| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
(၂၄) ၄. ကမ္မဝဂ္ဂော
(24) 4. Kammavaggo
၁. သံခိတ္တသုတ္တဝဏ္ဏနာ
1. Saṃkhittasuttavaṇṇanā
၂၃၂. စတုတ္ထသ္သ ပဌမေ ကဏ္ဟန္တိ ကာဠကံ ဒသအကုသလကမ္မပထကမ္မံ။ ကဏ္ဟဝိပာကန္တိ အပာယေ နိဗ္ဗတ္တနတော ကာဠကဝိပာကံ။ သုက္ကန္တိ ပဏ္ဍရကံ ကုသလကမ္မပထကမ္မံ ။ သုက္ကဝိပာကန္တိ သဂ္ဂေ နိဗ္ဗတ္တနတော ပဏ္ဍရကဝိပာကံ။ ကဏ္ဟသုက္ကန္တိ မိသ္သကကမ္မံ။ ကဏ္ဟသုက္ကဝိပာကန္တိ သုခဒုက္ခဝိပာကံ။ မိသ္သကကမ္မဉ္ဟိ ကတ္ဝာ အကုသလေန တိရစ္ဆာနယောနိယံ မင္ဂလဟတ္ထိဋ္ဌာနာဒီသု ဥပ္ပန္နော ကုသလေန ပဝတ္တေ သုခံ ဝေဒိယတိ။ ကုသလေန ရာဇကုလေပိ နိဗ္ဗတ္တော အကုသလေန ပဝတ္တေ ဒုက္ခံ ဝေဒိယတိ။ အကဏ္ဟံ အသုက္ကန္တိ ကမ္မက္ခယကရံ စတုမဂ္ဂဉာဏံ အဓိပ္ပေတံ။ တဉ္ဟိ ယဒိ ကဏ္ဟံ ဘဝေယ္ယ, ကဏ္ဟဝိပာကံ ဒဒေယ္ယ။ ယဒိ သုက္ကံ ဘဝေယ္ယ, သုက္ကဝိပာကံ ဒဒေယ္ယ။ ဥဘယဝိပာကသ္သ ပန အပ္ပဒာနတော အကဏ္ဟံ အသုက္ကန္တိ အယမေတ္ထ အတ္ထော။
232. Catutthassa paṭhame kaṇhanti kāḷakaṃ dasaakusalakammapathakammaṃ. Kaṇhavipākanti apāye nibbattanato kāḷakavipākaṃ. Sukkanti paṇḍarakaṃ kusalakammapathakammaṃ . Sukkavipākanti sagge nibbattanato paṇḍarakavipākaṃ. Kaṇhasukkanti missakakammaṃ. Kaṇhasukkavipākanti sukhadukkhavipākaṃ. Missakakammañhi katvā akusalena tiracchānayoniyaṃ maṅgalahatthiṭṭhānādīsu uppanno kusalena pavatte sukhaṃ vediyati. Kusalena rājakulepi nibbatto akusalena pavatte dukkhaṃ vediyati. Akaṇhaṃ asukkanti kammakkhayakaraṃ catumaggañāṇaṃ adhippetaṃ. Tañhi yadi kaṇhaṃ bhaveyya, kaṇhavipākaṃ dadeyya. Yadi sukkaṃ bhaveyya, sukkavipākaṃ dadeyya. Ubhayavipākassa pana appadānato akaṇhaṃ asukkanti ayamettha attho.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သံခိတ္တသုတ္တံ • 1. Saṃkhittasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. သံခိတ္တသုတ္တဝဏ္ဏနာ • 1. Saṃkhittasuttavaṇṇanā
