‘Vinayo’’ti idaṃ sammukhādipadehi paccekaṃ yojetabbaṃ ‘‘sammukhāvinayo sativinayo amūḷhavinayo’’ti. ‘‘Paṭiññāvinayo’’ti ca paṭiññātakaraṇaṃ vuttaṃ. Sattamo vinayoti samatho adhippeto. Tiṇavatthārakoti ime satta samathā buddhenādiccabandhunā vuttāti yojanā.
২৭৬৬. চতূসু অধিকরণেসু যং অধিকরণং যত্তকেহি সমথেহি সম্মতি, তে সঙ্গহেত্ৰা দস্সেন্তো আহ ‘‘ৰিৰাদো’’তিআদি।
2766. Catūsu adhikaraṇesu yaṃ adhikaraṇaṃ yattakehi samathehi sammati, te saṅgahetvā dassento āha ‘‘vivādo’’tiādi.
২৭৬৭-৯. ‘‘ৰিৰাদো’’তিআদিনা উদ্দিট্ঠমত্থং নিদ্দিসন্তো আহ ‘‘ছট্ঠেনা’’তিআদি। এত্থ এতেসু চতূসু অধিকরণেসু, সমথেসু চ কিং কেন সম্মতীতি চে? ৰিৰাদো ৰিৰাদাধিকরণং ছট্ঠেন যেভুয্যসিকায, পঠমেন সমথেন সম্মুখাৰিনযেন চাতি দ্ৰীহি সমথেহি সম্মতি। যস্সা কিরিযায ধম্মৰাদিনো বহুতরা, এসা যেভুয্যসিকা। ‘‘সঙ্ঘসম্মুখতা, ধম্মসম্মুখতা, ৰিনযসম্মুখতা, পুগ্গলসম্মুখতা’’তি (চূল়ৰ॰ ২২৯, ২৩৪, ২৩৬, ২৩৭, ২৪২) ৰুত্তানং সঙ্ঘাদীনং চতুন্নং সন্নিধানেন ৰা গণপুগ্গলেহি সমিযমানং ৰিৰাদাধিকরণং সঙ্ঘসম্মুখতং ৰিনা ইতরেহি তীহি ৰা সম্মতীতি ৰুত্তং হোতি।
2767-9. ‘‘Vivādo’’tiādinā uddiṭṭhamatthaṃ niddisanto āha ‘‘chaṭṭhenā’’tiādi. Ettha etesu catūsu adhikaraṇesu, samathesu ca kiṃ kena sammatīti ce? Vivādo vivādādhikaraṇaṃ chaṭṭhena yebhuyyasikāya, paṭhamena samathena sammukhāvinayena cāti dvīhi samathehi sammati. Yassā kiriyāya dhammavādino bahutarā, esā yebhuyyasikā. ‘‘Saṅghasammukhatā, dhammasammukhatā, vinayasammukhatā, puggalasammukhatā’’ti (cūḷava. 229, 234, 236, 237, 242) vuttānaṃ saṅghādīnaṃ catunnaṃ sannidhānena vā gaṇapuggalehi samiyamānaṃ vivādādhikaraṇaṃ saṅghasammukhataṃ vinā itarehi tīhi vā sammatīti vuttaṃ hoti.
এত্থ চ কারকসঙ্ঘস্স সঙ্ঘসামগ্গিৰসেন সম্মুখীভাৰো সঙ্ঘসম্মুখতা, সমেতব্বস্স ৰত্থুনো ভূততা ধম্মসম্মুখতা, যথা তং সমেতব্বং, তথেৰস্স সমনং ৰিনযসম্মুখতা, যো চ ৰিৰদতি, যেন চ ৰিৰদতি, তেসং উভিন্নং অত্থপচ্চত্থিকানং সম্মুখীভাৰো পুগ্গলসম্মুখতা।
Ettha ca kārakasaṅghassa saṅghasāmaggivasena sammukhībhāvo saṅghasammukhatā, sametabbassa vatthuno bhūtatā dhammasammukhatā, yathā taṃ sametabbaṃ, tathevassa samanaṃ vinayasammukhatā, yo ca vivadati, yena ca vivadati, tesaṃ ubhinnaṃ atthapaccatthikānaṃ sammukhībhāvo puggalasammukhatā.
