| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
10. самид̣̇д̇хисуд̇д̇аван̣н̣анаа
10. Samiddhisuttavaṇṇanā
20. д̣̇асамз д̇абод̣̇аараамзд̇и д̇абод̣̇асса д̇ад̇д̇од̣̇агасса рахад̣̇асса васзна звам̣ лад̣̇д̇ханаамз аараамз. взбхаарабаб̣б̣ад̇асса гира хздтаа бхуммадтаганааг̇аанам̣ бан̃жаяож̇анасад̇игам̣ нааг̇абхаванам̣ д̣̇звалогасад̣̇исам̣ ман̣имаязна д̇алзна аараамуяяаанзхи жа саманнааг̇ад̇ам̣. д̇ад̇т̇а нааг̇аанам̣ гийл̣анадтаанз махаауд̣̇агарахад̣̇о, д̇ад̇о д̇абод̣̇аа наама над̣̇ий санд̣̇ад̇и гут̇ид̇аа ун̣ход̣̇агаа. гасмаа банзсаа зд̣̇исаа? рааж̇аг̇ахам̣ гира бариваарзд̇ваа махаабзд̇алого д̇идтад̇и, д̇ад̇т̇а д̣̇виннам̣ махаалохагумбхинираяаанам̣ анд̇арзна аяам̣ д̇абод̣̇аа ааг̇ажчад̇и, д̇асмаа гут̇ид̇аа санд̣̇ад̇и. вуд̇д̇амби жзд̇ам̣ –
20. Dasame tapodārāmeti tapodassa tattodakassa rahadassa vasena evaṃ laddhanāme ārāme. Vebhārapabbatassa kira heṭṭhā bhummaṭṭhakanāgānaṃ pañcayojanasatikaṃ nāgabhavanaṃ devalokasadisaṃ maṇimayena talena ārāmuyyānehi ca samannāgataṃ. Tattha nāgānaṃ kīḷanaṭṭhāne mahāudakarahado, tato tapodā nāma nadī sandati kuthitā uṇhodakā. Kasmā panesā edisā? Rājagahaṃ kira parivāretvā mahāpetaloko tiṭṭhati, tattha dvinnaṃ mahālohakumbhinirayānaṃ antarena ayaṃ tapodā āgacchati, tasmā kuthitā sandati. Vuttampi cetaṃ –
‘‘яад̇ааяам̣, бхигкавз, д̇абод̣̇аа санд̣̇ад̇и, со д̣̇ахо ажчод̣̇аго сийд̇од̣̇аго саад̇од̣̇аго сзд̇од̣̇аго суббад̇ид̇т̇о раман̣ийяо бахууд̇амажчагажчабо, жаггамад̇д̇аани жа бад̣̇умаани бубпанд̇и. абижааяам̣, бхигкавз, д̇абод̣̇аа д̣̇виннам̣ махаанираяаанам̣ анд̇аригааяа ааг̇ажчад̇и, д̇знааяам̣ д̇абод̣̇аа гут̇ид̇аа санд̣̇ад̇ий’’д̇и (баараа. 231).
‘‘Yatāyaṃ, bhikkhave, tapodā sandati, so daho acchodako sītodako sātodako setodako suppatittho ramaṇīyo pahūtamacchakacchapo, cakkamattāni ca padumāni pupphanti. Apicāyaṃ, bhikkhave, tapodā dvinnaṃ mahānirayānaṃ antarikāya āgacchati, tenāyaṃ tapodā kuthitā sandatī’’ti (pārā. 231).
имасса бана аараамасса абхимукадтаанз д̇ад̇о махаауд̣̇агарахад̣̇о ж̇аад̇о, д̇асса васзнааяам̣ вихааро ‘‘д̇абод̣̇аараамо’’д̇и вужжад̇и.
Imassa pana ārāmassa abhimukhaṭṭhāne tato mahāudakarahado jāto, tassa vasenāyaṃ vihāro ‘‘tapodārāmo’’ti vuccati.
самид̣̇д̇хийд̇и д̇асса гира т̇зрасса ад̇д̇абхааво самид̣̇д̇хо абхируубо баасаад̣̇иго, д̇асмаа ‘‘самид̣̇д̇хий’’д̇взва сан̇кам̣ г̇ад̇о. г̇ад̇д̇аани барисин̃жид̇унд̇и бад̇хаанигад̇т̇зро зса, б̣алавабажжуусз удтааяаасанаа сарийрам̣ уд̇ум̣ г̇аахаабзд̇ваа б̣ахи садтихад̇т̇амад̇д̇з махаажан̇гамз абараабарам̣ жан̇гамид̇ваа ‘‘сзд̣̇аг̇ахид̇зхи г̇ад̇д̇зхи барибхун̃ж̇амаанам̣ сзнаасанам̣ гилиссад̇ий’’д̇и ман̃н̃амаано г̇ад̇д̇аани барисин̃жанад̇т̇ам̣ сарийрад̇хованад̇т̇ам̣ убасан̇гами. згажийваро адтаасийд̇и ниваасанам̣ ниваасзд̇ваа гааяаб̣анд̇ханам̣ б̣анд̇хид̇ваа жийварам̣ хад̇т̇зна г̇ахзд̇ваа адтааси.
Samiddhīti tassa kira therassa attabhāvo samiddho abhirūpo pāsādiko, tasmā ‘‘samiddhī’’tveva saṅkhaṃ gato. Gattāni parisiñcitunti padhānikatthero esa, balavapaccūse uṭṭhāyāsanā sarīraṃ utuṃ gāhāpetvā bahi saṭṭhihatthamatte mahācaṅkame aparāparaṃ caṅkamitvā ‘‘sedagahitehi gattehi paribhuñjamānaṃ senāsanaṃ kilissatī’’ti maññamāno gattāni parisiñcanatthaṃ sarīradhovanatthaṃ upasaṅkami. Ekacīvaro aṭṭhāsīti nivāsanaṃ nivāsetvā kāyabandhanaṃ bandhitvā cīvaraṃ hatthena gahetvā aṭṭhāsi.
г̇ад̇д̇аани буб̣б̣аабаяамаанод̇и г̇ад̇д̇аани буб̣б̣асад̣̇исаани вод̣̇агаани гурумаано. алласарийрз бааруд̇ам̣ хи жийварам̣ гилиссад̇и д̣̇уг̇г̇анд̇хам̣ ход̇и, на жзд̇ам̣ вад̇д̇ам̣. т̇зро бана вад̇д̇асамбанно, д̇асмаа вад̇д̇з тид̇ова нхааяид̇ваа бажжуд̇д̇арид̇ваа адтааси. д̇ад̇т̇а ид̣̇ам̣ нхаанавад̇д̇ам̣ – уд̣̇агад̇ид̇т̇ам̣ г̇анд̇ваа яад̇т̇а гад̇т̇ажи жийвараани нигкибид̇ваа взг̇зна тид̇агзнзва на од̇арид̇аб̣б̣ам̣, саб̣б̣ад̣̇исаа бана ологзд̇ваа вивид̇д̇абхаавам̣ н̃ад̇ваа каан̣уг̇умб̣алад̇аад̣̇ийни вавад̇т̇абзд̇ваа д̇игкад̇д̇ум̣ уггаасид̇ваа авагуж̇ж̇а тид̇зна уд̇д̇араасан̇г̇ажийварам̣ абанзд̇ваа басаарзд̇аб̣б̣ам̣, гааяаб̣анд̇ханам̣ можзд̇ваа жийварабидтзязва табзд̇аб̣б̣ам̣. сажз уд̣̇агасаадигаа над̇т̇и, уд̣̇аганд̇з уггудигам̣ нисийд̣̇ид̇ваа ниваасанам̣ можзд̇ваа сажз синнадтаанам̣ ад̇т̇и, басаарзд̇аб̣б̣ам̣. но жз ад̇т̇и, сам̣харид̇ваа табзд̇аб̣б̣ам̣. уд̣̇агам̣ од̇аранд̇зна сан̣игам̣ наабхиббамаан̣амад̇д̇ам̣ од̇арид̇ваа вийжим̣ анудтаабзнд̇зна сад̣̇д̣̇ам̣ агаронд̇зна нивад̇д̇ид̇ваа ааг̇ад̇ад̣̇исаабхимукзна нимуж̇ж̇ид̇аб̣б̣ам̣, звам̣ жийварам̣ рагкид̇ам̣ ход̇и. уммуж̇ж̇анд̇знаби сад̣̇д̣̇ам̣ агаронд̇зна сан̣игам̣ уммуж̇ж̇ид̇ваа нхаанабарияосаанз уд̣̇аганд̇з уггудигзна нисийд̣̇ид̇ваа ниваасанам̣ баригкибид̇ваа удтааяа субариман̣д̣алам̣ ниваасзд̇ваа гааяаб̣анд̇ханам̣ б̣анд̇хид̇ваа жийварам̣ абаарубид̇ваава таад̇аб̣б̣анд̇и.
