| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
(੨੪) ੪. ਕਮ੍ਮવਗ੍ਗੋ
(24) 4. Kammavaggo
੧. ਸਂਖਿਤ੍ਤਸੁਤ੍ਤવਣ੍ਣਨਾ
1. Saṃkhittasuttavaṇṇanā
੨੩੨. ਚਤੁਤ੍ਥਸ੍ਸ ਪਠਮੇ ਕਾਲ਼ਕਨ੍ਤਿ ਮਲੀਨਂ, ਚਿਤ੍ਤਸ੍ਸ ਅਪ੍ਪਭਸ੍ਸਰਭਾવਕਰਨ੍ਤਿ ਅਤ੍ਥੋ। ਤਂ ਪਨੇਤ੍ਥ ਕਮ੍ਮਪਥਪ੍ਪਤ੍ਤਮੇવ ਅਧਿਪ੍ਪੇਤਨ੍ਤਿ ਆਹ ‘‘ਦਸਅਕੁਸਲਕਮ੍ਮਪਥ’’ਨ੍ਤਿ। ਕਣ੍ਹਾਭਿਜਾਤਿਹੇਤੁਤੋ વਾ ਕਣ੍ਹਂ। ਤੇਨਾਹ ‘‘ਕਣ੍ਹવਿਪਾਕ’’ਨ੍ਤਿ। ਅਪਾਯੂਪਪਤ੍ਤਿ ਮਨੁਸ੍ਸੇਸੁ ਚ ਦੋਭਗ੍ਗਿਯਂ ਕਣ੍ਹવਿਪਾਕੋ, ਯਂ ਤਸ੍ਸ ਤਮਭਾવੋ વੁਤ੍ਤੋ। ਨਿਬ੍ਬਤ੍ਤਨਤੋਤਿ ਨਿਬ੍ਬਤ੍ਤਾਪਨਤੋ। ਪਣ੍ਡਰਕਨ੍ਤਿ ਓਦਾਤਂ, ਚਿਤ੍ਤਸ੍ਸ ਪਭਸ੍ਸਰਭਾવਕਰਨ੍ਤਿ ਅਤ੍ਥੋ। ਸੁਕ੍ਕਾਭਿਜਾਤਿਹੇਤੁਤੋ વਾ ਸੁਕ੍ਕਂ। ਤੇਨਾਹ ‘‘ਸੁਕ੍ਕવਿਪਾਕ’’ਨ੍ਤਿ। ਸਗ੍ਗੂਪਪਤ੍ਤਿ ਮਨੁਸ੍ਸਸੋਭਗ੍ਗਿਯਞ੍ਚ ਸੁਕ੍ਕવਿਪਾਕੋ, ਯਂ ਤਸ੍ਸ ਜੋਤਿਭਾવੋ વੁਤ੍ਤੋ। ਉਕ੍ਕਟ੍ਠਨਿਦ੍ਦੇਸੇਨ ਪਨ ‘‘ਸਗ੍ਗੇ ਨਿਬ੍ਬਤ੍ਤਨਤੋ’’ਤਿ વੁਤ੍ਤਂ, ਨਿਬ੍ਬਤ੍ਤਾਪਨਤੋਤਿ ਅਤ੍ਥੋ। ਮਿਸ੍ਸਕਕਮ੍ਮਨ੍ਤਿ ਕਾਲੇਨ ਕਣ੍ਹਂ ਕਾਲੇਨ ਸੁਕ੍ਕਨ੍ਤਿ ਏવਂ ਮਿਸ੍ਸਕવਸੇਨ ਕਤਕਮ੍ਮਂ। ਸੁਖਦੁਕ੍ਖવਿਪਾਕਨ੍ਤਿ વਤ੍વਾ ਤਤ੍ਥ ਸੁਖਦੁਕ੍ਖਾਨਂ ਪવਤ੍ਤਿਆਕਾਰਂ ਦਸ੍ਸੇਤੁਂ ‘‘ਮਿਸ੍ਸਕਕਮ੍ਮਂ ਹੀ’’ਤਿਆਦਿ વੁਤ੍ਤਂ। ਕਮ੍ਮਸ੍ਸ ਕਣ੍ਹਸੁਕ੍ਕਸਮਞ੍ਞਾ ਕਣ੍ਹਸੁਕ੍ਕਾਭਿਜਾਤਿਹੇਤੁਤਾਯਾਤਿ ਅਪਚਯਗਾਮਿਤਾਯ ਤਦੁਭਯવਿਦ੍ਧਂਸਕਸ੍ਸ ਕਮ੍ਮਕ੍ਖਯਕਰਕਮ੍ਮਸ੍ਸ ਇਧ ਸੁਕ੍ਕਪਰਿਯਾਯੋਪਿ ਇਚ੍ਛਿਤੋਤਿ ਆਹ ‘‘ਉਭਯ…ਪੇ॰… ਅਯਮੇਤ੍ਥ ਅਤ੍ਥੋ’’ਤਿ। ਤਤ੍ਥ ਉਭਯવਿਪਾਕਸ੍ਸਾਤਿ ਯਥਾਧਿਗਤਸ੍ਸ ਉਭਯવਿਪਾਕਸ੍ਸ। ਸਮ੍ਪਤ੍ਤਿਭવਪਰਿਯਾਪਨ੍ਨੋ ਹਿ વਿਪਾਕੋ ਇਧ ਸੁਕ੍ਕਂ ਸੁਕ੍ਕવਿਪਾਕੋਤਿ ਅਧਿਪ੍ਪੇਤੋ, ਨ ਅਚ੍ਚਨ੍ਤਪਰਿਸੁਦ੍ਧੋ ਅਰਿਯਫਲવਿਪਾਕੋ।
