| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. සමයසුත්‌තං
4. Samayasuttaṃ
54. ‘‘පඤ්‌චිමෙ , භික්‌ඛවෙ, අසමයා පධානාය. කතමෙ පඤ්‌ච? ඉධ , භික්‌ඛවෙ, භික්‌ඛු ජිණ්‌ණො හොති ජරායාභිභූතො. අයං, භික්‌ඛවෙ, පඨමො අසමයො පධානාය.
54. ‘‘Pañcime , bhikkhave, asamayā padhānāya. Katame pañca? Idha , bhikkhave, bhikkhu jiṇṇo hoti jarāyābhibhūto. Ayaṃ, bhikkhave, paṭhamo asamayo padhānāya.
‘‘පුන චපරං, භික්‌ඛවෙ, භික්‌ඛු බ්‍යාධිතො හොති බ්‍යාධිනාභිභූතො. අයං, භික්‌ඛවෙ, දුතියො අසමයො පධානාය.
‘‘Puna caparaṃ, bhikkhave, bhikkhu byādhito hoti byādhinābhibhūto. Ayaṃ, bhikkhave, dutiyo asamayo padhānāya.
‘‘පුන චපරං, භික්‌ඛවෙ, දුබ්‌භික්‌ඛං හොති දුස්‌සස්‌සං දුල්‌ලභපිණ්‌ඩං, න සුකරං උඤ්‌ඡෙන පග්‌ගහෙන යාපෙතුං. අයං, භික්‌ඛවෙ, තතියො අසමයො පධානාය.
‘‘Puna caparaṃ, bhikkhave, dubbhikkhaṃ hoti dussassaṃ dullabhapiṇḍaṃ, na sukaraṃ uñchena paggahena yāpetuṃ. Ayaṃ, bhikkhave, tatiyo asamayo padhānāya.
‘‘පුන චපරං, භික්‌ඛවෙ, භයං හොති අටවිසඞ්‌කොපො, චක්‌කසමාරූළ්‌හා ජානපදා පරියායන්‌ති. අයං, භික්‌ඛවෙ, චතුත්‌ථො අසමයො පධානාය.
‘‘Puna caparaṃ, bhikkhave, bhayaṃ hoti aṭavisaṅkopo, cakkasamārūḷhā jānapadā pariyāyanti. Ayaṃ, bhikkhave, catuttho asamayo padhānāya.
‘‘පුන චපරං, භික්‌ඛවෙ, සඞ්‌ඝො භින්‌නො හොති. සඞ්‌ඝෙ ඛො පන, භික්‌ඛවෙ, භින්‌නෙ අඤ්‌ඤමඤ්‌ඤං අක්‌කොසා ච හොන්‌ති, අඤ්‌ඤමඤ්‌ඤං පරිභාසා ච හොන්‌ති, අඤ්‌ඤමඤ්‌ඤං පරික්‌ඛෙපා ච හොන්‌ති, අඤ්‌ඤමඤ්‌ඤං පරිච්‌චජා ච හොන්‌ති. තත්‌ථ අප්‌පසන්‌නා චෙව නප්‌පසීදන්‌ති, පසන්‌නානඤ්‌ච එකච්‌චානං අඤ්‌ඤථත්‌තං හොති. අයං, භික්‌ඛවෙ, පඤ්‌චමො අසමයො පධානාය. ඉමෙ ඛො, භික්‌ඛවෙ, පඤ්‌ච අසමයා පධානායාති.
‘‘Puna caparaṃ, bhikkhave, saṅgho bhinno hoti. Saṅghe kho pana, bhikkhave, bhinne aññamaññaṃ akkosā ca honti, aññamaññaṃ paribhāsā ca honti, aññamaññaṃ parikkhepā ca honti, aññamaññaṃ pariccajā ca honti. Tattha appasannā ceva nappasīdanti, pasannānañca ekaccānaṃ aññathattaṃ hoti. Ayaṃ, bhikkhave, pañcamo asamayo padhānāya. Ime kho, bhikkhave, pañca asamayā padhānāyāti.
‘‘පඤ්‌චිමෙ, භික්‌ඛවෙ, සමයා පධානාය. කතමෙ පඤ්‌ච? ඉධ, භික්‌ඛවෙ, භික්‌ඛු දහරො හොති යුවා සුසු කාළකෙසො භද්‍රෙන යොබ්‌බනෙන සමන්‌නාගතො පඨමෙන වයසා. අයං, භික්‌ඛවෙ, පඨමො සමයො පධානාය.