Gattāni pubbāpayamānoti gattāni pubbasadisāni vodakāni kurumāno. Allasarīre pārutaṃ hi cīvaraṃ kilissati duggandhaṃ hoti, na cetaṃ vattaṃ. Thero pana vattasampanno, tasmā vatte ṭhitova nhāyitvā paccuttaritvā aṭṭhāsi. Tattha idaṃ nhānavattaṃ – udakatitthaṃ gantvā yattha katthaci cīvarāni nikkhipitvā vegena ṭhitakeneva na otaritabbaṃ, sabbadisā pana oloketvā vivittabhāvaṃ ñatvā khāṇugumbalatādīni vavatthapetvā tikkhattuṃ ukkāsitvā avakujja ṭhitena uttarāsaṅgacīvaraṃ apanetvā pasāretabbaṃ, kāyabandhanaṃ mocetvā cīvarapiṭṭheyeva ṭhapetabbaṃ. Sace udakasāṭikā natthi, udakante ukkuṭikaṃ nisīditvā nivāsanaṃ mocetvā sace sinnaṭṭhānaṃ atthi, pasāretabbaṃ. No ce atthi, saṃharitvā ṭhapetabbaṃ. Udakaṃ otarantena saṇikaṃ nābhippamāṇamattaṃ otaritvā vīciṃ anuṭṭhāpentena saddaṃ akarontena nivattitvā āgatadisābhimukhena nimujjitabbaṃ, evaṃ cīvaraṃ rakkhitaṃ hoti. Ummujjantenapi saddaṃ akarontena saṇikaṃ ummujjitvā nhānapariyosāne udakante ukkuṭikena nisīditvā nivāsanaṃ parikkhipitvā uṭṭhāya suparimaṇḍalaṃ nivāsetvā kāyabandhanaṃ bandhitvā cīvaraṃ apārupitvāva ṭhātabbanti.
т̇зроби д̇ат̇аа нхааяид̇ваа бажжуд̇д̇арид̇ваа виг̇ажчамаанауд̣̇агам̣ гааяам̣ ологаяамаано адтааси. д̇асса багад̇ияааби баасаад̣̇игасса бажжуусасамаяз саммаа барин̣ад̇аахаарасса ун̣ход̣̇агзна нхаад̇асса ад̇ивияа мукаван̣н̣о вирожи, б̣анд̇ханаа бавуд̇д̇ад̇аалапалам̣ вияа бабхаасамбанно бун̣н̣ажанд̣̇о вияа д̇ан̇кан̣авигасид̇абад̣̇умам̣ вияа мукам̣ сассиригам̣ ахоси, сарийраван̣н̣оби виббасийд̣̇и. д̇асмим̣ самаяз ванасан̣д̣з ад̇хивад̇т̇аа бхуммад̣̇звад̇аа баасаад̣̇игам̣ бхигкум̣ ологаяамаанаа саманам̣ ниг̇г̇ахзд̇ум̣ асаггонд̇ий гаамабарил̣аахаабхибхууд̇аа худ̇ваа, ‘‘т̇зрам̣ балобхзссаамий’’д̇и ад̇д̇абхаавам̣ ул̣аарзна алан̇гаарзна алан̇гарид̇ваа сахассаваддибад̣̇ийбам̣ баж̇ж̇аламаанаа вияа жанд̣̇ам̣ удтаабаяамаанаа вияа сагалаараамам̣ згобхаасам̣ гад̇ваа т̇зрам̣ убасан̇гамид̇ваа аванд̣̇ид̇ваава взхаасз тид̇аа г̇аат̇ам̣ абхааси. д̇зна вуд̇д̇ам̣ – ‘‘ат̇а ко ан̃н̃ад̇араа д̣̇звад̇аа…бз… аж̇жхабхаасий’’д̇и.
Theropi tathā nhāyitvā paccuttaritvā vigacchamānaudakaṃ kāyaṃ olokayamāno aṭṭhāsi. Tassa pakatiyāpi pāsādikassa paccūsasamaye sammā pariṇatāhārassa uṇhodakena nhātassa ativiya mukhavaṇṇo viroci, bandhanā pavuttatālaphalaṃ viya pabhāsampanno puṇṇacando viya taṅkhaṇavikasitapadumaṃ viya mukhaṃ sassirikaṃ ahosi, sarīravaṇṇopi vippasīdi. Tasmiṃ samaye vanasaṇḍe adhivatthā bhummadevatā pāsādikaṃ bhikkhuṃ olokayamānā samanaṃ niggahetuṃ asakkontī kāmapariḷāhābhibhūtā hutvā, ‘‘theraṃ palobhessāmī’’ti attabhāvaṃ uḷārena alaṅkārena alaṅkaritvā sahassavaṭṭipadīpaṃ pajjalamānā viya candaṃ uṭṭhāpayamānā viya sakalārāmaṃ ekobhāsaṃ katvā theraṃ upasaṅkamitvā avanditvāva vehāse ṭhitā gāthaṃ abhāsi. Tena vuttaṃ – ‘‘atha kho aññatarā devatā…pe… ajjhabhāsī’’ti.
абхуд̇ваад̇и бан̃жа гаамаг̇ун̣з абарибхун̃ж̇ид̇ваа. бхигкасийд̇и бин̣д̣ааяа жараси. маа д̇ам̣ гаало убажжаг̇аад̇и зд̇т̇а гаало наама бан̃жагаамаг̇ун̣абадисзванагкамо д̣̇ахараяоб̣б̣анагаало. ж̇арааж̇ин̣н̣зна хи обхаг̇г̇зна д̣̇ан̣д̣абарааяан̣зна бавзд̇хамаанзна гаасасаасаабхибхууд̇зна на саггаа гаамз барибхун̃ж̇ид̇ум̣. ид̇и имам̣ гаалам̣ санд̇хааяа д̣̇звад̇аа ‘‘маа д̇ам̣ гаало убажжаг̇аа’’д̇и ааха. д̇ад̇т̇а маа убажжаг̇аад̇и маа ад̇иггами.
Abhutvāti pañca kāmaguṇe aparibhuñjitvā. Bhikkhasīti piṇḍāya carasi. Mā taṃ kālo upaccagāti ettha kālo nāma pañcakāmaguṇapaṭisevanakkhamo daharayobbanakālo. Jarājiṇṇena hi obhaggena daṇḍaparāyaṇena pavedhamānena kāsasāsābhibhūtena na sakkā kāme paribhuñjituṃ. Iti imaṃ kālaṃ sandhāya devatā ‘‘mā taṃ kālo upaccagā’’ti āha. Tattha mā upaccagāti mā atikkami.
гаалам̣ вохам̣ на ж̇аанаамийд̇и зд̇т̇а вод̇и нибаад̇амад̇д̇ам̣. гаалам̣ на ж̇аанаамийд̇и маран̣агаалам̣ санд̇хааяа вад̣̇ад̇и. сад̇д̇аанан̃хи –
Kālaṃ vohaṃ na jānāmīti ettha voti nipātamattaṃ. Kālaṃ na jānāmīti maraṇakālaṃ sandhāya vadati. Sattānañhi –
‘‘ж̇ийвид̇ам̣ б̣яаад̇хи гаало жа, д̣̇зханигкзбанам̣ г̇ад̇и;
‘‘Jīvitaṃ byādhi kālo ca, dehanikkhepanaṃ gati;
бан̃жзд̇з ж̇ийвалогасмим̣, анимид̇д̇аа на нааяарз’’.
Pañcete jīvalokasmiṃ, animittā na nāyare’’.
