| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๔. สมิทฺธิสุตฺตวณฺณนา
4. Samiddhisuttavaṇṇanā
๑๔. จตุเตฺถ สมิทฺธีติ อตฺตภาวสมิทฺธตาย เอวํลทฺธนาโม เถรสฺส สทฺธิวิหาริกเตฺถโรฯ กิมารมฺมณาติ กิํปจฺจยาฯ สงฺกปฺปวิตกฺกาติ สงฺกปฺปภูตา วิตกฺกาฯ นามรูปารมฺมณาติ นามรูปปจฺจยาฯ อิมินา จตฺตาโร อรูปกฺขนฺธา ภูตุปาทายรูปญฺจ วิตกฺกานํ ปจฺจโยติ ทเสฺสติฯ กฺว นานตฺตํ คจฺฉนฺตีติ กสฺมิํ ฐาเน นานาสภาวตํ เวมตฺตํ คจฺฉนฺติฯ ธาตุสูติ รูปธาตุอาทีสุฯ อโญฺญเยว หิ รูปวิตโกฺก, อเญฺญ สทฺทวิตกฺกาทโยติฯ ผสฺสสมุทยาติ สมฺปยุตฺตผสฺสปจฺจยาฯ เวทนาสโมสรณาติ ติโสฺส เวทนา สโมสรณาฯ เอตฺตเกน กุสลากุสลมิสฺสกา กถิตาฯ สมาธิปฺปมุขาติอาทโย ปน อปจยปกฺขิกาติ เวทิตพฺพาฯ ตตฺถ ปุพฺพงฺคมเฎฺฐน เชฎฺฐกเฎฺฐน วา สมาธิ ปมุขํ เอเตสนฺติ สมาธิปฺปมุขาฯ เชฎฺฐกการณเฎฺฐน สติ อธิปเตยฺยา เอเตสนฺติ สตาธิปเตยฺยาฯ มคฺคปญฺญา อุตฺตรา เอเตสนฺติ ปญฺญุตฺตราฯ ผลวิมุตฺติํ ปตฺวา สารปฺปตฺตา โหนฺตีติ วิมุตฺติสาราฯ อารมฺมณวเสน อมตํ นิพฺพานํ โอคาหิตฺวา ตตฺถ ปติฎฺฐิตาติ อมโตคธาฯ เตน จ มา มญฺญีติ เตน วิสฺสชฺชเนน ‘‘อหํ อคฺคสาวเกน ปุจฺฉิเต ปเญฺห วิสฺสเชฺชสิ’’นฺติ มา มานํ วา ทปฺปํ วา อกาสิฯ
14. Catutthe samiddhīti attabhāvasamiddhatāya evaṃladdhanāmo therassa saddhivihārikatthero. Kimārammaṇāti kiṃpaccayā. Saṅkappavitakkāti saṅkappabhūtā vitakkā. Nāmarūpārammaṇāti nāmarūpapaccayā. Iminā cattāro arūpakkhandhā bhūtupādāyarūpañca vitakkānaṃ paccayoti dasseti. Kva nānattaṃ gacchantīti kasmiṃ ṭhāne nānāsabhāvataṃ vemattaṃ gacchanti. Dhātusūti rūpadhātuādīsu. Aññoyeva hi rūpavitakko, aññe saddavitakkādayoti. Phassasamudayāti sampayuttaphassapaccayā. Vedanāsamosaraṇāti tisso vedanā samosaraṇā. Ettakena kusalākusalamissakā kathitā. Samādhippamukhātiādayo pana apacayapakkhikāti veditabbā. Tattha pubbaṅgamaṭṭhena jeṭṭhakaṭṭhena vā samādhi pamukhaṃ etesanti samādhippamukhā. Jeṭṭhakakāraṇaṭṭhena sati adhipateyyā etesanti satādhipateyyā. Maggapaññā uttarā etesanti paññuttarā. Phalavimuttiṃ patvā sārappattā hontīti vimuttisārā. Ārammaṇavasena amataṃ nibbānaṃ ogāhitvā tattha patiṭṭhitāti amatogadhā. Tena ca mā maññīti tena vissajjanena ‘‘ahaṃ aggasāvakena pucchite pañhe vissajjesi’’nti mā mānaṃ vā dappaṃ vā akāsi.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๔. สมิทฺธิสุตฺตํ • 4. Samiddhisuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๔. สมิทฺธิสุตฺตวณฺณนา • 4. Samiddhisuttavaṇṇanā
