| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. সমিদ্ধিসুত্তৰণ্ণনা
2. Samiddhisuttavaṇṇanā
১৫৮. ময্হং লাভাতি এৰরূপস্স নাম সম্মাসম্বুদ্ধস্স সত্থুস্স পটিলাভো, এৰরূপস্স চ নাম নিয্যানিকস্স সদ্ধম্মস্স পটিলাভো, এৰরূপানঞ্চ সুপ্পটিপন্নানং সব্রহ্মচারীনং পটিলাভো, এতে ময্হং সুলদ্ধলাভা। ময্হং সুলদ্ধন্তি যঞ্চেতং মম নিয্যানিকসাসনে পব্বজ্জা উপসম্পদা, তস্মিঞ্চ অভিরতীতি সব্বঞ্চেতং মযা সুলদ্ধং। যথা পনস্স এৰং চেতসো পরিৰিতক্কো উপ্পন্নো, তং দস্সেতুং ‘‘সো কিরা’’তিআদি ৰুত্তং। চরিতানুরূপৰসেন গহিতং মূলকম্মট্ঠানং। পাসাদিকন্তি পসাদাৰহং। এৰমহোসীতি ‘‘লাভা ৰত মে’’তিআদিনা এৰং পরিৰিতক্কো অহোসি। নিসিন্নসদিসোতি নিসিন্নো ৰিয। তস্মিংযেৰ ঠানেতি যস্মিং ঠানে নিসিন্নং মারো উপসঙ্কমি, তস্মিংযেৰ ঠানে। তস্সাতি সমিদ্ধিত্থেরস্স। কম্মট্ঠানং সপ্পাযন্তি কম্মট্ঠানভাৰনায অনুযুঞ্জনং সপ্পাযং উপকারাৰহং ভৰিস্সতি।
158.Mayhaṃlābhāti evarūpassa nāma sammāsambuddhassa satthussa paṭilābho, evarūpassa ca nāma niyyānikassa saddhammassa paṭilābho, evarūpānañca suppaṭipannānaṃ sabrahmacārīnaṃ paṭilābho, ete mayhaṃ suladdhalābhā. Mayhaṃ suladdhanti yañcetaṃ mama niyyānikasāsane pabbajjā upasampadā, tasmiñca abhiratīti sabbañcetaṃ mayā suladdhaṃ. Yathā panassa evaṃ cetaso parivitakko uppanno, taṃ dassetuṃ ‘‘so kirā’’tiādi vuttaṃ. Caritānurūpavasena gahitaṃ mūlakammaṭṭhānaṃ. Pāsādikanti pasādāvahaṃ. Evamahosīti ‘‘lābhā vata me’’tiādinā evaṃ parivitakko ahosi. Nisinnasadisoti nisinno viya. Tasmiṃyeva ṭhāneti yasmiṃ ṭhāne nisinnaṃ māro upasaṅkami, tasmiṃyeva ṭhāne. Tassāti samiddhittherassa. Kammaṭṭhānaṃ sappāyanti kammaṭṭhānabhāvanāya anuyuñjanaṃ sappāyaṃ upakārāvahaṃ bhavissati.
ময্হন্তি মযা। সতি চ পঞ্ঞা চ সতিপঞ্ঞা, তা অরিযমগ্গেন জাননসমত্থনভাৰেন অৰবুদ্ধা। থেরো কির তদা ৰিপস্সনং উস্সুক্কাপেসি। কামন্তি যথারুচি। কেচি ‘‘কামং করস্সূতি আযস্মতো ‘কামা’তি মারস্স আলপন’’ন্তি ৰদন্তি। ৰিভিংসকারহানীতি ভযানকারহানি। রূপানীতি ৰিপ্পকারানি। ৰিপ্পকারত্থোপি হি রূপসদ্দো ‘‘রূপং দস্সেতি অনপ্পক’’ন্তিআদীসু ৰিয। ন কম্পেস্সসীতি সমণধম্মকরণতো ন চলিস্সসি।
Mayhanti mayā. Sati ca paññā ca satipaññā, tā ariyamaggena jānanasamatthanabhāvena avabuddhā. Thero kira tadā vipassanaṃ ussukkāpesi. Kāmanti yathāruci. Keci ‘‘kāmaṃ karassūti āyasmato ‘kāmā’ti mārassa ālapana’’nti vadanti. Vibhiṃsakārahānīti bhayānakārahāni. Rūpānīti vippakārāni. Vippakāratthopi hi rūpasaddo ‘‘rūpaṃ dasseti anappaka’’ntiādīsu viya. Na kampessasīti samaṇadhammakaraṇato na calissasi.
সমিদ্ধিসুত্তৰণ্ণনা নিট্ঠিতা।
Samiddhisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. সমিদ্ধিসুত্তং • 2. Samiddhisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. সমিদ্ধিসুত্তৰণ্ণনা • 2. Samiddhisuttavaṇṇanā
