| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. තතියවග්‌ගො
3. Tatiyavaggo
1. සම්‌බහුලසුත්‌තං
1. Sambahulasuttaṃ
157. එවං මෙ සුතං – එකං සමයං භගවා සක්‌කෙසු විහරති සිලාවතියං. තෙන ඛො පන සමයෙන සම්‌බහුලා භික්‌ඛූ භගවතො අවිදූරෙ අප්‌පමත්‌තා ආතාපිනො පහිතත්‌තා විහරන්‌ති. අථ ඛො මාරො පාපිමා බ්‍රාහ්‌මණවණ්‌ණං අභිනිම්‌මිනිත්‌වා මහන්‌තෙන ජටණ්‌ඩුවෙන අජිනක්‌ඛිපනිවත්‌ථො ජිණ්‌ණො ගොපානසිවඞ්‌කො ඝුරුඝුරුපස්‌සාසී උදුම්‌බරදණ්‌ඩං ගහෙත්‌වා යෙන තෙ භික්‌ඛූ තෙනුපසඞ්‌කමි; උපසඞ්‌කමිත්‌වා තෙ භික්‌ඛූ එතදවොච – ‘‘දහරා භවන්‌තො පබ්‌බජිතා සුසූ කාළකෙසා භද්‍රෙන යොබ්‌බනෙන සමන්‌නාගතා පඨමෙන වයසා අනික්‌කීළිතාවිනො කාමෙසු. භුඤ්‌ජන්‌තු භවන්‌තො මානුසකෙ කාමෙ. මා සන්‌දිට්‌ඨිකං හිත්‌වා කාලිකං අනුධාවිත්‌ථා’’ති. ‘‘න ඛො මයං, බ්‍රාහ්‌මණ, සන්‌දිට්‌ඨිකං හිත්‌වා කාලිකං අනුධාවාම. කාලිකඤ්‌ච ඛො මයං, බ්‍රාහ්‌මණ, හිත්‌වා සන්‌දිට්‌ඨිකං අනුධාවාම. කාලිකා හි, බ්‍රාහ්‌මණ, කාමා වුත්‌තා භගවතා බහුදුක්‌ඛා බහුපායාසා, ආදීනවො එත්‌ථ භිය්‍යො. සන්‌දිට්‌ඨිකො අයං ධම්‌මො අකාලිකො එහිපස්‌සිකො ඔපනෙය්‍යිකො පච්‌චත්‌තං වෙදිතබ්‌බො විඤ්‌ඤූහී’’ති. එවං වුත්‌තෙ, මාරො පාපිමා සීසං ඔකම්‌පෙත්‌වා ජිව්‌හං නිල්‌ලාලෙත්‌වා තිවිසාඛං නලාටෙ නලාටිකං වුට්‌ඨාපෙත්‌වා දණ්‌ඩමොලුබ්‌භ පක්‌කාමි.
157. Evaṃ me sutaṃ – ekaṃ samayaṃ bhagavā sakkesu viharati silāvatiyaṃ. Tena kho pana samayena sambahulā bhikkhū bhagavato avidūre appamattā ātāpino pahitattā viharanti. Atha kho māro pāpimā brāhmaṇavaṇṇaṃ abhinimminitvā mahantena jaṭaṇḍuvena ajinakkhipanivattho jiṇṇo gopānasivaṅko ghurughurupassāsī udumbaradaṇḍaṃ gahetvā yena te bhikkhū tenupasaṅkami; upasaṅkamitvā te bhikkhū etadavoca – ‘‘daharā bhavanto pabbajitā susū kāḷakesā bhadrena yobbanena samannāgatā paṭhamena vayasā anikkīḷitāvino kāmesu. Bhuñjantu bhavanto mānusake kāme. Mā sandiṭṭhikaṃ hitvā kālikaṃ anudhāvitthā’’ti. ‘‘Na kho mayaṃ, brāhmaṇa, sandiṭṭhikaṃ hitvā kālikaṃ anudhāvāma. Kālikañca kho mayaṃ, brāhmaṇa, hitvā sandiṭṭhikaṃ anudhāvāma. Kālikā hi, brāhmaṇa, kāmā vuttā bhagavatā bahudukkhā bahupāyāsā, ādīnavo ettha bhiyyo. Sandiṭṭhiko ayaṃ dhammo akāliko ehipassiko opaneyyiko paccattaṃ veditabbo viññūhī’’ti. Evaṃ vutte, māro pāpimā sīsaṃ okampetvā jivhaṃ nillāletvā tivisākhaṃ nalāṭe nalāṭikaṃ vuṭṭhāpetvā daṇḍamolubbha pakkāmi.
