| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. সামঞ্ঞৰগ্গো
5. Sāmaññavaggo
১. সম্বাধসুত্তং
1. Sambādhasuttaṃ
৪২. একং সমযং আযস্মা আনন্দো কোসম্বিযং ৰিহরতি ঘোসিতারামে। অথ খো আযস্মা উদাযী যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো আযস্মা উদাযী আযস্মন্তং আনন্দং এতদৰোচ – ‘‘ৰুত্তমিদং, আৰুসো, পঞ্চালচণ্ডেন দেৰপুত্তেন –
42. Ekaṃ samayaṃ āyasmā ānando kosambiyaṃ viharati ghositārāme. Atha kho āyasmā udāyī yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā udāyī āyasmantaṃ ānandaṃ etadavoca – ‘‘vuttamidaṃ, āvuso, pañcālacaṇḍena devaputtena –
যো ঝানমবুজ্ঝি বুদ্ধো, পটিলীননিসভো মুনী’’তি॥
Yo jhānamabujjhi buddho, paṭilīnanisabho munī’’ti.
‘‘কতমো, আৰুসো, সম্বাধো, কতমো সম্বাধে ওকাসাধিগমো ৰুত্তো ভগৰতা’’তি? ‘‘পঞ্চিমে, আৰুসো, কামগুণা সম্বাধো ৰুত্তো ভগৰতা। কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে॰… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা। ইমে খো, আৰুসো, পঞ্চ কামগুণা সম্বাধো ৰুত্তো ভগৰতা।
‘‘Katamo, āvuso, sambādho, katamo sambādhe okāsādhigamo vutto bhagavatā’’ti? ‘‘Pañcime, āvuso, kāmaguṇā sambādho vutto bhagavatā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho, āvuso, pañca kāmaguṇā sambādho vutto bhagavatā.
‘‘ইধাৰুসো, ভিক্খু ৰিৰিচ্চেৰ কামেহি…পে॰… পঠমং ঝানং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন। তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ ৰিতক্কৰিচারা অনিরুদ্ধা হোন্তি, অযমেত্থ সম্বাধো।
‘‘Idhāvuso, bhikkhu vivicceva kāmehi…pe… paṭhamaṃ jhānaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena. Tatrāpatthi sambādho. Kiñca tattha sambādho? Yadeva tattha vitakkavicārā aniruddhā honti, ayamettha sambādho.
‘‘পুন চপরং, আৰুসো, ভিক্খু ৰিতক্কৰিচারানং ৰূপসমা…পে॰… দুতিযং ঝানং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন । তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ পীতি অনিরুদ্ধা হোতি , অযমেত্থ সম্বাধো।
‘‘Puna caparaṃ, āvuso, bhikkhu vitakkavicārānaṃ vūpasamā…pe… dutiyaṃ jhānaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena . Tatrāpatthi sambādho. Kiñca tattha sambādho? Yadeva tattha pīti aniruddhā hoti , ayamettha sambādho.
‘‘পুন চপরং, আৰুসো, ভিক্খু পীতিযা চ ৰিরাগা…পে॰… ততিযং ঝানং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন। তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ উপেক্খাসুখং অনিরুদ্ধং হোতি, অযমেত্থ সম্বাধো।
‘‘Puna caparaṃ, āvuso, bhikkhu pītiyā ca virāgā…pe… tatiyaṃ jhānaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena. Tatrāpatthi sambādho. Kiñca tattha sambādho? Yadeva tattha upekkhāsukhaṃ aniruddhaṃ hoti, ayamettha sambādho.
‘‘পুন চপরং, আৰুসো, ভিক্খু সুখস্স চ পহানা…পে॰… চতুত্থং ঝানং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন। তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ রূপসঞ্ঞা অনিরুদ্ধা হোতি, অযমেত্থ সম্বাধো।
‘‘Puna caparaṃ, āvuso, bhikkhu sukhassa ca pahānā…pe… catutthaṃ jhānaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena. Tatrāpatthi sambādho. Kiñca tattha sambādho? Yadeva tattha rūpasaññā aniruddhā hoti, ayamettha sambādho.
‘‘পুন চপরং, আৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন। তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ আকাসানঞ্চাযতনসঞ্ঞা অনিরুদ্ধা হোতি, অযমেত্থ সম্বাধো।
‘‘Puna caparaṃ, āvuso, bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena. Tatrāpatthi sambādho. Kiñca tattha sambādho? Yadeva tattha ākāsānañcāyatanasaññā aniruddhā hoti, ayamettha sambādho.
‘‘পুন চপরং, আৰুসো, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন । তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ ৰিঞ্ঞাণঞ্চাযতনসঞ্ঞা অনিরুদ্ধা হোতি, অযমেত্থ সম্বাধো।
‘‘Puna caparaṃ, āvuso, bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena . Tatrāpatthi sambādho. Kiñca tattha sambādho? Yadeva tattha viññāṇañcāyatanasaññā aniruddhā hoti, ayamettha sambādho.
‘‘পুন চপরং, আৰুসো, ভিক্খু সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন। তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ আকিঞ্চঞ্ঞাযতনসঞ্ঞা অনিরুদ্ধা হোতি, অযমেত্থ সম্বাধো।
‘‘Puna caparaṃ, āvuso, bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena. Tatrāpatthi sambādho. Kiñca tattha sambādho? Yadeva tattha ākiñcaññāyatanasaññā aniruddhā hoti, ayamettha sambādho.
‘‘পুন চপরং, আৰুসো, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন। তত্রাপত্থি সম্বাধো। কিঞ্চ তত্থ সম্বাধো? যদেৰ তত্থ নেৰসঞ্ঞানাসঞ্ঞাযতনসঞ্ঞা অনিরুদ্ধা হোতি, অযমেত্থ সম্বাধো।
‘‘Puna caparaṃ, āvuso, bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati. Ettāvatāpi kho, āvuso, sambādhe okāsādhigamo vutto bhagavatā pariyāyena. Tatrāpatthi sambādho. Kiñca tattha sambādho? Yadeva tattha nevasaññānāsaññāyatanasaññā aniruddhā hoti, ayamettha sambādho.
‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি। এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা নিপ্পরিযাযেনা’’তি। পঠমং।
‘‘Puna caparaṃ, āvuso, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. Ettāvatāpi kho, āvuso, sambādhe okāsādhigamo vutto bhagavatā nippariyāyenā’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. সম্বাধসুত্তৰণ্ণনা • 1. Sambādhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. সম্বাধসুত্তাদিৰণ্ণনা • 1-10. Sambādhasuttādivaṇṇanā
