| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
78. ஸங்கி²த்தேன பாதிமொக்கு²த்³தே³ஸாதி³
78. Saṃkhittena pātimokkhuddesādi
150. அத² கோ² பி⁴க்கூ²னங் ஏதத³ஹோஸி – ‘‘கதி நு கோ² பாதிமொக்கு²த்³தே³ஸா’’தி? ப⁴க³வதோ ஏதமத்த²ங் ஆரோசேஸுங். பஞ்சிமே, பி⁴க்க²வே, பாதிமொக்கு²த்³தே³ஸா – நிதா³னங் உத்³தி³ஸித்வா அவஸேஸங் ஸுதேன ஸாவேதப்³ப³ங். அயங் பட²மோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா அவஸேஸங் ஸுதேன ஸாவேதப்³ப³ங். அயங் து³தியோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா தேரஸ ஸங்கா⁴தி³ஸேஸே உத்³தி³ஸித்வா அவஸேஸங் ஸுதேன ஸாவேதப்³ப³ங். அயங் ததியோ பாதிமொக்கு²த்³தே³ஸோ. நிதா³னங் உத்³தி³ஸித்வா சத்தாரி பாராஜிகானி உத்³தி³ஸித்வா தேரஸ ஸங்கா⁴தி³ஸேஸே உத்³தி³ஸித்வா த்³வே அனியதே உத்³தி³ஸித்வா அவஸேஸங் ஸுதேன ஸாவேதப்³ப³ங். அயங் சதுத்தோ² பாதிமொக்கு²த்³தே³ஸோ. வித்தா²ரேனேவ பஞ்சமோ. இமே கோ², பி⁴க்க²வே, பஞ்ச பாதிமொக்கு²த்³தே³ஸாதி.
150. Atha kho bhikkhūnaṃ etadahosi – ‘‘kati nu kho pātimokkhuddesā’’ti? Bhagavato etamatthaṃ ārocesuṃ. Pañcime, bhikkhave, pātimokkhuddesā – nidānaṃ uddisitvā avasesaṃ sutena sāvetabbaṃ. Ayaṃ paṭhamo pātimokkhuddeso. Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ. Ayaṃ dutiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ. Ayaṃ tatiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ. Ayaṃ catuttho pātimokkhuddeso. Vitthāreneva pañcamo. Ime kho, bhikkhave, pañca pātimokkhuddesāti.
தேன கோ² பன ஸமயேன பி⁴க்கூ² – ப⁴க³வதா ஸங்கி²த்தேன பாதிமொக்கு²த்³தே³ஸோ அனுஞ்ஞாதோதி – ஸப்³ப³காலங் ஸங்கி²த்தேன பாதிமொக்க²ங் உத்³தி³ஸந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸங்கி²த்தேன பாதிமொக்க²ங் உத்³தி³ஸிதப்³ப³ங். யோ உத்³தி³ஸெய்ய, ஆபத்தி து³க்கடஸ்ஸாதி.
Tena kho pana samayena bhikkhū – bhagavatā saṃkhittena pātimokkhuddeso anuññātoti – sabbakālaṃ saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, saṃkhittena pātimokkhaṃ uddisitabbaṃ. Yo uddiseyya, āpatti dukkaṭassāti.
தேன கோ² பன ஸமயேன கோஸலேஸு ஜனபதே³ அஞ்ஞதரஸ்மிங் ஆவாஸே தத³ஹுபோஸதே² ஸவரப⁴யங் 1 அஹோஸி. பி⁴க்கூ² நாஸக்கி²ங்ஸு வித்தா²ரேன பாதிமொக்க²ங் உத்³தி³ஸிதுங். ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸதி அந்தராயே ஸங்கி²த்தேன பாதிமொக்க²ங் உத்³தி³ஸிதுந்தி.
Tena kho pana samayena kosalesu janapade aññatarasmiṃ āvāse tadahuposathe savarabhayaṃ 2 ahosi. Bhikkhū nāsakkhiṃsu vitthārena pātimokkhaṃ uddisituṃ. Bhagavato etamatthaṃ ārocesuṃ. Anujānāmi, bhikkhave, sati antarāye saṃkhittena pātimokkhaṃ uddisitunti.
தேன கோ² பன ஸமயேன ச²ப்³ப³க்³கி³யா பி⁴க்கூ² அஸதிபி அந்தராயே ஸங்கி²த்தேன பாதிமொக்க²ங் உத்³தி³ஸந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அஸதி அந்தராயே ஸங்கி²த்தேன பாதிமொக்க²ங் உத்³தி³ஸிதப்³ப³ங். யோ உத்³தி³ஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ஸதி அந்தராயே ஸங்கி²த்தேன பாதிமொக்க²ங் உத்³தி³ஸிதுங். தத்ரிமே அந்தராயா – ராஜந்தராயோ, சோரந்தராயோ, அக்³யந்தராயோ, உத³கந்தராயோ, மனுஸ்ஸந்தராயோ, அமனுஸ்ஸந்தராயோ , வாளந்தராயோ, ஸரீஸபந்தராயோ, ஜீவிதந்தராயோ, ப்³ரஹ்மசரியந்தராயோதி. அனுஜானாமி, பி⁴க்க²வே, ஏவரூபேஸு அந்தராயேஸு ஸங்கி²த்தேன பாதிமொக்க²ங் உத்³தி³ஸிதுங், அஸதி அந்தராயே வித்தா²ரேனாதி.
Tena kho pana samayena chabbaggiyā bhikkhū asatipi antarāye saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, asati antarāye saṃkhittena pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, sati antarāye saṃkhittena pātimokkhaṃ uddisituṃ. Tatrime antarāyā – rājantarāyo, corantarāyo, agyantarāyo, udakantarāyo, manussantarāyo, amanussantarāyo , vāḷantarāyo, sarīsapantarāyo, jīvitantarāyo, brahmacariyantarāyoti. Anujānāmi, bhikkhave, evarūpesu antarāyesu saṃkhittena pātimokkhaṃ uddisituṃ, asati antarāye vitthārenāti.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்க⁴மஜ்ஜே² அனஜ்ஜி²ட்டா² த⁴ம்மங் பா⁴ஸந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸங்க⁴மஜ்ஜே² அனஜ்ஜி²ட்டே²ன த⁴ம்மோ பா⁴ஸிதப்³போ³. யோ பா⁴ஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தே²ரேன பி⁴க்கு²னா ஸாமங் வா த⁴ம்மங் பா⁴ஸிதுங் பரங் வா அஜ்ஜே²ஸிதுந்தி.
Tena kho pana samayena chabbaggiyā bhikkhū saṅghamajjhe anajjhiṭṭhā dhammaṃ bhāsanti. Bhagavato etamatthaṃ ārocesuṃ. Na, bhikkhave, saṅghamajjhe anajjhiṭṭhena dhammo bhāsitabbo. Yo bhāseyya, āpatti dukkaṭassa. Anujānāmi, bhikkhave, therena bhikkhunā sāmaṃ vā dhammaṃ bhāsituṃ paraṃ vā ajjhesitunti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பாதிமொக்கு²த்³தே³ஸகதா² • Pātimokkhuddesakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாதிமொக்கு²த்³தே³ஸகதா²வண்ணனா • Pātimokkhuddesakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாதிமொக்கு²த்³தே³ஸகதா²வண்ணனா • Pātimokkhuddesakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாதிமொக்கு²த்³தே³ஸகதா²வண்ணனா • Pātimokkhuddesakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 78. பாதிமொக்கு²த்³தே³ஸகதா² • 78. Pātimokkhuddesakathā
