| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
7. සමථවාරො
7. Samathavāro
255. කායසංසග්‌ගං සාදියනපච්‌චයා ආපත්‌තියො සත්‌තන්‌නං සමථානං කතිහි සමථෙහි සම්‌මන්‌ති? කායසංසග්‌ගං සාදියනපච්‌චයා ආපත්‌තියො සත්‌තන්‌නං සමථානං තීහි සමථෙහි සම්‌මන්‌ති – සියා සම්‌මුඛාවිනයෙන ච පටිඤ්‌ඤාතකරණෙන ච, සියා සම්‌මුඛාවිනයෙන ච තිණවත්‌ථාරකෙන ච…පෙ.….
255. Kāyasaṃsaggaṃ sādiyanapaccayā āpattiyo sattannaṃ samathānaṃ katihi samathehi sammanti? Kāyasaṃsaggaṃ sādiyanapaccayā āpattiyo sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca…pe….
දධිං විඤ්‌ඤාපෙත්‌වා භුඤ්‌ජනපච්‌චයා ආපත්‌තියො සත්‌තන්‌නං සමථානං කතිහි සමථෙහි සම්‌මන්‌ති? දධිං විඤ්‌ඤාපෙත්‌වා භුඤ්‌ජනපච්‌චයා ආපත්‌තියො සත්‌තන්‌නං සමථානං තීහි සමථෙහි සම්‌මන්‌ති – සියා සම්‌මුඛාවිනයෙන ච පටිඤ්‌ඤාතකරණෙන ච, සියා සම්‌මුඛාවිනයෙන ච තිණවත්‌ථාරකෙන ච.
Dadhiṃ viññāpetvā bhuñjanapaccayā āpattiyo sattannaṃ samathānaṃ katihi samathehi sammanti? Dadhiṃ viññāpetvā bhuñjanapaccayā āpattiyo sattannaṃ samathānaṃ tīhi samathehi sammanti – siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.
සමථවාරො නිට්‌ඨිතො සත්‌තමො.
Samathavāro niṭṭhito sattamo.
