| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. সমিদ্ধিসুত্তং
2. Samiddhisuttaṃ
১৫৮. একং সমযং ভগৰা সক্কেসু ৰিহরতি সিলাৰতিযং। তেন খো পন সমযেন আযস্মা সমিদ্ধি ভগৰতো অৰিদূরে অপ্পমত্তো আতাপী পহিতত্তো ৰিহরতি। অথ খো আযস্মতো সমিদ্ধিস্স রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘লাভা ৰত মে, সুলদ্ধং ৰত মে, যস্স মে সত্থা অরহং সম্মাসম্বুদ্ধো। লাভা ৰত মে, সুলদ্ধং ৰত মে, য্ৰাহং এৰং স্ৰাক্খাতে ধম্মৰিনযে পব্বজিতো। লাভা ৰত মে, সুলদ্ধং ৰত মে, যস্স মে সব্রহ্মচারিনো সীলৰন্তো কল্যাণধম্মা’’তি। অথ খো মারো পাপিমা আযস্মতো সমিদ্ধিস্স চেতসা চেতোপরিৰিতক্কমঞ্ঞায যেনাযস্মা সমিদ্ধি তেনুপসঙ্কমি; উপসঙ্কমিত্ৰা আযস্মতো সমিদ্ধিস্স অৰিদূরে মহন্তং ভযভেরৰং সদ্দমকাসি, অপিস্সুদং পথৰী মঞ্ঞে উন্দ্রীযতি।
158. Ekaṃ samayaṃ bhagavā sakkesu viharati silāvatiyaṃ. Tena kho pana samayena āyasmā samiddhi bhagavato avidūre appamatto ātāpī pahitatto viharati. Atha kho āyasmato samiddhissa rahogatassa paṭisallīnassa evaṃ cetaso parivitakko udapādi – ‘‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’’ti. Atha kho māro pāpimā āyasmato samiddhissa cetasā cetoparivitakkamaññāya yenāyasmā samiddhi tenupasaṅkami; upasaṅkamitvā āyasmato samiddhissa avidūre mahantaṃ bhayabheravaṃ saddamakāsi, apissudaṃ pathavī maññe undrīyati.
অথ খো আযস্মা সমিদ্ধি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো আযস্মা সমিদ্ধি ভগৰন্তং এতদৰোচ – ‘‘ইধাহং, ভন্তে, ভগৰতো অৰিদূরে অপ্পমত্তো আতাপী পহিতত্তো ৰিহরামি। তস্স ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘লাভা ৰত মে, সুলদ্ধং ৰত মে, যস্স মে সত্থা অরহং সম্মাসম্বুদ্ধো। লাভা ৰত মে, সুলদ্ধং ৰত মে, য্ৰাহং এৰং স্ৰাক্খাতে ধম্মৰিনযে পব্বজিতো। লাভা ৰত মে, সুলদ্ধং ৰত মে, যস্স মে সব্রহ্মচারিনো সীলৰন্তো কল্যাণধম্মা’তি। তস্স ময্হং, ভন্তে, অৰিদূরে মহাভযভেরৰসদ্দো অহোসি, অপিস্সুদং পথৰী মঞ্ঞে উন্দ্রীযতী’’তি।
Atha kho āyasmā samiddhi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno āyasmā samiddhi bhagavantaṃ etadavoca – ‘‘idhāhaṃ, bhante, bhagavato avidūre appamatto ātāpī pahitatto viharāmi. Tassa mayhaṃ, bhante, rahogatassa paṭisallīnassa evaṃ cetaso parivitakko udapādi – ‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’ti. Tassa mayhaṃ, bhante, avidūre mahābhayabheravasaddo ahosi, apissudaṃ pathavī maññe undrīyatī’’ti.
‘‘নেসা, সমিদ্ধি, পথৰী উন্দ্রীযতি। মারো এসো পাপিমা তুয্হং ৰিচক্খুকম্মায আগতো। গচ্ছ ত্ৰং, সমিদ্ধি, তত্থেৰ অপ্পমত্তো আতাপী পহিতত্তো ৰিহরাহী’’তি। ‘‘এৰং, ভন্তে’’তি খো আযস্মা সমিদ্ধি ভগৰতো পটিস্সুত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি। দুতিযম্পি খো আযস্মা সমিদ্ধি তত্থেৰ অপ্পমত্তো আতাপী পহিতত্তো ৰিহাসি। দুতিযম্পি খো আযস্মতো সমিদ্ধিস্স রহোগতস্স পটিসল্লীনস্স…পে॰… দুতিযম্পি খো মারো পাপিমা আযস্মতো সমিদ্ধিস্স চেতসা চেতোপরিৰিতক্কমঞ্ঞায…পে॰… অপিস্সুদং পথৰী মঞ্ঞে উন্দ্রীযতি। অথ খো আযস্মা সমিদ্ধি মারং পাপিমন্তং গাথায অজ্ঝভাসি –
‘‘Nesā, samiddhi, pathavī undrīyati. Māro eso pāpimā tuyhaṃ vicakkhukammāya āgato. Gaccha tvaṃ, samiddhi, tattheva appamatto ātāpī pahitatto viharāhī’’ti. ‘‘Evaṃ, bhante’’ti kho āyasmā samiddhi bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Dutiyampi kho āyasmā samiddhi tattheva appamatto ātāpī pahitatto vihāsi. Dutiyampi kho āyasmato samiddhissa rahogatassa paṭisallīnassa…pe… dutiyampi kho māro pāpimā āyasmato samiddhissa cetasā cetoparivitakkamaññāya…pe… apissudaṃ pathavī maññe undrīyati. Atha kho āyasmā samiddhi māraṃ pāpimantaṃ gāthāya ajjhabhāsi –
‘‘সদ্ধাযাহং পব্বজিতো, অগারস্মা অনগারিযং।
‘‘Saddhāyāhaṃ pabbajito, agārasmā anagāriyaṃ;
সতি পঞ্ঞা চ মে বুদ্ধা, চিত্তঞ্চ সুসমাহিতং।
Sati paññā ca me buddhā, cittañca susamāhitaṃ;
কামং করস্সু রূপানি, নেৰ মং ব্যাধযিস্সসী’’তি॥
Kāmaṃ karassu rūpāni, neva maṃ byādhayissasī’’ti.
অথ খো মারো পাপিমা ‘‘জানাতি মং সমিদ্ধি ভিক্খূ’’তি দুক্খী দুম্মনো তত্থেৰন্তরধাযীতি।
Atha kho māro pāpimā ‘‘jānāti maṃ samiddhi bhikkhū’’ti dukkhī dummano tatthevantaradhāyīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. সমিদ্ধিসুত্তৰণ্ণনা • 2. Samiddhisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. সমিদ্ধিসুত্তৰণ্ণনা • 2. Samiddhisuttavaṇṇanā
