| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
১০. সামাথেরীগাথাৰণ্ণনা
10. Sāmātherīgāthāvaṇṇanā
চতুক্খত্তুং পঞ্চক্খত্তুন্তিআদিকা সামায থেরিযা গাথা। অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা সুগতীসুযেৰ সংসরন্তী ইমস্মিং বুদ্ধুপ্পাদে কোসম্বিযং গহপতিমহাসালকুলে নিব্বত্তিত্ৰা সামাতিস্সা নামং অহোসি। সা ৰিঞ্ঞুতং পত্তা সামাৰতিযা উপাসিকায পিযসহাযিকা হুত্ৰা তায কালঙ্কতায সঞ্জাতসংৰেগা পব্বজি। পব্বজিত্ৰা চ সামাৰতিকং আরব্ভ উপ্পন্নসোকং ৰিনোদেতুং অসক্কোন্তী অরিযমগ্গং গণ্হিতুং নাসক্খি। অপরভাগে আসনসালায নিসিন্নস্স আনন্দত্থেরস্স ওৰাদং সুত্ৰা ৰিপস্সনং পট্ঠপেত্ৰা ততো সত্তমে দিৰসে সহ পটিসম্ভিদাহি অরহত্তং পাপুণি।
Catukkhattuṃpañcakkhattuntiādikā sāmāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā sugatīsuyeva saṃsarantī imasmiṃ buddhuppāde kosambiyaṃ gahapatimahāsālakule nibbattitvā sāmātissā nāmaṃ ahosi. Sā viññutaṃ pattā sāmāvatiyā upāsikāya piyasahāyikā hutvā tāya kālaṅkatāya sañjātasaṃvegā pabbaji. Pabbajitvā ca sāmāvatikaṃ ārabbha uppannasokaṃ vinodetuṃ asakkontī ariyamaggaṃ gaṇhituṃ nāsakkhi. Aparabhāge āsanasālāya nisinnassa ānandattherassa ovādaṃ sutvā vipassanaṃ paṭṭhapetvā tato sattame divase saha paṭisambhidāhi arahattaṃ pāpuṇi.
অরহত্তং পন পত্ৰা অত্তনো পটিপত্তিং পচ্চৰেক্খিত্ৰা তং পকাসেন্তী –
Arahattaṃ pana patvā attano paṭipattiṃ paccavekkhitvā taṃ pakāsentī –
৩৭.
37.
‘‘চতুক্খত্তুং পঞ্চক্খত্তুং, ৰিহারা উপনিক্খমিং।
‘‘Catukkhattuṃ pañcakkhattuṃ, vihārā upanikkhamiṃ;
অলদ্ধা চেতসো সন্তিং, চিত্তে অৰসৰত্তিনী।
Aladdhā cetaso santiṃ, citte avasavattinī;
তস্সা মে অট্ঠমী রত্তি, যতো তণ্হা সমূহতা॥
Tassā me aṭṭhamī ratti, yato taṇhā samūhatā.
৩৮.
38.
‘‘বহূহি দুক্খধম্মেহি, অপ্পমাদরতায মে।
‘‘Bahūhi dukkhadhammehi, appamādaratāya me;
তণ্হক্খযো অনুপ্পত্তো, কতং বুদ্ধস্স সাসন’’ন্তি॥ –
Taṇhakkhayo anuppatto, kataṃ buddhassa sāsana’’nti. –
উদানৰসেন ইমা দ্ৰে গাথা অভাসি।
Udānavasena imā dve gāthā abhāsi.
তত্থ চতুক্খত্তুং পঞ্চক্খত্তুং, ৰিহারা উপনিক্খমিন্তি ‘‘মম ৰসনকৰিহারে ৰিপস্সনামনসিকারেন নিসিন্না সমণকিচ্চং মত্থকং পাপেতুং অসক্কোন্তী উতুসপ্পাযাভাৰেন ননু খো ময্হং ৰিপস্সনা মগ্গেন ঘট্টেতী’’তি চিন্তেত্ৰা চত্তারো পঞ্চ চাতি নৰ ৰারে ৰিহারা উপস্সযতো বহি নিক্খমিং। তেনাহ ‘‘অলদ্ধা চেতসো সন্তিং, চিত্তে অৰসৰত্তিনী’’তি। তত্থ চেতসো সন্তিন্তি অরিযমগ্গসমাধিং সন্ধাযাহ। চিত্তে অৰসৰত্তিনীতি ৰীরিযসমতায অভাৰেন মম ভাৰনাচিত্তে ন ৰসৰত্তিনী। সা কির অতিৰিয পগ্গহিতৰীরিযা অহোসি। তস্সা মে অট্ঠমী রত্তীতি যতো পট্ঠায আনন্দত্থেরস্স সন্তিকে ওৰাদং পটিলভিং, ততো পট্ঠায রত্তিন্দিৰমতন্দিতা ৰিপস্সনায কম্মং করোন্তী রত্তিযং চতুক্খত্তুং পঞ্চক্খত্তুং ৰিহারতো নিক্খমিত্ৰা মনসিকারং পৰত্তেন্তী ৰিসেসং অনধিগন্ত্ৰা অট্ঠমিযং রত্তিযং ৰীরিযসমতং লভিত্ৰা মগ্গপটিপাটিযা কিলেসে খেপেসিন্তি অত্থো। তেন ৰুত্তং – ‘‘তস্সা মে অট্ঠমী রত্তি, যতো তণ্হা সমূহতা’’তি। সেসং ৰুত্তনযমেৰ।
Tattha catukkhattuṃ pañcakkhattuṃ, vihārā upanikkhaminti ‘‘mama vasanakavihāre vipassanāmanasikārena nisinnā samaṇakiccaṃ matthakaṃ pāpetuṃ asakkontī utusappāyābhāvena nanu kho mayhaṃ vipassanā maggena ghaṭṭetī’’ti cintetvā cattāro pañca cāti nava vāre vihārā upassayato bahi nikkhamiṃ. Tenāha ‘‘aladdhā cetaso santiṃ, citte avasavattinī’’ti. Tattha cetaso santinti ariyamaggasamādhiṃ sandhāyāha. Citte avasavattinīti vīriyasamatāya abhāvena mama bhāvanācitte na vasavattinī. Sā kira ativiya paggahitavīriyā ahosi. Tassā me aṭṭhamī rattīti yato paṭṭhāya ānandattherassa santike ovādaṃ paṭilabhiṃ, tato paṭṭhāya rattindivamatanditā vipassanāya kammaṃ karontī rattiyaṃ catukkhattuṃ pañcakkhattuṃ vihārato nikkhamitvā manasikāraṃ pavattentī visesaṃ anadhigantvā aṭṭhamiyaṃ rattiyaṃ vīriyasamataṃ labhitvā maggapaṭipāṭiyā kilese khepesinti attho. Tena vuttaṃ – ‘‘tassā me aṭṭhamī ratti, yato taṇhā samūhatā’’ti. Sesaṃ vuttanayameva.
সামাথেরীগাথাৰণ্ণনা নিট্ঠিতা।
Sāmātherīgāthāvaṇṇanā niṭṭhitā.
দুকনিপাতৰণ্ণনা নিট্ঠিতা।
Dukanipātavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ১০. সামাথেরীগাথা • 10. Sāmātherīgāthā
