| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๒. สมิทฺธิสุตฺตวณฺณนา
2. Samiddhisuttavaṇṇanā
๑๕๘. มยฺหํ ลาภาติ เอวรูปสฺส นาม สมฺมาสมฺพุทฺธสฺส สตฺถุสฺส ปฎิลาโภ, เอวรูปสฺส จ นาม นิยฺยานิกสฺส สทฺธมฺมสฺส ปฎิลาโภ, เอวรูปานญฺจ สุปฺปฎิปนฺนานํ สพฺรหฺมจารีนํ ปฎิลาโภ, เอเต มยฺหํ สุลทฺธลาภาฯ มยฺหํ สุลทฺธนฺติ ยเญฺจตํ มม นิยฺยานิกสาสเน ปพฺพชฺชา อุปสมฺปทา, ตสฺมิญฺจ อภิรตีติ สพฺพเญฺจตํ มยา สุลทฺธํฯ ยถา ปนสฺส เอวํ เจตโส ปริวิตโกฺก อุปฺปโนฺน, ตํ ทเสฺสตุํ ‘‘โส กิรา’’ติอาทิ วุตฺตํฯ จริตานุรูปวเสน คหิตํ มูลกมฺมฎฺฐานํฯ ปาสาทิกนฺติ ปสาทาวหํฯ เอวมโหสีติ ‘‘ลาภา วต เม’’ติอาทินา เอวํ ปริวิตโกฺก อโหสิฯ นิสินฺนสทิโสติ นิสิโนฺน วิยฯ ตสฺมิํเยว ฐาเนติ ยสฺมิํ ฐาเน นิสินฺนํ มาโร อุปสงฺกมิ, ตสฺมิํเยว ฐาเนฯ ตสฺสาติ สมิทฺธิเตฺถรสฺสฯ กมฺมฎฺฐานํ สปฺปายนฺติ กมฺมฎฺฐานภาวนาย อนุยุญฺชนํ สปฺปายํ อุปการาวหํ ภวิสฺสติฯ
158.Mayhaṃlābhāti evarūpassa nāma sammāsambuddhassa satthussa paṭilābho, evarūpassa ca nāma niyyānikassa saddhammassa paṭilābho, evarūpānañca suppaṭipannānaṃ sabrahmacārīnaṃ paṭilābho, ete mayhaṃ suladdhalābhā. Mayhaṃ suladdhanti yañcetaṃ mama niyyānikasāsane pabbajjā upasampadā, tasmiñca abhiratīti sabbañcetaṃ mayā suladdhaṃ. Yathā panassa evaṃ cetaso parivitakko uppanno, taṃ dassetuṃ ‘‘so kirā’’tiādi vuttaṃ. Caritānurūpavasena gahitaṃ mūlakammaṭṭhānaṃ. Pāsādikanti pasādāvahaṃ. Evamahosīti ‘‘lābhā vata me’’tiādinā evaṃ parivitakko ahosi. Nisinnasadisoti nisinno viya. Tasmiṃyeva ṭhāneti yasmiṃ ṭhāne nisinnaṃ māro upasaṅkami, tasmiṃyeva ṭhāne. Tassāti samiddhittherassa. Kammaṭṭhānaṃ sappāyanti kammaṭṭhānabhāvanāya anuyuñjanaṃ sappāyaṃ upakārāvahaṃ bhavissati.
มยฺหนฺติ มยาฯ สติ จ ปญฺญา จ สติปญฺญา, ตา อริยมเคฺคน ชานนสมตฺถนภาเวน อวพุทฺธาฯ เถโร กิร ตทา วิปสฺสนํ อุสฺสุกฺกาเปสิฯ กามนฺติ ยถารุจิฯ เกจิ ‘‘กามํ กรสฺสูติ อายสฺมโต ‘กามา’ติ มารสฺส อาลปน’’นฺติ วทนฺติฯ วิภิํสการหานีติ ภยานการหานิฯ รูปานีติ วิปฺปการานิฯ วิปฺปการโตฺถปิ หิ รูปสโทฺท ‘‘รูปํ ทเสฺสติ อนปฺปก’’นฺติอาทีสุ วิยฯ น กเมฺปสฺสสีติ สมณธมฺมกรณโต น จลิสฺสสิฯ
Mayhanti mayā. Sati ca paññā ca satipaññā, tā ariyamaggena jānanasamatthanabhāvena avabuddhā. Thero kira tadā vipassanaṃ ussukkāpesi. Kāmanti yathāruci. Keci ‘‘kāmaṃ karassūti āyasmato ‘kāmā’ti mārassa ālapana’’nti vadanti. Vibhiṃsakārahānīti bhayānakārahāni. Rūpānīti vippakārāni. Vippakāratthopi hi rūpasaddo ‘‘rūpaṃ dasseti anappaka’’ntiādīsu viya. Na kampessasīti samaṇadhammakaraṇato na calissasi.
สมิทฺธิสุตฺตวณฺณนา นิฎฺฐิตาฯ
Samiddhisuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๒. สมิทฺธิสุตฺตํ • 2. Samiddhisuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๒. สมิทฺธิสุตฺตวณฺณนา • 2. Samiddhisuttavaṇṇanā
