| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸம்ப³ரிமாயாஸுத்தங்
3. Sambarimāyāsuttaṃ
269. ஸாவத்தி²யங்…பே॰… ப⁴க³வா ஏதத³வோச – ‘‘பூ⁴தபுப்³ப³ங், பி⁴க்க²வே, வேபசித்தி அஸுரிந்தோ³ ஆபா³தி⁴கோ அஹோஸி து³க்கி²தோ பா³ள்ஹகி³லானோ. அத² கோ² பி⁴க்க²வே, ஸக்கோ தே³வானமிந்தோ³ யேன வேபசித்தி அஸுரிந்தோ³ தேனுபஸங்கமி கி³லானபுச்ச²கோ. அத்³த³ஸா கோ², பி⁴க்க²வே, வேபசித்தி அஸுரிந்தோ³ ஸக்கங் தே³வானமிந்த³ங் தூ³ரதோவ ஆக³ச்ச²ந்தங். தி³ஸ்வான ஸக்கங் தே³வானமிந்த³ங் ஏதத³வோச – ‘திகிச்ச² மங் தே³வானமிந்தா³’தி. ‘வாசேஹி மங், வேபசித்தி, ஸம்ப³ரிமாய’ந்தி. ‘ந தாவாஹங் வாசேமி, யாவாஹங், மாரிஸ, அஸுரே படிபுச்சா²மீ’’’தி. ‘‘அத² கோ², பி⁴க்க²வே, வேபசித்தி அஸுரிந்தோ³ அஸுரே படிபுச்சி² – ‘வாசேமஹங், மாரிஸா, ஸக்கங் தே³வானமிந்த³ங் ஸம்ப³ரிமாய’ந்தி? ‘மா கோ² த்வங், மாரிஸ, வாசேஸி ஸக்கங் தே³வானமிந்த³ங் ஸம்ப³ரிமாய’’’ந்தி. அத² கோ², பி⁴க்க²வே, வேபசித்தி அஸுரிந்தோ³ ஸக்கங் தே³வானமிந்த³ங் கா³தா²ய அஜ்ஜ²பா⁴ஸி –
269. Sāvatthiyaṃ…pe… bhagavā etadavoca – ‘‘bhūtapubbaṃ, bhikkhave, vepacitti asurindo ābādhiko ahosi dukkhito bāḷhagilāno. Atha kho bhikkhave, sakko devānamindo yena vepacitti asurindo tenupasaṅkami gilānapucchako. Addasā kho, bhikkhave, vepacitti asurindo sakkaṃ devānamindaṃ dūratova āgacchantaṃ. Disvāna sakkaṃ devānamindaṃ etadavoca – ‘tikiccha maṃ devānamindā’ti. ‘Vācehi maṃ, vepacitti, sambarimāya’nti. ‘Na tāvāhaṃ vācemi, yāvāhaṃ, mārisa, asure paṭipucchāmī’’’ti. ‘‘Atha kho, bhikkhave, vepacitti asurindo asure paṭipucchi – ‘vācemahaṃ, mārisā, sakkaṃ devānamindaṃ sambarimāya’nti? ‘Mā kho tvaṃ, mārisa, vācesi sakkaṃ devānamindaṃ sambarimāya’’’nti. Atha kho, bhikkhave, vepacitti asurindo sakkaṃ devānamindaṃ gāthāya ajjhabhāsi –
‘‘மாயாவீ மக⁴வா ஸக்க, தே³வராஜ ஸுஜம்பதி;
‘‘Māyāvī maghavā sakka, devarāja sujampati;
உபேதி நிரயங் கோ⁴ரங், ஸம்ப³ரோவ ஸதங் ஸம’’ந்தி.
Upeti nirayaṃ ghoraṃ, sambarova sataṃ sama’’nti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸம்ப³ரிமாயாஸுத்தவண்ணனா • 3. Sambarimāyāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஸம்ப³ரிமாயாஸுத்தவண்ணனா • 3. Sambarimāyāsuttavaṇṇanā
