| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
२०९. समत्तिंसविरेचनकथा
209. Samattiṃsavirecanakathā
३३६. किंपनाति एत्थ किंसद्दो अनियमत्थो। लूखो किं, न लूखो किन्ति हि अत्थो। ‘‘सिनेहपानं पन तेमेती’’ति च ‘‘करोती’’ति च सम्बन्धो। सब्बत्थाति सकलकाये। सिराति कण्डरा। अयन्ति जीवको। ओळारिकदोसहरणत्थन्ति ओळारिकस्स दोसस्स अपनयनत्थं। पकतत्तेति पकतिसङ्खाते सभावे सतीति सम्बन्धो। भगवा भन्तेति योजना। कुतोति कस्स सन्तिका। वट्टति नु खोति चिन्तेसीति योजना। ततोति चिन्तनतो। सोणोति कोळिवीससोणो, भुञ्जतीति सम्बन्धो। ततोति सोणस्स सन्तिका। तस्साति सोणस्स। सोति सोणो। थेरस्साति मोग्गल्लानत्थेरस्स। इदं ‘‘पत्त’’न्तिपदे सामी, ‘‘अदासी’’ति पदे सम्पदानं। अञ्ञं पिण्डपातन्ति सम्बन्धो।
336.Kiṃpanāti ettha kiṃsaddo aniyamattho. Lūkho kiṃ, na lūkho kinti hi attho. ‘‘Sinehapānaṃ pana temetī’’ti ca ‘‘karotī’’ti ca sambandho. Sabbatthāti sakalakāye. Sirāti kaṇḍarā. Ayanti jīvako. Oḷārikadosaharaṇatthanti oḷārikassa dosassa apanayanatthaṃ. Pakatatteti pakatisaṅkhāte sabhāve satīti sambandho. Bhagavā bhanteti yojanā. Kutoti kassa santikā. Vaṭṭati nu khoti cintesīti yojanā. Tatoti cintanato. Soṇoti koḷivīsasoṇo, bhuñjatīti sambandho. Tatoti soṇassa santikā. Tassāti soṇassa. Soti soṇo. Therassāti moggallānattherassa. Idaṃ ‘‘patta’’ntipade sāmī, ‘‘adāsī’’ti pade sampadānaṃ. Aññaṃ piṇḍapātanti sambandho.
राजापि खो भुञ्जितुकामो अहोसीति सम्बन्धो। यञ्च सुजाता अदासि, यञ्च परिनिब्बानकाले चुन्दो कम्मारपुत्तो, भाजनगतेसु द्वीसुयेव तेसु पिण्डपातेसु देवता ओजं पक्खिपन्तीति योजना। अञ्ञेसूति द्वीहि पिण्डपातेहि अञ्ञेसु। इच्छन्ति रुचिं। सोति बिम्बिसारो राजा। तवेवाति तुय्हमेव। तन्ति भगवतो वचनं। राजा अकासीति सम्बन्धो। तेति असीतिकुलपुत्तसहस्सा। एतदत्थमेवाति सोणस्स अरहत्ते पतिट्ठापनत्थमेव, न रञ्ञो अनुग्गहत्थन्ति अधिप्पायो।
Rājāpi kho bhuñjitukāmo ahosīti sambandho. Yañca sujātā adāsi, yañca parinibbānakāle cundo kammāraputto, bhājanagatesu dvīsuyeva tesu piṇḍapātesu devatā ojaṃ pakkhipantīti yojanā. Aññesūti dvīhi piṇḍapātehi aññesu. Icchanti ruciṃ. Soti bimbisāro rājā. Tavevāti tuyhameva. Tanti bhagavato vacanaṃ. Rājā akāsīti sambandho. Teti asītikulaputtasahassā. Etadatthamevāti soṇassa arahatte patiṭṭhāpanatthameva, na rañño anuggahatthanti adhippāyo.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / २०९. समत्तिंसविरेचनकथा • 209. Samattiṃsavirecanakathā
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / समत्तिंसविरेचनकथा • Samattiṃsavirecanakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पज्जोतराजवत्थुकथादिवण्णना • Pajjotarājavatthukathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / समत्तिंसविरेचनकथावण्णना • Samattiṃsavirecanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / जीवकवत्थुकथादिवण्णना • Jīvakavatthukathādivaṇṇanā
