| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
3. самб̣аримааяаасуд̇д̇аван̣н̣анаа
3. Sambarimāyāsuttavaṇṇanā
269. д̇ад̇ияз ааб̣аад̇хигод̇и исиг̇ан̣зна абхисабагаалз уббаннааб̣аад̇хзна ааб̣аад̇хиго. ваажзхи манд̇и сажз мам̣ самб̣аримааяам̣ ваажзси, звамахам̣ д̇амби д̇игижчиссаамийд̇и вад̣̇ад̇и. маа ко д̇вам̣, маариса, ваажзсийд̇и винааби д̇аава самб̣аримааяам̣ сагго амхз б̣аад̇хад̇и, яад̣̇и бана д̇ам̣ ж̇ааниссад̇и, надтаа маяам̣, маа ад̇д̇ано згасса ад̇т̇ааяа амхз наасзхийд̇и вад̇ваа ниваараяим̣су. самб̣арова сад̇ам̣ саманд̇и яат̇аа самб̣аро асуринд̣̇о мааяаавий мааяам̣ баяож̇зд̇ваа вассасад̇ам̣ нираяз багго, звам̣ бажжад̇и. д̇умхз д̇хаммигаава, алам̣ во мааяааяаад̇и вад̣̇ад̇и. гим̣ бана сагго д̇асса год̇хам̣ д̇игижчид̇ум̣ саггун̣зяяаад̇и? аама саггун̣зяяа. гат̇ам̣? д̇ад̣̇аа гира со исиг̇ан̣о д̇харад̇иязва, д̇асмаа нам̣ исийнам̣ санд̇игам̣ нзд̇ваа камаабзяяа, звамасса паасу бхавзяяа. д̇зна бана ван̃жид̇ад̇д̇аа д̇ат̇аа агад̇ваа багганд̇ова. д̇ад̇ияам̣.
269. Tatiye ābādhikoti isigaṇena abhisapakāle uppannābādhena ābādhiko. Vācehi manti sace maṃ sambarimāyaṃ vācesi, evamahaṃ tampi tikicchissāmīti vadati. Mā kho tvaṃ, mārisa, vācesīti vināpi tāva sambarimāyaṃ sakko amhe bādhati, yadi pana taṃ jānissati, naṭṭhā mayaṃ, mā attano ekassa atthāya amhe nāsehīti vatvā nivārayiṃsu. Sambarova sataṃ samanti yathā sambaro asurindo māyāvī māyaṃ payojetvā vassasataṃ niraye pakko, evaṃ paccati. Tumhe dhammikāva, alaṃ vo māyāyāti vadati. Kiṃ pana sakko tassa kodhaṃ tikicchituṃ sakkuṇeyyāti? Āma sakkuṇeyya. Kathaṃ? Tadā kira so isigaṇo dharatiyeva, tasmā naṃ isīnaṃ santikaṃ netvā khamāpeyya, evamassa phāsu bhaveyya. Tena pana vañcitattā tathā akatvā pakkantova. Tatiyaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 3. самб̣аримааяаасуд̇д̇ам̣ • 3. Sambarimāyāsuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 3. самб̣аримааяаасуд̇д̇аван̣н̣анаа • 3. Sambarimāyāsuttavaṇṇanā