д̇ад̇т̇а ж̇ийвид̇ам̣ д̇аава ‘‘зд̇д̇агамзва, на ид̇о бара’’нд̇и вавад̇т̇аанаабхаавад̇о анимид̇д̇ам̣. галалагаалзби хи сад̇д̇аа маранд̇и, аб̣б̣уд̣̇а-бзси-гхана-ад̣дхамааса-згамааса-д̣̇взмааса-д̇змааса-жад̇умаасабан̃жамааса…бз… д̣̇асамаасагаалзби, гужчид̇о нигканд̇асамаязби, д̇ад̇о барам̣ вассасад̇асса анд̇оби б̣ахиби маранд̇иязва. б̣яаад̇хиби ‘‘иминаава б̣яаад̇хинаа сад̇д̇аа маранд̇и, на ан̃н̃знаа’’д̇и вавад̇т̇аанаабхаавад̇о анимид̇д̇о. жагкурог̇знаби хи сад̇д̇аа маранд̇и сод̇арог̇аад̣̇ийнам̣ ан̃н̃ад̇арзнаби. гаалоби, ‘‘имасмим̣ язва гаалз марид̇аб̣б̣ам̣, на ан̃н̃асми’’нд̇и звам̣ вавад̇т̇аанаабхаавад̇о анимид̇д̇о. буб̣б̣ан̣хзби хи сад̇д̇аа маранд̇и маж̇жханхигаад̣̇ийнам̣ ан̃н̃ад̇арасмимби. д̣̇зханигкзбанамби, ‘‘ид̇хзва мийяамаанаанам̣ д̣̇зхзна бад̇ид̇аб̣б̣ам̣, на ан̃н̃ад̇т̇аа’’д̇и звам̣ вавад̇т̇аанаабхаавад̇о анимид̇д̇ам̣. анд̇ог̇аамз ж̇аад̇аанан̃хи б̣ахиг̇аамзби ад̇д̇абхааво бад̇ад̇и, б̣ахиг̇аамзби ж̇аад̇аанам̣ анд̇ог̇аамзби. д̇ат̇аа т̇алаж̇аанам̣ ж̇алз, ж̇алаж̇аанам̣ т̇алзд̇и анзгаббагаарад̇о вид̇т̇аарзд̇аб̣б̣ам̣. г̇ад̇иби, ‘‘ид̇о жуд̇зна ид̇ха ниб̣б̣ад̇д̇ид̇аб̣б̣а’’нд̇и звам̣ вавад̇т̇аанаабхаавад̇о анимид̇д̇аа. д̣̇звалогад̇о хи жуд̇аа мануссзсуби ниб̣б̣ад̇д̇анд̇и , мануссалогад̇о жуд̇аа д̣̇звалогаад̣̇ийнам̣ яад̇т̇а гад̇т̇ажи ниб̣б̣ад̇д̇анд̇ийд̇и звам̣ яанд̇з яуд̇д̇аг̇он̣о вияа г̇ад̇ибан̃жагз лого самбаривад̇д̇ад̇и. д̇ассзвам̣ самбаривад̇д̇ад̇о ‘‘имасмим̣ наама гаалз маран̣ам̣ бхависсад̇ий’’д̇и имам̣ маран̣асса гаалам̣ вохам̣ на ж̇аанаами.
Tattha jīvitaṃ tāva ‘‘ettakameva, na ito para’’nti vavatthānābhāvato animittaṃ. Kalalakālepi hi sattā maranti, abbuda-pesi-ghana-aḍḍhamāsa-ekamāsa-dvemāsa-temāsa-catumāsapañcamāsa…pe… dasamāsakālepi, kucchito nikkhantasamayepi, tato paraṃ vassasatassa antopi bahipi marantiyeva. Byādhipi ‘‘imināva byādhinā sattā maranti, na aññenā’’ti vavatthānābhāvato animitto. Cakkhurogenapi hi sattā maranti sotarogādīnaṃ aññatarenapi. Kālopi, ‘‘imasmiṃ yeva kāle maritabbaṃ, na aññasmi’’nti evaṃ vavatthānābhāvato animitto. Pubbaṇhepi hi sattā maranti majjhanhikādīnaṃ aññatarasmimpi. Dehanikkhepanampi, ‘‘idheva mīyamānānaṃ dehena patitabbaṃ, na aññatthā’’ti evaṃ vavatthānābhāvato animittaṃ. Antogāme jātānañhi bahigāmepi attabhāvo patati, bahigāmepi jātānaṃ antogāmepi. Tathā thalajānaṃ jale, jalajānaṃ thaleti anekappakārato vitthāretabbaṃ. Gatipi, ‘‘ito cutena idha nibbattitabba’’nti evaṃ vavatthānābhāvato animittā. Devalokato hi cutā manussesupi nibbattanti , manussalokato cutā devalokādīnaṃ yattha katthaci nibbattantīti evaṃ yante yuttagoṇo viya gatipañcake loko samparivattati. Tassevaṃ samparivattato ‘‘imasmiṃ nāma kāle maraṇaṃ bhavissatī’’ti imaṃ maraṇassa kālaṃ vohaṃ na jānāmi.
чанно гаало на д̣̇иссад̇ийд̇и аяам̣ гаало маяхам̣ бадижчанно авибхууд̇о на бан̃н̃ааяад̇и. д̇асмаад̇и яасмаа аяам̣ гаало бадижчанно на бан̃н̃ааяад̇и, д̇асмаа бан̃жа гаамаг̇ун̣з абхуд̇ваава бхигкаами. маа мам̣ гаало убажжаг̇аад̇и зд̇т̇а саман̣ад̇хаммагаран̣агаалам̣ санд̇хааяа ‘‘гаало’’д̇и ааха. аяан̃хи саман̣ад̇хаммо наама бажчимз гаалз д̇иссо ваяосиймаа ад̇игганд̇зна обхаг̇г̇зна д̣̇ан̣д̣абарааяан̣зна бавзд̇хамаанзна гаасасаасаабхибхууд̇зна на саггаа гаад̇ум̣. д̇ад̣̇аа хи на саггаа ход̇и ижчид̇ижчид̇ам̣ б̣уд̣̇д̇хаважанам̣ ваа г̇ан̣хид̇ум̣, д̇худ̇ан̇г̇ам̣ ваа барибхун̃ж̇ид̇ум̣, аран̃н̃аваасам̣ ваа васид̇ум̣, ижчид̇ижчид̇агкан̣з самаабад̇д̇им̣ ваа самаабаж̇ж̇ид̇ум̣, бад̣̇абхаан̣а-сарабхан̃н̃ад̇хаммагат̇аа-анумод̣̇анаад̣̇ийни ваа гаад̇ум̣, д̇арун̣аяоб̣б̣анагаалз банзд̇ам̣ саб̣б̣ам̣ саггаа гаад̇унд̇и аяам̣ саман̣ад̇хаммагаран̣асса гаало маа мам̣ убажжаг̇аа, яаава мам̣ наад̇иггамад̇и, д̇аава гаамз абхуд̇ваава саман̣ад̇хаммам̣ гаромийд̇и ааха.
Channo kālo na dissatīti ayaṃ kālo mayhaṃ paṭicchanno avibhūto na paññāyati. Tasmāti yasmā ayaṃ kālo paṭicchanno na paññāyati, tasmā pañca kāmaguṇe abhutvāva bhikkhāmi. Mā maṃ kālo upaccagāti ettha samaṇadhammakaraṇakālaṃ sandhāya ‘‘kālo’’ti āha. Ayañhi samaṇadhammo nāma pacchime kāle tisso vayosīmā atikkantena obhaggena daṇḍaparāyaṇena pavedhamānena kāsasāsābhibhūtena na sakkā kātuṃ. Tadā hi na sakkā hoti icchiticchitaṃ buddhavacanaṃ vā gaṇhituṃ, dhutaṅgaṃ vā paribhuñjituṃ, araññavāsaṃ vā vasituṃ, icchiticchitakkhaṇe samāpattiṃ vā samāpajjituṃ, padabhāṇa-sarabhaññadhammakathā-anumodanādīni vā kātuṃ, taruṇayobbanakāle panetaṃ sabbaṃ sakkā kātunti ayaṃ samaṇadhammakaraṇassa kālo mā maṃ upaccagā, yāva maṃ nātikkamati, tāva kāme abhutvāva samaṇadhammaṃ karomīti āha.
бат̇авияам̣ бад̇идтахид̇ваад̇и саа гира д̣̇звад̇аа – ‘‘аяам̣ бхигку саман̣ад̇хаммагаран̣асса гаалам̣ наама гат̇зд̇и, агаалам̣ наама гат̇зд̇и, сахзд̇угам̣ гат̇зд̇и саанисам̣са’’нд̇и зд̇д̇аавад̇аава т̇зрз лаж̇ж̇ам̣ бажжубадтаабзд̇ваа махааб̣рахмам̣ вияа аг̇г̇игканд̇хам̣ вияа жа нам̣ ман̃н̃амаанаа г̇аараваж̇аад̇аа аагаасаа оруяха бат̇авияам̣ адтааси, д̇ам̣ санд̇хааязд̇ам̣ вуд̇д̇ам̣. гин̃жааби бат̇авияам̣ тид̇аа, язна банад̇т̇зна ааг̇ад̇аа, бунаби д̇амзва г̇ахзд̇ваа д̣̇ахаро д̇ванд̇иаад̣̇имааха. д̇ад̇т̇а сусууд̇и д̇арун̣о. гаал̣агзсод̇и судту гаал̣агзсо. бхад̣̇рзнаад̇и бхад̣̇д̣̇агзна. згажжо хи д̣̇ахароби самаано гаан̣о ваа ход̇и гун̣иаад̣̇ийнам̣ ваа ан̃н̃ад̇аро, со бхад̣̇рзна яоб̣б̣анзна саманнааг̇ад̇о наама на ход̇и. яо бана абхируубо ход̇и д̣̇ассанийяо баасаад̣̇иго саб̣б̣асамбад̇д̇исамбанно, яам̣ яад̣̇зва алан̇гаарабарихаарам̣ ижчад̇и, д̇зна д̇зна алан̇гад̇о д̣̇звабуд̇д̇о вияа жарад̇и, аяам̣ бхад̣̇рзна яоб̣б̣анзна саманнааг̇ад̇о наама ход̇и. т̇зро жа уд̇д̇амаруубасамбанно, д̇зна нам̣ звамааха.