‘‘অনুৰাদো চতূহিপী’’তি উদ্দিট্ঠং নিদ্দিসন্তো আহ ‘‘সম্মুখা’’তিআদি। অনুপুব্বেনাতি অনুপটিপাটিযা। সম্মুখাৰিনযাদীহি তীহিপীতি সম্মুখাৰিনযসতিৰিনযঅমূল়্হৰিনযেহি তীহিপি। তথেৰাতি যথা তীহি, তথা পঞ্চমেন তস্সপাপিযসিকাসমথেনাপি অনুৰাদো সম্মতি, পগেৰ চতূহীতি অত্থো।
‘‘Anuvādo catūhipī’’ti uddiṭṭhaṃ niddisanto āha ‘‘sammukhā’’tiādi. Anupubbenāti anupaṭipāṭiyā. Sammukhāvinayādīhi tīhipīti sammukhāvinayasativinayaamūḷhavinayehi tīhipi. Tathevāti yathā tīhi, tathā pañcamena tassapāpiyasikāsamathenāpi anuvādo sammati, pageva catūhīti attho.
যো পাপুস্সন্নতায পাপিযো পুগ্গলো, তস্স কত্তব্বতো ‘‘তস্সপাপিযসিকা’’তি কম্মং ৰুচ্চতি। আযস্মতো দব্বস্স মল্লপুত্তস্স ৰিয সতিৰেপুল্লপ্পত্তস্স খীণাসৰস্স কতা অমূলিকা সীলৰিপত্তিচোদনা সম্মুখাৰিনযেন, ঞত্তিচতুত্থায কম্মৰাচায দিন্নেন সতিৰিনযেন চ সম্মতি। উম্মত্তকস্স ভিক্খুনো কতা আপত্তিচোদনা সম্মুখাৰিনযেন চ তথেৰ দিন্নেন অমূল়্হৰিনযেন চ সম্মতি। সঙ্ঘমজ্ঝে আপত্তিযা চোদিযমানস্স অৰজানিত্ৰা পটিজাননাদিং করোন্তস্স পাপভিক্খুনো বহুলাপত্তিচোদনা সম্মুখাৰিনযেন চেৰ তথেৰ পকতেন তস্সপাপিযসিকাকম্মেন চ ৰূপসম্মতীতি ৰুত্তং হোতি।
Yo pāpussannatāya pāpiyo puggalo, tassa kattabbato ‘‘tassapāpiyasikā’’ti kammaṃ vuccati. Āyasmato dabbassa mallaputtassa viya sativepullappattassa khīṇāsavassa katā amūlikā sīlavipatticodanā sammukhāvinayena, ñatticatutthāya kammavācāya dinnena sativinayena ca sammati. Ummattakassa bhikkhuno katā āpatticodanā sammukhāvinayena ca tatheva dinnena amūḷhavinayena ca sammati. Saṅghamajjhe āpattiyā codiyamānassa avajānitvā paṭijānanādiṃ karontassa pāpabhikkhuno bahulāpatticodanā sammukhāvinayena ceva tatheva pakatena tassapāpiyasikākammena ca vūpasammatīti vuttaṃ hoti.
