| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
அங்கு³த்தரனிகாயே
Aṅguttaranikāye
நவகனிபாத-அட்ட²கதா²
Navakanipāta-aṭṭhakathā
1. பட²மபண்ணாஸகங்
1. Paṭhamapaṇṇāsakaṃ
1. ஸம்போ³தி⁴வக்³கோ³
1. Sambodhivaggo
1. ஸம்போ³தி⁴ஸுத்தவண்ணனா
1. Sambodhisuttavaṇṇanā
1. நவகனிபாதஸ்ஸ பட²மே ஸம்போ³தி⁴பக்கி²கானந்தி சதுமக்³க³ஸங்கா²தஸ்ஸ ஸம்போ³தி⁴ஸ்ஸ பக்கே² ப⁴வானங், உபகாரகானந்தி அத்தோ². பாளியங் ஆக³தே நவ த⁴ம்மே ஸந்தா⁴யேவங் புச்ச²தி. கா உபனிஸாதி கோ உபனிஸ்ஸயபச்சயோ. அபி⁴ஸல்லேக²ந்தீதி அபி⁴ஸல்லேகி²கா. ஸமத²விபஸ்ஸனாசித்தஸ்ஸ விவரணே ஸப்பாயா உபகாரகாதி சேதோவிவரணஸப்பாயா. அப்பிச்ச²தங் ஆரப்³ப⁴ பவத்தா கதா² அப்பிச்ச²கதா². ஸேஸேஸுபி ஏஸேவ நயோ.
1. Navakanipātassa paṭhame sambodhipakkhikānanti catumaggasaṅkhātassa sambodhissa pakkhe bhavānaṃ, upakārakānanti attho. Pāḷiyaṃ āgate nava dhamme sandhāyevaṃ pucchati. Kā upanisāti ko upanissayapaccayo. Abhisallekhantīti abhisallekhikā. Samathavipassanācittassa vivaraṇe sappāyā upakārakāti cetovivaraṇasappāyā. Appicchataṃ ārabbha pavattā kathā appicchakathā. Sesesupi eseva nayo.
அஸுபா⁴ பா⁴வேதப்³பா³ ராக³ஸ்ஸ பஹானாயாதி அயமத்தோ² ஸாலிலாயகோபமாய விபா⁴வேதப்³போ³ – ஏகோ ஹி புரிஸோ அஸிதங் க³ஹெத்வா கோடிதோ பட்டா²ய ஸாலிக்கெ²த்தே ஸாலியோ லாயதி. அத²ஸ்ஸ வதிங் பி⁴ந்தி³த்வா கா³வோ பவிஸிங்ஸு. ஸோ அஸிதங் ட²பெத்வா யட்டி²ங் ஆதா³ய தேனேவ மக்³கே³ன கா³வோ நீஹரித்வா வதிங் பாகதிகங் கத்வா புனபி அஸிதங் ஆதா³ய ஸாலியோ லாயி. எத்த² ஸாலிக்கெ²த்தங் விய பு³த்³த⁴ஸாஸனங் த³ட்ட²ப்³ப³ங், ஸாலிலாயகோ விய யோகா³வசரோ, அஸிதங் விய பஞ்ஞா, லாயனகாலோ விய விபஸ்ஸனாய கம்மகரணகாலோ, யட்டி² விய அஸுப⁴கம்மட்டா²னங், வதி விய ஸங்வரோ, வதிங் பி⁴ந்தி³த்வா கா³வீனங் பவிஸனங் விய ஸஹஸா அப்படிஸங்கா²ய பமாத³ங் ஆரப்³ப⁴ ராக³ஸ்ஸ உப்பஜ்ஜனங், அஸிதங் ட²பெத்வா யட்டி²ங் ஆதா³ய பவிட்ட²மக்³கே³னேவ கா³வோ நீஹரித்வா வதிங் படிபாகதிகங் கத்வா புன கோடிதோ பட்டா²ய ஸாலிலாயனங் விய அஸுப⁴கம்மட்டா²னேன ராக³ங் விக்க²ம்பெ⁴த்வா புன விபஸ்ஸனாய கம்மங் ஆரப⁴னகாலோ. இமமத்த²ங் ஸந்தா⁴ய வுத்தங் – ‘‘அஸுபா⁴ பா⁴வேதப்³பா³ ராக³ஸ்ஸ பஹானாயா’’தி.
