| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. সমযসুত্তং
4. Samayasuttaṃ
৫৪. ‘‘পঞ্চিমে , ভিক্খৰে, অসমযা পধানায। কতমে পঞ্চ? ইধ , ভিক্খৰে, ভিক্খু জিণ্ণো হোতি জরাযাভিভূতো। অযং, ভিক্খৰে, পঠমো অসমযো পধানায।
54. ‘‘Pañcime , bhikkhave, asamayā padhānāya. Katame pañca? Idha , bhikkhave, bhikkhu jiṇṇo hoti jarāyābhibhūto. Ayaṃ, bhikkhave, paṭhamo asamayo padhānāya.
‘‘পুন চপরং, ভিক্খৰে, ভিক্খু ব্যাধিতো হোতি ব্যাধিনাভিভূতো। অযং, ভিক্খৰে, দুতিযো অসমযো পধানায।
‘‘Puna caparaṃ, bhikkhave, bhikkhu byādhito hoti byādhinābhibhūto. Ayaṃ, bhikkhave, dutiyo asamayo padhānāya.
‘‘পুন চপরং, ভিক্খৰে, দুব্ভিক্খং হোতি দুস্সস্সং দুল্লভপিণ্ডং, ন সুকরং উঞ্ছেন পগ্গহেন যাপেতুং। অযং, ভিক্খৰে, ততিযো অসমযো পধানায।
‘‘Puna caparaṃ, bhikkhave, dubbhikkhaṃ hoti dussassaṃ dullabhapiṇḍaṃ, na sukaraṃ uñchena paggahena yāpetuṃ. Ayaṃ, bhikkhave, tatiyo asamayo padhānāya.
‘‘পুন চপরং, ভিক্খৰে, ভযং হোতি অটৰিসঙ্কোপো, চক্কসমারূল়্হা জানপদা পরিযাযন্তি। অযং, ভিক্খৰে, চতুত্থো অসমযো পধানায।
‘‘Puna caparaṃ, bhikkhave, bhayaṃ hoti aṭavisaṅkopo, cakkasamārūḷhā jānapadā pariyāyanti. Ayaṃ, bhikkhave, catuttho asamayo padhānāya.
‘‘পুন চপরং, ভিক্খৰে, সঙ্ঘো ভিন্নো হোতি। সঙ্ঘে খো পন, ভিক্খৰে, ভিন্নে অঞ্ঞমঞ্ঞং অক্কোসা চ হোন্তি, অঞ্ঞমঞ্ঞং পরিভাসা চ হোন্তি, অঞ্ঞমঞ্ঞং পরিক্খেপা চ হোন্তি, অঞ্ঞমঞ্ঞং পরিচ্চজা চ হোন্তি। তত্থ অপ্পসন্না চেৰ নপ্পসীদন্তি, পসন্নানঞ্চ একচ্চানং অঞ্ঞথত্তং হোতি। অযং, ভিক্খৰে, পঞ্চমো অসমযো পধানায। ইমে খো, ভিক্খৰে, পঞ্চ অসমযা পধানাযাতি।
‘‘Puna caparaṃ, bhikkhave, saṅgho bhinno hoti. Saṅghe kho pana, bhikkhave, bhinne aññamaññaṃ akkosā ca honti, aññamaññaṃ paribhāsā ca honti, aññamaññaṃ parikkhepā ca honti, aññamaññaṃ pariccajā ca honti. Tattha appasannā ceva nappasīdanti, pasannānañca ekaccānaṃ aññathattaṃ hoti. Ayaṃ, bhikkhave, pañcamo asamayo padhānāya. Ime kho, bhikkhave, pañca asamayā padhānāyāti.
‘‘পঞ্চিমে, ভিক্খৰে, সমযা পধানায। কতমে পঞ্চ? ইধ, ভিক্খৰে, ভিক্খু দহরো হোতি যুৰা সুসু কাল়কেসো ভদ্রেন যোব্বনেন সমন্নাগতো পঠমেন ৰযসা। অযং, ভিক্খৰে, পঠমো সমযো পধানায।
‘‘Pañcime, bhikkhave, samayā padhānāya. Katame pañca? Idha, bhikkhave, bhikkhu daharo hoti yuvā susu kāḷakeso bhadrena yobbanena samannāgato paṭhamena vayasā. Ayaṃ, bhikkhave, paṭhamo samayo padhānāya.
‘‘পুন চপরং, ভিক্খৰে, ভিক্খু অপ্পাবাধো হোতি অপ্পাতঙ্কো, সমৰেপাকিনিযা গহণিযা সমন্নাগতো নাতিসীতায নাচ্চুণ্হায মজ্ঝিমায পধানক্খমায। অযং, ভিক্খৰে, দুতিযো সমযো পধানায।
‘‘Puna caparaṃ, bhikkhave, bhikkhu appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya. Ayaṃ, bhikkhave, dutiyo samayo padhānāya.
‘‘পুন চপরং, ভিক্খৰে, সুভিক্খং হোতি সুসস্সং সুলভপিণ্ডং, সুকরং উঞ্ছেন পগ্গহেন যাপেতুং। অযং, ভিক্খৰে, ততিযো সমযো পধানায।
‘‘Puna caparaṃ, bhikkhave, subhikkhaṃ hoti susassaṃ sulabhapiṇḍaṃ, sukaraṃ uñchena paggahena yāpetuṃ. Ayaṃ, bhikkhave, tatiyo samayo padhānāya.
‘‘পুন চপরং, ভিক্খৰে, মনুস্সা সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরন্তি। অযং, ভিক্খৰে, চতুত্থো সমযো পধানায।
‘‘Puna caparaṃ, bhikkhave, manussā samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti. Ayaṃ, bhikkhave, catuttho samayo padhānāya.
‘‘পুন চপরং, ভিক্খৰে, সঙ্ঘো সমগ্গো সম্মোদমানো অৰিৰদমানো একুদ্দেসো ফাসু ৰিহরতি। সঙ্ঘে খো পন, ভিক্খৰে, সমগ্গে ন চেৰ অঞ্ঞমঞ্ঞং অক্কোসা হোন্তি, ন চ অঞ্ঞমঞ্ঞং পরিভাসা হোন্তি, ন চ অঞ্ঞমঞ্ঞং পরিক্খেপা হোন্তি, ন চ অঞ্ঞমঞ্ঞং পরিচ্চজা হোন্তি। তত্থ অপ্পসন্না চেৰ পসীদন্তি, পসন্নানঞ্চ ভিয্যোভাৰো 1 হোতি। অযং, ভিক্খৰে, পঞ্চমো সমযো পধানায। ইমে খো, ভিক্খৰে, পঞ্চ সমযা পধানাযা’’তি। চতুত্থং।
‘‘Puna caparaṃ, bhikkhave, saṅgho samaggo sammodamāno avivadamāno ekuddeso phāsu viharati. Saṅghe kho pana, bhikkhave, samagge na ceva aññamaññaṃ akkosā honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajā honti. Tattha appasannā ceva pasīdanti, pasannānañca bhiyyobhāvo 2 hoti. Ayaṃ, bhikkhave, pañcamo samayo padhānāya. Ime kho, bhikkhave, pañca samayā padhānāyā’’ti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. সমযসুত্তৰণ্ণনা • 4. Samayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-৪. পধানিযঙ্গসুত্তাদিৰণ্ণনা • 3-4. Padhāniyaṅgasuttādivaṇṇanā
