| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ததியவக்³கோ³
3. Tatiyavaggo
1. ஸம்ப³ஹுலஸுத்தங்
1. Sambahulasuttaṃ
157. ஏவங் மே ஸுதங் – ஏகங் ஸமயங் ப⁴க³வா ஸக்கேஸு விஹரதி ஸிலாவதியங். தேன கோ² பன ஸமயேன ஸம்ப³ஹுலா பி⁴க்கூ² ப⁴க³வதோ அவிதூ³ரே அப்பமத்தா ஆதாபினோ பஹிதத்தா விஹரந்தி. அத² கோ² மாரோ பாபிமா ப்³ராஹ்மணவண்ணங் அபி⁴னிம்மினித்வா மஹந்தேன ஜடண்டு³வேன அஜினக்கி²பனிவத்தோ² ஜிண்ணோ கோ³பானஸிவங்கோ கு⁴ருகு⁴ருபஸ்ஸாஸீ உது³ம்ப³ரத³ண்ட³ங் க³ஹெத்வா யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² ஏதத³வோச – ‘‘த³ஹரா ப⁴வந்தோ பப்³ப³ஜிதா ஸுஸூ காளகேஸா ப⁴த்³ரேன யொப்³ப³னேன ஸமன்னாக³தா பட²மேன வயஸா அனிக்கீளிதாவினோ காமேஸு. பு⁴ஞ்ஜந்து ப⁴வந்தோ மானுஸகே காமே. மா ஸந்தி³ட்டி²கங் ஹித்வா காலிகங் அனுதா⁴வித்தா²’’தி. ‘‘ந கோ² மயங், ப்³ராஹ்மண, ஸந்தி³ட்டி²கங் ஹித்வா காலிகங் அனுதா⁴வாம. காலிகஞ்ச கோ² மயங், ப்³ராஹ்மண, ஹித்வா ஸந்தி³ட்டி²கங் அனுதா⁴வாம. காலிகா ஹி, ப்³ராஹ்மண, காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ. ஸந்தி³ட்டி²கோ அயங் த⁴ம்மோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’’தி. ஏவங் வுத்தே, மாரோ பாபிமா ஸீஸங் ஓகம்பெத்வா ஜிவ்ஹங் நில்லாலெத்வா திவிஸாக²ங் நலாடே நலாடிகங் வுட்டா²பெத்வா த³ண்ட³மோலுப்³ப⁴ பக்காமி.
157. Evaṃ me sutaṃ – ekaṃ samayaṃ bhagavā sakkesu viharati silāvatiyaṃ. Tena kho pana samayena sambahulā bhikkhū bhagavato avidūre appamattā ātāpino pahitattā viharanti. Atha kho māro pāpimā brāhmaṇavaṇṇaṃ abhinimminitvā mahantena jaṭaṇḍuvena ajinakkhipanivattho jiṇṇo gopānasivaṅko ghurughurupassāsī udumbaradaṇḍaṃ gahetvā yena te bhikkhū tenupasaṅkami; upasaṅkamitvā te bhikkhū etadavoca – ‘‘daharā bhavanto pabbajitā susū kāḷakesā bhadrena yobbanena samannāgatā paṭhamena vayasā anikkīḷitāvino kāmesu. Bhuñjantu bhavanto mānusake kāme. Mā sandiṭṭhikaṃ hitvā kālikaṃ anudhāvitthā’’ti. ‘‘Na kho mayaṃ, brāhmaṇa, sandiṭṭhikaṃ hitvā kālikaṃ anudhāvāma. Kālikañca kho mayaṃ, brāhmaṇa, hitvā sandiṭṭhikaṃ anudhāvāma. Kālikā hi, brāhmaṇa, kāmā vuttā bhagavatā bahudukkhā bahupāyāsā, ādīnavo ettha bhiyyo. Sandiṭṭhiko ayaṃ dhammo akāliko ehipassiko opaneyyiko paccattaṃ veditabbo viññūhī’’ti. Evaṃ vutte, māro pāpimā sīsaṃ okampetvā jivhaṃ nillāletvā tivisākhaṃ nalāṭe nalāṭikaṃ vuṭṭhāpetvā daṇḍamolubbha pakkāmi.
