| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
(༡༧) ༢. པཊིཔདཱཝགྒོ
(17) 2. Paṭipadāvaggo
༡. སཾཁིཏྟསུཏྟཝཎྞནཱ
1. Saṃkhittasuttavaṇṇanā
༡༦༡. དུཏིཡསྶ པཋམེ དུཀྑཱཔཊིཔདཱ དནྡྷཱབྷིཉྙཱཏིཨཱདཱིསུ པཱལི༹ཡཱ ཨཱགཏནཡེན ཨཏྠོ ཝེདིཏབྦོ། ཏཐཱ ཧི –
161. Dutiyassa paṭhame dukkhāpaṭipadā dandhābhiññātiādīsu pāḷiyā āgatanayena attho veditabbo. Tathā hi –
‘‘ཏཏྠ ཀཏམཱ དུཀྑཔཊིཔདཱ དནྡྷཱབྷིཉྙཱ པཉྙཱ? ཀིཙྪེན ཀསིརེན སམཱདྷིཾ ཨུཔྤཱདེནྟསྶ དནྡྷཾ ཏཾ ཋཱནཾ ཨབྷིཛཱནནྟསྶ ཡཱ ཨུཔྤཛྫཏི པཉྙཱ པཛཱནནཱ…པེ॰… ཨམོཧོ དྷམྨཝིཙཡོ སམྨཱདིཊྛི, ཨཡཾ ཝུཙྩཏི དུཀྑཔཊིཔདཱ དནྡྷཱབྷིཉྙཱ པཉྙཱ། ཏཏྠ ཀཏམཱ དུཀྑཔཊིཔདཱ ཁིཔྤཱབྷིཉྙཱ པཉྙཱ? ཀིཙྪེན ཀསིརེན སམཱདྷིཾ ཨུཔྤཱདེནྟསྶ ཁིཔྤཾ ཏཾ ཋཱནཾ ཨབྷིཛཱནནྟསྶ ཡཱ ཨུཔྤཛྫཏི པཉྙཱ པཛཱནནཱ…པེ॰… སམྨཱདིཊྛི, ཨཡཾ ཝུཙྩཏི དུཀྑཔཊིཔདཱ ཁིཔྤཱབྷིཉྙཱ པཉྙཱ། ཏཏྠ ཀཏམཱ སུཁཔཊིཔདཱ དནྡྷཱབྷིཉྙཱ པཉྙཱ? ཨཀིཙྪེན ཨཀསིརེན སམཱདྷིཾ ཨུཔྤཱདེནྟསྶ དནྡྷཾ ཏཾ ཋཱནཾ ཨབྷིཛཱནནྟསྶ ཡཱ ཨུཔྤཛྫཏི པཉྙཱ པཛཱནནཱ…པེ॰… སམྨཱདིཊྛི, ཨཡཾ ཝུཙྩཏི སུཁཔཊིཔདཱ དནྡྷཱབྷིཉྙཱ པཉྙཱ། ཏཏྠ ཀཏམཱ སུཁཔཊིཔདཱ ཁིཔྤཱབྷིཉྙཱ པཉྙཱ? ཨཀིཙྪེན ཨཀསིརེན སམཱདྷིཾ ཨུཔྤཱདེནྟསྶ ཁིཔྤཾ ཏཾ ཋཱནཾ ཨབྷིཛཱནནྟསྶ ཡཱ ཨུཔྤཛྫཏི པཉྙཱ པཛཱནནཱ…པེ॰… སམྨཱདིཊྛི, ཨཡཾ ཝུཙྩཏི སུཁཔཊིཔདཱ ཁིཔྤཱབྷིཉྙཱ པཉྙཱ’’ཏི (ཝིབྷ॰ ༨༠༡) – ཨཡམེཏྠ པཱལི༹།
‘‘Tattha katamā dukkhapaṭipadā dandhābhiññā paññā? Kicchena kasirena samādhiṃ uppādentassa dandhaṃ taṃ ṭhānaṃ abhijānantassa yā uppajjati paññā pajānanā…pe… amoho dhammavicayo sammādiṭṭhi, ayaṃ vuccati dukkhapaṭipadā dandhābhiññā paññā. Tattha katamā dukkhapaṭipadā khippābhiññā paññā? Kicchena kasirena samādhiṃ uppādentassa khippaṃ taṃ ṭhānaṃ abhijānantassa yā uppajjati paññā pajānanā…pe… sammādiṭṭhi, ayaṃ vuccati dukkhapaṭipadā khippābhiññā paññā. Tattha katamā sukhapaṭipadā dandhābhiññā paññā? Akicchena akasirena samādhiṃ uppādentassa dandhaṃ taṃ ṭhānaṃ abhijānantassa yā uppajjati paññā pajānanā…pe… sammādiṭṭhi, ayaṃ vuccati sukhapaṭipadā dandhābhiññā paññā. Tattha katamā sukhapaṭipadā khippābhiññā paññā? Akicchena akasirena samādhiṃ uppādentassa khippaṃ taṃ ṭhānaṃ abhijānantassa yā uppajjati paññā pajānanā…pe… sammādiṭṭhi, ayaṃ vuccati sukhapaṭipadā khippābhiññā paññā’’ti (vibha. 801) – ayamettha pāḷi.