Pathaviyaṃpatiṭṭhahitvāti sā kira devatā – ‘‘ayaṃ bhikkhu samaṇadhammakaraṇassa kālaṃ nāma katheti, akālaṃ nāma katheti, sahetukaṃ katheti sānisaṃsa’’nti ettāvatāva there lajjaṃ paccupaṭṭhāpetvā mahābrahmaṃ viya aggikkhandhaṃ viya ca naṃ maññamānā gāravajātā ākāsā oruyha pathaviyaṃ aṭṭhāsi, taṃ sandhāyetaṃ vuttaṃ. Kiñcāpi pathaviyaṃ ṭhitā, yena panatthena āgatā, punapi tameva gahetvā daharo tvantiādimāha. Tattha susūti taruṇo. Kāḷakesoti suṭṭhu kāḷakeso. Bhadrenāti bhaddakena. Ekacco hi daharopi samāno kāṇo vā hoti kuṇiādīnaṃ vā aññataro, so bhadrena yobbanena samannāgato nāma na hoti. Yo pana abhirūpo hoti dassanīyo pāsādiko sabbasampattisampanno, yaṃ yadeva alaṅkāraparihāraṃ icchati, tena tena alaṅkato devaputto viya carati, ayaṃ bhadrena yobbanena samannāgato nāma hoti. Thero ca uttamarūpasampanno, tena naṃ evamāha.
аниггийл̣ид̇аавий гаамзсууд̇и гаамзсу агийл̣ид̇агийл̣о абхуд̇д̇аавий, агад̇агаамагийл̣од̇и ад̇т̇о. маа санд̣̇идтигам̣ хид̇ваад̇и язбхуяязна хи д̇аа ад̣̇идтасажжаа авийд̇арааг̇аа абаражид̇д̇авид̣̇уунияо д̣̇звад̇аа бхигкуу д̣̇асаби вассаани вийсад̇имби…бз… садтимби вассаани барисуд̣̇д̇хам̣ акан̣д̣ам̣ б̣рахмажарияам̣ жарамаанз д̣̇исваа – ‘‘имз бхигкуу маанусагз бан̃жа гаамаг̇ун̣з бахааяа д̣̇иб̣б̣з гаамз бад̇т̇аяанд̇аа саман̣ад̇хаммам̣ гаронд̇ий’’д̇и сан̃н̃ам̣ уббаад̣̇знд̇и, аяамби д̇ад̇т̇зва уббаад̣̇зси. д̇асмаа маанусагз гаамз санд̣̇идтигз, д̣̇иб̣б̣з жа гаалигз гад̇ваа звамааха.
Anikkīḷitāvīkāmesūti kāmesu akīḷitakīḷo abhuttāvī, akatakāmakīḷoti attho. Mā sandiṭṭhikaṃ hitvāti yebhuyyena hi tā adiṭṭhasaccā avītarāgā aparacittavidūniyo devatā bhikkhū dasapi vassāni vīsatimpi…pe… saṭṭhimpi vassāni parisuddhaṃ akhaṇḍaṃ brahmacariyaṃ caramāne disvā – ‘‘ime bhikkhū mānusake pañca kāmaguṇe pahāya dibbe kāme patthayantā samaṇadhammaṃ karontī’’ti saññaṃ uppādenti, ayampi tattheva uppādesi. Tasmā mānusake kāme sandiṭṭhike, dibbe ca kālike katvā evamāha.
на ко ахам̣, аавусод̇и, аавусо, ахам̣ санд̣̇идтигз гаамз хид̇ваа гаалигз гаамз на ануд̇хааваами на бад̇т̇зми на бихзми. галиган̃жа ко ахам̣, аавусод̇и ахам̣ ко, аавусо, гаалигам̣ гаамам̣ хид̇ваа санд̣̇идтигам̣ логуд̇д̇арад̇хаммам̣ ануд̇хааваами. ид̇и т̇зро жид̇д̇аананд̇арам̣ алад̣̇д̇хаб̣б̣ад̇ааяа д̣̇иб̣б̣зби маанусагзби бан̃жа гаамаг̇ун̣з гаалигаад̇и агааси, жид̇д̇аананд̇арам̣ лад̣̇д̇хаб̣б̣ад̇ааяа логуд̇д̇арад̇хаммам̣ санд̣̇идтиганд̇и. бан̃жагаамаг̇ун̣зсу самохид̇зсуби самбаннагаамассааби гаамино жид̇д̇аананд̇арам̣ ижчид̇ижчид̇аарамман̣аанубхаванам̣ на самбаж̇ж̇ад̇и. жагкуд̣̇ваарз идтаарамман̣ам̣ анубхавид̇угаамзна хи жид̇д̇агаарабод̇т̇агаараруубагаараад̣̇аяо баггосаабзд̇ваа, ‘‘ид̣̇ам̣ наама саж̇ж̇зт̇аа’’д̇и вад̇д̇аб̣б̣ам̣ ход̇и. зд̇т̇анд̇арз анзгагодисад̇асахассаани жид̇д̇аани уббаж̇ж̇ид̇ваа нируж̇жханд̇и. ат̇а бажчаа д̇ам̣ аарамман̣ам̣ самбаабун̣аад̇и . сзсад̣̇ваарзсуби зсзва наяо. сод̇аабад̇д̇имаг̇г̇аананд̇арам̣ бана сод̇аабад̇д̇ипаламзва уббаж̇ж̇ад̇и, анд̇араа ан̃н̃асса жид̇д̇асса вааро над̇т̇и. сзсапалзсуби зсзва наяод̇и.
Na kho ahaṃ, āvusoti, āvuso, ahaṃ sandiṭṭhike kāme hitvā kālike kāme na anudhāvāmi na patthemi na pihemi. Kalikañca kho ahaṃ, āvusoti ahaṃ kho, āvuso, kālikaṃ kāmaṃ hitvā sandiṭṭhikaṃ lokuttaradhammaṃ anudhāvāmi. Iti thero cittānantaraṃ aladdhabbatāya dibbepi mānusakepi pañca kāmaguṇe kālikāti akāsi, cittānantaraṃ laddhabbatāya lokuttaradhammaṃ sandiṭṭhikanti. Pañcakāmaguṇesu samohitesupi sampannakāmassāpi kāmino cittānantaraṃ icchiticchitārammaṇānubhavanaṃ na sampajjati. Cakkhudvāre iṭṭhārammaṇaṃ anubhavitukāmena hi cittakārapotthakārarūpakārādayo pakkosāpetvā, ‘‘idaṃ nāma sajjethā’’ti vattabbaṃ hoti. Etthantare anekakoṭisatasahassāni cittāni uppajjitvā nirujjhanti. Atha pacchā taṃ ārammaṇaṃ sampāpuṇāti . Sesadvāresupi eseva nayo. Sotāpattimaggānantaraṃ pana sotāpattiphalameva uppajjati, antarā aññassa cittassa vāro natthi. Sesaphalesupi eseva nayoti.
со д̇амзвад̇т̇ам̣ г̇ахзд̇ваа гаалигаа хи, аавусод̇иаад̣̇имааха. д̇ад̇т̇а гаалигаад̇и вуд̇д̇анаязна самохид̇асамбад̇д̇инааби гааланд̇арз бад̇д̇аб̣б̣аа. б̣ахуд̣̇угкаад̇и бан̃жа гаамаг̇ун̣з ниссааяа бад̇д̇аб̣б̣ад̣̇угкасса б̣ахуд̇ааяа б̣ахуд̣̇угкаа. д̇ам̣вад̇т̇угассзва убааяаасасса б̣ахуд̇ааяа б̣ахубааяаасаа. аад̣̇ийнаво зд̇т̇а бхияяод̇и бан̃жа гаамаг̇ун̣з ниссааяа лад̣̇д̇хаб̣б̣асукад̇о аад̣̇ийнаво бхияяо, д̣̇угкамзва б̣ахуд̇аранд̇и ад̇т̇о. санд̣̇идтиго аяам̣ д̇хаммод̇и аяам̣ логуд̇д̇арад̇хаммо язна язна ад̇хиг̇ад̇о ход̇и, д̇зна д̇зна барасад̣̇д̇хааяа г̇анд̇аб̣б̣ад̇ам̣ хид̇ваа бажжавзгкан̣ан̃аан̣зна саяам̣ д̣̇адтаб̣б̣од̇и санд̣̇идтиго. ад̇д̇ано палад̣̇аанам̣ санд̇хааяа наасса гаалод̇и агаало, агаалоязва агаалиго. яо зд̇т̇а арияамаг̇г̇ад̇хаммо, со ад̇д̇ано бавад̇д̇исамананд̇арамзва палам̣ д̣̇зд̇ийд̇и ад̇т̇о. ‘‘зхи басса имам̣ д̇хамма’’нд̇и звам̣ бавад̇д̇ам̣ зхибассавид̇хим̣ арахад̇ийд̇и зхибассиго. аад̣̇ид̇д̇ам̣ жзлам̣ ваа сийсам̣ ваа аж̇жхубзгкид̇вааби бхааванаавасзна ад̇д̇ано жид̇д̇з убанаяам̣ арахад̇ийд̇и обанзяяиго. саб̣б̣зхи уг̇гхадид̇ан̃н̃ууаад̣̇ийхи вин̃н̃уухи ‘‘бхаавид̇о мз маг̇г̇о, ад̇хиг̇ад̇ам̣ палам̣, сажчигад̇о нирод̇хо’’д̇и ад̇д̇ани ад̇д̇ани взд̣̇ид̇аб̣б̣од̇и бажжад̇д̇ам̣ взд̣̇ид̇аб̣б̣о вин̃н̃уухийд̇и. аяамзд̇т̇а сан̇кзбо, вид̇т̇ааро бана висуд̣̇д̇химаг̇г̇з (висуд̣̇д̇хи. 1.146 аад̣̇аяо) д̇хаммаануссад̇иван̣н̣анааяам̣ вуд̇д̇о.
