| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
සමථවාරවිස්‌සජ්‌ජනාවාරවණ්‌ණනා
Samathavāravissajjanāvāravaṇṇanā
305. යස්‌මිං සමයෙ සම්‌මුඛාවිනයෙන චාතිආදි තස්‌සා විස්‌සජ්‌ජනං. යස්‌මිං සමයෙ සම්‌මුඛාවිනයෙන ච යෙභුය්‍යසිකාය ච අධිකරණං වූපසම්‌මති, තස්‌මිං සමයෙ යත්‌ථ යෙභුය්‍යසිකා ලබ්‌භති, තත්‌ථ සම්‌මුඛාවිනයො ලබ්‌භතීති එවං සබ්‌බත්‌ථ සම්‌බන්‌ධො. යත්‌ථ පටිඤ්‌ඤාතකරණං ලබ්‌භති, තත්‌ථ සම්‌මුඛාවිනයො ලබ්‌භතීති එත්‌ථ එකං වා ද්‌වෙ වා බහූ වා ආපත්‌තියො ආපන්‌නො භික්‌ඛු ‘‘ඉමං නාම ආපත්‌තිං ආපන්‌නොසී’’ති පුච්‌ඡිතො ‘‘ආමා’’ති ආපත්‌තිං පටිජානාති, ද්‌වෙපි ලබ්‌භන්‌ති. තත්‌ථ සඞ්‌ඝසම්‌මුඛතා ධම්‌මවිනයපුග්‌ගලසම්‌මුඛතාති එවං වුත්‌තසම්‌මුඛාවිනයෙ සඞ්‌ඝස්‌ස පුරතො පටිඤ්‌ඤාතං කතං චෙ, සඞ්‌ඝසම්‌මුඛතා. තත්‌ථෙව දෙසිතං චෙ, ධම්‌මවිනයසම්‌මුඛතායොපි ලද්‌ධා හොන්‌ති. අවිවදන්‌තා අඤ්‌ඤමඤ්‌ඤං පටිජානන්‌ති චෙ, පුග්‌ගලසම්‌මුඛතා. තස්‌සෙව සන්‌තිකෙ දෙසිතං චෙ, ධම්‌මවිනයසම්‌මුඛතායොපි ලද්‌ධා හොන්‌ති. එකස්‌සෙව වා එකස්‌ස සන්‌තිකෙ ආපත්‌තිදෙසනකාලෙ ‘‘පස්‌සසි, පස්‌සාමී’’ති වුත්‌තෙ තත්‌ථ ධම්‌මවිනයපුග්‌ගලසම්‌මුඛතාසඤ්‌ඤිතො සම්‌මුඛාවිනයො ච පටිඤ්‌ඤාතකරණඤ්‌ච ලද්‌ධං හොති.
305.Yasmiṃ samaye sammukhāvinayena cātiādi tassā vissajjanaṃ. Yasmiṃ samaye sammukhāvinayena ca yebhuyyasikāya ca adhikaraṇaṃ vūpasammati, tasmiṃ samaye yattha yebhuyyasikā labbhati, tattha sammukhāvinayo labbhatīti evaṃ sabbattha sambandho. Yattha paṭiññātakaraṇaṃ labbhati, tattha sammukhāvinayo labbhatīti ettha ekaṃ vā dve vā bahū vā āpattiyo āpanno bhikkhu ‘‘imaṃ nāma āpattiṃ āpannosī’’ti pucchito ‘‘āmā’’ti āpattiṃ paṭijānāti, dvepi labbhanti. Tattha saṅghasammukhatā dhammavinayapuggalasammukhatāti evaṃ vuttasammukhāvinaye saṅghassa purato paṭiññātaṃ kataṃ ce, saṅghasammukhatā. Tattheva desitaṃ ce, dhammavinayasammukhatāyopi laddhā honti. Avivadantā aññamaññaṃ paṭijānanti ce, puggalasammukhatā. Tasseva santike desitaṃ ce, dhammavinayasammukhatāyopi laddhā honti. Ekasseva vā ekassa santike āpattidesanakāle ‘‘passasi, passāmī’’ti vutte tattha dhammavinayapuggalasammukhatāsaññito sammukhāvinayo ca paṭiññātakaraṇañca laddhaṃ hoti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 15. සමථවාරො, විස්‌සජ්‌ජනාවාරො • 15. Samathavāro, vissajjanāvāro
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සමථවාරවිස්‌සජ්‌ජනාවාරකථාවණ්‌ණනා • Samathavāravissajjanāvārakathāvaṇṇanā
