| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
সমথৰারৰিস্সজ্জনাৰারৰণ্ণনা
Samathavāravissajjanāvāravaṇṇanā
৩০৫. যস্মিং সমযে সম্মুখাৰিনযেন চাতিআদি তস্সা ৰিস্সজ্জনং। যস্মিং সমযে সম্মুখাৰিনযেন চ যেভুয্যসিকায চ অধিকরণং ৰূপসম্মতি, তস্মিং সমযে যত্থ যেভুয্যসিকা লব্ভতি, তত্থ সম্মুখাৰিনযো লব্ভতীতি এৰং সব্বত্থ সম্বন্ধো। যত্থ পটিঞ্ঞাতকরণং লব্ভতি, তত্থ সম্মুখাৰিনযো লব্ভতীতি এত্থ একং ৰা দ্ৰে ৰা বহূ ৰা আপত্তিযো আপন্নো ভিক্খু ‘‘ইমং নাম আপত্তিং আপন্নোসী’’তি পুচ্ছিতো ‘‘আমা’’তি আপত্তিং পটিজানাতি, দ্ৰেপি লব্ভন্তি। তত্থ সঙ্ঘসম্মুখতা ধম্মৰিনযপুগ্গলসম্মুখতাতি এৰং ৰুত্তসম্মুখাৰিনযে সঙ্ঘস্স পুরতো পটিঞ্ঞাতং কতং চে, সঙ্ঘসম্মুখতা। তত্থেৰ দেসিতং চে, ধম্মৰিনযসম্মুখতাযোপি লদ্ধা হোন্তি। অৰিৰদন্তা অঞ্ঞমঞ্ঞং পটিজানন্তি চে, পুগ্গলসম্মুখতা। তস্সেৰ সন্তিকে দেসিতং চে, ধম্মৰিনযসম্মুখতাযোপি লদ্ধা হোন্তি। একস্সেৰ ৰা একস্স সন্তিকে আপত্তিদেসনকালে ‘‘পস্সসি, পস্সামী’’তি ৰুত্তে তত্থ ধম্মৰিনযপুগ্গলসম্মুখতাসঞ্ঞিতো সম্মুখাৰিনযো চ পটিঞ্ঞাতকরণঞ্চ লদ্ধং হোতি।
305.Yasmiṃ samaye sammukhāvinayena cātiādi tassā vissajjanaṃ. Yasmiṃ samaye sammukhāvinayena ca yebhuyyasikāya ca adhikaraṇaṃ vūpasammati, tasmiṃ samaye yattha yebhuyyasikā labbhati, tattha sammukhāvinayo labbhatīti evaṃ sabbattha sambandho. Yattha paṭiññātakaraṇaṃ labbhati, tattha sammukhāvinayo labbhatīti ettha ekaṃ vā dve vā bahū vā āpattiyo āpanno bhikkhu ‘‘imaṃ nāma āpattiṃ āpannosī’’ti pucchito ‘‘āmā’’ti āpattiṃ paṭijānāti, dvepi labbhanti. Tattha saṅghasammukhatā dhammavinayapuggalasammukhatāti evaṃ vuttasammukhāvinaye saṅghassa purato paṭiññātaṃ kataṃ ce, saṅghasammukhatā. Tattheva desitaṃ ce, dhammavinayasammukhatāyopi laddhā honti. Avivadantā aññamaññaṃ paṭijānanti ce, puggalasammukhatā. Tasseva santike desitaṃ ce, dhammavinayasammukhatāyopi laddhā honti. Ekasseva vā ekassa santike āpattidesanakāle ‘‘passasi, passāmī’’ti vutte tattha dhammavinayapuggalasammukhatāsaññito sammukhāvinayo ca paṭiññātakaraṇañca laddhaṃ hoti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১৫. সমথৰারো, ৰিস্সজ্জনাৰারো • 15. Samathavāro, vissajjanāvāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সমথৰারৰিস্সজ্জনাৰারকথাৰণ্ণনা • Samathavāravissajjanāvārakathāvaṇṇanā