232. Catutthassa paṭhame kāḷakanti malīnaṃ, cittassa appabhassarabhāvakaranti attho. Taṃ panettha kammapathappattameva adhippetanti āha ‘‘dasaakusalakammapatha’’nti. Kaṇhābhijātihetuto vā kaṇhaṃ. Tenāha ‘‘kaṇhavipāka’’nti. Apāyūpapatti manussesu ca dobhaggiyaṃ kaṇhavipāko, yaṃ tassa tamabhāvo vutto. Nibbattanatoti nibbattāpanato. Paṇḍarakanti odātaṃ, cittassa pabhassarabhāvakaranti attho. Sukkābhijātihetuto vā sukkaṃ. Tenāha ‘‘sukkavipāka’’nti. Saggūpapatti manussasobhaggiyañca sukkavipāko, yaṃ tassa jotibhāvo vutto. Ukkaṭṭhaniddesena pana ‘‘sagge nibbattanato’’ti vuttaṃ, nibbattāpanatoti attho. Missakakammanti kālena kaṇhaṃ kālena sukkanti evaṃ missakavasena katakammaṃ. Sukhadukkhavipākanti vatvā tattha sukhadukkhānaṃ pavattiākāraṃ dassetuṃ ‘‘missakakammaṃ hī’’tiādi vuttaṃ. Kammassa kaṇhasukkasamaññā kaṇhasukkābhijātihetutāyāti apacayagāmitāya tadubhayaviddhaṃsakassa kammakkhayakarakammassa idha sukkapariyāyopi icchitoti āha ‘‘ubhaya…pe… ayamettha attho’’ti. Tattha ubhayavipākassāti yathādhigatassa ubhayavipākassa. Sampattibhavapariyāpanno hi vipāko idha sukkaṃ sukkavipākoti adhippeto, na accantaparisuddho ariyaphalavipāko.
ਸਂਖਿਤ੍ਤਸੁਤ੍ਤવਣ੍ਣਨਾ ਨਿਟ੍ਠਿਤਾ।
Saṃkhittasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧. ਸਂਖਿਤ੍ਤਸੁਤ੍ਤਂ • 1. Saṃkhittasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੧. ਸਂਖਿਤ੍ਤਸੁਤ੍ਤવਣ੍ਣਨਾ • 1. Saṃkhittasuttavaṇṇanā
