| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၇၈. သံခိတ္တေန ပာတိမောက္ခုဒ္ဒေသာဒိ
78. Saṃkhittena pātimokkhuddesādi
၁၅၀. အထ ခော ဘိက္ခူနံ ဧတဒဟောသိ – ‘‘ကတိ နု ခော ပာတိမောက္ခုဒ္ဒေသာ’’တိ? ဘဂဝတော ဧတမတ္ထံ အာရောစေသုံ။ ပဉ္စိမေ, ဘိက္ခဝေ, ပာတိမောက္ခုဒ္ဒေသာ – နိဒာနံ ဥဒ္ဒိသိတ္ဝာ အဝသေသံ သုတေန သာဝေတဗ္ဗံ။ အယံ ပဌမော ပာတိမောက္ခုဒ္ဒေသော။ နိဒာနံ ဥဒ္ဒိသိတ္ဝာ စတ္တာရိ ပာရာဇိကာနိ ဥဒ္ဒိသိတ္ဝာ အဝသေသံ သုတေန သာဝေတဗ္ဗံ။ အယံ ဒုတိယော ပာတိမောက္ခုဒ္ဒေသော။ နိဒာနံ ဥဒ္ဒိသိတ္ဝာ စတ္တာရိ ပာရာဇိကာနိ ဥဒ္ဒိသိတ္ဝာ တေရသ သင္ဃာဒိသေသေ ဥဒ္ဒိသိတ္ဝာ အဝသေသံ သုတေန သာဝေတဗ္ဗံ။ အယံ တတိယော ပာတိမောက္ခုဒ္ဒေသော။ နိဒာနံ ဥဒ္ဒိသိတ္ဝာ စတ္တာရိ ပာရာဇိကာနိ ဥဒ္ဒိသိတ္ဝာ တေရသ သင္ဃာဒိသေသေ ဥဒ္ဒိသိတ္ဝာ ဒ္ဝေ အနိယတေ ဥဒ္ဒိသိတ္ဝာ အဝသေသံ သုတေန သာဝေတဗ္ဗံ။ အယံ စတုတ္ထော ပာတိမောက္ခုဒ္ဒေသော။ ဝိတ္ထာရေနေဝ ပဉ္စမော။ ဣမေ ခော, ဘိက္ခဝေ, ပဉ္စ ပာတိမောက္ခုဒ္ဒေသာတိ။
150. Atha kho bhikkhūnaṃ etadahosi – ‘‘kati nu kho pātimokkhuddesā’’ti? Bhagavato etamatthaṃ ārocesuṃ. Pañcime, bhikkhave, pātimokkhuddesā – nidānaṃ uddisitvā avasesaṃ sutena sāvetabbaṃ. Ayaṃ paṭhamo pātimokkhuddeso. Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ. Ayaṃ dutiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ. Ayaṃ tatiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ. Ayaṃ catuttho pātimokkhuddeso. Vitthāreneva pañcamo. Ime kho, bhikkhave, pañca pātimokkhuddesāti.
တေန ခော ပန သမယေန ဘိက္ခူ – ဘဂဝတာ သံခိတ္တေန ပာတိမောက္ခုဒ္ဒေသော အနုညာတောတိ – သဗ္ဗကာလံ သံခိတ္တေန ပာတိမောက္ခံ ဥဒ္ဒိသန္တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, သံခိတ္တေန ပာတိမောက္ခံ ဥဒ္ဒိသိတဗ္ဗံ။ ယော ဥဒ္ဒိသေယ္ယ, အာပတ္တိ ဒုက္ကဋသ္သာတိ။
Tena kho pana samayena bhikkhū – bhagavatā saṃkhittena pātimokkhuddeso anuññātoti – sabbakālaṃ saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, saṃkhittena pātimokkhaṃ uddisitabbaṃ. Yo uddiseyya, āpatti dukkaṭassāti.
