| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
2. සමිද්‌ධිසුත්‌තවණ්‌ණනා
2. Samiddhisuttavaṇṇanā
158. මය්‌හං ලාභාති එවරූපස්‌ස නාම සම්‌මාසම්‌බුද්‌ධස්‌ස සත්‌ථුස්‌ස පටිලාභො, එවරූපස්‌ස ච නාම නිය්‍යානිකස්‌ස සද්‌ධම්‌මස්‌ස පටිලාභො, එවරූපානඤ්‌ච සුප්‌පටිපන්‌නානං සබ්‍රහ්‌මචාරීනං පටිලාභො, එතෙ මය්‌හං සුලද්‌ධලාභා. මය්‌හං සුලද්‌ධන්‌ති යඤ්‌චෙතං මම නිය්‍යානිකසාසනෙ පබ්‌බජ්‌ජා උපසම්‌පදා, තස්‌මිඤ්‌ච අභිරතීති සබ්‌බඤ්‌චෙතං මයා සුලද්‌ධං. යථා පනස්‌ස එවං චෙතසො පරිවිතක්‌කො උප්‌පන්‌නො, තං දස්‌සෙතුං ‘‘සො කිරා’’තිආදි වුත්‌තං. චරිතානුරූපවසෙන ගහිතං මූලකම්‌මට්‌ඨානං. පාසාදිකන්‌ති පසාදාවහං. එවමහොසීති ‘‘ලාභා වත මෙ’’තිආදිනා එවං පරිවිතක්‌කො අහොසි. නිසින්‌නසදිසොති නිසින්‌නො විය. තස්‌මිංයෙව ඨානෙති යස්‌මිං ඨානෙ නිසින්‌නං මාරො උපසඞ්‌කමි, තස්‌මිංයෙව ඨානෙ. තස්‌සාති සමිද්‌ධිත්‌ථෙරස්‌ස. කම්‌මට්‌ඨානං සප්‌පායන්‌ති කම්‌මට්‌ඨානභාවනාය අනුයුඤ්‌ජනං සප්‌පායං උපකාරාවහං භවිස්‌සති.
158.Mayhaṃlābhāti evarūpassa nāma sammāsambuddhassa satthussa paṭilābho, evarūpassa ca nāma niyyānikassa saddhammassa paṭilābho, evarūpānañca suppaṭipannānaṃ sabrahmacārīnaṃ paṭilābho, ete mayhaṃ suladdhalābhā. Mayhaṃ suladdhanti yañcetaṃ mama niyyānikasāsane pabbajjā upasampadā, tasmiñca abhiratīti sabbañcetaṃ mayā suladdhaṃ. Yathā panassa evaṃ cetaso parivitakko uppanno, taṃ dassetuṃ ‘‘so kirā’’tiādi vuttaṃ. Caritānurūpavasena gahitaṃ mūlakammaṭṭhānaṃ. Pāsādikanti pasādāvahaṃ. Evamahosīti ‘‘lābhā vata me’’tiādinā evaṃ parivitakko ahosi. Nisinnasadisoti nisinno viya. Tasmiṃyeva ṭhāneti yasmiṃ ṭhāne nisinnaṃ māro upasaṅkami, tasmiṃyeva ṭhāne. Tassāti samiddhittherassa. Kammaṭṭhānaṃ sappāyanti kammaṭṭhānabhāvanāya anuyuñjanaṃ sappāyaṃ upakārāvahaṃ bhavissati.
මය්‌හන්‌ති මයා. සති ච පඤ්‌ඤා ච සතිපඤ්‌ඤා, තා අරියමග්‌ගෙන ජානනසමත්‌ථනභාවෙන අවබුද්‌ධා. ථෙරො කිර තදා විපස්‌සනං උස්‌සුක්‌කාපෙසි. කාමන්‌ති යථාරුචි. කෙචි ‘‘කාමං කරස්‌සූති ආයස්‌මතො ‘කාමා’ති මාරස්‌ස ආලපන’’න්‌ති වදන්‌ති. විභිංසකාරහානීති භයානකාරහානි. රූපානීති විප්‌පකාරානි. විප්‌පකාරත්‌ථොපි හි රූපසද්‌දො ‘‘රූපං දස්‌සෙති අනප්‌පක’’න්‌තිආදීසු විය. න කම්‌පෙස්‌සසීති සමණධම්‌මකරණතො න චලිස්‌සසි.
Mayhanti mayā. Sati ca paññā ca satipaññā, tā ariyamaggena jānanasamatthanabhāvena avabuddhā. Thero kira tadā vipassanaṃ ussukkāpesi. Kāmanti yathāruci. Keci ‘‘kāmaṃ karassūti āyasmato ‘kāmā’ti mārassa ālapana’’nti vadanti. Vibhiṃsakārahānīti bhayānakārahāni. Rūpānīti vippakārāni. Vippakāratthopi hi rūpasaddo ‘‘rūpaṃ dasseti anappaka’’ntiādīsu viya. Na kampessasīti samaṇadhammakaraṇato na calissasi.
සමිද්‌ධිසුත්‌තවණ්‌ණනා නිට්‌ඨිතා.
Samiddhisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 2. සමිද්‌ධිසුත්‌තං • 2. Samiddhisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. සමිද්‌ධිසුත්‌තවණ්‌ණනා • 2. Samiddhisuttavaṇṇanā
