| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
३. पुग्गलवग्गो
3. Puggalavaggo
१. समिद्धसुत्तवण्णना
1. Samiddhasuttavaṇṇanā
२१. ततियस्स पठमे झानफस्सं पठमं फुसति, पच्छा निरोधं निब्बानं सच्छिकरोतीति कायसक्खि। दिट्ठन्तं पत्तोति दिट्ठिप्पत्तो। सद्दहन्तो विमुत्तोति सद्धाविमुत्तो। खमतीति रुच्चति। अभिक्कन्ततरोति अतिसुन्दरतरो। पणीततरोति अतिपणीततरो। सद्धिन्द्रियं अधिमत्तं होतीति समिद्धत्थेरस्स किर अरहत्तमग्गक्खणे सद्धिन्द्रियं धुरं अहोसि, सेसानि चत्तारि सहजातिन्द्रियानि तस्सेव परिवारानि अहेसुं। इति थेरो अत्तना पटिविद्धमग्गं कथेन्तो एवमाह। महाकोट्ठिकत्थेरस्स पन अरहत्तमग्गक्खणे समाधिन्द्रियं धुरं अहोसि, सेसानि चत्तारि इन्द्रियानि तस्सेव परिवारानि अहेसुं। तस्मा सोपि समाधिन्द्रियं अधिमत्तन्ति कथेन्तो अत्तना पटिविद्धमग्गमेव कथेसि। सारिपुत्तत्थेरस्स पन अरहत्तमग्गक्खणे पञ्ञिन्द्रियं धुरं अहोसि। सेसानि चत्तारि इन्द्रियानि तस्सेव परिवारानि अहेसुं। तस्मा सोपि पञ्ञिन्द्रियं अधिमत्तन्ति कथेन्तो अत्तना पटिविद्धमग्गमेव कथेसि।
21. Tatiyassa paṭhame jhānaphassaṃ paṭhamaṃ phusati, pacchā nirodhaṃ nibbānaṃ sacchikarotīti kāyasakkhi. Diṭṭhantaṃ pattoti diṭṭhippatto. Saddahanto vimuttoti saddhāvimutto. Khamatīti ruccati. Abhikkantataroti atisundarataro. Paṇītataroti atipaṇītataro. Saddhindriyaṃ adhimattaṃ hotīti samiddhattherassa kira arahattamaggakkhaṇe saddhindriyaṃ dhuraṃ ahosi, sesāni cattāri sahajātindriyāni tasseva parivārāni ahesuṃ. Iti thero attanā paṭividdhamaggaṃ kathento evamāha. Mahākoṭṭhikattherassa pana arahattamaggakkhaṇe samādhindriyaṃ dhuraṃ ahosi, sesāni cattāri indriyāni tasseva parivārāni ahesuṃ. Tasmā sopi samādhindriyaṃ adhimattanti kathento attanā paṭividdhamaggameva kathesi. Sāriputtattherassa pana arahattamaggakkhaṇe paññindriyaṃ dhuraṃ ahosi. Sesāni cattāri indriyāni tasseva parivārāni ahesuṃ. Tasmā sopi paññindriyaṃ adhimattanti kathento attanā paṭividdhamaggameva kathesi.
न ख्वेत्थाति न खो एत्थ। एकंसेन ब्याकातुन्ति एकन्तेन ब्याकरितुं। अरहत्ताय पटिपन्नोति अरहत्तमग्गसमङ्गिं दस्सेति। एवमेतस्मिं सुत्ते तीहिपि थेरेहि अत्तना पटिविद्धमग्गोव कथितो, सम्मासम्बुद्धो पन भुम्मन्तरेनेव कथेसि।
Nakhvetthāti na kho ettha. Ekaṃsena byākātunti ekantena byākarituṃ. Arahattāya paṭipannoti arahattamaggasamaṅgiṃ dasseti. Evametasmiṃ sutte tīhipi therehi attanā paṭividdhamaggova kathito, sammāsambuddho pana bhummantareneva kathesi.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १. समिद्धसुत्तं • 1. Samiddhasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १. समिद्धसुत्तवण्णना • 1. Samiddhasuttavaṇṇanā
