| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ஸங்கி²த்தஸுத்தவண்ணனா
3. Saṃkhittasuttavaṇṇanā
63. ததியே ஏவமேவாதி நிக்காரணேனேவ. யதா² வா அயங் யாசதி, ஏவமேவ. மோக⁴புரிஸாதி மூள்ஹபுரிஸா துச்ச²புரிஸா. அஜ்ஜே²ஸந்தீதி யாசந்தி. அனுப³ந்தி⁴தப்³ப³ந்தி இரியாபதா²னுக³மனேன அனுப³ந்தி⁴தப்³ப³ங் மங் ந விஜஹிதப்³ப³ங் மஞ்ஞந்தி. ஆஜானநத்த²ங் அபஸாதெ³ந்தோ ஏவமாஹ. ஏஸ கிர பி⁴க்கு² ஓவாதே³ தி³ன்னேபி பமாத³மேவ அனுயுஞ்ஜதி, த⁴ம்மங் ஸுத்வா தத்தே²வ வஸதி, ஸமணத⁴ம்மங் காதுங் ந இச்ச²தி. தஸ்மா ப⁴க³வா ஏவங் அபஸாதெ³த்வா புன யஸ்மா ஸோ அரஹத்தஸ்ஸ உபனிஸ்ஸயஸம்பன்னோ , தஸ்மா தங் ஓவத³ந்தோ தஸ்மாதிஹ தே பி⁴க்கு² ஏவங் ஸிக்கி²தப்³ப³ந்திஆதி³மாஹ. தத்த² அஜ்ஜ²த்தங் மே சித்தங் டி²தங் ப⁴விஸ்ஸதி ஸுஸண்டி²தங், ந ச உப்பன்னா பாபகா அகுஸலா த⁴ம்மா சித்தங் பரியாதா³ய ட²ஸ்ஸந்தீதி இமினா தாவஸ்ஸ ஓவாதே³ன நியகஜ்ஜ²த்தவஸேன சித்தேகக்³க³தாமத்தோ மூலஸமாதி⁴ வுத்தோ.
63. Tatiye evamevāti nikkāraṇeneva. Yathā vā ayaṃ yācati, evameva. Moghapurisāti mūḷhapurisā tucchapurisā. Ajjhesantīti yācanti. Anubandhitabbanti iriyāpathānugamanena anubandhitabbaṃ maṃ na vijahitabbaṃ maññanti. Ājānanatthaṃ apasādento evamāha. Esa kira bhikkhu ovāde dinnepi pamādameva anuyuñjati, dhammaṃ sutvā tattheva vasati, samaṇadhammaṃ kātuṃ na icchati. Tasmā bhagavā evaṃ apasādetvā puna yasmā so arahattassa upanissayasampanno , tasmā taṃ ovadanto tasmātiha te bhikkhu evaṃ sikkhitabbantiādimāha. Tattha ajjhattaṃ me cittaṃ ṭhitaṃ bhavissati susaṇṭhitaṃ, na ca uppannā pāpakā akusalā dhammā cittaṃ pariyādāya ṭhassantīti iminā tāvassa ovādena niyakajjhattavasena cittekaggatāmatto mūlasamādhi vutto.
ததோ ‘‘எத்தகேனேவ ஸந்துட்டி²ங் அனாபஜ்ஜித்வா ஏவங் ஸோ ஸமாதி⁴ வட்³டே⁴தப்³போ³’’தி த³ஸ்ஸேதுங் யதோ கோ² தே பி⁴க்கு² அஜ்ஜ²த்தங் சித்தங் டி²தங் ஹோதி ஸுஸண்டி²தங், ந ச உப்பன்னா பாபகா அகுஸலா த⁴ம்மா சித்தங் பரியாதா³ய திட்ட²ந்தி, ததோ தே பி⁴க்கு² ஏவங் ஸிக்கி²தப்³ப³ங் ‘‘மெத்தா மே சேதோவிமுத்தி பா⁴விதா ப⁴விஸ்ஸதி…பே॰… ஸுஸமாரத்³தா⁴’’தி ஏவமஸ்ஸ மெத்தாவஸேன பா⁴வனங் வட்³டெ⁴த்வா புன யதோ கோ² தே பி⁴க்கு² அயங் ஸமாதி⁴ ஏவங் பா⁴விதோ ஹோதி ப³ஹுலீகதோ, ததோ த்வங் பி⁴க்கு² இமங் ஸமாதி⁴ங் ஸவிதக்கஸவிசாரம்பி பா⁴வெய்யாஸீதிஆதி³ வுத்தங். தஸ்ஸத்தோ² – யதா³ தே பி⁴க்கு² அயங் மூலஸமாதி⁴ ஏவங் மெத்தாவஸேன பா⁴விதோ ஹோதி, ததா³ த்வங் தாவதகேனபி துட்டி²ங் அனாபஜ்ஜித்வாவ இமங் மூலஸமாதி⁴ங் அஞ்ஞேஸுபி ஆரம்மணேஸு சதுக்கபஞ்சகஜ்ஜா²னானி பாபயமானோ ‘‘ஸவிதக்கஸவிசாரம்பீ’’திஆதி³னா நயேன பா⁴வெய்யாஸீதி.
