| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
78. සංඛිත්‌තෙන පාතිමොක්‌ඛුද්‌දෙසාදි
78. Saṃkhittena pātimokkhuddesādi
150. අථ ඛො භික්‌ඛූනං එතදහොසි – ‘‘කති නු ඛො පාතිමොක්‌ඛුද්‌දෙසා’’ති? භගවතො එතමත්‌ථං ආරොචෙසුං. පඤ්‌චිමෙ, භික්‌ඛවෙ, පාතිමොක්‌ඛුද්‌දෙසා – නිදානං උද්‌දිසිත්‌වා අවසෙසං සුතෙන සාවෙතබ්‌බං. අයං පඨමො පාතිමොක්‌ඛුද්‌දෙසො. නිදානං උද්‌දිසිත්‌වා චත්‌තාරි පාරාජිකානි උද්‌දිසිත්‌වා අවසෙසං සුතෙන සාවෙතබ්‌බං. අයං දුතියො පාතිමොක්‌ඛුද්‌දෙසො. නිදානං උද්‌දිසිත්‌වා චත්‌තාරි පාරාජිකානි උද්‌දිසිත්‌වා තෙරස සඞ්‌ඝාදිසෙසෙ උද්‌දිසිත්‌වා අවසෙසං සුතෙන සාවෙතබ්‌බං. අයං තතියො පාතිමොක්‌ඛුද්‌දෙසො. නිදානං උද්‌දිසිත්‌වා චත්‌තාරි පාරාජිකානි උද්‌දිසිත්‌වා තෙරස සඞ්‌ඝාදිසෙසෙ උද්‌දිසිත්‌වා ද්‌වෙ අනියතෙ උද්‌දිසිත්‌වා අවසෙසං සුතෙන සාවෙතබ්‌බං. අයං චතුත්‌ථො පාතිමොක්‌ඛුද්‌දෙසො. විත්‌ථාරෙනෙව පඤ්‌චමො. ඉමෙ ඛො, භික්‌ඛවෙ, පඤ්‌ච පාතිමොක්‌ඛුද්‌දෙසාති.
150. Atha kho bhikkhūnaṃ etadahosi – ‘‘kati nu kho pātimokkhuddesā’’ti? Bhagavato etamatthaṃ ārocesuṃ. Pañcime, bhikkhave, pātimokkhuddesā – nidānaṃ uddisitvā avasesaṃ sutena sāvetabbaṃ. Ayaṃ paṭhamo pātimokkhuddeso. Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ. Ayaṃ dutiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ. Ayaṃ tatiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ. Ayaṃ catuttho pātimokkhuddeso. Vitthāreneva pañcamo. Ime kho, bhikkhave, pañca pātimokkhuddesāti.
තෙන ඛො පන සමයෙන භික්‌ඛූ – භගවතා සංඛිත්‌තෙන පාතිමොක්‌ඛුද්‌දෙසො අනුඤ්‌ඤාතොති – සබ්‌බකාලං සංඛිත්‌තෙන පාතිමොක්‌ඛං උද්‌දිසන්‌ති. භගවතො එතමත්‌ථං ආරොචෙසුං. න, භික්‌ඛවෙ, සංඛිත්‌තෙන පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, ආපත්‌ති දුක්‌කටස්‌සාති.
Tena kho pana samayena bhikkhū – bhagavatā saṃkhittena pātimokkhuddeso anuññātoti – sabbakālaṃ saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, saṃkhittena pātimokkhaṃ uddisitabbaṃ. Yo uddiseyya, āpatti dukkaṭassāti.
තෙන ඛො පන සමයෙන කොසලෙසු ජනපදෙ අඤ්‌ඤතරස්‌මිං ආවාසෙ තදහුපොසථෙ සවරභයං 1 අහොසි. භික්‌ඛූ නාසක්‌ඛිංසු විත්‌ථාරෙන පාතිමොක්‌ඛං උද්‌දිසිතුං. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සති අන්‌තරායෙ සංඛිත්‌තෙන පාතිමොක්‌ඛං උද්‌දිසිතුන්‌ති.