တေန ခော ပန သမယေန ကောသလေသု ဇနပဒေ အညတရသ္မိံ အာဝာသေ တဒဟုပောသထေ သဝရဘယံ 1 အဟောသိ။ ဘိက္ခူ နာသက္ခိံသု ဝိတ္ထာရေန ပာတိမောက္ခံ ဥဒ္ဒိသိတုံ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, သတိ အန္တရာယေ သံခိတ္တေန ပာတိမောက္ခံ ဥဒ္ဒိသိတုန္တိ။
Tena kho pana samayena kosalesu janapade aññatarasmiṃ āvāse tadahuposathe savarabhayaṃ 2 ahosi. Bhikkhū nāsakkhiṃsu vitthārena pātimokkhaṃ uddisituṃ. Bhagavato etamatthaṃ ārocesuṃ. Anujānāmi, bhikkhave, sati antarāye saṃkhittena pātimokkhaṃ uddisitunti.
တေန ခော ပန သမယေန ဆဗ္ဗဂ္ဂိယာ ဘိက္ခူ အသတိပိ အန္တရာယေ သံခိတ္တေန ပာတိမောက္ခံ ဥဒ္ဒိသန္တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, အသတိ အန္တရာယေ သံခိတ္တေန ပာတိမောက္ခံ ဥဒ္ဒိသိတဗ္ဗံ။ ယော ဥဒ္ဒိသေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, သတိ အန္တရာယေ သံခိတ္တေန ပာတိမောက္ခံ ဥဒ္ဒိသိတုံ။ တတ္ရိမေ အန္တရာယာ – ရာဇန္တရာယော, စောရန္တရာယော, အဂ္ယန္တရာယော, ဥဒကန္တရာယော, မနုသ္သန္တရာယော, အမနုသ္သန္တရာယော , ဝာဠန္တရာယော, သရီသပန္တရာယော, ဇီဝိတန္တရာယော, ဗ္ရဟ္မစရိယန္တရာယောတိ။ အနုဇာနာမိ, ဘိက္ခဝေ, ဧဝရူပေသု အန္တရာယေသု သံခိတ္တေန ပာတိမောက္ခံ ဥဒ္ဒိသိတုံ, အသတိ အန္တရာယေ ဝိတ္ထာရေနာတိ။
Tena kho pana samayena chabbaggiyā bhikkhū asatipi antarāye saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, asati antarāye saṃkhittena pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, sati antarāye saṃkhittena pātimokkhaṃ uddisituṃ. Tatrime antarāyā – rājantarāyo, corantarāyo, agyantarāyo, udakantarāyo, manussantarāyo, amanussantarāyo , vāḷantarāyo, sarīsapantarāyo, jīvitantarāyo, brahmacariyantarāyoti. Anujānāmi, bhikkhave, evarūpesu antarāyesu saṃkhittena pātimokkhaṃ uddisituṃ, asati antarāye vitthārenāti.
တေန ခော ပန သမယေန ဆဗ္ဗဂ္ဂိယာ ဘိက္ခူ သင္ဃမဇ္ဈေ အနဇ္ဈိဋ္ဌာ ဓမ္မံ ဘာသန္တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, သင္ဃမဇ္ဈေ အနဇ္ဈိဋ္ဌေန ဓမ္မော ဘာသိတဗ္ဗော။ ယော ဘာသေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ထေရေန ဘိက္ခုနာ သာမံ ဝာ ဓမ္မံ ဘာသိတုံ ပရံ ဝာ အဇ္ဈေသိတုန္တိ။
Tena kho pana samayena chabbaggiyā bhikkhū saṅghamajjhe anajjhiṭṭhā dhammaṃ bhāsanti. Bhagavato etamatthaṃ ārocesuṃ. Na, bhikkhave, saṅghamajjhe anajjhiṭṭhena dhammo bhāsitabbo. Yo bhāseyya, āpatti dukkaṭassa. Anujānāmi, bhikkhave, therena bhikkhunā sāmaṃ vā dhammaṃ bhāsituṃ paraṃ vā ajjhesitunti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပာတိမောက္ခုဒ္ဒေသကထာ • Pātimokkhuddesakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပာတိမောက္ခုဒ္ဒေသကထာဝဏ္ဏနာ • Pātimokkhuddesakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပာတိမောက္ခုဒ္ဒေသကထာဝဏ္ဏနာ • Pātimokkhuddesakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပာတိမောက္ခုဒ္ဒေသကထာဝဏ္ဏနာ • Pātimokkhuddesakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇၈. ပာတိမောက္ခုဒ္ဒေသကထာ • 78. Pātimokkhuddesakathā