‘‘আপত্তি পন তীহেৰা’’তি উদ্দেসস্স নিদ্দেসমাহ ‘‘সম্মুখেনা’’তিআদি। সম্মুখেন সম্মুখাৰিনযেন, পটিঞ্ঞায পটিঞ্ঞাতকরণেন, তিণৰত্থারকেন ৰা ইমেহি তীহি এৰ সমথেহি সা আপত্তি আপত্তাধিকরণং উপসমং যাতীতি যোজনা। এত্থ পটিঞ্ঞাতকরণং নাম আপত্তিং পটিগ্গণ্হন্তেন ‘‘পস্সসী’’তি ৰুত্তে আপত্তিং দেসেন্তেন ‘‘আম পস্সামী’’তি সম্পটিচ্ছনং। তিণৰত্থারকং পন সযমেৰ ৰক্খতি।
‘‘Āpatti pana tīhevā’’ti uddesassa niddesamāha ‘‘sammukhenā’’tiādi. Sammukhena sammukhāvinayena, paṭiññāya paṭiññātakaraṇena, tiṇavatthārakena vā imehi tīhi eva samathehi sā āpatti āpattādhikaraṇaṃ upasamaṃ yātīti yojanā. Ettha paṭiññātakaraṇaṃ nāma āpattiṃ paṭiggaṇhantena ‘‘passasī’’ti vutte āpattiṃ desentena ‘‘āma passāmī’’ti sampaṭicchanaṃ. Tiṇavatthārakaṃ pana sayameva vakkhati.
তীহেৰ সমথেহীতি এত্থ গরুকাপত্তি সম্মুখাৰিনযেন, পটিঞ্ঞাতকরণেন চাতি দ্ৰীহি, লহুকাপত্তিং আপজ্জিত্ৰা সঙ্ঘে ৰা গণে ৰা পুগ্গলে ৰা দেসনায সম্মুখাৰিনযেন চেৰ পটিঞ্ঞাতকরণেন চ, কোসম্বকানং ৰিগ্গহসদিসং মহাৰিগ্গহং করোন্তেহি আপন্না অনেকৰিধা আপত্তিযো সচে হোন্তি, তাসু ৰক্খমানসরূপং থুল্লৰজ্জাদিং ঠপেত্ৰা অৰসেসা সব্বা আপত্তিযো সম্মুখাৰিনযেন, তিণৰত্থারকেন চ সম্মন্তীতি অত্থো।
Tīheva samathehīti ettha garukāpatti sammukhāvinayena, paṭiññātakaraṇena cāti dvīhi, lahukāpattiṃ āpajjitvā saṅghe vā gaṇe vā puggale vā desanāya sammukhāvinayena ceva paṭiññātakaraṇena ca, kosambakānaṃ viggahasadisaṃ mahāviggahaṃ karontehi āpannā anekavidhā āpattiyo sace honti, tāsu vakkhamānasarūpaṃ thullavajjādiṃ ṭhapetvā avasesā sabbā āpattiyo sammukhāvinayena, tiṇavatthārakena ca sammantīti attho.
কিচ্চং কিচ্চাধিকরণং একেন সম্মুখাৰিনযেনেৰ সম্মতীতি যোজনা।
Kiccaṃ kiccādhikaraṇaṃ ekena sammukhāvinayeneva sammatīti yojanā.
