| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. ပုဂ္ဂလဝဂ္ဂော
3. Puggalavaggo
၁. သမိဒ္ဓသုတ္တဝဏ္ဏနာ
1. Samiddhasuttavaṇṇanā
၂၁. တတိယသ္သ ပဌမေ ဈာနဖသ္သံ ပဌမံ ဖုသတိ, ပစ္ဆာ နိရောဓံ နိဗ္ဗာနံ သစ္ဆိကရောတီတိ ကာယသက္ခိ။ ဒိဋ္ဌန္တံ ပတ္တောတိ ဒိဋ္ဌိပ္ပတ္တော။ သဒ္ဒဟန္တော ဝိမုတ္တောတိ သဒ္ဓာဝိမုတ္တော။ ခမတီတိ ရုစ္စတိ။ အဘိက္ကန္တတရောတိ အတိသုန္ဒရတရော။ ပဏီတတရောတိ အတိပဏီတတရော။ သဒ္ဓိန္ဒ္ရိယံ အဓိမတ္တံ ဟောတီတိ သမိဒ္ဓတ္ထေရသ္သ ကိရ အရဟတ္တမဂ္ဂက္ခဏေ သဒ္ဓိန္ဒ္ရိယံ ဓုရံ အဟောသိ, သေသာနိ စတ္တာရိ သဟဇာတိန္ဒ္ရိယာနိ တသ္သေဝ ပရိဝာရာနိ အဟေသုံ။ ဣတိ ထေရော အတ္တနာ ပဋိဝိဒ္ဓမဂ္ဂံ ကထေန္တော ဧဝမာဟ။ မဟာကောဋ္ဌိကတ္ထေရသ္သ ပန အရဟတ္တမဂ္ဂက္ခဏေ သမာဓိန္ဒ္ရိယံ ဓုရံ အဟောသိ, သေသာနိ စတ္တာရိ ဣန္ဒ္ရိယာနိ တသ္သေဝ ပရိဝာရာနိ အဟေသုံ။ တသ္မာ သောပိ သမာဓိန္ဒ္ရိယံ အဓိမတ္တန္တိ ကထေန္တော အတ္တနာ ပဋိဝိဒ္ဓမဂ္ဂမေဝ ကထေသိ။ သာရိပုတ္တတ္ထေရသ္သ ပန အရဟတ္တမဂ္ဂက္ခဏေ ပညိန္ဒ္ရိယံ ဓုရံ အဟောသိ။ သေသာနိ စတ္တာရိ ဣန္ဒ္ရိယာနိ တသ္သေဝ ပရိဝာရာနိ အဟေသုံ။ တသ္မာ သောပိ ပညိန္ဒ္ရိယံ အဓိမတ္တန္တိ ကထေန္တော အတ္တနာ ပဋိဝိဒ္ဓမဂ္ဂမေဝ ကထေသိ။
21. Tatiyassa paṭhame jhānaphassaṃ paṭhamaṃ phusati, pacchā nirodhaṃ nibbānaṃ sacchikarotīti kāyasakkhi. Diṭṭhantaṃ pattoti diṭṭhippatto. Saddahanto vimuttoti saddhāvimutto. Khamatīti ruccati. Abhikkantataroti atisundarataro. Paṇītataroti atipaṇītataro. Saddhindriyaṃ adhimattaṃ hotīti samiddhattherassa kira arahattamaggakkhaṇe saddhindriyaṃ dhuraṃ ahosi, sesāni cattāri sahajātindriyāni tasseva parivārāni ahesuṃ. Iti thero attanā paṭividdhamaggaṃ kathento evamāha. Mahākoṭṭhikattherassa pana arahattamaggakkhaṇe samādhindriyaṃ dhuraṃ ahosi, sesāni cattāri indriyāni tasseva parivārāni ahesuṃ. Tasmā sopi samādhindriyaṃ adhimattanti kathento attanā paṭividdhamaggameva kathesi. Sāriputtattherassa pana arahattamaggakkhaṇe paññindriyaṃ dhuraṃ ahosi. Sesāni cattāri indriyāni tasseva parivārāni ahesuṃ. Tasmā sopi paññindriyaṃ adhimattanti kathento attanā paṭividdhamaggameva kathesi.
န ခ္ဝေတ္ထာတိ န ခော ဧတ္ထ။ ဧကံသေန ဗ္ယာကာတုန္တိ ဧကန္တေန ဗ္ယာကရိတုံ။ အရဟတ္တာယ ပဋိပန္နောတိ အရဟတ္တမဂ္ဂသမင္ဂိံ ဒသ္သေတိ။ ဧဝမေတသ္မိံ သုတ္တေ တီဟိပိ ထေရေဟိ အတ္တနာ ပဋိဝိဒ္ဓမဂ္ဂောဝ ကထိတော, သမ္မာသမ္ဗုဒ္ဓော ပန ဘုမ္မန္တရေနေဝ ကထေသိ။
Nakhvetthāti na kho ettha. Ekaṃsena byākātunti ekantena byākarituṃ. Arahattāya paṭipannoti arahattamaggasamaṅgiṃ dasseti. Evametasmiṃ sutte tīhipi therehi attanā paṭividdhamaggova kathito, sammāsambuddho pana bhummantareneva kathesi.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သမိဒ္ဓသုတ္တံ • 1. Samiddhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သမိဒ္ဓသုတ္တဝဏ္ဏနာ • 1. Samiddhasuttavaṇṇanā