So tamevatthaṃ gahetvā kālikā hi, āvusotiādimāha. Tattha kālikāti vuttanayena samohitasampattināpi kālantare pattabbā. Bahudukkhāti pañca kāmaguṇe nissāya pattabbadukkhassa bahutāya bahudukkhā. Taṃvatthukasseva upāyāsassa bahutāya bahupāyāsā. Ādīnavo ettha bhiyyoti pañca kāmaguṇe nissāya laddhabbasukhato ādīnavo bhiyyo, dukkhameva bahutaranti attho. Sandiṭṭhiko ayaṃ dhammoti ayaṃ lokuttaradhammo yena yena adhigato hoti, tena tena parasaddhāya gantabbataṃ hitvā paccavekkhaṇañāṇena sayaṃ daṭṭhabboti sandiṭṭhiko. Attano phaladānaṃ sandhāya nāssa kāloti akālo, akāloyeva akāliko. Yo ettha ariyamaggadhammo, so attano pavattisamanantarameva phalaṃ detīti attho. ‘‘Ehi passa imaṃ dhamma’’nti evaṃ pavattaṃ ehipassavidhiṃ arahatīti ehipassiko. Ādittaṃ celaṃ vā sīsaṃ vā ajjhupekkhitvāpi bhāvanāvasena attano citte upanayaṃ arahatīti opaneyyiko. Sabbehi ugghaṭitaññūādīhi viññūhi ‘‘bhāvito me maggo, adhigataṃ phalaṃ, sacchikato nirodho’’ti attani attani veditabboti paccattaṃ veditabbo viññūhīti. Ayamettha saṅkhepo, vitthāro pana visuddhimagge (visuddhi. 1.146 ādayo) dhammānussativaṇṇanāyaṃ vutto.
ид̣̇аани саа д̣̇звад̇аа анд̇хо вияа руубависзсам̣ т̇зрзна гат̇ид̇асса ад̇т̇з аж̇аананд̇ий гат̇ан̃жа бхигкууд̇иаад̣̇имааха. д̇ад̇т̇а гат̇ан̃жаад̇ибад̣̇асса ‘‘гат̇ан̃жа бхигку гаалигаа гаамаа вуд̇д̇аа бхаг̇авад̇аа, гат̇ам̣ б̣ахуд̣̇угкаа, гат̇ам̣ б̣ахубааяаасаа’’д̇и? звам̣ саб̣б̣абад̣̇зхи самб̣анд̇хо взд̣̇ид̇аб̣б̣о.
Idāni sā devatā andho viya rūpavisesaṃ therena kathitassa atthe ajānantī kathañca bhikkhūtiādimāha. Tattha kathañcātipadassa ‘‘kathañca bhikkhu kālikā kāmā vuttā bhagavatā, kathaṃ bahudukkhā, kathaṃ bahupāyāsā’’ti? Evaṃ sabbapadehi sambandho veditabbo.
навод̇и абарибун̣н̣абан̃жавассо хи бхигку наво наама ход̇и, бан̃жавассад̇о бадтааяа маж̇жхимо, д̣̇асавассад̇о бадтааяа т̇зро. абаро наяо – абарибун̣н̣ад̣̇асавассо наво, д̣̇асавассад̇о бадтааяа маж̇жхимо, вийсад̇ивассад̇о бадтааяа т̇зро. д̇зсам̣ ахам̣ навод̇и вад̣̇ад̇и.
Navoti aparipuṇṇapañcavasso hi bhikkhu navo nāma hoti, pañcavassato paṭṭhāya majjhimo, dasavassato paṭṭhāya thero. Aparo nayo – aparipuṇṇadasavasso navo, dasavassato paṭṭhāya majjhimo, vīsativassato paṭṭhāya thero. Tesaṃ ahaṃ navoti vadati.
навоби згажжо сад̇д̇адтавассагаалз баб̣б̣аж̇ид̇ваа д̣̇ваад̣̇асад̇зрасавассаани сааман̣зрабхаавзнзва ад̇игганд̇о жирабаб̣б̣аж̇ид̇о ход̇и, ахам̣ бана ажирабаб̣б̣аж̇ид̇од̇и вад̣̇ад̇и. имам̣ д̇хаммавинаяанд̇и имам̣ д̇хамман̃жа винаяан̃жа. убхаяамбзд̇ам̣ саасанассзва наамам̣. д̇хаммзна хзд̇т̇а д̣̇вз бидагаани вуд̇д̇аани, винаязна винаяабидагам̣, ид̇и д̇ийхи бидагзхи багаасид̇ам̣ бадибад̇д̇им̣ ад̇хунаа ааг̇ад̇омхийд̇и вад̣̇ад̇и.
Navopi ekacco sattaṭṭhavassakāle pabbajitvā dvādasaterasavassāni sāmaṇerabhāveneva atikkanto cirapabbajito hoti, ahaṃ pana acirapabbajitoti vadati. Imaṃ dhammavinayanti imaṃ dhammañca vinayañca. Ubhayampetaṃ sāsanasseva nāmaṃ. Dhammena hettha dve piṭakāni vuttāni, vinayena vinayapiṭakaṃ, iti tīhi piṭakehi pakāsitaṃ paṭipattiṃ adhunā āgatomhīti vadati.
махзсагкаахийд̇и махаабариваараахи. згзгасса хи д̣̇зваран̃н̃о годисад̇амби годисахассамби баривааро ход̇и, д̇з ад̇д̇аанам̣ маханд̇з таанз табзд̇ваа д̇ат̇ааг̇ад̇ам̣ бассанд̇и. д̇ад̇т̇а амхаад̣̇исаанам̣ аббзсагкаанам̣ маад̇уг̇аамаж̇аад̇игаанам̣ гуд̇о огаасод̇и д̣̇ассзд̇и.
Mahesakkhāhīti mahāparivārāhi. Ekekassa hi devarañño koṭisatampi koṭisahassampi parivāro hoti, te attānaṃ mahante ṭhāne ṭhapetvā tathāgataṃ passanti. Tattha amhādisānaṃ appesakkhānaṃ mātugāmajātikānaṃ kuto okāsoti dasseti.
маяамби ааг̇ажчзяяаамаад̇и ид̣̇ам̣ саа д̣̇звад̇аа ‘‘сажзби жаггаваал̣ам̣ буурзд̇ваа барисаа нисиннаа ход̇и, махад̇ияаа б̣уд̣̇д̇хавийт̇ияаа сад̇т̇у санд̇игам̣ г̇анд̇ум̣ лабхад̇ий’’д̇и н̃ад̇ваа ааха. бужча бхигку, бужча бхигкууд̇и т̇ирагаран̣авасзна аамзд̣ид̇ам̣ гад̇ам̣.
Mayampiāgaccheyyāmāti idaṃ sā devatā ‘‘sacepi cakkavāḷaṃ pūretvā parisā nisinnā hoti, mahatiyā buddhavīthiyā satthu santikaṃ gantuṃ labhatī’’ti ñatvā āha. Puccha bhikkhu, puccha bhikkhūti thirakaraṇavasena āmeḍitaṃ kataṃ.