අථ ඛො තෙ භික්‌ඛූ යෙන භගවා තෙනුපසඞ්‌කමිංසු; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නා ඛො තෙ භික්‌ඛූ භගවන්‌තං එතදවොචුං – ‘‘ඉධ මයං, භන්‌තෙ, භගවතො අවිදූරෙ අප්‌පමත්‌තා ආතාපිනො පහිතත්‌තා විහරාම. අථ ඛො, භන්‌තෙ, අඤ්‌ඤතරො බ්‍රාහ්‌මණො මහන්‌තෙන ජටණ්‌ඩුවෙන අජිනක්‌ඛිපනිවත්‌ථො ජිණ්‌ණො ගොපානසිවඞ්‌කො ඝුරුඝුරුපස්‌සාසී උදුම්‌බරදණ්‌ඩං ගහෙත්‌වා යෙන මයං තෙනුපසඞ්‌කමි; උපසඞ්‌කමිත්‌වා අම්‌හෙ එතදවොච – ‘දහරා භවන්‌තො පබ්‌බජිතා සුසූ කාළකෙසා භද්‍රෙන යොබ්‌බනෙන සමන්‌නාගතා පඨමෙන වයසා අනික්‌කීළිතාවිනො කාමෙසු. භුඤ්‌ජන්‌තු භවන්‌තො මානුසකෙ කාමෙ. මා සන්‌දිට්‌ඨිකං හිත්‌වා කාලිකං අනුධාවිත්‌ථා’ති. එවං වුත්‌තෙ, මයං, භන්‌තෙ, තං බ්‍රාහ්‌මණං එතදවොචුම්‌හ – ‘න ඛො මයං, බ්‍රාහ්‌මණ, සන්‌දිට්‌ඨිකං හිත්‌වා කාලිකං අනුධාවාම. කාලිකඤ්‌ච ඛො මයං, බ්‍රාහ්‌මණ, හිත්‌වා සන්‌දිට්‌ඨිකං අනුධාවාම. කාලිකා හි, බ්‍රාහ්‌මණ, කාමා වුත්‌තා භගවතා බහුදුක්‌ඛා බහුපායාසා, ආදීනවො එත්‌ථ භිය්‍යො. සන්‌දිට්‌ඨිකො අයං ධම්‌මො අකාලිකො එහිපස්‌සිකො ඔපනෙය්‍යිකො පච්‌චත්‌තං වෙදිතබ්‌බො විඤ්‌ඤූහී’ති. එවං වුත්‌තෙ, භන්‌තෙ, සො බ්‍රාහ්‌මණො සීසං ඔකම්‌පෙත්‌වා ජිව්‌හං නිල්‌ලාලෙත්‌වා තිවිසාඛං නලාටෙ නලාටිකං වුට්‌ඨාපෙත්‌වා දණ්‌ඩමොලුබ්‌භ පක්‌කන්‌තො’’ති.
Atha kho te bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha mayaṃ, bhante, bhagavato avidūre appamattā ātāpino pahitattā viharāma. Atha kho, bhante, aññataro brāhmaṇo mahantena jaṭaṇḍuvena ajinakkhipanivattho jiṇṇo gopānasivaṅko ghurughurupassāsī udumbaradaṇḍaṃ gahetvā yena mayaṃ tenupasaṅkami; upasaṅkamitvā amhe etadavoca – ‘daharā bhavanto pabbajitā susū kāḷakesā bhadrena yobbanena samannāgatā paṭhamena vayasā anikkīḷitāvino kāmesu. Bhuñjantu bhavanto mānusake kāme. Mā sandiṭṭhikaṃ hitvā kālikaṃ anudhāvitthā’ti. Evaṃ vutte, mayaṃ, bhante, taṃ brāhmaṇaṃ etadavocumha – ‘na kho mayaṃ, brāhmaṇa, sandiṭṭhikaṃ hitvā kālikaṃ anudhāvāma. Kālikañca kho mayaṃ, brāhmaṇa, hitvā sandiṭṭhikaṃ anudhāvāma. Kālikā hi, brāhmaṇa, kāmā vuttā bhagavatā bahudukkhā bahupāyāsā, ādīnavo ettha bhiyyo. Sandiṭṭhiko ayaṃ dhammo akāliko ehipassiko opaneyyiko paccattaṃ veditabbo viññūhī’ti. Evaṃ vutte, bhante, so brāhmaṇo sīsaṃ okampetvā jivhaṃ nillāletvā tivisākhaṃ nalāṭe nalāṭikaṃ vuṭṭhāpetvā daṇḍamolubbha pakkanto’’ti.
‘‘නෙසො, භික්‌ඛවෙ, බ්‍රාහ්‌මණො. මාරො එසො පාපිමා තුම්‌හාකං විචක්‌ඛුකම්‌මාය ආගතො’’ති. අථ ඛො භගවා එතමත්‌ථං විදිත්‌වා තායං වෙලායං ඉමං ගාථං අභාසි –
‘‘Neso, bhikkhave, brāhmaṇo. Māro eso pāpimā tumhākaṃ vicakkhukammāya āgato’’ti. Atha kho bhagavā etamatthaṃ viditvā tāyaṃ velāyaṃ imaṃ gāthaṃ abhāsi –
‘‘යො දුක්‌ඛමද්‌දක්‌ඛි යතොනිදානං,
‘‘Yo dukkhamaddakkhi yatonidānaṃ,
කාමෙසු සො ජන්‌තු කථං නමෙය්‍ය;
Kāmesu so jantu kathaṃ nameyya;
උපධිං විදිත්‌වා සඞ්‌ගොති ලොකෙ,
Upadhiṃ viditvā saṅgoti loke,
තස්‌සෙව ජන්‌තු විනයාය සික්‌ඛෙ’’ති.
Tasseva jantu vinayāya sikkhe’’ti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සම්‌බහුලසුත්‌තවණ්‌ණනා • 1. Sambahulasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. සම්‌බහුලසුත්‌තවණ්‌ණනා • 1. Sambahulasuttavaṇṇanā
