| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. உபோஸத²வக்³கோ³
5. Uposathavaggo
1-8. ஸங்கி²த்தூபோஸத²ஸுத்தாதி³வண்ணனா
1-8. Saṃkhittūposathasuttādivaṇṇanā
41-48. பஞ்சமஸ்ஸ பட²மாதீ³ஸு நத்தி² வத்தப்³ப³ங். ச²ட்டே² (ஸங்॰ நி॰ டீ॰ 1.1.165) பஞ்ச அங்கா³னி ஏதஸ்ஸாதி பஞ்சங்க³ங், பஞ்சங்க³மேவ பஞ்சங்கி³கங், தஸ்ஸ பஞ்சங்கி³கஸ்ஸ. மஹதீ த³த்³த³ரீ வீணாவிஸேஸோபி ஆததமேவாதி ‘‘சம்மபரியோனத்³தே⁴ஸூ’’தி விஸேஸனங் கதங். ஏகதலதூரியங் கும்ப⁴து²னத³த்³த³ரிகாதி³. உப⁴யதலங் பே⁴ரிமுதி³ங்கா³தி³. சம்மபரியோனத்³த⁴ங் ஹுத்வா வினிப³த்³த⁴ங் ஆததவிததங். ஸப்³ப³ஸோ பரியோனத்³த⁴ங் நாம சதுரஸ்ஸஅம்ப³ணங் பணவாதி³ ச. கோ³முகீ²ஆதீ³னம்பி எத்தே²வ ஸங்க³ஹோ த³ட்ட²ப்³போ³. வங்ஸாதீ³தி ஆதி³-ஸத்³தே³ன ஸங்கா²தீ³னங் ஸங்க³ஹோ. ஸம்மாதீ³தி ஸம்மதாளகங்ஸதாளஸிலாஸலாகதாளாதி³. தத்த² ஸம்மதாளங் நாம த³ந்தமயதாளங். கங்ஸதாளங் லோஹமயங். ஸிலாமயங் அயோபத்தேன ச வாத³னதாளங் ஸிலாஸலாகதாளங். ஸுமுச்சி²தஸ்ஸாதி ஸுட்டு² படியத்தஸ்ஸ. பமாணேதி நாதித³ள்ஹனாதிஸிதி²லஸங்கா²தே மஜ்ஜி²மே முச்ச²னாபமாணே. சே²கோதி படு பட்டோ². ஸோ சஸ்ஸ படுபா⁴வோ மனோஹரோதி ஆஹ ‘‘ஸுந்த³ரோ’’தி. ரஞ்ஜேதுந்தி ராக³ங் உப்பாதே³துங். க²மதேவாதி ரோசதேவ. ந நிப்³பி³ந்த³தீதி ந தஜ்ஜேதி, ஸோதஸுக²பா⁴வதோ பியாயிதப்³போ³வ ஹோதி.
41-48. Pañcamassa paṭhamādīsu natthi vattabbaṃ. Chaṭṭhe (saṃ. ni. ṭī. 1.1.165) pañca aṅgāni etassāti pañcaṅgaṃ, pañcaṅgameva pañcaṅgikaṃ, tassa pañcaṅgikassa. Mahatī daddarī vīṇāvisesopi ātatamevāti ‘‘cammapariyonaddhesū’’ti visesanaṃ kataṃ. Ekatalatūriyaṃ kumbhathunadaddarikādi. Ubhayatalaṃ bherimudiṅgādi. Cammapariyonaddhaṃ hutvā vinibaddhaṃ ātatavitataṃ. Sabbaso pariyonaddhaṃ nāma caturassaambaṇaṃ paṇavādi ca. Gomukhīādīnampi ettheva saṅgaho daṭṭhabbo. Vaṃsādīti ādi-saddena saṅkhādīnaṃ saṅgaho. Sammādīti sammatāḷakaṃsatāḷasilāsalākatāḷādi. Tattha sammatāḷaṃ nāma dantamayatāḷaṃ. Kaṃsatāḷaṃ lohamayaṃ. Silāmayaṃ ayopattena ca vādanatāḷaṃ silāsalākatāḷaṃ. Sumucchitassāti suṭṭhu paṭiyattassa. Pamāṇeti nātidaḷhanātisithilasaṅkhāte majjhime mucchanāpamāṇe. Chekoti paṭu paṭṭho. So cassa paṭubhāvo manoharoti āha ‘‘sundaro’’ti. Rañjetunti rāgaṃ uppādetuṃ. Khamatevāti rocateva. Na nibbindatīti na tajjeti, sotasukhabhāvato piyāyitabbova hoti.
ப⁴த்தாரங் நாதிமஞ்ஞதீதி ஸாமிகங் முஞ்சித்வா அஞ்ஞங் மனஸாபி ந பத்தே²தி. உட்டா²ஹிகாதி உட்டா²னவீரியஸம்பன்னா. அனலஸாதி நிக்கோஸஜ்ஜா. ஸங்க³ஹிதபரிஜ்ஜனாதி ஸம்மானநாதீ³ஹி சேவ ச²ணாதீ³ஸு பேஸேதப்³ப³-பியப⁴ண்டா³தி³பண்ணாகாரபேஸனாதீ³ஹி ச ஸங்க³ஹிதபரிஜனா. இத⁴ பரிஜனோ நாம ஸாமிகஸ்ஸ சேவ அத்தனோ ச ஞாதிஜனோ. ஸம்ப⁴தந்தி கஸிவணிஜ்ஜாதீ³னி கத்வா ஆப⁴தத⁴னங். ஸத்தமட்ட²மானி உத்தானத்தா²னி.
Bhattāraṃ nātimaññatīti sāmikaṃ muñcitvā aññaṃ manasāpi na pattheti. Uṭṭhāhikāti uṭṭhānavīriyasampannā. Analasāti nikkosajjā. Saṅgahitaparijjanāti sammānanādīhi ceva chaṇādīsu pesetabba-piyabhaṇḍādipaṇṇākārapesanādīhi ca saṅgahitaparijanā. Idha parijano nāma sāmikassa ceva attano ca ñātijano. Sambhatanti kasivaṇijjādīni katvā ābhatadhanaṃ. Sattamaṭṭhamāni uttānatthāni.
ஸங்கி²த்தூபோஸத²ஸுத்தாதி³வண்ணனா நிட்டி²தா.
Saṃkhittūposathasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. ஸங்கி²த்தூபோஸத²ஸுத்தங் • 1. Saṅkhittūposathasuttaṃ
2. வித்த²தூபோஸத²ஸுத்தங் • 2. Vitthatūposathasuttaṃ
3. விஸாகா²ஸுத்தங் • 3. Visākhāsuttaṃ
4. வாஸெட்ட²ஸுத்தங் • 4. Vāseṭṭhasuttaṃ
5. பொ³ஜ்ஜ²ஸுத்தங் • 5. Bojjhasuttaṃ
6. அனுருத்³த⁴ஸுத்தங் • 6. Anuruddhasuttaṃ
7. து³தியவிஸாகா²ஸுத்தங் • 7. Dutiyavisākhāsuttaṃ
8. நகுலமாதாஸுத்தங் • 8. Nakulamātāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
4. வாஸெட்ட²ஸுத்தவண்ணனா • 4. Vāseṭṭhasuttavaṇṇanā
6. அனுருத்³த⁴ஸுத்தவண்ணனா • 6. Anuruddhasuttavaṇṇanā
