| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. སམཡསུཏྟཾ
4. Samayasuttaṃ
༥༤. ‘‘པཉྩིམེ , བྷིཀྑཝེ, ཨསམཡཱ པདྷཱནཱཡ། ཀཏམེ པཉྩ? ཨིདྷ , བྷིཀྑཝེ, བྷིཀྑུ ཛིཎྞོ ཧོཏི ཛརཱཡཱབྷིབྷཱུཏོ། ཨཡཾ, བྷིཀྑཝེ, པཋམོ ཨསམཡོ པདྷཱནཱཡ།
54. ‘‘Pañcime , bhikkhave, asamayā padhānāya. Katame pañca? Idha , bhikkhave, bhikkhu jiṇṇo hoti jarāyābhibhūto. Ayaṃ, bhikkhave, paṭhamo asamayo padhānāya.
‘‘པུན ཙཔརཾ, བྷིཀྑཝེ, བྷིཀྑུ བྱཱདྷིཏོ ཧོཏི བྱཱདྷིནཱབྷིབྷཱུཏོ། ཨཡཾ, བྷིཀྑཝེ, དུཏིཡོ ཨསམཡོ པདྷཱནཱཡ།
‘‘Puna caparaṃ, bhikkhave, bhikkhu byādhito hoti byādhinābhibhūto. Ayaṃ, bhikkhave, dutiyo asamayo padhānāya.
‘‘པུན ཙཔརཾ, བྷིཀྑཝེ, དུབྦྷིཀྑཾ ཧོཏི དུསྶསྶཾ དུལླབྷཔིཎྜཾ, ན སུཀརཾ ཨུཉྪེན པགྒཧེན ཡཱཔེཏུཾ། ཨཡཾ, བྷིཀྑཝེ, ཏཏིཡོ ཨསམཡོ པདྷཱནཱཡ།
‘‘Puna caparaṃ, bhikkhave, dubbhikkhaṃ hoti dussassaṃ dullabhapiṇḍaṃ, na sukaraṃ uñchena paggahena yāpetuṃ. Ayaṃ, bhikkhave, tatiyo asamayo padhānāya.
‘‘པུན ཙཔརཾ, བྷིཀྑཝེ, བྷཡཾ ཧོཏི ཨཊཝིསངྐོཔོ, ཙཀྐསམཱརཱུལ༹ྷཱ ཛཱནཔདཱ པརིཡཱཡནྟི། ཨཡཾ, བྷིཀྑཝེ, ཙཏུཏྠོ ཨསམཡོ པདྷཱནཱཡ།
‘‘Puna caparaṃ, bhikkhave, bhayaṃ hoti aṭavisaṅkopo, cakkasamārūḷhā jānapadā pariyāyanti. Ayaṃ, bhikkhave, catuttho asamayo padhānāya.
‘‘པུན ཙཔརཾ, བྷིཀྑཝེ, སངྒྷོ བྷིནྣོ ཧོཏི། སངྒྷེ ཁོ པན, བྷིཀྑཝེ, བྷིནྣེ ཨཉྙམཉྙཾ ཨཀྐོསཱ ཙ ཧོནྟི, ཨཉྙམཉྙཾ པརིབྷཱསཱ ཙ ཧོནྟི, ཨཉྙམཉྙཾ པརིཀྑེཔཱ ཙ ཧོནྟི, ཨཉྙམཉྙཾ པརིཙྩཛཱ ཙ ཧོནྟི། ཏཏྠ ཨཔྤསནྣཱ ཙེཝ ནཔྤསཱིདནྟི, པསནྣཱནཉྩ ཨེཀཙྩཱནཾ ཨཉྙཐཏྟཾ ཧོཏི། ཨཡཾ, བྷིཀྑཝེ, པཉྩམོ ཨསམཡོ པདྷཱནཱཡ། ཨིམེ ཁོ, བྷིཀྑཝེ, པཉྩ ཨསམཡཱ པདྷཱནཱཡཱཏི།
‘‘Puna caparaṃ, bhikkhave, saṅgho bhinno hoti. Saṅghe kho pana, bhikkhave, bhinne aññamaññaṃ akkosā ca honti, aññamaññaṃ paribhāsā ca honti, aññamaññaṃ parikkhepā ca honti, aññamaññaṃ pariccajā ca honti. Tattha appasannā ceva nappasīdanti, pasannānañca ekaccānaṃ aññathattaṃ hoti. Ayaṃ, bhikkhave, pañcamo asamayo padhānāya. Ime kho, bhikkhave, pañca asamayā padhānāyāti.