২৭৭০. যেভুয্যসিককম্মেতি এত্থ নিমিত্তত্থে ভুম্মং। সলাকং গাহযেতি ৰিনিচ্ছযকারকে সঙ্ঘে ধম্মৰাদীনং বহুত্তং ৰা অপ্পতরত্তং ৰা জানিতুং ৰক্খমানেন নযেন সলাকং গাহাপেয্য। বুধোতি ‘‘ন ছন্দাগতিং গচ্ছতি…পে॰… গহিতাগহিতঞ্চ জানাতী’’তি ৰুত্তং পঞ্চহি অঙ্গেহি সমন্নাগতং পুগ্গলং দস্সেতি। ‘‘গূল়্হেনা’’তিআদিনা সলাকগ্গাহপ্পকারো দস্সিতো। কণ্ণজপ্পেনাতি এত্থ কণ্ণে জপ্পো যস্মিং সলাকগ্গাহপযোগেতি ৰিগ্গহো। এত্থ গূল়্হসলাকগ্গাহো নাম ধম্মৰাদিসলাকা চ অধম্মৰাদিসলাকা চ ৰিসুং ৰিসুং চীৰরকণ্ণে পক্খিপিত্ৰা পুগ্গলানং সন্তিকং ৰিসুং ৰিসুং উপসঙ্কমিত্ৰা সলাকা ৰিসুং ৰিসুং দস্সেত্ৰা ‘‘ইতো তৰ রুচ্চনকং গণ্হাহী’’তি রহো ঠত্ৰা গাহাপনং। ৰিৰটকং নাম ধম্মৰাদীনং বহুভাৰং ঞত্ৰা সব্বেসু জানন্তেসু পুগ্গলানং সন্তিকং গাহাপনং। কণ্ণজপ্পনং নাম এৰমেৰ কণ্ণমূলে রহো ঠত্ৰা গাহাপনং।
2770.Yebhuyyasikakammeti ettha nimittatthe bhummaṃ. Salākaṃ gāhayeti vinicchayakārake saṅghe dhammavādīnaṃ bahuttaṃ vā appatarattaṃ vā jānituṃ vakkhamānena nayena salākaṃ gāhāpeyya. Budhoti ‘‘na chandāgatiṃ gacchati…pe… gahitāgahitañca jānātī’’ti vuttaṃ pañcahi aṅgehi samannāgataṃ puggalaṃ dasseti. ‘‘Gūḷhenā’’tiādinā salākaggāhappakāro dassito. Kaṇṇajappenāti ettha kaṇṇe jappo yasmiṃ salākaggāhapayogeti viggaho. Ettha gūḷhasalākaggāho nāma dhammavādisalākā ca adhammavādisalākā ca visuṃ visuṃ cīvarakaṇṇe pakkhipitvā puggalānaṃ santikaṃ visuṃ visuṃ upasaṅkamitvā salākā visuṃ visuṃ dassetvā ‘‘ito tava ruccanakaṃ gaṇhāhī’’ti raho ṭhatvā gāhāpanaṃ. Vivaṭakaṃ nāma dhammavādīnaṃ bahubhāvaṃ ñatvā sabbesu jānantesu puggalānaṃ santikaṃ gāhāpanaṃ. Kaṇṇajappanaṃ nāma evameva kaṇṇamūle raho ṭhatvā gāhāpanaṃ.
২৭৭১. অলজ্জুস্সদেতি এত্থ ‘‘সঙ্ঘে’’তি সেসো। লজ্জিসু বালেসূতি এত্থাপি ‘‘উস্সদেসূ’’তি ৰত্তব্বং।
2771.Alajjussadeti ettha ‘‘saṅghe’’ti seso. Lajjisu bālesūti etthāpi ‘‘ussadesū’’ti vattabbaṃ.
২৭৭২. সকেন কম্মুনাযেৰাতি অত্তনো যং কিচ্চং, তেনেৰাতি।
2772.Sakena kammunāyevāti attano yaṃ kiccaṃ, tenevāti.
