| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃. တတိယဝဂ္ဂော
3. Tatiyavaggo
၁. သမ္ဗဟုလသုတ္တဝဏ္ဏနာ
1. Sambahulasuttavaṇṇanā
၁၅၇. တတိယဝဂ္ဂသ္သ ပဌမေ ဇဋဏ္ဍုဝေနာတိ ဇဋာစုမ္ဗဋကေန။ အဇိနက္ခိပနိဝတ္ထောတိ သခုရံ အဇိနစမ္မံ ဧကံ နိဝတ္ထော ဧကံ ပာရုတော။ ဥဒုမ္ဗရဒဏ္ဍန္တိ အပ္ပိစ္ဆဘာဝပ္ပကာသနတ္ထံ ဤသကံ ဝင္ကံ ဥဒုမ္ဗရဒဏ္ဍံ ဂဟေတ္ဝာ။ ဧတဒဝောစာတိ လောကေ ဗ္ရာဟ္မဏသ္သ ဝစနံ နာမ သုသ္သူသန္တိ, ဗ္ရာဟ္မဏေသုပိ ပဗ္ဗဇိတသ္သ, ပဗ္ဗဇိတေသုပိ မဟလ္လကသ္သာတိ မဟလ္လကဗ္ရာဟ္မဏသ္သ ပဗ္ဗဇိတဝေသံ ဂဟေတ္ဝာ ပဓာနဘူမိယံ ကမ္မံ ကရောန္တေ တေ ဘိက္ခူ ဥပသင္ကမိတ္ဝာ ဟတ္ထံ ဥက္ခိပိတ္ဝာ ဧတံ ‘‘ဒဟရာ ဘဝန္တော’’တိအာဒိဝစနံ အဝောစ။ ဩကမ္ပေတ္ဝာတိ ဟနုကေန ဥရံ ပဟရန္တော အဓောနတံ ကတ္ဝာ။ ဇိဝ္ဟံ နိလ္လာလေတ္ဝာတိ ကဗရမဟာဇိဝ္ဟံ နီဟရိတ္ဝာ ဥဒ္ဓမဓော ဥဘယပသ္သေသု စ လာလေတ္ဝာ။ တိဝိသာခန္တိ တိသာခံ။ နလာဋိကန္တိ ဘကုဋိံ, နလာဋေ ဥဋ္ဌိတံ ဝလိတ္တယန္တိ အတ္ထော။ ပက္ကာမီတိ တုမ္ဟေ ဇာနန္တာနံ ဝစနံ အကတ္ဝာ အတ္တနောဝ တေလေ ပစ္စိသ္သထာတိ ဝတ္ဝာ ဧကံ မဂ္ဂံ ဂဟေတ္ဝာ ဂတော။ ပဌမံ။
157. Tatiyavaggassa paṭhame jaṭaṇḍuvenāti jaṭācumbaṭakena. Ajinakkhipanivatthoti sakhuraṃ ajinacammaṃ ekaṃ nivattho ekaṃ pāruto. Udumbaradaṇḍanti appicchabhāvappakāsanatthaṃ īsakaṃ vaṅkaṃ udumbaradaṇḍaṃ gahetvā. Etadavocāti loke brāhmaṇassa vacanaṃ nāma sussūsanti, brāhmaṇesupi pabbajitassa, pabbajitesupi mahallakassāti mahallakabrāhmaṇassa pabbajitavesaṃ gahetvā padhānabhūmiyaṃ kammaṃ karonte te bhikkhū upasaṅkamitvā hatthaṃ ukkhipitvā etaṃ ‘‘daharā bhavanto’’tiādivacanaṃ avoca. Okampetvāti hanukena uraṃ paharanto adhonataṃ katvā. Jivhaṃ nillāletvāti kabaramahājivhaṃ nīharitvā uddhamadho ubhayapassesu ca lāletvā. Tivisākhanti tisākhaṃ. Nalāṭikanti bhakuṭiṃ, nalāṭe uṭṭhitaṃ valittayanti attho. Pakkāmīti tumhe jānantānaṃ vacanaṃ akatvā attanova tele paccissathāti vatvā ekaṃ maggaṃ gahetvā gato. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သမ္ဗဟုလသုတ္တံ • 1. Sambahulasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. သမ္ဗဟုလသုတ္တဝဏ္ဏနာ • 1. Sambahulasuttavaṇṇanā