Asubhābhāvetabbā rāgassa pahānāyāti ayamattho sālilāyakopamāya vibhāvetabbo – eko hi puriso asitaṃ gahetvā koṭito paṭṭhāya sālikkhette sāliyo lāyati. Athassa vatiṃ bhinditvā gāvo pavisiṃsu. So asitaṃ ṭhapetvā yaṭṭhiṃ ādāya teneva maggena gāvo nīharitvā vatiṃ pākatikaṃ katvā punapi asitaṃ ādāya sāliyo lāyi. Ettha sālikkhettaṃ viya buddhasāsanaṃ daṭṭhabbaṃ, sālilāyako viya yogāvacaro, asitaṃ viya paññā, lāyanakālo viya vipassanāya kammakaraṇakālo, yaṭṭhi viya asubhakammaṭṭhānaṃ, vati viya saṃvaro, vatiṃ bhinditvā gāvīnaṃ pavisanaṃ viya sahasā appaṭisaṅkhāya pamādaṃ ārabbha rāgassa uppajjanaṃ, asitaṃ ṭhapetvā yaṭṭhiṃ ādāya paviṭṭhamaggeneva gāvo nīharitvā vatiṃ paṭipākatikaṃ katvā puna koṭito paṭṭhāya sālilāyanaṃ viya asubhakammaṭṭhānena rāgaṃ vikkhambhetvā puna vipassanāya kammaṃ ārabhanakālo. Imamatthaṃ sandhāya vuttaṃ – ‘‘asubhā bhāvetabbā rāgassa pahānāyā’’ti.
தத்த² ராக³ஸ்ஸாதி பஞ்சகாமகு³ணிகராக³ஸ்ஸ. மெத்தாதி மெத்தாகம்மட்டா²னங். ப்³யாபாத³ஸ்ஸ பஹானாயாதி வுத்தனயேனேவ உப்பன்னஸ்ஸ கோபஸ்ஸ பஜஹனத்தா²ய. ஆனாபானஸ்ஸதீதி ஸோளஸவத்து²கா ஆனாபானஸ்ஸதி. விதக்குபச்சே²தா³யாதி வுத்தனயேனேவ உப்பன்னானங் விதக்கானங் உபச்சே²த³னத்தா²ய. அஸ்மிமானஸமுக்³கா⁴தாயாதி அஸ்மீதி உப்பஜ்ஜனகஸ்ஸ மானஸ்ஸ ஸமுக்³கா⁴தத்தா²ய. அனத்தஸஞ்ஞா ஸண்டா²தீதி அனிச்சலக்க²ணே தி³ட்டே² அனத்தலக்க²ணங் தி³ட்ட²மேவ ஹோதி. ஏதேஸு ஹி தீஸு லக்க²ணேஸு ஏகஸ்மிங் தி³ட்டே² இதரத்³வயங் தி³ட்ட²மேவ ஹோதி. தேன வுத்தங் – ‘‘அனிச்சஸஞ்ஞினோ, பி⁴க்க²வே, அனத்தஸஞ்ஞா ஸண்டா²தீ’’தி. தி³ட்டே²வ த⁴ம்மே நிப்³பா³னந்தி தி³ட்டே²யேவ த⁴ம்மே அபச்சயபரினிப்³பா³னஞ்ச பாபுணாதீதி இமஸ்மிங் ஸுத்தே வட்டவிவட்டங் கதி²தங்.
Tattha rāgassāti pañcakāmaguṇikarāgassa. Mettāti mettākammaṭṭhānaṃ. Byāpādassa pahānāyāti vuttanayeneva uppannassa kopassa pajahanatthāya. Ānāpānassatīti soḷasavatthukā ānāpānassati. Vitakkupacchedāyāti vuttanayeneva uppannānaṃ vitakkānaṃ upacchedanatthāya. Asmimānasamugghātāyāti asmīti uppajjanakassa mānassa samugghātatthāya. Anattasaññā saṇṭhātīti aniccalakkhaṇe diṭṭhe anattalakkhaṇaṃ diṭṭhameva hoti. Etesu hi tīsu lakkhaṇesu ekasmiṃ diṭṭhe itaradvayaṃ diṭṭhameva hoti. Tena vuttaṃ – ‘‘aniccasaññino, bhikkhave, anattasaññā saṇṭhātī’’ti. Diṭṭheva dhamme nibbānanti diṭṭheyeva dhamme apaccayaparinibbānañca pāpuṇātīti imasmiṃ sutte vaṭṭavivaṭṭaṃ kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸம்போ³தி⁴ஸுத்தங் • 1. Sambodhisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. ஸம்போ³தி⁴ஸுத்தாதி³வண்ணனா • 1-2. Sambodhisuttādivaṇṇanā