২৭৭৩-৫. ‘‘আপজ্জতী’’তিআদি ‘‘অলজ্জী, লজ্জী, বালো’’তি জাননস্স হেতুভূতকম্মদস্সনং। দুচ্চিন্তিতোতি অভিজ্ঝাদিতিৰিধমনোদুচ্চরিতৰসেন দুট্ঠু চিন্তেন্তো। দুব্ভাসীতি মুসাৰাদাদিচতুব্বিধৰচীদুচ্চরিতৰসেন ৰচীদ্ৰারে পঞ্ঞত্তানং সিক্খাপদানং ৰীতিক্কমৰসেন দুট্ঠু ভাসনসীলো। দুক্কটকারিকোতি পাণাতিপাতাদিতিৰিধকাযদুচ্চরিতৰসেন কাযদ্ৰারে পঞ্ঞত্তসিক্খাপদানং ৰীতিক্কমৰসেন কুচ্ছিতকম্মস্স করণসীলো। ইতি লক্খণেনেৰাতি যথাৰুত্তং অলজ্জীলজ্জীবাললক্খণং নিগমেতি।
2773-5.‘‘Āpajjatī’’tiādi ‘‘alajjī, lajjī, bālo’’ti jānanassa hetubhūtakammadassanaṃ. Duccintitoti abhijjhāditividhamanoduccaritavasena duṭṭhu cintento. Dubbhāsīti musāvādādicatubbidhavacīduccaritavasena vacīdvāre paññattānaṃ sikkhāpadānaṃ vītikkamavasena duṭṭhu bhāsanasīlo. Dukkaṭakārikoti pāṇātipātāditividhakāyaduccaritavasena kāyadvāre paññattasikkhāpadānaṃ vītikkamavasena kucchitakammassa karaṇasīlo. Iti lakkhaṇenevāti yathāvuttaṃ alajjīlajjībālalakkhaṇaṃ nigameti.
২৭৭৬. ‘‘যেভুয্যসিকা’’তিআদিগাথাহি নিদ্দিট্ঠমেৰ অত্থং নিগমেতুমাহ ‘‘তিধা’’তিআদি। তিধাসলাকগাহেনাতি তিৰিধস্স সলাকগাহস্স অঞ্ঞতরেন। বহুকা ধম্মৰাদিনো যদি সিযুন্তি যোজনা। কাতব্বন্তি এত্থ ‘‘ৰিৰাদাধিকরণৰূপসমন’’ন্তি সেসো।
2776. ‘‘Yebhuyyasikā’’tiādigāthāhi niddiṭṭhameva atthaṃ nigametumāha ‘‘tidhā’’tiādi. Tidhāsalākagāhenāti tividhassa salākagāhassa aññatarena. Bahukā dhammavādino yadi siyunti yojanā. Kātabbanti ettha ‘‘vivādādhikaraṇavūpasamana’’nti seso.
২৭৭৭. যো পুগ্গলো অলজ্জী চ হোতি সানুৰাদো চ কম্মতো কাযকম্মতো, ৰচীকম্মতো চ অসুচি চ সম্বুদ্ধজিগুচ্ছনীযোতি অত্থো। সো এৰংৰিধো পাপপুগ্গলো তস্স পাপিযসিককম্মস্স যোগো হোতীতি সম্বন্ধো। সানুৰাদোতি এত্থ অনুৰাদো নাম চোদনা, সহ অনুৰাদেন ৰত্ততীতি সানুৰাদো, পাপগরহিতপুগ্গলেহি কাতব্বচোদনায অনুরূপোতি অত্থো।
2777. Yo puggalo alajjī ca hoti sānuvādo ca kammato kāyakammato, vacīkammato ca asuci ca sambuddhajigucchanīyoti attho. So evaṃvidho pāpapuggalo tassa pāpiyasikakammassa yogo hotīti sambandho. Sānuvādoti ettha anuvādo nāma codanā, saha anuvādena vattatīti sānuvādo, pāpagarahitapuggalehi kātabbacodanāya anurūpoti attho.
