| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. ஸம்ப³ஹுலஸுத்தவண்ணனா
4. Sambahulasuttavaṇṇanā
224. சதுத்தே² ஸம்ப³ஹுலாதி ப³ஹூ ஸுத்தந்திகா ஆபி⁴த⁴ம்மிகா வினயத⁴ரா ச. விஹரந்தீதி ஸத்து² ஸந்திகே கம்மட்டா²னங் க³ஹெத்வா விஹரந்தி. பக்கமிங்ஸூதி தே கிர தஸ்மிங் ஜனபதே³ அஞ்ஞதரங் கா³மங் உபஸங்கமந்தே தி³ஸ்வா மனுஸ்ஸா பஸன்னசித்தா ஆஸனஸாலாய கோஜவத்த²ரணாதீ³னி பஞ்ஞாபெத்வா யாகு³க²ஜ்ஜகானி த³த்வா உபனிஸீதி³ங்ஸு. மஹாதே²ரோ ஏகங் த⁴ம்மகதி²கங் ‘‘த⁴ம்மங் கதே²ஹீ’’தி ஆஹ. ஸோ சித்தங் த⁴ம்மகத²ங் கதே²ஸி. மனுஸ்ஸா பஸீதி³த்வா போ⁴ஜனவேலாயங் பணீதபோ⁴ஜனங் அத³ங்ஸு. மஹாதே²ரோ மனுஞ்ஞங் ப⁴த்தானுமோத³னமகாஸி. மனுஸ்ஸா பி⁴ய்யோஸோமத்தாய பஸன்னா ‘‘இதே⁴வ, ப⁴ந்தே, தேமாஸங் வஸதா²’’தி படிஞ்ஞங் காரெத்வா க³மனாக³மனஸம்பன்னே டா²னே ஸேனாஸனானி காரெத்வா சதூஹி பச்சயேஹி உபட்ட²ஹிங்ஸு. மஹாதே²ரோ வஸ்ஸூபனாயிகதி³வஸே பி⁴க்கூ² ஓவதி³ – ‘‘ஆவுஸோ, தும்ஹேஹி க³ருகஸ்ஸ ஸத்து² ஸந்திகே கம்மட்டா²னங் க³ஹிதங், பு³த்³த⁴பாதுபா⁴வோ நாம து³ல்லபோ⁴. மாஸஸ்ஸ அட்ட² தி³வஸே த⁴ம்மஸ்ஸவனங் கத்வா க³ணஸங்க³ணிகங் பஹாய அப்பமத்தா விஹரதா²’’தி. தே ததோ பட்டா²ய யுஞ்ஜந்தி க⁴டெந்தி. கதா³சி ஸப்³ப³ரத்திகங் த⁴ம்மஸ்ஸவனங் கரொந்தி, கதா³சி பஞ்ஹங் விஸ்ஸஜ்ஜெந்தி, கதா³சி பதா⁴னங் கரொந்தி. தேஸங் த⁴ம்மஸ்ஸவனதி³வஸே த⁴ம்மங் கதெ²ந்தானங்யேவ அருணோ உக்³க³ச்ச²தி. பஞ்ஹாவிஸ்ஸஜ்ஜனதி³வஸே ப்³யத்தோ பி⁴க்கு² பஞ்ஹங் புச்ச²தி, பண்டி³தோ விஸ்ஸஜ்ஜேதீதி புச்ச²னவிஸ்ஸஜ்ஜனங் கரொந்தானங்யேவ. பதா⁴னதி³வஸே ஸூரியத்த²ங்க³மனே க³ண்டி³ங் பஹரித்வாவ சங்கமங் ஓதரித்வா பதா⁴னங் கரொந்தானங்யேவ. தே ஏவங் வஸ்ஸங் வஸ்ஸித்வா பவாரெத்வா பக்கமிங்ஸு. தங் ஸந்தா⁴யேதங் வுத்தங். பரிதே³வமானாதி ‘‘இதா³னி ததா²ரூபங் மது⁴ரங் த⁴ம்மஸ்ஸவனங் பஞ்ஹாகத²னங் குதோ லபி⁴ஸ்ஸாமீ’’திஆதீ³னி வத்வா ரோத³மானா.