ཏཏྠ ཀིཙྪེན ཀསིརེན སམཱདྷིཾ ཨུཔྤཱདེནྟསྶཱཏི པུབྦབྷཱགེ ཨཱགམནཀཱལེ ཀིཙྪེན ཀསིརེན དུཀྑེན སསངྑཱརེན སཔྤཡོགེན ཀིལེསེ ཝིཀྑམྦྷེཏྭཱ ལོཀུཏྟརསམཱདྷིཾ ཨུཔྤཱདེནྟསྶ། དནྡྷཾ ཏཾ ཋཱནཾ ཨབྷིཛཱནནྟསྶཱཏི ཝིཀྑམྦྷིཏེསུ ཀིལེསེསུ ཝིཔསྶནཱཔརིཝཱསེ ཙིརཾ ཝསིཏྭཱ ཏཾ ལོཀུཏྟརསམཱདྷིསངྑཱཏཾ ཋཱནཾ དནྡྷཾ སཎིཀཾ ཨབྷིཛཱནནྟསྶ པཊིཝིཛ྄ཛྷནྟསྶ, པཱཔུཎནྟསྶཱཏི ཨཏྠོ། ཨཡཾ ཝུཙྩཏཱིཏི ཡཱ ཨེསཱ ཨེཝཾ ཨུཔྤཛྫཏི, ཨཡཾ ཀིལེསཝིཀྑམྦྷནཔྤཊིཔདཱཡ དུཀྑཏྟཱ, ཝིཔསྶནཱཔརིཝཱསཔཉྙཱཡ ཙ དནྡྷཏྟཱ མགྒཀཱལེ ཨེཀཙིཏྟཀྑཎེ ཨུཔྤནྣཱཔི པཉྙཱ ཨཱགམནཝསེན ‘‘དུཀྑཔཊིཔདཱ དནྡྷཱབྷིཉྙཱ ནཱམཱ’’ཏི ཝུཙྩཏི། ཨུཔརི ཏཱིསུ པདེསུཔི ཨིམིནཱ ནཡེན ཨཏྠོ ཝེདིཏབྦོ།
Tattha kicchena kasirena samādhiṃ uppādentassāti pubbabhāge āgamanakāle kicchena kasirena dukkhena sasaṅkhārena sappayogena kilese vikkhambhetvā lokuttarasamādhiṃ uppādentassa. Dandhaṃ taṃ ṭhānaṃ abhijānantassāti vikkhambhitesu kilesesu vipassanāparivāse ciraṃ vasitvā taṃ lokuttarasamādhisaṅkhātaṃ ṭhānaṃ dandhaṃ saṇikaṃ abhijānantassa paṭivijjhantassa, pāpuṇantassāti attho. Ayaṃ vuccatīti yā esā evaṃ uppajjati, ayaṃ kilesavikkhambhanappaṭipadāya dukkhattā, vipassanāparivāsapaññāya ca dandhattā maggakāle ekacittakkhaṇe uppannāpi paññā āgamanavasena ‘‘dukkhapaṭipadādandhābhiññā nāmā’’ti vuccati. Upari tīsu padesupi iminā nayena attho veditabbo.
སཾཁིཏྟསུཏྟཝཎྞནཱ ནིཊྛིཏཱ།
Saṃkhittasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. སཾཁིཏྟསུཏྟཾ • 1. Saṃkhittasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. སཾཁིཏྟསུཏྟཝཎྞནཱ • 1. Saṃkhittasuttavaṇṇanā
