| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
५. सामञ्ञवग्गो
5. Sāmaññavaggo
१. सम्बाधसुत्तवण्णना
1. Sambādhasuttavaṇṇanā
४२. पञ्चमस्स पठमे उदायीति काळुदायित्थेरो। अविद्वाति अञ्ञासि। भूरिमेधसोति महापञ्ञो। यो झानमबुज्झीति यो झानं अबुज्झि। पटिलीननिसभोति एकीभाववसेन पटिलीनो चेव उत्तमट्ठेन च निसभो। मुनीति बुद्धमुनि। परियायेनाति एकेन कारणेन। कामसम्बाधस्स हि अभावमत्तेनेव पठमज्झानं ओकासाधिगमो नाम, न सब्बथा सब्बं। तत्रापत्थि सम्बाधोति तस्मिम्पि पठमज्झाने सम्बाधो पटिपीळनं अत्थियेव। तत्रापित्थीतिपि पाठो। किञ्च तत्थ सम्बाधोति तस्मिं पन झाने किं सम्बाधो नाम। अयमेत्थ सम्बाधोति अयं वितक्कविचारानं अनिरुद्धभावो सम्बाधो संपीळा नाम। इमिना उपायेन सब्बवारेसु अत्थो वेदितब्बो। निप्परियायेनाति न एकेन कारणेन, अथ खो आसवक्खयो नाम सब्बसम्बाधानं पहीनत्ता सब्बेन सब्बं ओकासाधिगमो नामाति।
42. Pañcamassa paṭhame udāyīti kāḷudāyitthero. Avidvāti aññāsi. Bhūrimedhasoti mahāpañño. Yo jhānamabujjhīti yo jhānaṃ abujjhi. Paṭilīnanisabhoti ekībhāvavasena paṭilīno ceva uttamaṭṭhena ca nisabho. Munīti buddhamuni. Pariyāyenāti ekena kāraṇena. Kāmasambādhassa hi abhāvamatteneva paṭhamajjhānaṃ okāsādhigamo nāma, na sabbathā sabbaṃ. Tatrāpatthi sambādhoti tasmimpi paṭhamajjhāne sambādho paṭipīḷanaṃ atthiyeva. Tatrāpitthītipi pāṭho. Kiñca tattha sambādhoti tasmiṃ pana jhāne kiṃ sambādho nāma. Ayamettha sambādhoti ayaṃ vitakkavicārānaṃ aniruddhabhāvo sambādho saṃpīḷā nāma. Iminā upāyena sabbavāresu attho veditabbo. Nippariyāyenāti na ekena kāraṇena, atha kho āsavakkhayo nāma sabbasambādhānaṃ pahīnattā sabbena sabbaṃ okāsādhigamo nāmāti.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १. सम्बाधसुत्तं • 1. Sambādhasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-१०. सम्बाधसुत्तादिवण्णना • 1-10. Sambādhasuttādivaṇṇanā