২৭৭৮-৯. ভণ্ডনেতি কলহস্স পুব্বভাগে। কলহেতি কাযৰচীদ্ৰারপ্পৰত্তে হত্থপরামসাদিকে কলহে চ। ৰিৰাদম্হি অনপ্পকেতি বহুৰিধে ৰিৰাদে জাতে। বহুঅস্সামণে চিণ্ণেতি সমণানং অননুচ্ছৰিকে নানপ্পকারে কাযিকৰাচসিকৰীতিক্কমে চ কতে। অনগ্গেতি অনন্তে। ভস্সকেতি কুচ্ছিতে অমনাপৰচনে চিণ্ণেতি যোজনা, ভাসিতেতি অত্থো। গৰেসন্তন্তি গৰেসিযমানং, আপত্তাধিকরণন্তি সেসো। ৰাল়ন্তি চণ্ডং। কক্খল়ন্তি আসজ্জং। কাতব্বন্তি ৰূপসমেতব্বং।
2778-9.Bhaṇḍaneti kalahassa pubbabhāge. Kalaheti kāyavacīdvārappavatte hatthaparāmasādike kalahe ca. Vivādamhi anappaketi bahuvidhe vivāde jāte. Bahuassāmaṇe ciṇṇeti samaṇānaṃ ananucchavike nānappakāre kāyikavācasikavītikkame ca kate. Anaggeti anante. Bhassaketi kucchite amanāpavacane ciṇṇeti yojanā, bhāsiteti attho. Gavesantanti gavesiyamānaṃ, āpattādhikaraṇanti seso. Vāḷanti caṇḍaṃ. Kakkhaḷanti āsajjaṃ. Kātabbanti vūpasametabbaṃ.
২৭৮০-২. যথা চ ৰূপসম্মতি, তথা তিণৰত্থারকে সুদ্ধো হোতীতি সম্বন্ধো।
2780-2. Yathā ca vūpasammati, tathā tiṇavatthārake suddho hotīti sambandho.
থুল্লৰজ্জন্তি পারাজিকঞ্চেৰ সঙ্ঘাদিসেসঞ্চ। গিহীহি পটিসংযুতন্তি গিহীনং জাতিআদীহি পাল়িযা আগতেহি দসহি অক্কোসৰত্থূহি, অট্ঠকথাগতেহি চ তদঞ্ঞেহি অক্কোসৰত্থূহি খুংসনৰম্ভনপচ্চযা চ ধম্মিকপটিস্সৰস্স অসচ্চাপনপচ্চযা চ আপন্নাপত্তিং। এসা এৰ হি আপত্তি গিহিপটিসংযুত্তা নাম পরিৰারে ‘‘অত্থি গিহিপটিসংযুত্তা, অত্থি নগিহিপটিসংযুত্তা’’তি দুকং নিক্খিপিত্ৰা ‘‘গিহিপটিসংযুত্তাতি সুধম্মত্থেরস্স আপত্তি, যা চ ধম্মিকস্স পটিস্সৰস্স অসচ্চাপনে আপত্তি। অৰসেসা নগিহিপটিসংযুত্তা’’তি (পরি॰ অট্ঠ॰ ৩২১) ৰচনতো।
Thullavajjanti pārājikañceva saṅghādisesañca. Gihīhi paṭisaṃyutanti gihīnaṃ jātiādīhi pāḷiyā āgatehi dasahi akkosavatthūhi, aṭṭhakathāgatehi ca tadaññehi akkosavatthūhi khuṃsanavambhanapaccayā ca dhammikapaṭissavassa asaccāpanapaccayā ca āpannāpattiṃ. Esā eva hi āpatti gihipaṭisaṃyuttā nāma parivāre ‘‘atthi gihipaṭisaṃyuttā, atthi nagihipaṭisaṃyuttā’’ti dukaṃ nikkhipitvā ‘‘gihipaṭisaṃyuttāti sudhammattherassa āpatti, yā ca dhammikassa paṭissavassa asaccāpane āpatti. Avasesā nagihipaṭisaṃyuttā’’ti (pari. aṭṭha. 321) vacanato.
