| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. སམིདྡྷིསུཏྟཾ
4. Samiddhisuttaṃ
༡༤. ཨཐ ཁོ ཨཱཡསྨཱ སམིདྡྷི ཡེནཱཡསྨཱ སཱརིཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ སཱརིཔུཏྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ སམིདྡྷིཾ ཨཱཡསྨཱ སཱརིཔུཏྟོ ཨེཏདཝོཙ – ‘‘ཀིམཱརམྨཎཱ, སམིདྡྷི, པུརིསསྶ སངྐཔྤཝིཏཀྐཱ ཨུཔྤཛྫནྟཱི’’ཏི? ‘‘ནཱམརཱུཔཱརམྨཎཱ, བྷནྟེ’’ཏི། ‘‘ཏེ པན, སམིདྡྷི, ཀྭ ནཱནཏྟཾ གཙྪནྟཱི’’ཏི? ‘‘དྷཱཏཱུསུ, བྷནྟེ’’ཏི། ‘‘ཏེ པན, སམིདྡྷི, ཀིཾསམུདཡཱ’’ཏི? ‘‘ཕསྶསམུདཡཱ, བྷནྟེ’’ཏི། ‘‘ཏེ པན, སམིདྡྷི, ཀིཾསམོསརཎཱ’’ཏི? ‘‘ཝེདནཱསམོསརཎཱ, བྷནྟེ’’ཏི། ‘‘ཏེ པན , སམིདྡྷི, ཀིཾཔམུཁཱ’’ཏི? ‘‘སམཱདྷིཔྤམུཁཱ, བྷནྟེ’’ཏི། ‘‘ཏེ པན, སམིདྡྷི, ཀིཾཨདྷིཔཏེཡྻཱ’’ཏི? ‘‘སཏཱདྷིཔཏེཡྻཱ, བྷནྟེ’’ཏི། ‘‘ཏེ པན, སམིདྡྷི, ཀིཾཨུཏྟརཱ’’ཏི? ‘‘པཉྙུཏྟརཱ, བྷནྟེ’’ཏི། ‘‘ཏེ པན, སམིདྡྷི, ཀིཾསཱརཱ’’ཏི? ‘‘ཝིམུཏྟིསཱརཱ, བྷནྟེ’’ཏི། ‘‘ཏེ པན, སམིདྡྷི, ཀིཾཨོགདྷཱ’’ཏི? ‘‘ཨམཏོགདྷཱ, བྷནྟེ’’ཏི།
14. Atha kho āyasmā samiddhi yenāyasmā sāriputto tenupasaṅkami; upasaṅkamitvā āyasmantaṃ sāriputtaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ samiddhiṃ āyasmā sāriputto etadavoca – ‘‘kimārammaṇā, samiddhi, purisassa saṅkappavitakkā uppajjantī’’ti? ‘‘Nāmarūpārammaṇā, bhante’’ti. ‘‘Te pana, samiddhi, kva nānattaṃ gacchantī’’ti? ‘‘Dhātūsu, bhante’’ti. ‘‘Te pana, samiddhi, kiṃsamudayā’’ti? ‘‘Phassasamudayā, bhante’’ti. ‘‘Te pana, samiddhi, kiṃsamosaraṇā’’ti? ‘‘Vedanāsamosaraṇā, bhante’’ti. ‘‘Te pana , samiddhi, kiṃpamukhā’’ti? ‘‘Samādhippamukhā, bhante’’ti. ‘‘Te pana, samiddhi, kiṃadhipateyyā’’ti? ‘‘Satādhipateyyā, bhante’’ti. ‘‘Te pana, samiddhi, kiṃuttarā’’ti? ‘‘Paññuttarā, bhante’’ti. ‘‘Te pana, samiddhi, kiṃsārā’’ti? ‘‘Vimuttisārā, bhante’’ti. ‘‘Te pana, samiddhi, kiṃogadhā’’ti? ‘‘Amatogadhā, bhante’’ti.