Tato ‘‘ettakeneva santuṭṭhiṃ anāpajjitvā evaṃ so samādhi vaḍḍhetabbo’’ti dassetuṃ yato kho te bhikkhu ajjhattaṃ cittaṃ ṭhitaṃ hoti susaṇṭhitaṃ, na ca uppannā pāpakā akusalā dhammā cittaṃ pariyādāya tiṭṭhanti, tato te bhikkhu evaṃ sikkhitabbaṃ‘‘mettā me cetovimutti bhāvitā bhavissati…pe… susamāraddhā’’ti evamassa mettāvasena bhāvanaṃ vaḍḍhetvā puna yato kho te bhikkhu ayaṃ samādhi evaṃ bhāvito hoti bahulīkato, tato tvaṃ bhikkhu imaṃ samādhiṃ savitakkasavicārampi bhāveyyāsītiādi vuttaṃ. Tassattho – yadā te bhikkhu ayaṃ mūlasamādhi evaṃ mettāvasena bhāvito hoti, tadā tvaṃ tāvatakenapi tuṭṭhiṃ anāpajjitvāva imaṃ mūlasamādhiṃ aññesupi ārammaṇesu catukkapañcakajjhānāni pāpayamāno ‘‘savitakkasavicārampī’’tiādinā nayena bhāveyyāsīti.
ஏவங் வத்வா ச பன அவஸேஸப்³ரஹ்மவிஹாரபுப்³ப³ங்க³மம்பிஸ்ஸ அஞ்ஞேஸு ஆரம்மணேஸு சதுக்கபஞ்சகஜ்ஜா²னபா⁴வனங் கரெய்யாஸீதி த³ஸ்ஸெந்தோ யதோ கோ² தே பி⁴க்கு² அயங் ஸமாதி⁴ ஏவங் பா⁴விதோ ஹோதி ஸுபா⁴விதோ, ததோ தே பி⁴க்கு² ஏவங் ஸிக்கி²தப்³ப³ங் ‘‘கருணா மே சேதோவிமுத்தீ’’திஆதி³மாஹ. ஏவங் மெத்தாபுப்³ப³ங்க³மங் சதுக்கபஞ்சகஜ்ஜா²னபா⁴வனங் த³ஸ்ஸெத்வா புன காயானுபஸ்ஸனாதி³புப்³ப³ங்க³மங் த³ஸ்ஸேதுங் யதோ கோ² தே பி⁴க்கு² அயங் ஸமாதி⁴ ஏவங் பா⁴விதோ ஹோதி ஸுபா⁴விதோ, ததோ தே பி⁴க்கு² ஏவங் ஸிக்கி²தப்³ப³ங் ‘‘காயே காயானுபஸ்ஸீ’’திஆதி³ங் வத்வா யதோ கோ² தே பி⁴க்கு² அயங் ஸமாதி⁴ ஏவங் பா⁴விதோ ஹோதி ஸுபா⁴விதோ, ததோ த்வங் பி⁴க்கு² யேன யேனேவ க³க்³க⁴ஸீதிஆதி³மாஹ. தத்த² க³க்³க⁴ஸீதி க³மிஸ்ஸஸி. பா²ஸுங்யேவாதி இமினா அரஹத்தங் த³ஸ்ஸேதி. அரஹத்தப்பத்தோ ஹி ஸப்³பி³ரியாபதே²ஸு பா²ஸு விஹரதி நாம.
Evaṃ vatvā ca pana avasesabrahmavihārapubbaṅgamampissa aññesu ārammaṇesu catukkapañcakajjhānabhāvanaṃ kareyyāsīti dassento yato kho te bhikkhu ayaṃ samādhi evaṃ bhāvito hoti subhāvito, tato te bhikkhu evaṃ sikkhitabbaṃ ‘‘karuṇā me cetovimuttī’’tiādimāha. Evaṃ mettāpubbaṅgamaṃ catukkapañcakajjhānabhāvanaṃ dassetvā puna kāyānupassanādipubbaṅgamaṃ dassetuṃ yato kho te bhikkhu ayaṃ samādhi evaṃ bhāvito hoti subhāvito, tato te bhikkhu evaṃ sikkhitabbaṃ ‘‘kāye kāyānupassī’’tiādiṃ vatvā yato kho te bhikkhu ayaṃ samādhi evaṃ bhāvito hoti subhāvito, tato tvaṃ bhikkhu yena yeneva gagghasītiādimāha. Tattha gagghasīti gamissasi. Phāsuṃyevāti iminā arahattaṃ dasseti. Arahattappatto hi sabbiriyāpathesu phāsu viharati nāma.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸங்கி²த்தஸுத்தங் • 3. Saṃkhittasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-5. இச்சா²ஸுத்தாதி³வண்ணனா • 1-5. Icchāsuttādivaṇṇanā