‘‘པཉྩིམེ, བྷིཀྑཝེ, སམཡཱ པདྷཱནཱཡ། ཀཏམེ པཉྩ? ཨིདྷ, བྷིཀྑཝེ, བྷིཀྑུ དཧརོ ཧོཏི ཡུཝཱ སུསུ ཀཱལ༹ཀེསོ བྷདྲེན ཡོབྦནེན སམནྣཱགཏོ པཋམེན ཝཡསཱ། ཨཡཾ, བྷིཀྑཝེ, པཋམོ སམཡོ པདྷཱནཱཡ།
‘‘Pañcime, bhikkhave, samayā padhānāya. Katame pañca? Idha, bhikkhave, bhikkhu daharo hoti yuvā susu kāḷakeso bhadrena yobbanena samannāgato paṭhamena vayasā. Ayaṃ, bhikkhave, paṭhamo samayo padhānāya.
‘‘པུན ཙཔརཾ, བྷིཀྑཝེ, བྷིཀྑུ ཨཔྤཱབཱདྷོ ཧོཏི ཨཔྤཱཏངྐོ, སམཝེཔཱཀིནིཡཱ གཧཎིཡཱ སམནྣཱགཏོ ནཱཏིསཱིཏཱཡ ནཱཙྩུཎྷཱཡ མཛ྄ཛྷིམཱཡ པདྷཱནཀྑམཱཡ། ཨཡཾ, བྷིཀྑཝེ, དུཏིཡོ སམཡོ པདྷཱནཱཡ།
‘‘Puna caparaṃ, bhikkhave, bhikkhu appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya. Ayaṃ, bhikkhave, dutiyo samayo padhānāya.
‘‘པུན ཙཔརཾ, བྷིཀྑཝེ, སུབྷིཀྑཾ ཧོཏི སུསསྶཾ སུལབྷཔིཎྜཾ, སུཀརཾ ཨུཉྪེན པགྒཧེན ཡཱཔེཏུཾ། ཨཡཾ, བྷིཀྑཝེ, ཏཏིཡོ སམཡོ པདྷཱནཱཡ།
‘‘Puna caparaṃ, bhikkhave, subhikkhaṃ hoti susassaṃ sulabhapiṇḍaṃ, sukaraṃ uñchena paggahena yāpetuṃ. Ayaṃ, bhikkhave, tatiyo samayo padhānāya.
‘‘པུན ཙཔརཾ, བྷིཀྑཝེ, མནུསྶཱ སམགྒཱ སམྨོདམཱནཱ ཨཝིཝདམཱནཱ ཁཱིརོདཀཱིབྷཱུཏཱ ཨཉྙམཉྙཾ པིཡཙཀྑཱུཧི སམྤསྶནྟཱ ཝིཧརནྟི། ཨཡཾ, བྷིཀྑཝེ, ཙཏུཏྠོ སམཡོ པདྷཱནཱཡ།
‘‘Puna caparaṃ, bhikkhave, manussā samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti. Ayaṃ, bhikkhave, catuttho samayo padhānāya.
‘‘པུན ཙཔརཾ, བྷིཀྑཝེ, སངྒྷོ སམགྒོ སམྨོདམཱནོ ཨཝིཝདམཱནོ ཨེཀུདྡེསོ ཕཱསུ ཝིཧརཏི། སངྒྷེ ཁོ པན, བྷིཀྑཝེ, སམགྒེ ན ཙེཝ ཨཉྙམཉྙཾ ཨཀྐོསཱ ཧོནྟི, ན ཙ ཨཉྙམཉྙཾ པརིབྷཱསཱ ཧོནྟི, ན ཙ ཨཉྙམཉྙཾ པརིཀྑེཔཱ ཧོནྟི, ན ཙ ཨཉྙམཉྙཾ པརིཙྩཛཱ ཧོནྟི། ཏཏྠ ཨཔྤསནྣཱ ཙེཝ པསཱིདནྟི, པསནྣཱནཉྩ བྷིཡྻོབྷཱཝོ 1 ཧོཏི། ཨཡཾ, བྷིཀྑཝེ, པཉྩམོ སམཡོ པདྷཱནཱཡ། ཨིམེ ཁོ, བྷིཀྑཝེ, པཉྩ སམཡཱ པདྷཱནཱཡཱ’’ཏི། ཙཏུཏྠཾ།
‘‘Puna caparaṃ, bhikkhave, saṅgho samaggo sammodamāno avivadamāno ekuddeso phāsu viharati. Saṅghe kho pana, bhikkhave, samagge na ceva aññamaññaṃ akkosā honti, na ca aññamaññaṃ paribhāsā honti, na ca aññamaññaṃ parikkhepā honti, na ca aññamaññaṃ pariccajā honti. Tattha appasannā ceva pasīdanti, pasannānañca bhiyyobhāvo 2 hoti. Ayaṃ, bhikkhave, pañcamo samayo padhānāya. Ime kho, bhikkhave, pañca samayā padhānāyā’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. སམཡསུཏྟཝཎྞནཱ • 4. Samayasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༣-༤. པདྷཱནིཡངྒསུཏྟཱདིཝཎྞནཱ • 3-4. Padhāniyaṅgasuttādivaṇṇanā
