| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ததியவக்³கோ³
3. Tatiyavaggo
1. ஸம்ப³ஹுலஸுத்தவண்ணனா
1. Sambahulasuttavaṇṇanā
157. ததியவக்³க³ஸ்ஸ பட²மே ஜடண்டு³வேனாதி ஜடாசும்ப³டகேன. அஜினக்கி²பனிவத்தோ²தி ஸகு²ரங் அஜினசம்மங் ஏகங் நிவத்தோ² ஏகங் பாருதோ. உது³ம்ப³ரத³ண்ட³ந்தி அப்பிச்ச²பா⁴வப்பகாஸனத்த²ங் ஈஸகங் வங்கங் உது³ம்ப³ரத³ண்ட³ங் க³ஹெத்வா. ஏதத³வோசாதி லோகே ப்³ராஹ்மணஸ்ஸ வசனங் நாம ஸுஸ்ஸூஸந்தி, ப்³ராஹ்மணேஸுபி பப்³ப³ஜிதஸ்ஸ, பப்³ப³ஜிதேஸுபி மஹல்லகஸ்ஸாதி மஹல்லகப்³ராஹ்மணஸ்ஸ பப்³ப³ஜிதவேஸங் க³ஹெத்வா பதா⁴னபூ⁴மியங் கம்மங் கரொந்தே தே பி⁴க்கூ² உபஸங்கமித்வா ஹத்த²ங் உக்கி²பித்வா ஏதங் ‘‘த³ஹரா ப⁴வந்தோ’’திஆதி³வசனங் அவோச. ஓகம்பெத்வாதி ஹனுகேன உரங் பஹரந்தோ அதோ⁴னதங் கத்வா. ஜிவ்ஹங் நில்லாலெத்வாதி கப³ரமஹாஜிவ்ஹங் நீஹரித்வா உத்³த⁴மதோ⁴ உப⁴யபஸ்ஸேஸு ச லாலெத்வா. திவிஸாக²ந்தி திஸாக²ங். நலாடிகந்தி ப⁴குடிங், நலாடே உட்டி²தங் வலித்தயந்தி அத்தோ². பக்காமீதி தும்ஹே ஜானந்தானங் வசனங் அகத்வா அத்தனோவ தேலே பச்சிஸ்ஸதா²தி வத்வா ஏகங் மக்³க³ங் க³ஹெத்வா க³தோ. பட²மங்.
157. Tatiyavaggassa paṭhame jaṭaṇḍuvenāti jaṭācumbaṭakena. Ajinakkhipanivatthoti sakhuraṃ ajinacammaṃ ekaṃ nivattho ekaṃ pāruto. Udumbaradaṇḍanti appicchabhāvappakāsanatthaṃ īsakaṃ vaṅkaṃ udumbaradaṇḍaṃ gahetvā. Etadavocāti loke brāhmaṇassa vacanaṃ nāma sussūsanti, brāhmaṇesupi pabbajitassa, pabbajitesupi mahallakassāti mahallakabrāhmaṇassa pabbajitavesaṃ gahetvā padhānabhūmiyaṃ kammaṃ karonte te bhikkhū upasaṅkamitvā hatthaṃ ukkhipitvā etaṃ ‘‘daharā bhavanto’’tiādivacanaṃ avoca. Okampetvāti hanukena uraṃ paharanto adhonataṃ katvā. Jivhaṃ nillāletvāti kabaramahājivhaṃ nīharitvā uddhamadho ubhayapassesu ca lāletvā. Tivisākhanti tisākhaṃ. Nalāṭikanti bhakuṭiṃ, nalāṭe uṭṭhitaṃ valittayanti attho. Pakkāmīti tumhe jānantānaṃ vacanaṃ akatvā attanova tele paccissathāti vatvā ekaṃ maggaṃ gahetvā gato. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸம்ப³ஹுலஸுத்தங் • 1. Sambahulasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸம்ப³ஹுலஸுத்தவண்ணனா • 1. Sambahulasuttavaṇṇanā
