| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ಸಮಿದ್ಧಿಸುತ್ತವಣ್ಣನಾ
2. Samiddhisuttavaṇṇanā
೧೫೮. ಮಯ್ಹಂ ಲಾಭಾತಿ ಏವರೂಪಸ್ಸ ನಾಮ ಸಮ್ಮಾಸಮ್ಬುದ್ಧಸ್ಸ ಸತ್ಥುಸ್ಸ ಪಟಿಲಾಭೋ, ಏವರೂಪಸ್ಸ ಚ ನಾಮ ನಿಯ್ಯಾನಿಕಸ್ಸ ಸದ್ಧಮ್ಮಸ್ಸ ಪಟಿಲಾಭೋ, ಏವರೂಪಾನಞ್ಚ ಸುಪ್ಪಟಿಪನ್ನಾನಂ ಸಬ್ರಹ್ಮಚಾರೀನಂ ಪಟಿಲಾಭೋ, ಏತೇ ಮಯ್ಹಂ ಸುಲದ್ಧಲಾಭಾ। ಮಯ್ಹಂ ಸುಲದ್ಧನ್ತಿ ಯಞ್ಚೇತಂ ಮಮ ನಿಯ್ಯಾನಿಕಸಾಸನೇ ಪಬ್ಬಜ್ಜಾ ಉಪಸಮ್ಪದಾ, ತಸ್ಮಿಞ್ಚ ಅಭಿರತೀತಿ ಸಬ್ಬಞ್ಚೇತಂ ಮಯಾ ಸುಲದ್ಧಂ। ಯಥಾ ಪನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉಪ್ಪನ್ನೋ, ತಂ ದಸ್ಸೇತುಂ ‘‘ಸೋ ಕಿರಾ’’ತಿಆದಿ ವುತ್ತಂ। ಚರಿತಾನುರೂಪವಸೇನ ಗಹಿತಂ ಮೂಲಕಮ್ಮಟ್ಠಾನಂ। ಪಾಸಾದಿಕನ್ತಿ ಪಸಾದಾವಹಂ। ಏವಮಹೋಸೀತಿ ‘‘ಲಾಭಾ ವತ ಮೇ’’ತಿಆದಿನಾ ಏವಂ ಪರಿವಿತಕ್ಕೋ ಅಹೋಸಿ। ನಿಸಿನ್ನಸದಿಸೋತಿ ನಿಸಿನ್ನೋ ವಿಯ। ತಸ್ಮಿಂಯೇವ ಠಾನೇತಿ ಯಸ್ಮಿಂ ಠಾನೇ ನಿಸಿನ್ನಂ ಮಾರೋ ಉಪಸಙ್ಕಮಿ, ತಸ್ಮಿಂಯೇವ ಠಾನೇ। ತಸ್ಸಾತಿ ಸಮಿದ್ಧಿತ್ಥೇರಸ್ಸ। ಕಮ್ಮಟ್ಠಾನಂ ಸಪ್ಪಾಯನ್ತಿ ಕಮ್ಮಟ್ಠಾನಭಾವನಾಯ ಅನುಯುಞ್ಜನಂ ಸಪ್ಪಾಯಂ ಉಪಕಾರಾವಹಂ ಭವಿಸ್ಸತಿ।
158.Mayhaṃlābhāti evarūpassa nāma sammāsambuddhassa satthussa paṭilābho, evarūpassa ca nāma niyyānikassa saddhammassa paṭilābho, evarūpānañca suppaṭipannānaṃ sabrahmacārīnaṃ paṭilābho, ete mayhaṃ suladdhalābhā. Mayhaṃ suladdhanti yañcetaṃ mama niyyānikasāsane pabbajjā upasampadā, tasmiñca abhiratīti sabbañcetaṃ mayā suladdhaṃ. Yathā panassa evaṃ cetaso parivitakko uppanno, taṃ dassetuṃ ‘‘so kirā’’tiādi vuttaṃ. Caritānurūpavasena gahitaṃ mūlakammaṭṭhānaṃ. Pāsādikanti pasādāvahaṃ. Evamahosīti ‘‘lābhā vata me’’tiādinā evaṃ parivitakko ahosi. Nisinnasadisoti nisinno viya. Tasmiṃyeva ṭhāneti yasmiṃ ṭhāne nisinnaṃ māro upasaṅkami, tasmiṃyeva ṭhāne. Tassāti samiddhittherassa. Kammaṭṭhānaṃ sappāyanti kammaṭṭhānabhāvanāya anuyuñjanaṃ sappāyaṃ upakārāvahaṃ bhavissati.
ಮಯ್ಹನ್ತಿ ಮಯಾ। ಸತಿ ಚ ಪಞ್ಞಾ ಚ ಸತಿಪಞ್ಞಾ, ತಾ ಅರಿಯಮಗ್ಗೇನ ಜಾನನಸಮತ್ಥನಭಾವೇನ ಅವಬುದ್ಧಾ। ಥೇರೋ ಕಿರ ತದಾ ವಿಪಸ್ಸನಂ ಉಸ್ಸುಕ್ಕಾಪೇಸಿ। ಕಾಮನ್ತಿ ಯಥಾರುಚಿ। ಕೇಚಿ ‘‘ಕಾಮಂ ಕರಸ್ಸೂತಿ ಆಯಸ್ಮತೋ ‘ಕಾಮಾ’ತಿ ಮಾರಸ್ಸ ಆಲಪನ’’ನ್ತಿ ವದನ್ತಿ। ವಿಭಿಂಸಕಾರಹಾನೀತಿ ಭಯಾನಕಾರಹಾನಿ। ರೂಪಾನೀತಿ ವಿಪ್ಪಕಾರಾನಿ। ವಿಪ್ಪಕಾರತ್ಥೋಪಿ ಹಿ ರೂಪಸದ್ದೋ ‘‘ರೂಪಂ ದಸ್ಸೇತಿ ಅನಪ್ಪಕ’’ನ್ತಿಆದೀಸು ವಿಯ। ನ ಕಮ್ಪೇಸ್ಸಸೀತಿ ಸಮಣಧಮ್ಮಕರಣತೋ ನ ಚಲಿಸ್ಸಸಿ।
Mayhanti mayā. Sati ca paññā ca satipaññā, tā ariyamaggena jānanasamatthanabhāvena avabuddhā. Thero kira tadā vipassanaṃ ussukkāpesi. Kāmanti yathāruci. Keci ‘‘kāmaṃ karassūti āyasmato ‘kāmā’ti mārassa ālapana’’nti vadanti. Vibhiṃsakārahānīti bhayānakārahāni. Rūpānīti vippakārāni. Vippakāratthopi hi rūpasaddo ‘‘rūpaṃ dasseti anappaka’’ntiādīsu viya. Na kampessasīti samaṇadhammakaraṇato na calissasi.
ಸಮಿದ್ಧಿಸುತ್ತವಣ್ಣನಾ ನಿಟ್ಠಿತಾ।
Samiddhisuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಸಮಿದ್ಧಿಸುತ್ತಂ • 2. Samiddhisuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ಸಮಿದ್ಧಿಸುತ್ತವಣ್ಣನಾ • 2. Samiddhisuttavaṇṇanā
