| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༣. པུགྒལཝགྒོ
3. Puggalavaggo
༡. སམིདྡྷསུཏྟཝཎྞནཱ
1. Samiddhasuttavaṇṇanā
༢༡. ཏཏིཡསྶ པཋམེ ཛྷཱནཕསྶཾ པཋམཾ ཕུསཏི, པཙྪཱ ནིརོདྷཾ ནིབྦཱནཾ སཙྪིཀརོཏཱིཏི ཀཱཡསཀྑི། དིཊྛནྟཾ པཏྟོཏི དིཊྛིཔྤཏྟོ། སདྡཧནྟོ ཝིམུཏྟོཏི སདྡྷཱཝིམུཏྟོ། ཁམཏཱིཏི རུཙྩཏི། ཨབྷིཀྐནྟཏརོཏི ཨཏིསུནྡརཏརོ། པཎཱིཏཏརོཏི ཨཏིཔཎཱིཏཏརོ། སདྡྷིནྡྲིཡཾ ཨདྷིམཏྟཾ ཧོཏཱིཏི སམིདྡྷཏྠེརསྶ ཀིར ཨརཧཏྟམགྒཀྑཎེ སདྡྷིནྡྲིཡཾ དྷུརཾ ཨཧོསི, སེསཱནི ཙཏྟཱརི སཧཛཱཏིནྡྲིཡཱནི ཏསྶེཝ པརིཝཱརཱནི ཨཧེསུཾ། ཨིཏི ཐེརོ ཨཏྟནཱ པཊིཝིདྡྷམགྒཾ ཀཐེནྟོ ཨེཝམཱཧ། མཧཱཀོཊྛིཀཏྠེརསྶ པན ཨརཧཏྟམགྒཀྑཎེ སམཱདྷིནྡྲིཡཾ དྷུརཾ ཨཧོསི, སེསཱནི ཙཏྟཱརི ཨིནྡྲིཡཱནི ཏསྶེཝ པརིཝཱརཱནི ཨཧེསུཾ། ཏསྨཱ སོཔི སམཱདྷིནྡྲིཡཾ ཨདྷིམཏྟནྟི ཀཐེནྟོ ཨཏྟནཱ པཊིཝིདྡྷམགྒམེཝ ཀཐེསི། སཱརིཔུཏྟཏྠེརསྶ པན ཨརཧཏྟམགྒཀྑཎེ པཉྙིནྡྲིཡཾ དྷུརཾ ཨཧོསི། སེསཱནི ཙཏྟཱརི ཨིནྡྲིཡཱནི ཏསྶེཝ པརིཝཱརཱནི ཨཧེསུཾ། ཏསྨཱ སོཔི པཉྙིནྡྲིཡཾ ཨདྷིམཏྟནྟི ཀཐེནྟོ ཨཏྟནཱ པཊིཝིདྡྷམགྒམེཝ ཀཐེསི།
21. Tatiyassa paṭhame jhānaphassaṃ paṭhamaṃ phusati, pacchā nirodhaṃ nibbānaṃ sacchikarotīti kāyasakkhi. Diṭṭhantaṃ pattoti diṭṭhippatto. Saddahanto vimuttoti saddhāvimutto. Khamatīti ruccati. Abhikkantataroti atisundarataro. Paṇītataroti atipaṇītataro. Saddhindriyaṃ adhimattaṃ hotīti samiddhattherassa kira arahattamaggakkhaṇe saddhindriyaṃ dhuraṃ ahosi, sesāni cattāri sahajātindriyāni tasseva parivārāni ahesuṃ. Iti thero attanā paṭividdhamaggaṃ kathento evamāha. Mahākoṭṭhikattherassa pana arahattamaggakkhaṇe samādhindriyaṃ dhuraṃ ahosi, sesāni cattāri indriyāni tasseva parivārāni ahesuṃ. Tasmā sopi samādhindriyaṃ adhimattanti kathento attanā paṭividdhamaggameva kathesi. Sāriputtattherassa pana arahattamaggakkhaṇe paññindriyaṃ dhuraṃ ahosi. Sesāni cattāri indriyāni tasseva parivārāni ahesuṃ. Tasmā sopi paññindriyaṃ adhimattanti kathento attanā paṭividdhamaggameva kathesi.
ན ཁྭེཏྠཱཏི ན ཁོ ཨེཏྠ། ཨེཀཾསེན བྱཱཀཱཏུནྟི ཨེཀནྟེན བྱཱཀརིཏུཾ། ཨརཧཏྟཱཡ པཊིཔནྣོཏི ཨརཧཏྟམགྒསམངྒིཾ དསྶེཏི། ཨེཝམེཏསྨིཾ སུཏྟེ ཏཱིཧིཔི ཐེརེཧི ཨཏྟནཱ པཊིཝིདྡྷམགྒོཝ ཀཐིཏོ, སམྨཱསམྦུདྡྷོ པན བྷུམྨནྟརེནེཝ ཀཐེསི།
Nakhvetthāti na kho ettha. Ekaṃsena byākātunti ekantena byākarituṃ. Arahattāya paṭipannoti arahattamaggasamaṅgiṃ dasseti. Evametasmiṃ sutte tīhipi therehi attanā paṭividdhamaggova kathito, sammāsambuddho pana bhummantareneva kathesi.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. སམིདྡྷསུཏྟཾ • 1. Samiddhasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡. སམིདྡྷསུཏྟཝཎྞནཱ • 1. Samiddhasuttavaṇṇanā