সুধম্মত্থেরস্স আপত্তীতি চ তেন চিত্তস্স গহপতিনো জাতিং পটিচ্চ খুংসনৰম্ভনপচ্চযা আপন্না ওমসৰাদসিক্খাপদৰিভাগগতা দুক্কটাপত্তি গহেতব্বা। ইদঞ্চ উপলক্খণমত্তং, তস্মা ইতরেহিপি অক্কোসৰত্থূহি গিহিং খুংসেন্তানং ৰম্ভেন্তানং ইতরেসং ভিক্খূনং সা আপত্তি গিহিপটিসংযুত্তাৰাতি ৰেদিতব্বং। তথা আপন্নং আপত্তিং দেসাপেন্তেন দস্সনূপচারং অৰিজহাপেত্ৰা সৰনূপচারং জহাপেত্ৰা একংসে উত্তরাসঙ্গং কারাপেত্ৰা উক্কুটিকং নিসীদাপেত্ৰা অঞ্জলিং পগ্গণ্হাপেত্ৰা সা আপত্তি দেসাপেতব্বা।
Sudhammattherassa āpattīti ca tena cittassa gahapatino jātiṃ paṭicca khuṃsanavambhanapaccayā āpannā omasavādasikkhāpadavibhāgagatā dukkaṭāpatti gahetabbā. Idañca upalakkhaṇamattaṃ, tasmā itarehipi akkosavatthūhi gihiṃ khuṃsentānaṃ vambhentānaṃ itaresaṃ bhikkhūnaṃ sā āpatti gihipaṭisaṃyuttāvāti veditabbaṃ. Tathā āpannaṃ āpattiṃ desāpentena dassanūpacāraṃ avijahāpetvā savanūpacāraṃ jahāpetvā ekaṃse uttarāsaṅgaṃ kārāpetvā ukkuṭikaṃ nisīdāpetvā añjaliṃ paggaṇhāpetvā sā āpatti desāpetabbā.
দিট্ঠাৰিকম্মিকন্তি দিট্ঠাৰিকম্মে নিযুত্তো দিট্ঠাৰিকম্মিকো, তং, অট্ঠকথাযং ‘‘যে পন ‘ন মেতং খমতী’তি অঞ্ঞমঞ্ঞং দিট্ঠাৰিকম্মং করোন্তী’’তি (চূল়ৰ॰ অট্ঠ॰ ২১৪) যে পুগ্গলা দস্সিতা, তেসমঞ্ঞতরস্সেৰ গহণং।
Diṭṭhāvikammikanti diṭṭhāvikamme niyutto diṭṭhāvikammiko, taṃ, aṭṭhakathāyaṃ ‘‘ye pana ‘na metaṃ khamatī’ti aññamaññaṃ diṭṭhāvikammaṃ karontī’’ti (cūḷava. aṭṭha. 214) ye puggalā dassitā, tesamaññatarasseva gahaṇaṃ.
যোতি ভণ্ডনকারকেহি ভিক্খূহি সদ্ধিং মহন্তং ৰিগ্গহং কত্ৰা সম্বহুলা আপত্তিযো আপন্নো যো ভিক্খু। তত্থাতি তস্মিং তিণৰত্থারকসমথকারকে ভিক্খুসমূহে। ন হোতীতি ছন্দং দত্ৰা তং ভিক্খুপরিসং অনাগতত্তা ন সংৰিজ্জতি। তঞ্চ ঠপেত্ৰাতি যোজনা।
Yoti bhaṇḍanakārakehi bhikkhūhi saddhiṃ mahantaṃ viggahaṃ katvā sambahulā āpattiyo āpanno yo bhikkhu. Tatthāti tasmiṃ tiṇavatthārakasamathakārake bhikkhusamūhe. Na hotīti chandaṃ datvā taṃ bhikkhuparisaṃ anāgatattā na saṃvijjati. Tañca ṭhapetvāti yojanā.
তিণৰত্থারকে কতে সতি যাৰ উপসম্পদমাল়তো পভুতি আপন্নায সেসায আপত্তিযা নিরাপত্তি হুত্ৰা সুদ্ধো হোতি সঙ্ঘোতি যোজনা।
Tiṇavatthārake kate sati yāva upasampadamāḷato pabhuti āpannāya sesāya āpattiyā nirāpatti hutvā suddho hoti saṅghoti yojanā.
সমথক্খন্ধককথাৰণ্ণনা।
Samathakkhandhakakathāvaṇṇanā.
