| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
१३. सम्मापरिब्बाजनीयसुत्तं
13. Sammāparibbājanīyasuttaṃ
३६१.
361.
‘‘पुच्छामि मुनिं पहूतपञ्ञं,
‘‘Pucchāmi muniṃ pahūtapaññaṃ,
तिण्णं पारङ्गतं परिनिब्बुतं ठितत्तं।
Tiṇṇaṃ pāraṅgataṃ parinibbutaṃ ṭhitattaṃ;
निक्खम्म घरा पनुज्ज कामे, कथं भिक्खु
Nikkhamma gharā panujja kāme, kathaṃ bhikkhu
सम्मा सो लोके परिब्बजेय्य’’॥
Sammā so loke paribbajeyya’’.
३६२.
362.
‘‘यस्स मङ्गला समूहता, (इति भगवा)
‘‘Yassa maṅgalā samūhatā, (iti bhagavā)
उप्पाता सुपिना च लक्खणा च।
Uppātā supinā ca lakkhaṇā ca;
सो मङ्गलदोसविप्पहीनो,
So maṅgaladosavippahīno,
सम्मा सो लोके परिब्बजेय्य॥
Sammā so loke paribbajeyya.
३६३.
363.
‘‘रागं विनयेथ मानुसेसु, दिब्बेसु कामेसु चापि भिक्खु।
‘‘Rāgaṃ vinayetha mānusesu, dibbesu kāmesu cāpi bhikkhu;
अतिक्कम्म भवं समेच्च धम्मं, सम्मा सो लोके परिब्बजेय्य॥
Atikkamma bhavaṃ samecca dhammaṃ, sammā so loke paribbajeyya.
३६४.
364.
‘‘विपिट्ठिकत्वान पेसुणानि, कोधं कदरियं जहेय्य भिक्खु।
‘‘Vipiṭṭhikatvāna pesuṇāni, kodhaṃ kadariyaṃ jaheyya bhikkhu;
अनुरोधविरोधविप्पहीनो, सम्मा सो लोके परिब्बजेय्य॥
Anurodhavirodhavippahīno, sammā so loke paribbajeyya.
३६५.
365.
‘‘हित्वान पियञ्च अप्पियञ्च, अनुपादाय अनिस्सितो कुहिञ्चि।
‘‘Hitvāna piyañca appiyañca, anupādāya anissito kuhiñci;
संयोजनियेहि विप्पमुत्तो, सम्मा सो लोके परिब्बजेय्य॥
Saṃyojaniyehi vippamutto, sammā so loke paribbajeyya.
३६६.
366.
‘‘न सो उपधीसु सारमेति, आदानेसु विनेय्य छन्दरागं।
‘‘Na so upadhīsu sārameti, ādānesu vineyya chandarāgaṃ;
सो अनिस्सितो अनञ्ञनेय्यो, सम्मा सो लोके परिब्बजेय्य॥
So anissito anaññaneyyo, sammā so loke paribbajeyya.
३६७.
367.
‘‘वचसा मनसा च कम्मुना च, अविरुद्धो सम्मा विदित्वा धम्मं।
‘‘Vacasā manasā ca kammunā ca, aviruddho sammā viditvā dhammaṃ;
निब्बानपदाभिपत्थयानो, सम्मा सो लोके परिब्बजेय्य॥
Nibbānapadābhipatthayāno, sammā so loke paribbajeyya.
३६८.
368.
‘‘यो वन्दति मन्ति नुण्णमेय्य 1, अक्कुट्ठोपि न सन्धियेथ भिक्खु।
‘‘Yo vandati manti nuṇṇameyya 2, akkuṭṭhopi na sandhiyetha bhikkhu;
लद्धा परभोजनं न मज्जे, सम्मा सो लोके परिब्बजेय्य॥
Laddhā parabhojanaṃ na majje, sammā so loke paribbajeyya.
३६९.
369.
