১. সংখিত্তসুত্তৰণ্ণনা

1. Saṃkhittasuttavaṇṇanā

২৩২. চতুত্থস্স পঠমে কাল়কন্তি মলীনং, চিত্তস্স অপ্পভস্সরভাৰকরন্তি অত্থো। তং পনেত্থ কম্মপথপ্পত্তমেৰ অধিপ্পেতন্তি আহ ‘‘দসঅকুসলকম্মপথ’’ন্তি। কণ্হাভিজাতিহেতুতো ৰা কণ্হং। তেনাহ ‘‘কণ্হৰিপাক’’ন্তি। অপাযূপপত্তি মনুস্সেসু চ দোভগ্গিযং কণ্হৰিপাকো, যং তস্স তমভাৰো ৰুত্তো। নিব্বত্তনতোতি নিব্বত্তাপনতো। পণ্ডরকন্তি ওদাতং, চিত্তস্স পভস্সরভাৰকরন্তি অত্থো। সুক্কাভিজাতিহেতুতো ৰা সুক্কং। তেনাহ ‘‘সুক্কৰিপাক’’ন্তি। সগ্গূপপত্তি মনুস্সসোভগ্গিযঞ্চ সুক্কৰিপাকো, যং তস্স জোতিভাৰো ৰুত্তো। উক্কট্ঠনিদ্দেসেন পন ‘‘সগ্গে নিব্বত্তনতো’’তি ৰুত্তং, নিব্বত্তাপনতোতি অত্থো। মিস্সককম্মন্তি কালেন কণ্হং কালেন সুক্কন্তি এৰং মিস্সকৰসেন কতকম্মং। সুখদুক্খৰিপাকন্তি ৰত্ৰা তত্থ সুখদুক্খানং পৰত্তিআকারং দস্সেতুং ‘‘মিস্সককম্মং হী’’তিআদি ৰুত্তং। কম্মস্স কণ্হসুক্কসমঞ্ঞা কণ্হসুক্কাভিজাতিহেতুতাযাতি অপচযগামিতায তদুভযৰিদ্ধংসকস্স কম্মক্খযকরকম্মস্স ইধ সুক্কপরিযাযোপি ইচ্ছিতোতি আহ ‘‘উভয…পে॰… অযমেত্থ অত্থো’’তি। তত্থ উভযৰিপাকস্সাতি যথাধিগতস্স উভযৰিপাকস্স। সম্পত্তিভৰপরিযাপন্নো হি ৰিপাকো ইধ সুক্কং সুক্কৰিপাকোতি অধিপ্পেতো, ন অচ্চন্তপরিসুদ্ধো অরিযফলৰিপাকো।

232. Catutthassa paṭhame kāḷakanti malīnaṃ, cittassa appabhassarabhāvakaranti attho. Taṃ panettha kammapathappattameva adhippetanti āha ‘‘dasaakusalakammapatha’’nti. Kaṇhābhijātihetuto vā kaṇhaṃ. Tenāha ‘‘kaṇhavipāka’’nti. Apāyūpapatti manussesu ca dobhaggiyaṃ kaṇhavipāko, yaṃ tassa tamabhāvo vutto. Nibbattanatoti nibbattāpanato. Paṇḍarakanti odātaṃ, cittassa pabhassarabhāvakaranti attho. Sukkābhijātihetuto vā sukkaṃ. Tenāha ‘‘sukkavipāka’’nti. Saggūpapatti manussasobhaggiyañca sukkavipāko, yaṃ tassa jotibhāvo vutto. Ukkaṭṭhaniddesena pana ‘‘sagge nibbattanato’’ti vuttaṃ, nibbattāpanatoti attho. Missakakammanti kālena kaṇhaṃ kālena sukkanti evaṃ missakavasena katakammaṃ. Sukhadukkhavipākanti vatvā tattha sukhadukkhānaṃ pavattiākāraṃ dassetuṃ ‘‘missakakammaṃ hī’’tiādi vuttaṃ. Kammassa kaṇhasukkasamaññā kaṇhasukkābhijātihetutāyāti apacayagāmitāya tadubhayaviddhaṃsakassa kammakkhayakarakammassa idha sukkapariyāyopi icchitoti āha ‘‘ubhaya…pe… ayamettha attho’’ti. Tattha ubhayavipākassāti yathādhigatassa ubhayavipākassa. Sampattibhavapariyāpanno hi vipāko idha sukkaṃ sukkavipākoti adhippeto, na accantaparisuddho ariyaphalavipāko.

সংখিত্তসুত্তৰণ্ণনা নিট্ঠিতা।

Saṃkhittasuttavaṇṇanā niṭṭhitā.

Next: ২. ৰিত্থারসুত্তৰণ্ণনা • 2. Vitthārasuttavaṇṇanā

Related texts:

তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. সংখিত্তসুত্তং • 1. Saṃkhittasuttaṃ

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. সংখিত্তসুত্তৰণ্ণনা • 1. Saṃkhittasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact