| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. පුග්‌ගලවග්‌ගො
3. Puggalavaggo
1. සමිද්‌ධසුත්‌තවණ්‌ණනා
1. Samiddhasuttavaṇṇanā
21. තතියස්‌ස පඨමෙ ඣානඵස්‌සං පඨමං ඵුසති, පච්‌ඡා නිරොධං නිබ්‌බානං සච්‌ඡිකරොතීති කායසක්‌ඛි. දිට්‌ඨන්‌තං පත්‌තොති දිට්‌ඨිප්‌පත්‌තො. සද්‌දහන්‌තො විමුත්‌තොති සද්‌ධාවිමුත්‌තො. ඛමතීති රුච්‌චති. අභික්‌කන්‌තතරොති අතිසුන්‌දරතරො. පණීතතරොති අතිපණීතතරො. සද්‌ධින්‌ද්‍රියං අධිමත්‌තං හොතීති සමිද්‌ධත්‌ථෙරස්‌ස කිර අරහත්‌තමග්‌ගක්‌ඛණෙ සද්‌ධින්‌ද්‍රියං ධුරං අහොසි, සෙසානි චත්‌තාරි සහජාතින්‌ද්‍රියානි තස්‌සෙව පරිවාරානි අහෙසුං. ඉති ථෙරො අත්‌තනා පටිවිද්‌ධමග්‌ගං කථෙන්‌තො එවමාහ. මහාකොට්‌ඨිකත්‌ථෙරස්‌ස පන අරහත්‌තමග්‌ගක්‌ඛණෙ සමාධින්‌ද්‍රියං ධුරං අහොසි, සෙසානි චත්‌තාරි ඉන්‌ද්‍රියානි තස්‌සෙව පරිවාරානි අහෙසුං. තස්‌මා සොපි සමාධින්‌ද්‍රියං අධිමත්‌තන්‌ති කථෙන්‌තො අත්‌තනා පටිවිද්‌ධමග්‌ගමෙව කථෙසි. සාරිපුත්‌තත්‌ථෙරස්‌ස පන අරහත්‌තමග්‌ගක්‌ඛණෙ පඤ්‌ඤින්‌ද්‍රියං ධුරං අහොසි. සෙසානි චත්‌තාරි ඉන්‌ද්‍රියානි තස්‌සෙව පරිවාරානි අහෙසුං. තස්‌මා සොපි පඤ්‌ඤින්‌ද්‍රියං අධිමත්‌තන්‌ති කථෙන්‌තො අත්‌තනා පටිවිද්‌ධමග්‌ගමෙව කථෙසි.
21. Tatiyassa paṭhame jhānaphassaṃ paṭhamaṃ phusati, pacchā nirodhaṃ nibbānaṃ sacchikarotīti kāyasakkhi. Diṭṭhantaṃ pattoti diṭṭhippatto. Saddahanto vimuttoti saddhāvimutto. Khamatīti ruccati. Abhikkantataroti atisundarataro. Paṇītataroti atipaṇītataro. Saddhindriyaṃ adhimattaṃ hotīti samiddhattherassa kira arahattamaggakkhaṇe saddhindriyaṃ dhuraṃ ahosi, sesāni cattāri sahajātindriyāni tasseva parivārāni ahesuṃ. Iti thero attanā paṭividdhamaggaṃ kathento evamāha. Mahākoṭṭhikattherassa pana arahattamaggakkhaṇe samādhindriyaṃ dhuraṃ ahosi, sesāni cattāri indriyāni tasseva parivārāni ahesuṃ. Tasmā sopi samādhindriyaṃ adhimattanti kathento attanā paṭividdhamaggameva kathesi. Sāriputtattherassa pana arahattamaggakkhaṇe paññindriyaṃ dhuraṃ ahosi. Sesāni cattāri indriyāni tasseva parivārāni ahesuṃ. Tasmā sopi paññindriyaṃ adhimattanti kathento attanā paṭividdhamaggameva kathesi.
න ඛ්‌වෙත්‌ථාති න ඛො එත්‌ථ. එකංසෙන බ්‍යාකාතුන්‌ති එකන්‌තෙන බ්‍යාකරිතුං. අරහත්‌තාය පටිපන්‌නොති අරහත්‌තමග්‌ගසමඞ්‌ගිං දස්‌සෙති. එවමෙතස්‌මිං සුත්‌තෙ තීහිපි ථෙරෙහි අත්‌තනා පටිවිද්‌ධමග්‌ගොව කථිතො, සම්‌මාසම්‌බුද්‌ධො පන භුම්‌මන්‌තරෙනෙව කථෙසි.
Nakhvetthāti na kho ettha. Ekaṃsena byākātunti ekantena byākarituṃ. Arahattāya paṭipannoti arahattamaggasamaṅgiṃ dasseti. Evametasmiṃ sutte tīhipi therehi attanā paṭividdhamaggova kathito, sammāsambuddho pana bhummantareneva kathesi.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. සමිද්‌ධසුත්‌තං • 1. Samiddhasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. සමිද්‌ධසුත්‌තවණ්‌ණනා • 1. Samiddhasuttavaṇṇanā