агкзяяасан̃н̃инод̇и зд̇т̇а ‘‘д̣̇зво, мануссо, г̇ахадто, баб̣б̣аж̇ид̇о, сад̇д̇о, буг̇г̇ало, д̇иссо, пуссо’’д̇иаад̣̇инаа наязна агкзяяад̇о саб̣б̣зсам̣ агкаанаанам̣ саб̣б̣аасам̣ гат̇аанам̣ вад̇т̇убхууд̇ад̇о бан̃жагканд̇хаа ‘‘агкзяяаа’’д̇и вужжанд̇и. ‘‘сад̇д̇о наро босо буг̇г̇ало ид̇т̇ий бурисо’’д̇и звам̣ сан̃н̃аа зд̇зсам̣ ад̇т̇ийд̇и сан̃н̃ино, агкзяязсвзва сан̃н̃инод̇и агкзяяасан̃н̃ино, бан̃жасу канд̇хзсу сад̇д̇абуг̇г̇алаад̣̇исан̃н̃инод̇и ад̇т̇о. агкзяяасмим̣ бад̇идтид̇аад̇и бан̃жасу канд̇хзсу адтахаагаарзхи бад̇идтид̇аа. рад̇д̇о хи рааг̇авасзна бад̇идтид̇о ход̇и, д̣̇удто д̣̇осавасзна, муул̣хо мохавасзна, бараамадто д̣̇идтивасзна, т̇аамаг̇ад̇о анусаяавасзна, виниб̣ад̣̇д̇хо маанавасзна, анидтан̇г̇ад̇о вижигижчаавасзна, вигкзбаг̇ад̇о уд̣̇д̇хажжавасзна бад̇идтид̇о ход̇и. агкзяяам̣ абарин̃н̃ааяаад̇и бан̃жагканд̇хз д̇ийхи барин̃н̃аахи абариж̇аанид̇ваа. яог̇амааяанд̇и мажжунод̇и мажжуно яог̇ам̣ баяог̇ам̣ багкзбам̣ убагкзбам̣ убаггамам̣ аб̣бханд̇арам̣ ааг̇ажчанд̇и, маран̣авасам̣ г̇ажчанд̇ийд̇и ад̇т̇о. звамимааяа г̇аат̇ааяа гаалигаа гаамаа гат̇ид̇аа.
Akkheyyasaññinoti ettha ‘‘devo, manusso, gahaṭṭho, pabbajito, satto, puggalo, tisso, phusso’’tiādinā nayena akkheyyato sabbesaṃ akkhānānaṃ sabbāsaṃ kathānaṃ vatthubhūtato pañcakkhandhā ‘‘akkheyyā’’ti vuccanti. ‘‘Satto naro poso puggalo itthī puriso’’ti evaṃ saññā etesaṃ atthīti saññino, akkheyyesveva saññinoti akkheyyasaññino, pañcasu khandhesu sattapuggalādisaññinoti attho. Akkheyyasmiṃ patiṭṭhitāti pañcasu khandhesu aṭṭhahākārehi patiṭṭhitā. Ratto hi rāgavasena patiṭṭhito hoti, duṭṭho dosavasena, mūḷho mohavasena, parāmaṭṭho diṭṭhivasena, thāmagato anusayavasena, vinibaddho mānavasena, aniṭṭhaṅgato vicikicchāvasena, vikkhepagato uddhaccavasena patiṭṭhito hoti. Akkheyyaṃ apariññāyāti pañcakkhandhe tīhi pariññāhi aparijānitvā. Yogamāyanti maccunoti maccuno yogaṃ payogaṃ pakkhepaṃ upakkhepaṃ upakkamaṃ abbhantaraṃ āgacchanti, maraṇavasaṃ gacchantīti attho. Evamimāya gāthāya kālikā kāmā kathitā.
барин̃н̃ааяаад̇и н̃аад̇абарин̃н̃аа, д̇ийран̣абарин̃н̃аа, бахаанабарин̃н̃аад̇и имаахи д̇ийхи барин̃н̃аахи бариж̇аанид̇ваа. д̇ад̇т̇а гад̇амаа н̃аад̇абарин̃н̃аа? бан̃жагканд̇хз бариж̇аанаад̇и – ‘‘аяам̣ руубагканд̇хо, аяам̣ взд̣̇анаагканд̇хо, аяам̣ сан̃н̃аагканд̇хо, аяам̣ сан̇каарагканд̇хо, аяам̣ вин̃н̃аан̣агканд̇хо, имаани д̇зсам̣ лагкан̣арасабажжубадтаанабад̣̇адтаанааний’’д̇и, аяам̣ н̃аад̇абарин̃н̃аа. гад̇амаа д̇ийран̣абарин̃н̃аа? звам̣ н̃аад̇ам̣ гад̇ваа бан̃жагканд̇хз д̇ийрзд̇и анижжад̇о д̣̇угкад̇о рог̇ад̇од̇и д̣̇ваажад̇д̇аалийсааяа аагаарзхи. аяам̣ д̇ийран̣абарин̃н̃аа. гад̇амаа бахаанабарин̃н̃аа? звам̣ д̇ийраяид̇ваа аг̇г̇амаг̇г̇зна бан̃жасу канд̇хзсу чанд̣̇арааг̇ам̣ баж̇ахад̇и. аяам̣ бахаанабарин̃н̃аа.
Pariññāyāti ñātapariññā, tīraṇapariññā, pahānapariññāti imāhi tīhi pariññāhi parijānitvā. Tattha katamā ñātapariññā? Pañcakkhandhe parijānāti – ‘‘ayaṃ rūpakkhandho, ayaṃ vedanākkhandho, ayaṃ saññākkhandho, ayaṃ saṅkhārakkhandho, ayaṃ viññāṇakkhandho, imāni tesaṃ lakkhaṇarasapaccupaṭṭhānapadaṭṭhānānī’’ti, ayaṃ ñātapariññā. Katamā tīraṇapariññā? Evaṃ ñātaṃ katvā pañcakkhandhe tīreti aniccato dukkhato rogatoti dvācattālīsāya ākārehi. Ayaṃ tīraṇapariññā. Katamā pahānapariññā? Evaṃ tīrayitvā aggamaggena pañcasu khandhesu chandarāgaṃ pajahati. Ayaṃ pahānapariññā.
агкаад̇аарам̣ на ман̃н̃ад̇ийд̇и звам̣ д̇ийхи барин̃н̃аахи бан̃жагканд̇хз бариж̇аанид̇ваа кийн̣аасаво бхигку агкаад̇аарам̣ буг̇г̇алам̣ на ман̃н̃ад̇и. агкаад̇ааранд̇и гаммавасзна гааран̣ам̣ взд̣̇ид̇аб̣б̣ам̣, агкаад̇аб̣б̣ам̣ гат̇зд̇аб̣б̣ам̣ буг̇г̇алам̣ на ман̃н̃ад̇и, на бассад̇ийд̇и ад̇т̇о . гинд̇и агкаад̇аб̣б̣анд̇и? ‘‘д̇иссо’’д̇и ваа ‘‘пуссо’’д̇и ваа звам̣ язна гзнажи наамзна ваа г̇од̇д̇зна ваа багаасзд̇аб̣б̣ам̣. д̇ан̃хи д̇асса на ход̇ийд̇и д̇ам̣ д̇асса кийн̣аасавасса на ход̇и. язна нам̣ важ̇ж̇аад̇и язна нам̣ ‘‘рааг̇зна рад̇д̇о’’д̇и ваа ‘‘д̣̇осзна д̣̇удто’’д̇и ваа ‘‘мохзна муул̣хо’’д̇и ваад̇и гожи вад̣̇зяяа, д̇ам̣ гааран̣ам̣ д̇асса кийн̣аасавасса над̇т̇и.
Akkhātāraṃ na maññatīti evaṃ tīhi pariññāhi pañcakkhandhe parijānitvā khīṇāsavo bhikkhu akkhātāraṃ puggalaṃ na maññati. Akkhātāranti kammavasena kāraṇaṃ veditabbaṃ, akkhātabbaṃ kathetabbaṃ puggalaṃ na maññati, na passatīti attho . Kinti akkhātabbanti? ‘‘Tisso’’ti vā ‘‘phusso’’ti vā evaṃ yena kenaci nāmena vā gottena vā pakāsetabbaṃ. Tañhi tassa na hotīti taṃ tassa khīṇāsavassa na hoti. Yena naṃ vajjāti yena naṃ ‘‘rāgena ratto’’ti vā ‘‘dosena duṭṭho’’ti vā ‘‘mohena mūḷho’’ti vāti koci vadeyya, taṃ kāraṇaṃ tassa khīṇāsavassa natthi.
сажз виж̇аанааси вад̣̇зхийд̇и сажз зваруубам̣ кийн̣аасавам̣ ж̇аанааси, ‘‘ж̇аанаамий’’д̇и вад̣̇зхи. но жз ж̇аанааси, ат̇а ‘‘на ж̇аанаамий’’д̇и вад̣̇зхи. яагкаад̇и д̣̇звад̇ам̣ аалабанд̇о ааха. ид̇и имааяа г̇аат̇ааяа санд̣̇идтиго нававид̇хо логуд̇д̇арад̇хаммо гат̇ид̇о. саад̇хууд̇и ааяаажанад̇т̇з нибаад̇о.
Sace vijānāsi vadehīti sace evarūpaṃ khīṇāsavaṃ jānāsi, ‘‘jānāmī’’ti vadehi. No ce jānāsi, atha ‘‘na jānāmī’’ti vadehi. Yakkhāti devataṃ ālapanto āha. Iti imāya gāthāya sandiṭṭhiko navavidho lokuttaradhammo kathito. Sādhūti āyācanatthe nipāto.
