| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ஸமித்³தி⁴ஸுத்தங்
2. Samiddhisuttaṃ
158. ஏகங் ஸமயங் ப⁴க³வா ஸக்கேஸு விஹரதி ஸிலாவதியங். தேன கோ² பன ஸமயேன ஆயஸ்மா ஸமித்³தி⁴ ப⁴க³வதோ அவிதூ³ரே அப்பமத்தோ ஆதாபீ பஹிதத்தோ விஹரதி. அத² கோ² ஆயஸ்மதோ ஸமித்³தி⁴ஸ்ஸ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘லாபா⁴ வத மே, ஸுலத்³த⁴ங் வத மே, யஸ்ஸ மே ஸத்தா² அரஹங் ஸம்மாஸம்பு³த்³தோ⁴. லாபா⁴ வத மே, ஸுலத்³த⁴ங் வத மே, ய்வாஹங் ஏவங் ஸ்வாக்கா²தே த⁴ம்மவினயே பப்³ப³ஜிதோ. லாபா⁴ வத மே, ஸுலத்³த⁴ங் வத மே, யஸ்ஸ மே ஸப்³ரஹ்மசாரினோ ஸீலவந்தோ கல்யாணத⁴ம்மா’’தி. அத² கோ² மாரோ பாபிமா ஆயஸ்மதோ ஸமித்³தி⁴ஸ்ஸ சேதஸா சேதோபரிவிதக்கமஞ்ஞாய யேனாயஸ்மா ஸமித்³தி⁴ தேனுபஸங்கமி; உபஸங்கமித்வா ஆயஸ்மதோ ஸமித்³தி⁴ஸ்ஸ அவிதூ³ரே மஹந்தங் ப⁴யபே⁴ரவங் ஸத்³த³மகாஸி, அபிஸ்ஸுத³ங் பத²வீ மஞ்ஞே உந்த்³ரீயதி.
158. Ekaṃ samayaṃ bhagavā sakkesu viharati silāvatiyaṃ. Tena kho pana samayena āyasmā samiddhi bhagavato avidūre appamatto ātāpī pahitatto viharati. Atha kho āyasmato samiddhissa rahogatassa paṭisallīnassa evaṃ cetaso parivitakko udapādi – ‘‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’’ti. Atha kho māro pāpimā āyasmato samiddhissa cetasā cetoparivitakkamaññāya yenāyasmā samiddhi tenupasaṅkami; upasaṅkamitvā āyasmato samiddhissa avidūre mahantaṃ bhayabheravaṃ saddamakāsi, apissudaṃ pathavī maññe undrīyati.
அத² கோ² ஆயஸ்மா ஸமித்³தி⁴ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ ஆயஸ்மா ஸமித்³தி⁴ ப⁴க³வந்தங் ஏதத³வோச – ‘‘இதா⁴ஹங், ப⁴ந்தே, ப⁴க³வதோ அவிதூ³ரே அப்பமத்தோ ஆதாபீ பஹிதத்தோ விஹராமி. தஸ்ஸ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘லாபா⁴ வத மே, ஸுலத்³த⁴ங் வத மே, யஸ்ஸ மே ஸத்தா² அரஹங் ஸம்மாஸம்பு³த்³தோ⁴. லாபா⁴ வத மே, ஸுலத்³த⁴ங் வத மே, ய்வாஹங் ஏவங் ஸ்வாக்கா²தே த⁴ம்மவினயே பப்³ப³ஜிதோ. லாபா⁴ வத மே, ஸுலத்³த⁴ங் வத மே, யஸ்ஸ மே ஸப்³ரஹ்மசாரினோ ஸீலவந்தோ கல்யாணத⁴ம்மா’தி. தஸ்ஸ மய்ஹங், ப⁴ந்தே, அவிதூ³ரே மஹாப⁴யபே⁴ரவஸத்³தோ³ அஹோஸி, அபிஸ்ஸுத³ங் பத²வீ மஞ்ஞே உந்த்³ரீயதீ’’தி.
