| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃. သမ္ဗရိမာယာသုတ္တဝဏ္ဏနာ
3. Sambarimāyāsuttavaṇṇanā
၂၆၉. တတိယေ အာဗာဓိကောတိ ဣသိဂဏေန အဘိသပကာလေ ဥပ္ပန္နာဗာဓေန အာဗာဓိကော။ ဝာစေဟိ မန္တိ သစေ မံ သမ္ဗရိမာယံ ဝာစေသိ, ဧဝမဟံ တမ္ပိ တိကိစ္ဆိသ္သာမီတိ ဝဒတိ။ မာ ခော တ္ဝံ, မာရိသ, ဝာစေသီတိ ဝိနာပိ တာဝ သမ္ဗရိမာယံ သက္ကော အမ္ဟေ ဗာဓတိ, ယဒိ ပန တံ ဇာနိသ္သတိ, နဋ္ဌာ မယံ, မာ အတ္တနော ဧကသ္သ အတ္ထာယ အမ္ဟေ နာသေဟီတိ ဝတ္ဝာ နိဝာရယိံသု။ သမ္ဗရောဝ သတံ သမန္တိ ယထာ သမ္ဗရော အသုရိန္ဒော မာယာဝီ မာယံ ပယောဇေတ္ဝာ ဝသ္သသတံ နိရယေ ပက္ကော, ဧဝံ ပစ္စတိ။ တုမ္ဟေ ဓမ္မိကာဝ, အလံ ဝော မာယာယာတိ ဝဒတိ။ ကိံ ပန သက္ကော တသ္သ ကောဓံ တိကိစ္ဆိတုံ သက္ကုဏေယ္ယာတိ? အာမ သက္ကုဏေယ္ယ။ ကထံ? တဒာ ကိရ သော ဣသိဂဏော ဓရတိယေဝ, တသ္မာ နံ ဣသီနံ သန္တိကံ နေတ္ဝာ ခမာပေယ္ယ, ဧဝမသ္သ ဖာသု ဘဝေယ္ယ။ တေန ပန ဝဉ္စိတတ္တာ တထာ အကတ္ဝာ ပက္ကန္တောဝ။ တတိယံ။
269. Tatiye ābādhikoti isigaṇena abhisapakāle uppannābādhena ābādhiko. Vācehi manti sace maṃ sambarimāyaṃ vācesi, evamahaṃ tampi tikicchissāmīti vadati. Mā kho tvaṃ, mārisa, vācesīti vināpi tāva sambarimāyaṃ sakko amhe bādhati, yadi pana taṃ jānissati, naṭṭhā mayaṃ, mā attano ekassa atthāya amhe nāsehīti vatvā nivārayiṃsu. Sambarova sataṃ samanti yathā sambaro asurindo māyāvī māyaṃ payojetvā vassasataṃ niraye pakko, evaṃ paccati. Tumhe dhammikāva, alaṃ vo māyāyāti vadati. Kiṃ pana sakko tassa kodhaṃ tikicchituṃ sakkuṇeyyāti? Āma sakkuṇeyya. Kathaṃ? Tadā kira so isigaṇo dharatiyeva, tasmā naṃ isīnaṃ santikaṃ netvā khamāpeyya, evamassa phāsu bhaveyya. Tena pana vañcitattā tathā akatvā pakkantova. Tatiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. သမ္ဗရိမာယာသုတ္တံ • 3. Sambarimāyāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. သမ္ဗရိမာယာသုတ္တဝဏ္ဏနာ • 3. Sambarimāyāsuttavaṇṇanā
