| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. සමිද්‌ධිසුත්‌තං
2. Samiddhisuttaṃ
158. එකං සමයං භගවා සක්‌කෙසු විහරති සිලාවතියං. තෙන ඛො පන සමයෙන ආයස්‌මා සමිද්‌ධි භගවතො අවිදූරෙ අප්‌පමත්‌තො ආතාපී පහිතත්‌තො විහරති. අථ ඛො ආයස්‌මතො සමිද්‌ධිස්‌ස රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘‘ලාභා වත මෙ, සුලද්‌ධං වත මෙ, යස්‌ස මෙ සත්‌ථා අරහං සම්‌මාසම්‌බුද්‌ධො. ලාභා වත මෙ, සුලද්‌ධං වත මෙ, ය්‌වාහං එවං ස්‌වාක්‌ඛාතෙ ධම්‌මවිනයෙ පබ්‌බජිතො. ලාභා වත මෙ, සුලද්‌ධං වත මෙ, යස්‌ස මෙ සබ්‍රහ්‌මචාරිනො සීලවන්‌තො කල්‍යාණධම්‌මා’’ති. අථ ඛො මාරො පාපිමා ආයස්‌මතො සමිද්‌ධිස්‌ස චෙතසා චෙතොපරිවිතක්‌කමඤ්‌ඤාය යෙනායස්‌මා සමිද්‌ධි තෙනුපසඞ්‌කමි; උපසඞ්‌කමිත්‌වා ආයස්‌මතො සමිද්‌ධිස්‌ස අවිදූරෙ මහන්‌තං භයභෙරවං සද්‌දමකාසි, අපිස්‌සුදං පථවී මඤ්‌ඤෙ උන්‌ද්‍රීයති.
158. Ekaṃ samayaṃ bhagavā sakkesu viharati silāvatiyaṃ. Tena kho pana samayena āyasmā samiddhi bhagavato avidūre appamatto ātāpī pahitatto viharati. Atha kho āyasmato samiddhissa rahogatassa paṭisallīnassa evaṃ cetaso parivitakko udapādi – ‘‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’’ti. Atha kho māro pāpimā āyasmato samiddhissa cetasā cetoparivitakkamaññāya yenāyasmā samiddhi tenupasaṅkami; upasaṅkamitvā āyasmato samiddhissa avidūre mahantaṃ bhayabheravaṃ saddamakāsi, apissudaṃ pathavī maññe undrīyati.
අථ ඛො ආයස්‌මා සමිද්‌ධි යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ආයස්‌මා සමිද්‌ධි භගවන්‌තං එතදවොච – ‘‘ඉධාහං, භන්‌තෙ, භගවතො අවිදූරෙ අප්‌පමත්‌තො ආතාපී පහිතත්‌තො විහරාමි. තස්‌ස මය්‌හං, භන්‌තෙ, රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘ලාභා වත මෙ, සුලද්‌ධං වත මෙ, යස්‌ස මෙ සත්‌ථා අරහං සම්‌මාසම්‌බුද්‌ධො. ලාභා වත මෙ, සුලද්‌ධං වත මෙ, ය්‌වාහං එවං ස්‌වාක්‌ඛාතෙ ධම්‌මවිනයෙ පබ්‌බජිතො. ලාභා වත මෙ, සුලද්‌ධං වත මෙ, යස්‌ස මෙ සබ්‍රහ්‌මචාරිනො සීලවන්‌තො කල්‍යාණධම්‌මා’ති. තස්‌ස මය්‌හං, භන්‌තෙ, අවිදූරෙ මහාභයභෙරවසද්‌දො අහොසි, අපිස්‌සුදං පථවී මඤ්‌ඤෙ උන්‌ද්‍රීයතී’’ති.