அத² கோ² தே பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘இத⁴ மயங், ப⁴ந்தே, ப⁴க³வதோ அவிதூ³ரே அப்பமத்தா ஆதாபினோ பஹிதத்தா விஹராம. அத² கோ², ப⁴ந்தே, அஞ்ஞதரோ ப்³ராஹ்மணோ மஹந்தேன ஜடண்டு³வேன அஜினக்கி²பனிவத்தோ² ஜிண்ணோ கோ³பானஸிவங்கோ கு⁴ருகு⁴ருபஸ்ஸாஸீ உது³ம்ப³ரத³ண்ட³ங் க³ஹெத்வா யேன மயங் தேனுபஸங்கமி; உபஸங்கமித்வா அம்ஹே ஏதத³வோச – ‘த³ஹரா ப⁴வந்தோ பப்³ப³ஜிதா ஸுஸூ காளகேஸா ப⁴த்³ரேன யொப்³ப³னேன ஸமன்னாக³தா பட²மேன வயஸா அனிக்கீளிதாவினோ காமேஸு. பு⁴ஞ்ஜந்து ப⁴வந்தோ மானுஸகே காமே. மா ஸந்தி³ட்டி²கங் ஹித்வா காலிகங் அனுதா⁴வித்தா²’தி. ஏவங் வுத்தே, மயங், ப⁴ந்தே, தங் ப்³ராஹ்மணங் ஏதத³வோசும்ஹ – ‘ந கோ² மயங், ப்³ராஹ்மண, ஸந்தி³ட்டி²கங் ஹித்வா காலிகங் அனுதா⁴வாம. காலிகஞ்ச கோ² மயங், ப்³ராஹ்மண, ஹித்வா ஸந்தி³ட்டி²கங் அனுதா⁴வாம. காலிகா ஹி, ப்³ராஹ்மண, காமா வுத்தா ப⁴க³வதா ப³ஹுது³க்கா² ப³ஹுபாயாஸா, ஆதீ³னவோ எத்த² பி⁴ய்யோ. ஸந்தி³ட்டி²கோ அயங் த⁴ம்மோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’தி. ஏவங் வுத்தே, ப⁴ந்தே, ஸோ ப்³ராஹ்மணோ ஸீஸங் ஓகம்பெத்வா ஜிவ்ஹங் நில்லாலெத்வா திவிஸாக²ங் நலாடே நலாடிகங் வுட்டா²பெத்வா த³ண்ட³மோலுப்³ப⁴ பக்கந்தோ’’தி.
Atha kho te bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha mayaṃ, bhante, bhagavato avidūre appamattā ātāpino pahitattā viharāma. Atha kho, bhante, aññataro brāhmaṇo mahantena jaṭaṇḍuvena ajinakkhipanivattho jiṇṇo gopānasivaṅko ghurughurupassāsī udumbaradaṇḍaṃ gahetvā yena mayaṃ tenupasaṅkami; upasaṅkamitvā amhe etadavoca – ‘daharā bhavanto pabbajitā susū kāḷakesā bhadrena yobbanena samannāgatā paṭhamena vayasā anikkīḷitāvino kāmesu. Bhuñjantu bhavanto mānusake kāme. Mā sandiṭṭhikaṃ hitvā kālikaṃ anudhāvitthā’ti. Evaṃ vutte, mayaṃ, bhante, taṃ brāhmaṇaṃ etadavocumha – ‘na kho mayaṃ, brāhmaṇa, sandiṭṭhikaṃ hitvā kālikaṃ anudhāvāma. Kālikañca kho mayaṃ, brāhmaṇa, hitvā sandiṭṭhikaṃ anudhāvāma. Kālikā hi, brāhmaṇa, kāmā vuttā bhagavatā bahudukkhā bahupāyāsā, ādīnavo ettha bhiyyo. Sandiṭṭhiko ayaṃ dhammo akāliko ehipassiko opaneyyiko paccattaṃ veditabbo viññūhī’ti. Evaṃ vutte, bhante, so brāhmaṇo sīsaṃ okampetvā jivhaṃ nillāletvā tivisākhaṃ nalāṭe nalāṭikaṃ vuṭṭhāpetvā daṇḍamolubbha pakkanto’’ti.
‘‘நேஸோ, பி⁴க்க²வே, ப்³ராஹ்மணோ. மாரோ ஏஸோ பாபிமா தும்ஹாகங் விசக்கு²கம்மாய ஆக³தோ’’தி. அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் கா³த²ங் அபா⁴ஸி –
‘‘Neso, bhikkhave, brāhmaṇo. Māro eso pāpimā tumhākaṃ vicakkhukammāya āgato’’ti. Atha kho bhagavā etamatthaṃ viditvā tāyaṃ velāyaṃ imaṃ gāthaṃ abhāsi –
‘‘யோ து³க்க²மத்³த³க்கி² யதோனிதா³னங்,
‘‘Yo dukkhamaddakkhi yatonidānaṃ,
காமேஸு ஸோ ஜந்து கத²ங் நமெய்ய;
Kāmesu so jantu kathaṃ nameyya;
உபதி⁴ங் விதி³த்வா ஸங்கோ³தி லோகே,
Upadhiṃ viditvā saṅgoti loke,
தஸ்ஸேவ ஜந்து வினயாய ஸிக்கே²’’தி.
Tasseva jantu vinayāya sikkhe’’ti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸம்ப³ஹுலஸுத்தவண்ணனா • 1. Sambahulasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸம்ப³ஹுலஸுத்தவண்ணனா • 1. Sambahulasuttavaṇṇanā
