| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༧༨. སཾཁིཏྟེན པཱཏིམོཀྑུདྡེསཱདི
78. Saṃkhittena pātimokkhuddesādi
༡༥༠. ཨཐ ཁོ བྷིཀྑཱུནཾ ཨེཏདཧོསི – ‘‘ཀཏི ནུ ཁོ པཱཏིམོཀྑུདྡེསཱ’’ཏི? བྷགཝཏོ ཨེཏམཏྠཾ ཨཱརོཙེསུཾ། པཉྩིམེ, བྷིཀྑཝེ, པཱཏིམོཀྑུདྡེསཱ – ནིདཱནཾ ཨུདྡིསིཏྭཱ ཨཝསེསཾ སུཏེན སཱཝེཏབྦཾ། ཨཡཾ པཋམོ པཱཏིམོཀྑུདྡེསོ། ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཨཝསེསཾ སུཏེན སཱཝེཏབྦཾ། ཨཡཾ དུཏིཡོ པཱཏིམོཀྑུདྡེསོ། ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཏེརས སངྒྷཱདིསེསེ ཨུདྡིསིཏྭཱ ཨཝསེསཾ སུཏེན སཱཝེཏབྦཾ། ཨཡཾ ཏཏིཡོ པཱཏིམོཀྑུདྡེསོ། ནིདཱནཾ ཨུདྡིསིཏྭཱ ཙཏྟཱརི པཱརཱཛིཀཱནི ཨུདྡིསིཏྭཱ ཏེརས སངྒྷཱདིསེསེ ཨུདྡིསིཏྭཱ དྭེ ཨནིཡཏེ ཨུདྡིསིཏྭཱ ཨཝསེསཾ སུཏེན སཱཝེཏབྦཾ། ཨཡཾ ཙཏུཏྠོ པཱཏིམོཀྑུདྡེསོ། ཝིཏྠཱརེནེཝ པཉྩམོ། ཨིམེ ཁོ, བྷིཀྑཝེ, པཉྩ པཱཏིམོཀྑུདྡེསཱཏི།
150. Atha kho bhikkhūnaṃ etadahosi – ‘‘kati nu kho pātimokkhuddesā’’ti? Bhagavato etamatthaṃ ārocesuṃ. Pañcime, bhikkhave, pātimokkhuddesā – nidānaṃ uddisitvā avasesaṃ sutena sāvetabbaṃ. Ayaṃ paṭhamo pātimokkhuddeso. Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ. Ayaṃ dutiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ. Ayaṃ tatiyo pātimokkhuddeso. Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ. Ayaṃ catuttho pātimokkhuddeso. Vitthāreneva pañcamo. Ime kho, bhikkhave, pañca pātimokkhuddesāti.
ཏེན ཁོ པན སམཡེན བྷིཀྑཱུ – བྷགཝཏཱ སཾཁིཏྟེན པཱཏིམོཀྑུདྡེསོ ཨནུཉྙཱཏོཏི – སབྦཀཱལཾ སཾཁིཏྟེན པཱཏིམོཀྑཾ ཨུདྡིསནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, སཾཁིཏྟེན པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶཱཏི།
Tena kho pana samayena bhikkhū – bhagavatā saṃkhittena pātimokkhuddeso anuññātoti – sabbakālaṃ saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, saṃkhittena pātimokkhaṃ uddisitabbaṃ. Yo uddiseyya, āpatti dukkaṭassāti.
ཏེན ཁོ པན སམཡེན ཀོསལེསུ ཛནཔདེ ཨཉྙཏརསྨིཾ ཨཱཝཱསེ ཏདཧུཔོསཐེ སཝརབྷཡཾ 1 ཨཧོསི། བྷིཀྑཱུ ནཱསཀྑིཾསུ ཝིཏྠཱརེན པཱཏིམོཀྑཾ ཨུདྡིསིཏུཾ། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, སཏི ཨནྟརཱཡེ སཾཁིཏྟེན པཱཏིམོཀྑཾ ཨུདྡིསིཏུནྟི།
Tena kho pana samayena kosalesu janapade aññatarasmiṃ āvāse tadahuposathe savarabhayaṃ 2 ahosi. Bhikkhū nāsakkhiṃsu vitthārena pātimokkhaṃ uddisituṃ. Bhagavato etamatthaṃ ārocesuṃ. Anujānāmi, bhikkhave, sati antarāye saṃkhittena pātimokkhaṃ uddisitunti.