‘‘लोभञ्च भवञ्च विप्पहाय, विरतो छेदनबन्धना च 3 भिक्खु।
‘‘Lobhañca bhavañca vippahāya, virato chedanabandhanā ca 4 bhikkhu;
सो तिण्णकथंकथो विसल्लो, सम्मा सो लोके परिब्बजेय्य॥
So tiṇṇakathaṃkatho visallo, sammā so loke paribbajeyya.
३७०.
370.
‘‘सारुप्पं अत्तनो विदित्वा, नो च भिक्खु हिंसेय्य कञ्चि लोके।
‘‘Sāruppaṃ attano viditvā, no ca bhikkhu hiṃseyya kañci loke;
यथा तथियं विदित्वा धम्मं, सम्मा सो लोके परिब्बजेय्य॥
Yathā tathiyaṃ viditvā dhammaṃ, sammā so loke paribbajeyya.
३७१.
371.
‘‘यस्सानुसया न सन्ति केचि, मूला च 5 अकुसला समूहतासे।
‘‘Yassānusayā na santi keci, mūlā ca 6 akusalā samūhatāse;
३७२.
372.
‘‘आसवखीणो पहीनमानो, सब्बं रागपथं उपातिवत्तो।
‘‘Āsavakhīṇo pahīnamāno, sabbaṃ rāgapathaṃ upātivatto;
दन्तो परिनिब्बुतो ठितत्तो, सम्मा सो लोके परिब्बजेय्य॥
Danto parinibbuto ṭhitatto, sammā so loke paribbajeyya.
३७३.
373.
‘‘सद्धो सुतवा नियामदस्सी, वग्गगतेसु न वग्गसारि धीरो।
‘‘Saddho sutavā niyāmadassī, vaggagatesu na vaggasāri dhīro;
लोभं दोसं विनेय्य पटिघं, सम्मा सो लोके परिब्बजेय्य॥
Lobhaṃ dosaṃ vineyya paṭighaṃ, sammā so loke paribbajeyya.
३७४.
374.
‘‘संसुद्धजिनो विवट्टच्छदो, धम्मेसु वसी पारगू अनेजो।
‘‘Saṃsuddhajino vivaṭṭacchado, dhammesu vasī pāragū anejo;
सङ्खारनिरोधञाणकुसलो , सम्मा सो लोके परिब्बजेय्य॥
Saṅkhāranirodhañāṇakusalo , sammā so loke paribbajeyya.
३७५.
375.
‘‘अतीतेसु अनागतेसु चापि, कप्पातीतो अतिच्चसुद्धिपञ्ञो।
‘‘Atītesu anāgatesu cāpi, kappātīto aticcasuddhipañño;
सब्बायतनेहि विप्पमुत्तो, सम्मा सो लोके परिब्बजेय्य॥
Sabbāyatanehi vippamutto, sammā so loke paribbajeyya.
३७६.
376.
‘‘अञ्ञाय पदं समेच्च धम्मं, विवटं दिस्वान पहानमासवानं।
‘‘Aññāya padaṃ samecca dhammaṃ, vivaṭaṃ disvāna pahānamāsavānaṃ;
सब्बुपधीनं परिक्खयानो 11, सम्मा सो लोके परिब्बजेय्य’’॥
Sabbupadhīnaṃ parikkhayāno 12, sammā so loke paribbajeyya’’.
३७७.
377.
‘‘अद्धा हि भगवा तथेव एतं, यो सो एवंविहारी दन्तो भिक्खु।
‘‘Addhā hi bhagavā tatheva etaṃ, yo so evaṃvihārī danto bhikkhu;
सब्बसंयोजनयोगवीतिवत्तो 13, सम्मा सो लोके परिब्बजेय्या’’ति॥
Sabbasaṃyojanayogavītivatto 14, sammā so loke paribbajeyyā’’ti.
सम्मापरिब्बाजनीयसुत्तं तेरसमं निट्ठितं।
Sammāparibbājanīyasuttaṃ terasamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / १३. सम्मापरिब्बाजनीयसुत्त-(महासमयसुत्त)-वण्णना • 13. Sammāparibbājanīyasutta-(mahāsamayasutta)-vaṇṇanā