‘‘Pañcime, bhikkhave, samayā padhānāya. Katame pañca? Idha, bhikkhave, bhikkhu daharo hoti yuvā susu kāḷakeso bhadrena yobbanena samannāgato paṭhamena vayasā. Ayaṃ, bhikkhave, paṭhamo samayo padhānāya.
‘‘පුන චපරං, භික්‌ඛවෙ, භික්‌ඛු අප්‌පාබාධො හොති අප්‌පාතඞ්‌කො, සමවෙපාකිනියා ගහණියා සමන්‌නාගතො නාතිසීතාය නාච්‌චුණ්‌හාය මජ්‌ඣිමාය පධානක්‌ඛමාය. අයං, භික්‌ඛවෙ, දුතියො සමයො පධානාය.
‘‘Puna caparaṃ, bhikkhave, bhikkhu appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya. Ayaṃ, bhikkhave, dutiyo samayo padhānāya.
‘‘පුන චපරං, භික්‌ඛවෙ, සුභික්‌ඛං හොති සුසස්‌සං සුලභපිණ්‌ඩං, සුකරං උඤ්‌ඡෙන පග්‌ගහෙන යාපෙතුං. අයං, භික්‌ඛවෙ, තතියො සමයො පධානාය.
‘‘Puna caparaṃ, bhikkhave, subhikkhaṃ hoti susassaṃ sulabhapiṇḍaṃ, sukaraṃ uñchena paggahena yāpetuṃ. Ayaṃ, bhikkhave, tatiyo samayo padhānāya.
‘‘පුන චපරං, භික්‌ඛවෙ, මනුස්‌සා සමග්‌ගා සම්‌මොදමානා අවිවදමානා ඛීරොදකීභූතා අඤ්‌ඤමඤ්‌ඤං පියචක්‌ඛූහි සම්‌පස්‌සන්‌තා විහරන්‌ති. අයං, භික්‌ඛවෙ, චතුත්‌ථො සමයො පධානාය.
‘‘Puna caparaṃ, bhikkhave, manussā samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti. Ayaṃ, bhikkhave, catuttho samayo padhānāya.
‘‘පුන චපරං, භික්‌ඛවෙ, සඞ්‌ඝො සමග්‌ගො සම්‌මොදමානො අවිවදමානො එකුද්‌දෙසො ඵාසු විහරති. සඞ්‌ඝෙ ඛො පන, භික්‌ඛවෙ, සමග්‌ගෙ න චෙව අඤ්‌ඤමඤ්‌ඤං අක්‌කොසා හොන්‌ති, න ච අඤ්‌ඤමඤ්‌ඤං පරිභාසා හොන්‌ති, න ච අඤ්‌ඤමඤ්‌ඤං පරික්‌ඛෙපා හොන්‌ති, න ච අඤ්‌ඤමඤ්‌ඤං පරිච්‌චජා හොන්‌ති. තත්‌ථ අප්‌පසන්‌නා චෙව පසීදන්‌ති, පසන්‌නානඤ්‌ච භිය්‍යොභාවො 1 හොති. අයං, භික්‌ඛවෙ, පඤ්‌චමො සමයො පධානාය. ඉමෙ ඛො, භික්‌ඛවෙ, පඤ්‌ච සමයා පධානායා’’ති. චතුත්‌ථං.
‘‘Puna caparaṃ, bhikkhave, saṅgho samaggo sammodamāno avivadamāno ekuddeso phāsu viharati. Saṅghe kho pana, bhikkhave, samagge na ceva aññamaññaṃ akkosā honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajā honti. Tattha appasannā ceva pasīdanti, pasannānañca bhiyyobhāvo 2 hoti. Ayaṃ, bhikkhave, pañcamo samayo padhānāya. Ime kho, bhikkhave, pañca samayā padhānāyā’’ti. Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. සමයසුත්‌තවණ්‌ණනා • 4. Samayasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-4. පධානියඞ්‌ගසුත්‌තාදිවණ්‌ණනා • 3-4. Padhāniyaṅgasuttādivaṇṇanā
