| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. සම්‌මාදිට්‌ඨිසුත්‌තං
9. Sammādiṭṭhisuttaṃ
89. ‘‘චත්‌තාරොමෙ, භික්‌ඛවෙ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? සමණමචලො, සමණපුණ්‌ඩරීකො, සමණපදුමො, සමණෙසු සමණසුඛුමාලො.
89. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Samaṇamacalo, samaṇapuṇḍarīko, samaṇapadumo, samaṇesu samaṇasukhumālo.
‘‘කථඤ්‌ච, භික්‌ඛවෙ, පුග්‌ගලො සමණපුණ්‌ඩරීකො හොති? ඉධ, භික්‌ඛවෙ, භික්‌ඛු සම්‌මාදිට්‌ඨිකො හොති, සම්‌මාසඞ්‌කප්‌පො හොති, සම්‌මාවාචො හොති, සම්‌මාකම්‌මන්‌තො හොති, සම්‌මාආජීවො හොති, සම්‌මාවායාමො හොති, සම්‌මාසති හොති, සම්‌මාසමාධි හොති, සම්‌මාඤාණී හොති, සම්‌මාවිමුත්‌ති 5 හොති, නො ච ඛො අට්‌ඨ විමොක්‌ඛෙ කායෙන ඵුසිත්‌වා විහරති . එවං ඛො, භික්‌ඛවෙ, පුග්‌ගලො සමණපුණ්‌ඩරීකො හොති.
‘‘Kathañca, bhikkhave, puggalo samaṇapuṇḍarīko hoti? Idha, bhikkhave, bhikkhu sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti, sammāñāṇī hoti, sammāvimutti 6 hoti, no ca kho aṭṭha vimokkhe kāyena phusitvā viharati . Evaṃ kho, bhikkhave, puggalo samaṇapuṇḍarīko hoti.
‘‘කථඤ්‌ච, භික්‌ඛවෙ, පුග්‌ගලො සමණපදුමො හොති? ඉධ, භික්‌ඛවෙ, භික්‌ඛු සම්‌මාදිට්‌ඨිකො හොති…පෙ.… සම්‌මාවිමුත්‌ති හොති, අට්‌ඨ ච විමොක්‌ඛෙ කායෙන ඵුසිත්‌වා විහරති. එවං ඛො, භික්‌ඛවෙ, පුග්‌ගලො සමණපදුමො හොති.
‘‘Kathañca, bhikkhave, puggalo samaṇapadumo hoti? Idha, bhikkhave, bhikkhu sammādiṭṭhiko hoti…pe… sammāvimutti hoti, aṭṭha ca vimokkhe kāyena phusitvā viharati. Evaṃ kho, bhikkhave, puggalo samaṇapadumo hoti.
‘‘කථඤ්‌ච, භික්‌ඛවෙ, පුග්‌ගලො සමණෙසු සමණසුඛුමාලො හොති? ඉධ, භික්‌ඛවෙ, භික්‌ඛු යාචිතොව බහුලං චීවරං පරිභුඤ්‌ජති, අප්‌පං අයාචිතො…පෙ.… යඤ්‌හි තං, භික්‌ඛවෙ, සම්‌මා වදමානො වදෙය්‍ය සමණෙසු සමණසුඛුමාලොති, මමෙව තං, භික්‌ඛවෙ , සම්‌මා වදමානො වදෙය්‍ය සමණෙසු සමණසුඛුමාලොති. ඉමෙ ඛො, භික්‌ඛවෙ, චත්‌තාරො පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. නවමං.
‘‘Kathañca, bhikkhave, puggalo samaṇesu samaṇasukhumālo hoti? Idha, bhikkhave, bhikkhu yācitova bahulaṃ cīvaraṃ paribhuñjati, appaṃ ayācito…pe… yañhi taṃ, bhikkhave, sammā vadamāno vadeyya samaṇesu samaṇasukhumāloti, mameva taṃ, bhikkhave , sammā vadamāno vadeyya samaṇesu samaṇasukhumāloti. Ime kho, bhikkhave, cattāro puggalā santo saṃvijjamānā lokasmi’’nti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. සම්‌මාදිට්‌ඨිසුත්‌තවණ්‌ණනා • 9. Sammādiṭṭhisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-10. සංයොජනසුත්‌තාදිවණ්‌ණනා • 8-10. Saṃyojanasuttādivaṇṇanā