Atha kho āyasmā samiddhi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno āyasmā samiddhi bhagavantaṃ etadavoca – ‘‘idhāhaṃ, bhante, bhagavato avidūre appamatto ātāpī pahitatto viharāmi. Tassa mayhaṃ, bhante, rahogatassa paṭisallīnassa evaṃ cetaso parivitakko udapādi – ‘lābhā vata me, suladdhaṃ vata me, yassa me satthā arahaṃ sammāsambuddho. Lābhā vata me, suladdhaṃ vata me, yvāhaṃ evaṃ svākkhāte dhammavinaye pabbajito. Lābhā vata me, suladdhaṃ vata me, yassa me sabrahmacārino sīlavanto kalyāṇadhammā’ti. Tassa mayhaṃ, bhante, avidūre mahābhayabheravasaddo ahosi, apissudaṃ pathavī maññe undrīyatī’’ti.
‘‘නෙසා, සමිද්‌ධි, පථවී උන්‌ද්‍රීයති. මාරො එසො පාපිමා තුය්‌හං විචක්‌ඛුකම්‌මාය ආගතො. ගච්‌ඡ ත්‌වං, සමිද්‌ධි, තත්‌ථෙව අප්‌පමත්‌තො ආතාපී පහිතත්‌තො විහරාහී’’ති. ‘‘එවං, භන්‌තෙ’’ති ඛො ආයස්‌මා සමිද්‌ධි භගවතො පටිස්‌සුත්‌වා උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි. දුතියම්‌පි ඛො ආයස්‌මා සමිද්‌ධි තත්‌ථෙව අප්‌පමත්‌තො ආතාපී පහිතත්‌තො විහාසි. දුතියම්‌පි ඛො ආයස්‌මතො සමිද්‌ධිස්‌ස රහොගතස්‌ස පටිසල්‌ලීනස්‌ස…පෙ.… දුතියම්‌පි ඛො මාරො පාපිමා ආයස්‌මතො සමිද්‌ධිස්‌ස චෙතසා චෙතොපරිවිතක්‌කමඤ්‌ඤාය…පෙ.… අපිස්‌සුදං පථවී මඤ්‌ඤෙ උන්‌ද්‍රීයති. අථ ඛො ආයස්‌මා සමිද්‌ධි මාරං පාපිමන්‌තං ගාථාය අජ්‌ඣභාසි –
‘‘Nesā, samiddhi, pathavī undrīyati. Māro eso pāpimā tuyhaṃ vicakkhukammāya āgato. Gaccha tvaṃ, samiddhi, tattheva appamatto ātāpī pahitatto viharāhī’’ti. ‘‘Evaṃ, bhante’’ti kho āyasmā samiddhi bhagavato paṭissutvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Dutiyampi kho āyasmā samiddhi tattheva appamatto ātāpī pahitatto vihāsi. Dutiyampi kho āyasmato samiddhissa rahogatassa paṭisallīnassa…pe… dutiyampi kho māro pāpimā āyasmato samiddhissa cetasā cetoparivitakkamaññāya…pe… apissudaṃ pathavī maññe undrīyati. Atha kho āyasmā samiddhi māraṃ pāpimantaṃ gāthāya ajjhabhāsi –
‘‘සද්‌ධායාහං පබ්‌බජිතො, අගාරස්‌මා අනගාරියං;
‘‘Saddhāyāhaṃ pabbajito, agārasmā anagāriyaṃ;
සති පඤ්‌ඤා ච මෙ බුද්‌ධා, චිත්‌තඤ්‌ච සුසමාහිතං;
Sati paññā ca me buddhā, cittañca susamāhitaṃ;
කාමං කරස්‌සු රූපානි, නෙව මං බ්‍යාධයිස්‌සසී’’ති.
Kāmaṃ karassu rūpāni, neva maṃ byādhayissasī’’ti.
අථ ඛො මාරො පාපිමා ‘‘ජානාති මං සමිද්‌ධි භික්‌ඛූ’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ samiddhi bhikkhū’’ti dukkhī dummano tatthevantaradhāyīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. සමිද්‌ධිසුත්‌තවණ්‌ණනා • 2. Samiddhisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. සමිද්‌ධිසුත්‌තවණ්‌ණනා • 2. Samiddhisuttavaṇṇanā