яо ман̃н̃ад̇ийд̇и яо ад̇д̇аанам̣ ‘‘ахам̣ само’’д̇и ваа ‘‘висзсий’’д̇и ваа ‘‘нихийно’’д̇и ваа ман̃н̃ад̇и. зд̇зна ‘‘сзяяохамасмий’’д̇иаад̣̇аяо д̇аяо маанаа г̇ахид̇аава. д̇зсу г̇ахид̇зсу нава маанаа г̇ахид̇аава хонд̇и. со вивад̣̇зт̇а д̇знаад̇и со буг̇г̇ало д̇знзва маанзна язна гзнажи буг̇г̇алзна сад̣̇д̇хим̣ – ‘‘гзна мам̣ д̇вам̣ баабун̣ааси, гим̣ ж̇аад̇ияаа баабун̣ааси, уд̣̇ааху г̇од̇д̇зна, гулабад̣̇зсзна, ван̣н̣абогкарад̇ааяа, б̣аахусажжзна, д̇худ̇аг̇ун̣знаа’’д̇и звам̣ вивад̣̇зяяа. ид̇и имааяаби убад̣дхаг̇аат̇ааяа гаалигаа гаамаа гат̇ид̇аа.
Yo maññatīti yo attānaṃ ‘‘ahaṃ samo’’ti vā ‘‘visesī’’ti vā ‘‘nihīno’’ti vā maññati. Etena ‘‘seyyohamasmī’’tiādayo tayo mānā gahitāva. Tesu gahitesu nava mānā gahitāva honti. So vivadetha tenāti so puggalo teneva mānena yena kenaci puggalena saddhiṃ – ‘‘kena maṃ tvaṃ pāpuṇāsi, kiṃ jātiyā pāpuṇāsi, udāhu gottena, kulapadesena, vaṇṇapokkharatāya, bāhusaccena, dhutaguṇenā’’ti evaṃ vivadeyya. Iti imāyapi upaḍḍhagāthāya kālikā kāmā kathitā.
д̇ийсу вид̇хаасууд̇и д̇ийсу маанзсу. ‘‘згавид̇хзна руубасан̇г̇ахо’’д̇иаад̣̇ийсу (д̇ха. са. 584) хи годтаасо ‘‘вид̇хо’’д̇и вуд̇д̇о. ‘‘гат̇ам̣вид̇хам̣ сийлаванд̇ам̣ вад̣̇анд̇и, гат̇ам̣вид̇хам̣ бан̃н̃аванд̇ам̣ вад̣̇анд̇ий’’д̇иаад̣̇ийсу (сам̣. ни. 1.95) аагааро. ‘‘д̇иссо имаа, бхигкавз, вид̇хаа. гад̇амаа д̇иссо ? сзяяохамасмийд̇и вид̇хаа, сад̣̇исохамасмийд̇и вид̇хаа, хийнохамасмийд̇и вид̇хаа’’д̇иаад̣̇ийсу (сам̣. ни. 5.162) маано ‘‘вид̇хаа’’д̇и вуд̇д̇о. ид̇хааби маанова. д̇зна вуд̇д̇ам̣ ‘‘д̇ийсу вид̇хаасууд̇и д̇ийсу маанзсуу’’д̇и. авигамбамаанод̇и со буг̇г̇ало зд̇зсу сан̇кзбад̇о д̇ийсу , вид̇т̇аарад̇о навасу маанзсу на гамбад̇и, на жалад̇и. само висзсийд̇и на д̇асса ход̇ийд̇и д̇асса бахийнамаанасса кийн̣аасавасса ‘‘ахам̣ сад̣̇исо’’д̇и ваа ‘‘сзяяо’’д̇и ваа ‘‘хийно’’д̇и ваа на ход̇ийд̇и д̣̇ассзд̇и. бажчимабад̣̇ам̣ вуд̇д̇анаяамзва. ид̇и имааяаби убад̣дхаг̇аат̇ааяа нававид̇хо санд̣̇идтиго логуд̇д̇арад̇хаммо гат̇ид̇о.
Tīsu vidhāsūti tīsu mānesu. ‘‘Ekavidhena rūpasaṅgaho’’tiādīsu (dha. sa. 584) hi koṭṭhāso ‘‘vidho’’ti vutto. ‘‘Kathaṃvidhaṃ sīlavantaṃ vadanti, kathaṃvidhaṃ paññavantaṃ vadantī’’tiādīsu (saṃ. ni. 1.95) ākāro. ‘‘Tisso imā, bhikkhave, vidhā. Katamā tisso ? Seyyohamasmīti vidhā, sadisohamasmīti vidhā, hīnohamasmīti vidhā’’tiādīsu (saṃ. ni. 5.162) māno ‘‘vidhā’’ti vutto. Idhāpi mānova. Tena vuttaṃ ‘‘tīsu vidhāsūti tīsu mānesū’’ti. Avikampamānoti so puggalo etesu saṅkhepato tīsu , vitthārato navasu mānesu na kampati, na calati. Samo visesīti na tassa hotīti tassa pahīnamānassa khīṇāsavassa ‘‘ahaṃ sadiso’’ti vā ‘‘seyyo’’ti vā ‘‘hīno’’ti vā na hotīti dasseti. Pacchimapadaṃ vuttanayameva. Iti imāyapi upaḍḍhagāthāya navavidho sandiṭṭhiko lokuttaradhammo kathito.
бахааси сан̇канд̇и, ‘‘бадисан̇каа яонисо аахаарам̣ аахаарзд̇ий’’д̇иаад̣̇ийсу (сам̣. ни. 4.120, 239) бан̃н̃аа ‘‘сан̇каа’’д̇и ааг̇ад̇аа. ‘‘ад̇т̇и д̇з гожи г̇ан̣аго ваа муд̣̇д̣̇иго ваа сан̇кааяаго ваа, яо баход̇и г̇ан̇г̇ааяа ваалугам̣ г̇ан̣зд̇у’’нд̇и (сам̣. ни. 4.410) зд̇т̇а г̇ан̣анаа. ‘‘сан̃н̃аанид̣̇аанаа хи бабан̃жасан̇каа’’д̇иаад̣̇ийсу (су. ни. 880) годтаасо. ‘‘яаа д̇зсам̣ д̇зсам̣ д̇хаммаанам̣ сан̇каа саман̃н̃аа’’д̇и (д̇ха. са. 1313-1315) зд̇т̇а бан̣н̣ад̇д̇и ‘‘сан̇каа’’д̇и ааг̇ад̇аа. ид̇хааби аяамзва ад̇хиббзд̇аа. бахааси сан̇канд̇и бад̣̇асса хи аяамзвад̇т̇о – рад̇д̇о д̣̇удто муул̣хо ид̇и имам̣ бан̣н̣ад̇д̇им̣ кийн̣аасаво бахааси ж̇ахи баж̇ахийд̇и.
Pahāsisaṅkhanti, ‘‘paṭisaṅkhā yoniso āhāraṃ āhāretī’’tiādīsu (saṃ. ni. 4.120, 239) paññā ‘‘saṅkhā’’ti āgatā. ‘‘Atthi te koci gaṇako vā muddiko vā saṅkhāyako vā, yo pahoti gaṅgāya vālukaṃ gaṇetu’’nti (saṃ. ni. 4.410) ettha gaṇanā. ‘‘Saññānidānā hi papañcasaṅkhā’’tiādīsu (su. ni. 880) koṭṭhāso. ‘‘Yā tesaṃ tesaṃ dhammānaṃ saṅkhā samaññā’’ti (dha. sa. 1313-1315) ettha paṇṇatti ‘‘saṅkhā’’ti āgatā. Idhāpi ayameva adhippetā. Pahāsi saṅkhanti padassa hi ayamevattho – ratto duṭṭho mūḷho iti imaṃ paṇṇattiṃ khīṇāsavo pahāsi jahi pajahīti.
на вимаанамаж̇жхаг̇аад̇и навабхзд̣̇ам̣ д̇ивид̇хамаанам̣ на убаг̇ад̇о. ниваасадтзна ваа маад̇угужчи ‘‘вимаана’’нд̇и вужжад̇и, д̇ам̣ ааяад̇им̣ бадисанд̇хивасзна на убаг̇ажчийд̇иби ад̇т̇о. анааг̇ад̇ад̇т̇з ад̇ийд̇аважанам̣. ажчзжчийд̇и чинд̣̇и. чиннаг̇ант̇анд̇и жад̇д̇ааро г̇ант̇з чинд̣̇ид̇ваа тид̇ам̣. анийгханд̇и нид̣̇д̣̇угкам̣. нираасанд̇и нид̇д̇ан̣хам̣. бариязсамаанаад̇и ологаяамаанаа. нааж̇жхаг̇амунд̇и на ад̇хиг̇ажчанд̇и на винд̣̇анд̇и на бассанд̇и. вад̇д̇амаанад̇т̇з ад̇ийд̇аважанам̣. ид̇ха ваа хурам̣ ваад̇и ид̇халогз ваа баралогз ваа. саб̣б̣анивзсанзсууд̇и д̇аяо бхаваа, жад̇ассо яонияо, бан̃жа г̇ад̇ияо, сад̇д̇а вин̃н̃аан̣адтид̇ияо, нава сад̇д̇ааваасаа, ид̇и имзсуби саб̣б̣зсу сад̇д̇анивзсанзсу зваруубам̣ кийн̣аасавам̣ гааяасса бхзд̣̇аа уббаж̇ж̇амаанам̣ ваа уббаннам̣ ваа на бассанд̇ийд̇и ад̇т̇о. имааяа г̇аат̇ааяа санд̣̇идтигам̣ логуд̇д̇арад̇хаммамзва гат̇зси.