‘‘‘ཀིམཱརམྨཎཱ, སམིདྡྷི, པུརིསསྶ སངྐཔྤཝིཏཀྐཱ ཨུཔྤཛྫནྟཱི’ཏི, ཨིཏི པུཊྛོ སམཱནོ ‘ནཱམརཱུཔཱརམྨཎཱ, བྷནྟེ’ཏི ཝདེསི། ‘ཏེ པན, སམིདྡྷི, ཀྭ ནཱནཏྟཾ གཙྪནྟཱི’ཏི, ཨིཏི པུཊྛོ སམཱནོ ‘དྷཱཏཱུསུ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾསམུདཡཱ’ཏི, ཨིཏི པུཊྛོ སམཱནོ ‘ཕསྶསམུདཡཱ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾསམོསརཎཱ’ཏི, ཨིཏི པུཊྛོ སམཱནོ ‘ཝེདནཱསམོསརཎཱ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾཔམུཁཱ’ཏི, ཨིཏི པུཊྛོ སམཱནོ ‘སམཱདྷིཔྤམུཁཱ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾཨདྷིཔཏེཡྻཱ’ཏི, ཨིཏི པུཊྛོ སམཱནོ ‘སཏཱདྷིཔཏེཡྻཱ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾཨུཏྟརཱ’ཏི, ཨིཏི པུཊྛོ སམཱནོ ‘པཉྙུཏྟརཱ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾསཱརཱ’ཏི, ཨིཏི པུཊྛོ སམཱནོ ‘ཝིམུཏྟིསཱརཱ, བྷནྟེ’ཏི ཝདེསི། ‘ཏེ པན, སམིདྡྷི, ཀིཾཨོགདྷཱ’ཏི, ཨིཏི པུཊྛོ སམཱནོ ‘ཨམཏོགདྷཱ, བྷནྟེ’ཏི ཝདེསི། སཱདྷུ སཱདྷུ, སམིདྡྷི! སཱདྷུ ཁོ ཏྭཾ, སམིདྡྷི, པུཊྛོ 1 པུཊྛོ ཝིསྶཛྫེསི, ཏེན ཙ མཱ མཉྙཱི’’ཏི། ཙཏུཏྠཾ།
‘‘‘Kimārammaṇā, samiddhi, purisassa saṅkappavitakkā uppajjantī’ti, iti puṭṭho samāno ‘nāmarūpārammaṇā, bhante’ti vadesi. ‘Te pana, samiddhi, kva nānattaṃ gacchantī’ti, iti puṭṭho samāno ‘dhātūsu, bhante’ti vadesi. ‘Te pana, samiddhi, kiṃsamudayā’ti, iti puṭṭho samāno ‘phassasamudayā, bhante’ti vadesi. ‘Te pana, samiddhi, kiṃsamosaraṇā’ti, iti puṭṭho samāno ‘vedanāsamosaraṇā, bhante’ti vadesi. ‘Te pana, samiddhi, kiṃpamukhā’ti, iti puṭṭho samāno ‘samādhippamukhā, bhante’ti vadesi. ‘Te pana, samiddhi, kiṃadhipateyyā’ti, iti puṭṭho samāno ‘satādhipateyyā, bhante’ti vadesi. ‘Te pana, samiddhi, kiṃuttarā’ti, iti puṭṭho samāno ‘paññuttarā, bhante’ti vadesi. ‘Te pana, samiddhi, kiṃsārā’ti, iti puṭṭho samāno ‘vimuttisārā, bhante’ti vadesi. ‘Te pana, samiddhi, kiṃogadhā’ti, iti puṭṭho samāno ‘amatogadhā, bhante’ti vadesi. Sādhu sādhu, samiddhi! Sādhu kho tvaṃ, samiddhi, puṭṭho 2 puṭṭho vissajjesi, tena ca mā maññī’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. སམིདྡྷིསུཏྟཝཎྞནཱ • 4. Samiddhisuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤. སམིདྡྷིསུཏྟཝཎྞནཱ • 4. Samiddhisuttavaṇṇanā
