| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. সম্বরিমাযাসুত্তং
3. Sambarimāyāsuttaṃ
২৬৯. সাৰত্থিযং…পে॰… ভগৰা এতদৰোচ – ‘‘ভূতপুব্বং, ভিক্খৰে, ৰেপচিত্তি অসুরিন্দো আবাধিকো অহোসি দুক্খিতো বাল়্হগিলানো। অথ খো ভিক্খৰে, সক্কো দেৰানমিন্দো যেন ৰেপচিত্তি অসুরিন্দো তেনুপসঙ্কমি গিলানপুচ্ছকো। অদ্দসা খো, ভিক্খৰে, ৰেপচিত্তি অসুরিন্দো সক্কং দেৰানমিন্দং দূরতোৰ আগচ্ছন্তং। দিস্ৰান সক্কং দেৰানমিন্দং এতদৰোচ – ‘তিকিচ্ছ মং দেৰানমিন্দা’তি। ‘ৰাচেহি মং, ৰেপচিত্তি, সম্বরিমায’ন্তি। ‘ন তাৰাহং ৰাচেমি, যাৰাহং, মারিস, অসুরে পটিপুচ্ছামী’’’তি। ‘‘অথ খো, ভিক্খৰে, ৰেপচিত্তি অসুরিন্দো অসুরে পটিপুচ্ছি – ‘ৰাচেমহং, মারিসা, সক্কং দেৰানমিন্দং সম্বরিমায’ন্তি? ‘মা খো ত্ৰং, মারিস, ৰাচেসি সক্কং দেৰানমিন্দং সম্বরিমায’’’ন্তি। অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং গাথায অজ্ঝভাসি –
269. Sāvatthiyaṃ…pe… bhagavā etadavoca – ‘‘bhūtapubbaṃ, bhikkhave, vepacitti asurindo ābādhiko ahosi dukkhito bāḷhagilāno. Atha kho bhikkhave, sakko devānamindo yena vepacitti asurindo tenupasaṅkami gilānapucchako. Addasā kho, bhikkhave, vepacitti asurindo sakkaṃ devānamindaṃ dūratova āgacchantaṃ. Disvāna sakkaṃ devānamindaṃ etadavoca – ‘tikiccha maṃ devānamindā’ti. ‘Vācehi maṃ, vepacitti, sambarimāya’nti. ‘Na tāvāhaṃ vācemi, yāvāhaṃ, mārisa, asure paṭipucchāmī’’’ti. ‘‘Atha kho, bhikkhave, vepacitti asurindo asure paṭipucchi – ‘vācemahaṃ, mārisā, sakkaṃ devānamindaṃ sambarimāya’nti? ‘Mā kho tvaṃ, mārisa, vācesi sakkaṃ devānamindaṃ sambarimāya’’’nti. Atha kho, bhikkhave, vepacitti asurindo sakkaṃ devānamindaṃ gāthāya ajjhabhāsi –
‘‘মাযাৰী মঘৰা সক্ক, দেৰরাজ সুজম্পতি।
‘‘Māyāvī maghavā sakka, devarāja sujampati;
উপেতি নিরযং ঘোরং, সম্বরোৰ সতং সম’’ন্তি॥
Upeti nirayaṃ ghoraṃ, sambarova sataṃ sama’’nti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. সম্বরিমাযাসুত্তৰণ্ণনা • 3. Sambarimāyāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. সম্বরিমাযাসুত্তৰণ্ণনা • 3. Sambarimāyāsuttavaṇṇanā