Na vimānamajjhagāti navabhedaṃ tividhamānaṃ na upagato. Nivāsaṭṭhena vā mātukucchi ‘‘vimāna’’nti vuccati, taṃ āyatiṃ paṭisandhivasena na upagacchītipi attho. Anāgatatthe atītavacanaṃ. Acchecchīti chindi. Chinnaganthanti cattāro ganthe chinditvā ṭhitaṃ. Anīghanti niddukkhaṃ. Nirāsanti nittaṇhaṃ. Pariyesamānāti olokayamānā. Nājjhagamunti na adhigacchanti na vindanti na passanti. Vattamānatthe atītavacanaṃ. Idha vā huraṃ vāti idhaloke vā paraloke vā. Sabbanivesanesūti tayo bhavā, catasso yoniyo, pañca gatiyo, satta viññāṇaṭṭhitiyo, nava sattāvāsā, iti imesupi sabbesu sattanivesanesu evarūpaṃ khīṇāsavaṃ kāyassa bhedā uppajjamānaṃ vā uppannaṃ vā na passantīti attho. Imāya gāthāya sandiṭṭhikaṃ lokuttaradhammameva kathesi.
иман̃жа г̇аат̇ам̣ суд̇ваа сааби д̣̇звад̇аа ад̇т̇ам̣ саллагкзси, д̇знзва гааран̣зна имасса кваахам̣, бханд̇зд̇иаад̣̇имааха. д̇ад̇т̇а баабам̣ на гаяираад̇и г̇аат̇ааяа д̣̇асагусалагаммабат̇авасзнаби гат̇зд̇ум̣ ваддад̇и адтан̇г̇игамаг̇г̇авасзнаби. д̣̇асагусалагаммабат̇авасзна д̇аава важасаад̇и жад̇уб̣б̣ид̇хам̣ важийсужарид̇ам̣ г̇ахид̇ам̣. манасаад̇и д̇ивид̇хам̣ маносужарид̇ам̣ г̇ахид̇ам̣. гааязна ваа гин̃жана саб̣б̣алогзд̇и д̇ивид̇хам̣ гааяасужарид̇ам̣ г̇ахид̇ам̣. имз д̇аава д̣̇асагусалагаммабат̇ад̇хаммаа хонд̇и. гаамз бахааяаад̇и иминаа бана гаамасукаллигаануяог̇о бадигкид̇д̇о. сад̇имаа самбаж̇аанод̇и иминаа д̣̇асагусалагаммабат̇агааран̣ам̣ сад̇исамбаж̇ан̃н̃ам̣ г̇ахид̇ам̣. д̣̇угкам̣ на сзвзт̇а анад̇т̇асам̣хид̇анд̇и иминаа ад̇д̇агиламат̇аануяог̇о бадисид̣̇д̇хо. ид̇и д̣̇звад̇аа ‘‘убхо анд̇з виваж̇ж̇зд̇ваа гааран̣зхи сад̇исамбаж̇ан̃н̃зхи сад̣̇д̇хим̣ д̣̇асагусалагаммабат̇ад̇хаммз д̇умхзхи гат̇ид̇з ааж̇аанаами бхаг̇аваа’’д̇и вад̣̇ад̇и.
Imañca gāthaṃ sutvā sāpi devatā atthaṃ sallakkhesi, teneva kāraṇena imassa khvāhaṃ, bhantetiādimāha. Tattha pāpaṃ na kayirāti gāthāya dasakusalakammapathavasenapi kathetuṃ vaṭṭati aṭṭhaṅgikamaggavasenapi. Dasakusalakammapathavasena tāva vacasāti catubbidhaṃ vacīsucaritaṃ gahitaṃ. Manasāti tividhaṃ manosucaritaṃ gahitaṃ. Kāyena vā kiñcana sabbaloketi tividhaṃ kāyasucaritaṃ gahitaṃ. Ime tāva dasakusalakammapathadhammā honti. Kāme pahāyāti iminā pana kāmasukhallikānuyogo paṭikkhitto. Satimā sampajānoti iminā dasakusalakammapathakāraṇaṃ satisampajaññaṃ gahitaṃ. Dukkhaṃ na sevetha anatthasaṃhitanti iminā attakilamathānuyogo paṭisiddho. Iti devatā ‘‘ubho ante vivajjetvā kāraṇehi satisampajaññehi saddhiṃ dasakusalakammapathadhamme tumhehi kathite ājānāmi bhagavā’’ti vadati.
адтан̇г̇игамаг̇г̇авасзна бана аяам̣ наяо – д̇асмим̣ гира таанз махад̇ий д̇хаммад̣̇зсанаа ахоси. д̣̇зсанаабарияосаанз д̣̇звад̇аа яат̇аатаанз тид̇аава д̣̇зсанаанусаарзна н̃аан̣ам̣ бзсзд̇ваа сод̇аабад̇д̇ипалз бад̇идтааяа ад̇д̇анаа ад̇хиг̇ад̇ам̣ адтан̇г̇игам̣ маг̇г̇ам̣ д̣̇ассзнд̇ий звамааха. д̇ад̇т̇а важасаад̇и саммааваажаа г̇ахид̇аа, мано бана ан̇г̇ам̣ на ход̇ийд̇и манасаад̇и маг̇г̇асамбаяуд̇д̇агам̣ жид̇д̇ам̣ г̇ахид̇ам̣. гааязна ваа гин̃жана саб̣б̣алогзд̇и саммаагамманд̇о г̇ахид̇о, ааж̇ийво бана ваажаагамманд̇абагкигад̇д̇аа г̇ахид̇ова ход̇и. сад̇имаад̇и иминаа вааяаамасад̇исамаад̇хаяо г̇ахид̇аа. самбаж̇аанод̇ибад̣̇зна саммаад̣̇идтисаммаасан̇габбаа. гаамз бахааяа, д̣̇угкам̣ на сзвзт̇аад̇ибад̣̇ад̣̇ваязна анд̇ад̣̇ваяаваж̇ж̇анам̣. ид̇и имз д̣̇вз анд̇з анубаг̇амма маж̇жхимам̣ бадибад̣̇ам̣ д̇умхзхи гат̇ид̇ам̣, ааж̇аанаами бхаг̇аваад̇и вад̇ваа д̇ат̇ааг̇ад̇ам̣ г̇анд̇хамаалаад̣̇ийхи бууж̇зд̇ваа бад̣̇агкин̣ам̣ гад̇ваа баггаамийд̇и.
Aṭṭhaṅgikamaggavasena pana ayaṃ nayo – tasmiṃ kira ṭhāne mahatī dhammadesanā ahosi. Desanāpariyosāne devatā yathāṭhāne ṭhitāva desanānusārena ñāṇaṃ pesetvā sotāpattiphale patiṭṭhāya attanā adhigataṃ aṭṭhaṅgikaṃ maggaṃ dassentī evamāha. Tattha vacasāti sammāvācā gahitā, mano pana aṅgaṃ na hotīti manasāti maggasampayuttakaṃ cittaṃ gahitaṃ. Kāyena vā kiñcana sabbaloketi sammākammanto gahito, ājīvo pana vācākammantapakkhikattā gahitova hoti. Satimāti iminā vāyāmasatisamādhayo gahitā. Sampajānotipadena sammādiṭṭhisammāsaṅkappā. Kāme pahāya, dukkhaṃ na sevethātipadadvayena antadvayavajjanaṃ. Iti ime dve ante anupagamma majjhimaṃ paṭipadaṃ tumhehi kathitaṃ, ājānāmi bhagavāti vatvā tathāgataṃ gandhamālādīhi pūjetvā padakkhiṇaṃ katvā pakkāmīti.
самид̣̇д̇хисуд̇д̇аван̣н̣анаа нидтид̇аа.
Samiddhisuttavaṇṇanā niṭṭhitā.
нанд̣̇анаваг̇г̇о д̣̇уд̇ияо.
Nandanavaggo dutiyo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. самид̣̇д̇хисуд̇д̇ам̣ • 10. Samiddhisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 10. самид̣̇д̇хисуд̇д̇аван̣н̣анаа • 10. Samiddhisuttavaṇṇanā