ཏེན ཁོ པན སམཡེན ཚབྦགྒིཡཱ བྷིཀྑཱུ ཨསཏིཔི ཨནྟརཱཡེ སཾཁིཏྟེན པཱཏིམོཀྑཾ ཨུདྡིསནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, ཨསཏི ཨནྟརཱཡེ སཾཁིཏྟེན པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, སཏི ཨནྟརཱཡེ སཾཁིཏྟེན པཱཏིམོཀྑཾ ཨུདྡིསིཏུཾ། ཏཏྲིམེ ཨནྟརཱཡཱ – རཱཛནྟརཱཡོ, ཙོརནྟརཱཡོ, ཨགྱནྟརཱཡོ, ཨུདཀནྟརཱཡོ, མནུསྶནྟརཱཡོ, ཨམནུསྶནྟརཱཡོ , ཝཱལ༹ནྟརཱཡོ, སརཱིསཔནྟརཱཡོ, ཛཱིཝིཏནྟརཱཡོ, བྲཧྨཙརིཡནྟརཱཡོཏི། ཨནུཛཱནཱམི, བྷིཀྑཝེ, ཨེཝརཱུཔེསུ ཨནྟརཱཡེསུ སཾཁིཏྟེན པཱཏིམོཀྑཾ ཨུདྡིསིཏུཾ, ཨསཏི ཨནྟརཱཡེ ཝིཏྠཱརེནཱཏི།
Tena kho pana samayena chabbaggiyā bhikkhū asatipi antarāye saṃkhittena pātimokkhaṃ uddisanti. Bhagavato etamatthaṃ ārocesuṃ. Na, bhikkhave, asati antarāye saṃkhittena pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, sati antarāye saṃkhittena pātimokkhaṃ uddisituṃ. Tatrime antarāyā – rājantarāyo, corantarāyo, agyantarāyo, udakantarāyo, manussantarāyo, amanussantarāyo , vāḷantarāyo, sarīsapantarāyo, jīvitantarāyo, brahmacariyantarāyoti. Anujānāmi, bhikkhave, evarūpesu antarāyesu saṃkhittena pātimokkhaṃ uddisituṃ, asati antarāye vitthārenāti.
ཏེན ཁོ པན སམཡེན ཚབྦགྒིཡཱ བྷིཀྑཱུ སངྒྷམཛ྄ཛྷེ ཨནཛ྄ཛྷིཊྛཱ དྷམྨཾ བྷཱསནྟི། བྷགཝཏོ ཨེཏམཏྠཾ ཨཱརོཙེསུཾ། ན, བྷིཀྑཝེ, སངྒྷམཛ྄ཛྷེ ཨནཛ྄ཛྷིཊྛེན དྷམྨོ བྷཱསིཏབྦོ། ཡོ བྷཱསེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, ཐེརེན བྷིཀྑུནཱ སཱམཾ ཝཱ དྷམྨཾ བྷཱསིཏུཾ པརཾ ཝཱ ཨཛ྄ཛྷེསིཏུནྟི།
Tena kho pana samayena chabbaggiyā bhikkhū saṅghamajjhe anajjhiṭṭhā dhammaṃ bhāsanti. Bhagavato etamatthaṃ ārocesuṃ. Na, bhikkhave, saṅghamajjhe anajjhiṭṭhena dhammo bhāsitabbo. Yo bhāseyya, āpatti dukkaṭassa. Anujānāmi, bhikkhave, therena bhikkhunā sāmaṃ vā dhammaṃ bhāsituṃ paraṃ vā ajjhesitunti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཱཏིམོཀྑུདྡེསཀཐཱ • Pātimokkhuddesakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཱཏིམོཀྑུདྡེསཀཐཱཝཎྞནཱ • Pātimokkhuddesakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པཱཏིམོཀྑུདྡེསཀཐཱཝཎྞནཱ • Pātimokkhuddesakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / པཱཏིམོཀྑུདྡེསཀཐཱཝཎྞནཱ • Pātimokkhuddesakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༧༨. པཱཏིམོཀྑུདྡེསཀཐཱ • 78. Pātimokkhuddesakathā