Atha kho āyasmā samiddhi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno āyasmā samiddhi bhagavantaṃ etadavoca – ‘‘idhāhaṃ, bhante, bhagavato avidūre appamatto ātāpī pahitatto viharāmi. Tassa mayhaṃ, bhante, rahogatassa paṭisallīnassa evaṃ cetaso parivitakko udapādi – ‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’ti. Tassa mayhaṃ, bhante, avidūre mahābhayabheravasaddo ahosi, apissudaṃ pathavī maññe undrīyatī’’ti.
‘‘நேஸா, ஸமித்³தி⁴, பத²வீ உந்த்³ரீயதி. மாரோ ஏஸோ பாபிமா துய்ஹங் விசக்கு²கம்மாய ஆக³தோ. க³ச்ச² த்வங், ஸமித்³தி⁴, தத்தே²வ அப்பமத்தோ ஆதாபீ பஹிதத்தோ விஹராஹீ’’தி. ‘‘ஏவங், ப⁴ந்தே’’தி கோ² ஆயஸ்மா ஸமித்³தி⁴ ப⁴க³வதோ படிஸ்ஸுத்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. து³தியம்பி கோ² ஆயஸ்மா ஸமித்³தி⁴ தத்தே²வ அப்பமத்தோ ஆதாபீ பஹிதத்தோ விஹாஸி. து³தியம்பி கோ² ஆயஸ்மதோ ஸமித்³தி⁴ஸ்ஸ ரஹோக³தஸ்ஸ படிஸல்லீனஸ்ஸ…பே॰… து³தியம்பி கோ² மாரோ பாபிமா ஆயஸ்மதோ ஸமித்³தி⁴ஸ்ஸ சேதஸா சேதோபரிவிதக்கமஞ்ஞாய…பே॰… அபிஸ்ஸுத³ங் பத²வீ மஞ்ஞே உந்த்³ரீயதி. அத² கோ² ஆயஸ்மா ஸமித்³தி⁴ மாரங் பாபிமந்தங் கா³தா²ய அஜ்ஜ²பா⁴ஸி –
‘‘Nesā, samiddhi, pathavī undrīyati. Māro eso pāpimā tuyhaṃ vicakkhukammāya āgato. Gaccha tvaṃ, samiddhi, tattheva appamatto ātāpī pahitatto viharāhī’’ti. ‘‘Evaṃ, bhante’’ti kho āyasmā samiddhi bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Dutiyampi kho āyasmā samiddhi tattheva appamatto ātāpī pahitatto vihāsi. Dutiyampi kho āyasmato samiddhissa rahogatassa paṭisallīnassa…pe… dutiyampi kho māro pāpimā āyasmato samiddhissa cetasā cetoparivitakkamaññāya…pe… apissudaṃ pathavī maññe undrīyati. Atha kho āyasmā samiddhi māraṃ pāpimantaṃ gāthāya ajjhabhāsi –
‘‘ஸத்³தா⁴யாஹங் பப்³ப³ஜிதோ, அகா³ரஸ்மா அனகா³ரியங்;
‘‘Saddhāyāhaṃ pabbajito, agārasmā anagāriyaṃ;
ஸதி பஞ்ஞா ச மே பு³த்³தா⁴, சித்தஞ்ச ஸுஸமாஹிதங்;
Sati paññā ca me buddhā, cittañca susamāhitaṃ;
காமங் கரஸ்ஸு ரூபானி, நேவ மங் ப்³யாத⁴யிஸ்ஸஸீ’’தி.
Kāmaṃ karassu rūpāni, neva maṃ byādhayissasī’’ti.
அத² கோ² மாரோ பாபிமா ‘‘ஜானாதி மங் ஸமித்³தி⁴ பி⁴க்கூ²’’தி து³க்கீ² து³ம்மனோ தத்தே²வந்தரதா⁴யீதி.
Atha kho māro pāpimā ‘‘jānāti maṃ samiddhi bhikkhū’’ti dukkhī dummano tatthevantaradhāyīti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. ஸமித்³தி⁴ஸுத்தவண்ணனா • 2. Samiddhisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. ஸமித்³தி⁴ஸுத்தவண்ணனா • 2. Samiddhisuttavaṇṇanā