224. Catutthe sambahulāti bahū suttantikā ābhidhammikā vinayadharā ca. Viharantīti satthu santike kammaṭṭhānaṃ gahetvā viharanti. Pakkamiṃsūti te kira tasmiṃ janapade aññataraṃ gāmaṃ upasaṅkamante disvā manussā pasannacittā āsanasālāya kojavattharaṇādīni paññāpetvā yāgukhajjakāni datvā upanisīdiṃsu. Mahāthero ekaṃ dhammakathikaṃ ‘‘dhammaṃ kathehī’’ti āha. So cittaṃ dhammakathaṃ kathesi. Manussā pasīditvā bhojanavelāyaṃ paṇītabhojanaṃ adaṃsu. Mahāthero manuññaṃ bhattānumodanamakāsi. Manussā bhiyyosomattāya pasannā ‘‘idheva, bhante, temāsaṃ vasathā’’ti paṭiññaṃ kāretvā gamanāgamanasampanne ṭhāne senāsanāni kāretvā catūhi paccayehi upaṭṭhahiṃsu. Mahāthero vassūpanāyikadivase bhikkhū ovadi – ‘‘āvuso, tumhehi garukassa satthu santike kammaṭṭhānaṃ gahitaṃ, buddhapātubhāvo nāma dullabho. Māsassa aṭṭha divase dhammassavanaṃ katvā gaṇasaṅgaṇikaṃ pahāya appamattā viharathā’’ti. Te tato paṭṭhāya yuñjanti ghaṭenti. Kadāci sabbarattikaṃ dhammassavanaṃ karonti, kadāci pañhaṃ vissajjenti, kadāci padhānaṃ karonti. Tesaṃ dhammassavanadivase dhammaṃ kathentānaṃyeva aruṇo uggacchati. Pañhāvissajjanadivase byatto bhikkhu pañhaṃ pucchati, paṇḍito vissajjetīti pucchanavissajjanaṃ karontānaṃyeva. Padhānadivase sūriyatthaṅgamane gaṇḍiṃ paharitvāva caṅkamaṃ otaritvā padhānaṃ karontānaṃyeva. Te evaṃ vassaṃ vassitvā pavāretvā pakkamiṃsu. Taṃ sandhāyetaṃ vuttaṃ. Paridevamānāti ‘‘idāni tathārūpaṃ madhuraṃ dhammassavanaṃ pañhākathanaṃ kuto labhissāmī’’tiādīni vatvā rodamānā.
கா²யதீதி பஞ்ஞாயதி உபட்டா²தி. கோ மேதி கஹங் இமே. வஜ்ஜிபூ⁴மியாதி வஜ்ஜிரட்டா²பி⁴முகா² க³தா. மகா³ வியாதி யதா² மகா³ தஸ்மிங் தஸ்மிங் பப்³ப³தபாதே³ வா வனஸண்டே³ வா விசரந்தா – ‘‘இத³ங் அம்ஹாகங் மாதுஸந்தகங் பிதுஸந்தகங் பவேணிஆக³த’’ந்தி அக³ஹெத்வா, யத்தே²வ நேஸங் கோ³சரபா²ஸுதா ச ஹோதி பரிபந்தா²பா⁴வோ ச, தத்த² விசரந்தி. ஏவங் அனிகேதா அகே³ஹா பி⁴க்க²வோபி ‘‘அயங், ஆவுஸோ, அம்ஹாகங் ஆசரியுபஜ்ஜா²யானங் ஸந்தகோ பவேணிஆக³தோ’’தி அக³ஹெத்வா யத்தே²வ நேஸங் உதுஸப்பாயங் போ⁴ஜனஸப்பாயங் புக்³க³லஸப்பாயங் ஸேனாஸனஸப்பாயங் த⁴ம்மஸ்ஸவனஸப்பாயஞ்ச ஸுலப⁴ங் ஹோதி, தத்த² விஹரந்தி. சதுத்த²ங்.
Khāyatīti paññāyati upaṭṭhāti. Ko meti kahaṃ ime. Vajjibhūmiyāti vajjiraṭṭhābhimukhā gatā. Magā viyāti yathā magā tasmiṃ tasmiṃ pabbatapāde vā vanasaṇḍe vā vicarantā – ‘‘idaṃ amhākaṃ mātusantakaṃ pitusantakaṃ paveṇiāgata’’nti agahetvā, yattheva nesaṃ gocaraphāsutā ca hoti paripanthābhāvo ca, tattha vicaranti. Evaṃ aniketā agehā bhikkhavopi ‘‘ayaṃ, āvuso, amhākaṃ ācariyupajjhāyānaṃ santako paveṇiāgato’’ti agahetvā yattheva nesaṃ utusappāyaṃ bhojanasappāyaṃ puggalasappāyaṃ senāsanasappāyaṃ dhammassavanasappāyañca sulabhaṃ hoti, tattha viharanti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஸம்ப³ஹுலஸுத்தங் • 4. Sambahulasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. ஸம்ப³ஹுலஸுத்தவண்ணனா • 4. Sambahulasuttavaṇṇanā