Tena kho pana samayena kosalesu janapade aññatarasmiṃ āvāse tadahuposathe savarabhayaṃ 2 ahosi. Bhikkhū nāsakkhiṃsu vitthārena pātimokkhaṃ uddisituṃ. Bhagavato etamatthaṃ ārocesuṃ. Anujānāmi, bhikkhave, sati antarāye saṃkhittena pātimokkhaṃ uddisitunti.
තෙන ඛො පන සමයෙන ඡබ්‌බග්‌ගියා භික්‌ඛූ අසතිපි අන්‌තරායෙ සංඛිත්‌තෙන පාතිමොක්‌ඛං උද්‌දිසන්‌ති. භගවතො එතමත්‌ථං ආරොචෙසුං. න, භික්‌ඛවෙ, අසති අන්‌තරායෙ සංඛිත්‌තෙන පාතිමොක්‌ඛං උද්‌දිසිතබ්‌බං. යො උද්‌දිසෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, සති අන්‌තරායෙ සංඛිත්‌තෙන පාතිමොක්‌ඛං උද්‌දිසිතුං. තත්‍රිමෙ අන්‌තරායා – රාජන්‌තරායො, චොරන්‌තරායො, අග්‍යන්‌තරායො, උදකන්‌තරායො, මනුස්‌සන්‌තරායො, අමනුස්‌සන්‌තරායො , වාළන්‌තරායො, සරීසපන්‌තරායො, ජීවිතන්‌තරායො, බ්‍රහ්‌මචරියන්‌තරායොති. අනුජානාමි, භික්‌ඛවෙ, එවරූපෙසු අන්‌තරායෙසු සංඛිත්‌තෙන පාතිමොක්‌ඛං උද්‌දිසිතුං, අසති අන්‌තරායෙ විත්‌ථාරෙනාති.
Tena kho pana samayena chabbaggiyā bhikkhū asatipi antarāye saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, asati antarāye saṃkhittena pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, sati antarāye saṃkhittena pātimokkhaṃ uddisituṃ. Tatrime antarāyā – rājantarāyo, corantarāyo, agyantarāyo, udakantarāyo, manussantarāyo, amanussantarāyo , vāḷantarāyo, sarīsapantarāyo, jīvitantarāyo, brahmacariyantarāyoti. Anujānāmi, bhikkhave, evarūpesu antarāyesu saṃkhittena pātimokkhaṃ uddisituṃ, asati antarāye vitthārenāti.
තෙන ඛො පන සමයෙන ඡබ්‌බග්‌ගියා භික්‌ඛූ සඞ්‌ඝමජ්‌ඣෙ අනජ්‌ඣිට්‌ඨා ධම්‌මං භාසන්‌ති. භගවතො එතමත්‌ථං ආරොචෙසුං. න, භික්‌ඛවෙ, සඞ්‌ඝමජ්‌ඣෙ අනජ්‌ඣිට්‌ඨෙන ධම්‌මො භාසිතබ්‌බො. යො භාසෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, ථෙරෙන භික්‌ඛුනා සාමං වා ධම්‌මං භාසිතුං පරං වා අජ්‌ඣෙසිතුන්‌ති.
Tena kho pana samayena chabbaggiyā bhikkhū saṅghamajjhe anajjhiṭṭhā dhammaṃ bhāsanti. Bhagavato etamatthaṃ ārocesuṃ. Na, bhikkhave, saṅghamajjhe anajjhiṭṭhena dhammo bhāsitabbo. Yo bhāseyya, āpatti dukkaṭassa. Anujānāmi, bhikkhave, therena bhikkhunā sāmaṃ vā dhammaṃ bhāsituṃ paraṃ vā ajjhesitunti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පාතිමොක්‌ඛුද්‌දෙසකථා • Pātimokkhuddesakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාතිමොක්‌ඛුද්‌දෙසකථාවණ්‌ණනා • Pātimokkhuddesakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පාතිමොක්‌ඛුද්‌දෙසකථාවණ්‌ණනා • Pātimokkhuddesakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාතිමොක්‌ඛුද්‌දෙසකථාවණ්‌ණනා • Pātimokkhuddesakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 78. පාතිමොක්‌ඛුද්‌දෙසකථා • 78. Pātimokkhuddesakathā
